Edwɛkpa ne kɛmɔ Mateyu hɛlɛle la 16 - BAEBOLO ANZƐƐ BULUKU NWUANZANWUANZA

Menli ne kpondɛ nwanwane sɛkɛlɛneɛ anlea

¹ Falasiima nee Sadusiima bie rale Gyisɛse ɛkɛ radole ye agyiba kɛ ɔyɛ nwanwane sɛkɛlɛneɛ ɔmaa bɛnlea, ɔva ɔhile kɛ Nyamenle die mɔɔ ɔlɛyɛ la to nu.

² Gyisɛse buale kɛ, “Saa sɛnzɛne ne ɛlɛkɔ ahɔdɔ a ɛnee bɛse, ‘Maanle nu bayɛ kɛnlɛma, ɔluakɛ anwomanyunlu le yɔɔnwo.’

³ Nwonlomɔ mangyee ne noko ɛnee bɛse, ‘Ezule badɔ, ɔluakɛ anwomanyunlu ɛbolo, ɛlu.’ Bɛkola bɛnea anwomanyunlu bɛka maanle nu edwɛkɛ, na bɛngola bɛngile sɛkɛlɛneɛ mɔɔ fane mekɛ ɛhye mɔ anwo la abo!

⁴ Adwuleso amra munzule mɔɔ ɛnze Nyamenle a! Bɛbiza me bɛanlea nwanwane sɛkɛlɛneɛ? Bɛnrɛnwu bie! Mɔɔ bɛkɛnwu ye la ala a le Dwona ɛdeɛ ne.” Na Gyisɛse vile bɛ nwo ɛkɛ ne hɔle.

Gyisɛse ka Falasiima nee Sadusiima ngilehilelɛ ne anwo edwɛkɛ

⁵ Mɔɔ ɛdoavolɛma ne pɛle tandane ne hɔle ɔ nzi lɔ la, bɛhakyele kɛ bɛ rɛle vile na bɛanva kpanwo.

⁶ Gyisɛse zele bɛ kɛ, “Bɛnlea bɛ nwo boɛ wɔ Falasiima nee Sadusiima mgbɔvonle ne anwo.”

⁷ Ɛdoavolɛma ne bɔle ɔ bo kɛ bɛdwenledwenle nwolɛ kɛ, “Ɛnee kpanwo mɔɔ yɛanva yɛamba la ati a ɔlɛka ɛhye a?”

⁸ Gyisɛse nwunle mɔɔ bɛlɛkeha la na ɔbizale bɛ kɛ, “Duzu ati a bɛlɛsu bɛ nwo kpolera wɔ kpanwo mɔɔ bɛanva la anwo ɛ? Bɛ diedi le ekyi!

⁹ Ɛnɛ nee ɛnɛ bɛtɛnyianle ndelebɛbo ɔ? Bɛngakye mekɛ mɔɔ membubule kpanwo mumua nnu ne anu memanle mrenya apenle nnu ne la ɔ?

¹⁰ Na kpanwo mumua nsuu ne mɔɔ menvale memanle mrenya apenle nna ne la noko ɛ? Ahɛndɛne nyɛ a ɔ bo zo mgbokpoloka ne yɛle a?

¹¹ Kɛmɔti a bɛnde ɔ bo kɛ tɛ kpanwo a melɛka nwolɛ edwɛkɛ meahile bɛ a? Bɛnlea bɛ nwo boɛ wɔ Falasiima nee Sadusiima mgbɔvonle ne anwo!”

¹² Akee ɛdoavolɛma ne dele ɔ bo kɛ tɛ mgbɔvonle mɔɔ bɛfa bɛwula ɛdɔkɛ nu la a ɔlɛka nwolɛ edwɛkɛ a, na ɔlɛka Falasiima nee Sadusiima ngilehilelɛ ɛtane ne anwo edwɛkɛ.

Pita se Gyisɛse le Mɛzaya

¹³ Gyisɛse hɔle Felepe Sizalia afoa nu la, ɔbizale ye ɛdoavolɛma ne kɛ, “Menli se medame Sonla Ra ne a le nwane?”

¹⁴ Bɛbuale ye kɛ, “Bie mɔ se Dwɔn Sɔnevolɛ ne ɔ, bie mɔ se Yilaegya ɔ, yɛɛ bie mɔ noko se Gyɛlɛmaya anzɛɛ Nyamenle kpɔmanvolɛma ne mɔ ko ɔ.”

¹⁵ Gyisɛse bizale bɛ kɛ, “Na bɛdabɛ noko kɛ bɛse ɛ?”

¹⁶ Saemɔn Pita buale kɛ, “Wɔmɔ a ɛle Kelaese ne, mɔɔ le tease Nyamenle ne Ara ne.”

¹⁷ Gyisɛse buale ye kɛ, “Dwɔn ara Saemɔn, nyilalɛ ɛha wɔ. Ɔluakɛ tɛ sonla yɛɛ ɛye nɔhalɛ ɛhye ɛhile wɔ a, na Egya mɔɔ wɔ anwuma la ɔ.

¹⁸ Yemɔti meka meahile wɔ, Pita, ɛle bodane, kɛmɔ wɔ duma ne abo kile la; wɔ bodane ɛhye azo yɛɛ mebazi me asɔne ne a, na ewule tumi bɔbɔ ɛnrɛhola ɔ nwo zo fo.

¹⁹ Mebava Anwuma Belemgbunlililɛ ne azanvɛ ne meawula ɛ sa nu; mɔɔ ɛkɛkyekye ye wɔ aze ɛke la, bɛkɛkyekye ye wɔ anwuma lɔ, mɔɔ ɛkɛtulu ye wɔ aze ɛke noko la, bɛkɛtulu ye wɔ anwuma lɔ.”

²⁰ Akee Gyisɛse bɔle ye ɛdoavolɛma ne mɔ anloa kɛ bɛmmaka bɛkile awie biala kɛ yemɔ a ɔle Kelaese ne.

Gyisɛse ka ye amaneɛnwunlɛ nee ye ewule nwo edwɛkɛ

²¹ Ɔvi mekɛ ne anu Gyisɛse bɔle ɔ bo kɛ ɔka ye wienyi yeahile ye ɛdoavolɛma ne kɛ, “Ɔwɔ kɛ mekɔ Gyɛlusalɛm mekɔnwu amaneɛ dɔɔnwo wɔ mgbanyima ne, sɛlɛvolɛ mgbanyinli ne, yɛɛ mɛla kilehilevolɛma ne mɔ asa anu. Bɛbahu me, na ye kenle nsa ne azo Nyamenle badwazo me ara ngoane nu bieko.”

²² Pita vale Gyisɛse hɔle ahane na ɔbɔle ɔ bo kɛ ɔtwi ɔ nyunlu. Ɔse, “Awulae, kosoɛ! Nyamenle ɛkpa ɛgua! Ɛhye ɛnrɛzi ɛ nwo zo ɛlɛ!”

²³ Gyisɛse hakyile ɔ nye na ɔzele Pita kɛ, “Seetan, se di me nzi nehae! Ɛndu folɛ kpalɛ. Wɔ adwenle ne le sonla adwenle. Ɔnvi Nyamenle ɛkɛ.”

²⁴ Akee Gyisɛse zele ye ɛdoavolɛma ne kɛ, “Saa awie biala kpondɛ kɛ ɔ nee me dua a, ɛnee ɔkpo ɔ nwo, ɔva ye (amaneɛnwunlɛ) meanubaka ne ɔdo ɔ kɔme zo na ɔdoa me.

²⁵ Ɔluakɛ awie biala mɔɔ kɛpele ye ngoane nwo la kɛminli ye, na mɔɔ kɛminli ye ngoane wɔ me ti la kɛlie ye ɛkɛla ngoane.

²⁶ Saa sonla nyia ewiade ninyɛne ne amuala na ɔminli ye ɛkɛla a, duzu nvasoɛ a ɔnyia a? Ɔnnyia ɛhwee! Debie biala ɛnle ɛkɛ mɔɔ sonla kɛhola kɛva kɛzenza ye ngoane a.

²⁷ Ɔluakɛ ɔnrɛhyɛ biala na medame Sonla Ra me nee me anwuma soanvolɛma yɛara, wɔ Egya anyunlunyia nu, na yɛaradua awie biala kakɛ kɛmɔ ye gyima de la.

²⁸ Bɛhakye ɛhye, menli bie gyigyi bɛ avinli ɛke mɔɔ bɛnrɛwu na bɛanwu Sonla Ra ne kɛ yera kɛ Belemgbunli la.”