Edwɛkpa ne kɛmɔ Mateyu hɛlɛle la 21 - BAEBOLO ANZƐƐ BULUKU NWUANZANWUANZA

Gyisɛse kɔ Gyɛlusalɛm konimlilɛ nu

¹ Mɔɔ Gyisɛse nee ye ɛdoavolɛma ne bikyele Gyɛlusalɛm na bɛradwule Bɛtefagye wɔ Ɔlivi Boka ne azo la, Gyisɛse zoanle ye ɛdoavolɛma nwiɔ,

² na ɔzele bɛ kɛ, “Bɛhɔ namule ne mɔɔ wɔ bɛ nyunlu lɔ la azo na bɛkɛnwu asoaso mɔɔ bɛhenda ye na asoaso ralɛ gyi ɔ nwo ɛkɛ ne la. Bɛzianyi bɛ na bɛva bɛ bɛrɛlɛ me.

³ Na saa awie biala biza bɛ nwolɛ edwɛkɛ a bɛze ye kɛ, ‘Yɛ Menle ɛhyia bɛ nwo’; na ɔkɛmaa bɛ adenle.”

⁴ Ɛhye zile amaa mɔɔ Nyamenle kpɔmanvolɛ ne hanle la ayɛ nɔhalɛ kɛ,

⁵ “Ka kile suakpole Zayɔn kɛ, Nea, wɔ belemgbunli ne ɛlɛba ɛ nwo. Ɔle bɛlɛvo na ɔde asoaso nee asoaso ralɛ zo.”

⁶ Ɛdoavolɛma ne hɔle na bɛhɔyɛle ye kɛmɔ Gyisɛse hanle hilele bɛ la.

⁷ Bɛvale asoaso ne nee ɔ ra ne bɛrale na bɛvale bɛ ndanlɛ bɛguale zolɛ, na Gyisɛse dɛnlanle zolɛ.

⁸ Menli dɔɔnwo kpalɛ noko sesɛle bɛ ndanlɛ wɔ adenle ne anu, yɛɛ bɛ bie mɔ bubule nya guale adenle ne anu.

⁹ Na menli dɔɔnwo ne mɔɔ li ɔ nyunlu nee ɔ nzi la deɛdeanle nuhua kɛ, “Ayɛlɛyelɛ ɛha Devidi Ara ne! Nyamenle ɛyila mɔɔ lua Awulae duma nu ɛlɛba la! Bɛye Nyamenle ayɛlɛ!”

¹⁰ Mɔɔ Gyisɛse dwule Gyɛlusalɛm la, suakpole ne azo kpudwule na bɛbizale kɛ, “Na nwane ɛne?”

¹¹ Na menli dɔɔnwo ne zele kɛ, “Ɛhye a le Nyamenle kpɔmanvolɛ ne mɔɔ bɛfɛlɛ ye Gyisɛse, mɔɔ vi Nazalɛte mɔɔ wɔ Galeli la.”

Gyisɛse kɔ Ɛzonlenlɛ Sua ne anu

¹² Gyisɛse hɔle Ɛzonlenlɛ Sua ne anu na ɔvoanle bɛdabɛ mɔɔ bɛlɛdi gua wɔ ɛkɛ ne la amuala. Ɔbutubutule menli mɔɔ senza ezukoa la ɛkponle ne mɔ, ɔhanle menli mɔɔ tɔne mɔlɔnoma la mbia ne mɔ ɔguale,

¹³ na ɔzele bɛ kɛ, “Bɛhɛlɛ ye wɔ Nyamenle Edwɛkɛ ne anu kɛ: Nyamenle se, ‘Bɛbavɛlɛ me Ɛzonlenlɛ Sua ne nzɛlɛlɛ sua.’ Na bɛmɛ, bɛyɛ ye awulema fealeka!”

¹⁴ Anyenzinliravolɛma nee abuburama rale ɔ nwo ɛkɛ ne wɔ Ɛzonlenlɛ Sua ne anu, na ɔyɛle bɛ ayile.

¹⁵ Mɔɔ sɛlɛvolɛ mgbanyinli ne nee mɛla kilehilevolɛma ne nwunle nwanwane gyima mgbole mɔɔ ɔlɛdi, nee ngakula ne mɔ alɛra mɔɔ bɛlɛyɛ, bɛayeyɛ Gyisɛse wɔ Ɛzonlenlɛ Sua ne anu kɛ, “Ayɛlɛyelɛ ɛha Devidi Ara ne!” la, bɛvale ɛya.

¹⁶ Yemɔti bɛbizale Gyisɛse kɛ, “Ɛte mɔɔ ɛhye mɔ ɛlɛkeha la ɔ?” Gyisɛse buale bɛ kɛ, “Nɔhalɛ, mete. Na bɛtɛkengale Nyamenle Edwɛkɛ ne mɔɔ fane ɛhye anwo la ɔ? Ɔse, ‘Bɛtete ngakula ndetendete nee nlɔma kɛ bɛye Nyamenle ayɛlɛ mɔɔ di munli a!’ ”

¹⁷ Na Gyisɛse gyakyile bɛ ɛkɛ ne na ɔvile Gyɛlusalɛm ɔhɔle Bɛtani ɔhɔlale.

Gyisɛse wa feege baka ne amonle

¹⁸ Aleɛ hyenle nwonlomɔ mangyee ne na Gyisɛse sia ahɔ Gyɛlusalɛm, na ɔlua adenle zo la ɛhɔne hunle ye.

¹⁹ Ɔnwunle feege baka bie kɛ ɔgyi adehane ne, ɔhɔle ɔ bo la yeannwu ma ko bɔbɔ wɔ zolɛ kɛ nya ngome a yewula a. Yemɔti ɔzele baka ne kɛ, “Ɛnrɛzo ma bieko ɛlɛ!” Na ɛkɛ ne ala feege baka ne nwosonle.

²⁰ Ɛhye zinle ɛdoavolɛma ne anwo kpole na bɛbizale Gyisɛse kɛ, “Kɛ ɔyɛle mɔɔ feege baka ne nwosonle ndɛndɛ zɛhae ɛ?”

²¹ Gyisɛse buale kɛ, “Bɛhakye ɛhye! Saa bɛdie bɛdi na bɛanzu kpolera a, bɛkɛhola bɛkɛyɛ mɔɔ meyɛ feege baka ɛhye la bie. Bɔbɔ bɛkɛhola bɛkɛze boka ɛhye kɛ, ‘Tudu kɔdɔ nyevile nu’, na ɔkɛyɛ zɔhane.

²² Saa bɛdie bɛdi a, bɛ sa kɛha debie biala mɔɔ bɛkɛbiza wɔ nzɛlɛlɛ nu la.”

Gyisɛse tumi ne anwo edwɛkɛ

²³ Gyisɛse ziale rale Ɛzonlenlɛ Sua ne anu, na mɔɔ ɔlɛkilehile la, sɛlɛvolɛ mgbanyinli ne nee mgbanyima ne mɔ rale ɔ nwo ɛkɛ ne rabizale ye kɛ, “Duzu tumi a ɛlɛfa wɔayɛ ninyɛne ɛhye mɔ a? Nwane a manle wɔ tumi ɛhye a?”

²⁴ Gyisɛse buale bɛ kɛ, “Medame noko mebiza bɛ kpuyia ko na saa bɛye me ɔ nloa a menwɔhile tumi holɛ ko mɔɔ mefa meyɛ ninyɛne ɛhye mɔ la.

²⁵ Tumi ne mɔɔ Dwɔn nyianle ye vale zɔnenle menli la vi nienwu, ɔvi Nyamenle anzɛɛ ɔvi sonla?” Na bɛbɔle ɔ bo kɛ bɛsu bɛ nwo kpolera kɛ, “Duzu edwɛkɛ a yɛha a? Saa yɛbua kɛ, ‘Ɔvi Nyamenle’ a, ɔkɛbiza yɛ kɛ, ‘Ɛnee duzu ati a bɛanlie bɛanli ɛ?’

²⁶ Saa yɛka noko kɛ, ‘Ɔvi sonla’ a, yɛsulo menli ye, ɔboalekɛ bɛ muala bɛdie bɛto nu kɛ Dwɔn le Nyamenle kpɔmanvolɛ.”

²⁷ Yemɔti bɛbuale Gyisɛse kɛ, “Yɛnze.” Na Gyisɛse ɔdaye ɔzele bɛ kɛ, “Ɛnee medame noko menrɛha ahenle holɛ ko mɔɔ manle me tumi kɛ menyɛ ninyɛne ɛhye mɔ la menrɛhile bɛ.”

Mralɛ mrenya nwiɔ ne anwo ɛrɛlɛ

²⁸ Akee Gyisɛse bizale bɛ edwɛkɛ ɛhye, ɔse, “Kɛ bɛdwenle ɛhye anwo bɛse ɛ? Nrenya bie lɛ ɔ mra mrenya nwiɔ. Ɔhɔle mɔɔ lumua la anwo ɛkɛ ne ɔhɔzele ye kɛ, ‘Me ra, ɛnɛ kɔyɛ gyima wɔ me vanye egyinli ne anu.’

²⁹ Na ɔbuale ye kɛ, ‘Menrɛhɔ,’ Noko nzinlii ɔnlunle ɔ nwo na ɔhɔle.

³⁰ Ɔhɔle ko ne noko ɛkɛ ne na ɔhɔhanle edwɛkɛ ko ne ala ɔhilele ye. Na ɔbuale kɛ, ‘Egya, mebahɔ.’ Noko yeangɔ.

³¹ Ɛnee ngakula nwiɔ ɛhye, bɛ nuhua boni a yɛle ɔ ze ɛhulolɛdeɛ a?” Bɛzele ye kɛ, “Mɔɔ lumua la ɔ.” Gyisɛse zele bɛ kɛ, “Nɔhalɛ, meka meahile bɛ: Adwuledievolɛma nee tuutuuma balumua anyia Nyamenle Belemgbunlililɛ ne agyakyi bɛ.

³² Ɔluakɛ Dwɔn Sɔnevolɛ ne rale na ɔrahilehilele bɛ nɔhalɛ adenle ne la, bɛanlie ye bɛanli; noko adwuledievolɛma nee tuutuuma liele ye lile; yɛɛ nzinlii bɔbɔ mɔɔ bɛnwunle ɛhye zɔhane la, bɛannu bɛ nwo na bɛalie ye bɛali.”

Abunsama ne mɔɔ wɔ vanye egyinli ne anu la anwo ɛrɛlɛ

³³ Eza Gyisɛse zele bɛ kɛ, “Bɛdie ɛrɛlɛ ɛhye noko. Azɛlɛ menle bie yɛle ye vanye egyinli na ɔhyele nwolɛ ɔyiale. Ɔdule kuma mɔɔ bɛbahwihwi vanye ma ne anu nzule bɛagua nu la, na ɔzile tawa tendenle ko mɔɔ bɛgyinla zo bɛsinza egyinli ne la. Akee ɔvale egyinli ne ɔwulale abunsama asa anu na ɔdule adenle ɔhɔle maanle fofolɛ nu.

³⁴ Ɛbuhenle ne dwule la, ɔzoanle ye sonvolɛma bie mɔ kɛ bɛhɔ bɛhɔlie ye ɛkpɔ ɛdeɛ ne bɛrɛlɛ ye.

³⁵ Na abunsama ne hyele sonvolɛma ne, bɛbole ko, bɛhunle ko na bɛzile ko awolɛ.

³⁶ Egyinli menle ne eza zoanle ye sonvolɛma mɔɔ zonle tɛla mɔɔ ɔlumuale ɔzoanle bɛ la, na bɛyɛle bɛdabɛ noko zɔhane ala.

³⁷ Nzinlii ɔzoanle ɔ ra nrenya wɔ bɛ nwo lɔ, na ɔdwenlenle kɛ, ‘Me ra ye ɛdeɛ, bɛbaze ye nyiane.’

³⁸ Na mɔɔ abunsama ne nwunle ɔ ra ne la, bɛhanle bɛhilele bɛ nwo ngoko kɛ, ‘Kɔliagya ne ɛne. Bɛrɛla bɛmaa yɛhu ye na yɛva ye agyadeɛ ne!’

³⁹ Yemɔti bɛhyele ye na bɛvale ye bɛvindele egyinli ne anzi lɔ bɛhɔhunle ye.

⁴⁰ “Na ɛnee bɛnea a saa vanye egyinli ne amenle ba a, duzu a ɔkɛyɛ abunsama ne a?”

⁴¹ Bɛbuale ye kɛ, “Ɔkɛhu amumuyɛma ne na ɔkɛva ye egyinli ne ɔkɛwula abunsama fofolɛ mɔɔ ɛbuhenle ne dwu a bɛkɛva ye ɛkpɔ ɛdeɛ ne bɛkɛmaa ye la asa anu.”

⁴² Gyisɛse zele bɛ kɛ, “Asoo bɛtɛkengale Nyamenle Edwɛkɛ ɛhye ɛlɛ? Ɔse, ‘Bolɛ ne mɔɔ suasivoma ne kpole la, ɛrayɛ bolɛ mɔɔ anwo hyia kpole kpalɛ kɛ sua mgbɛne zo sika la. Awulae a yɛle ɛhye a; na ɔyɛ nwanwane kpole!’

⁴³ “Zɔhane ati meka meahile bɛ, bɛbalie Nyamenle Belemgbunlililɛ ne bɛ sa nu na bɛava bɛamaa menli mɔɔ yɛ tieyɛ la. [

⁴⁴ Na awie biala mɔɔ kɛdɔ bolɛ ɛhye azo la kɛtete nzokanzoka, yɛɛ mɔɔ bolɛ ne kɛdɔ ɔ nwo zo la kɛdi kɛyɛ kɛ sianlɛ.”]

⁴⁵ Sɛlɛvolɛ mgbanyinli ne nee Falasiima ne mɔ dele Gyisɛse ɛrɛlɛ ne abo, na bɛnwunle kɛ bɛmɛ a yebu ɛrɛlɛ ne yetia bɛ a.

⁴⁶ Ɛhye ati bɛyɛle kɛ bɛkye ye; noko akee bɛzulole, ɔluakɛ menli ne mɔ die to nu kɛ Gyisɛse le Nyamenle kpɔmanvolɛ.