Edwɛkpa ne kɛmɔ Mateyu hɛlɛle la 10 - BAEBOLO ANZƐƐ BULUKU NWUANZANWUANZA

Ɛzoanvolɛma bulu nee nwiɔ ne

¹ Gyisɛse vɛlɛle ye ɛdoavolɛma bulu nee nwiɔ ne na ɔmanle bɛ tumi kɛ bɛdu sunsum ɛtane, na bɛyɛ ewule nee anwonyane biala ayile.

² Ɛzoanvolɛma bulu nee nwiɔ ne aluma ɛne: mɔɔ lumua la a le Saemɔn, mɔɔ bɛfɛlɛ ye Pita la nee ɔ diema Andelu; Gyemise nee ɔ diema Dwɔn, mɔɔ bɛ ze a le Zɛbɛdi la;

³ Felepe nee Baatɔlomiyu; Tɔmase nee Mateyu mɔɔ le adwuledievolɛ ne; Afeɛse ara Gyemise nee Tadease;

⁴ Saemɔn mɔɔ le Keenanli ne, nee Dwudase Yesekaleɔto mɔɔ yele Gyisɛse manle la.

Bulu nee nwiɔ ne gyima

⁵ Gyisɛse zoanle bɛdabɛ bulu nee nwiɔ ɛhye na ɔzele bɛ kɛ, “Bɛmmakɔ bɛdabɛ mɔɔ bɛnle Dwuuma la anu anzɛɛ Samɛlea azua ne mɔ azo;

⁶ bɛhɔ Yizilayɛma mɔɔ ɛminli la ɛkɛ ne.

⁷ Saa bɛkɔ a, bɛhɔbɔ nolo kɛ, ‘Anwuma Belemgbunlililɛ ne ɛbikye.’

⁸ Bɛyɛ wuleravolɛma ayile, bɛdunwue mɔɔ ɛwu la, bɛmaa kokobɛvolɛma ɛde kpɔkɛ, na bɛdu sunsum ɛtane ne mɔ. Bɛnyia tumi ɛhye mgbane mɔɔ bɛandua nwolɛ ɛhwee a, yemɔti bɛva bɛmaa mgbane mɔɔ bɛnlie ɛhwee a.

⁹ Bɛmmafa ezukoa nvutuke anzɛɛ dwɛtɛ fufule anzɛɛ ezukoa kɔbele bɛbɔ bɛ nwo;

¹⁰ bɛmmafa aleɛ kodoku wɔ bɛ adendulɛ nu. Bɛmmafa anwuma adɛladeɛ nwiɔ, mgbɔlaboa anzɛɛ kpɔma, ɔluakɛ soamɛlɛkɛ didi mgbane.

¹¹ “Saa bɛkɔ sua bie anzɛɛ namule bie azo a, bɛbiza bɛnwu sonla mɔɔ kɛlie bɛ la na bɛhɔzokoɛ ye, na bɛdɛnla ɔ nwo ɛkɛ ne ɔhɔdwu mekɛ mɔɔ bɛkɛvi sua ne anzɛɛ namule ne azo la.

¹² Saa bɛwolo awuke nu a, bɛze ɛkɛ ne amra kɛ, ‘Anzonudwolɛ ɛha bɛ.’

¹³ Saa awuke ne anu amra die bɛ a, bɛmaa bɛ anzonudwolɛ ne ɛha ɛkɛ; saa bɛanlie bɛ noko a, bɛva bɛ anzonudwolɛ ne bɛzia bɛhɔ.

¹⁴ Eza awuke anzɛɛ sua biala mɔɔ anlie bɛ anzɛɛ andie mɔɔ bɛka la, saa bɛlɛfi ɛkɛ ne a bɛkpɔlɔkpɔla bɛ gyakɛ abo anwea ne bɛgua zolɛ.

¹⁵ Na nɔhalɛ, mese, wɔ Ndɛnebualɛ Kenle ne, Nyamenle baze Sodɔm nee Gomɔla amra anwunvɔne dɔɔnwo adɛla menli mɔɔ wɔ zɔhane sua ne azo la.

Bɛbayɛ bɛ kpɔdekpɔde

¹⁶ “Bɛdie! Melɛsoa bɛ kɛ mboane la wɔ bedi avinli. Bɛmaa bɛ nye ɛla bɛ nwo zo kɛ nwɔlɛ, noko bɛyɛ bɛlɛvo kɛ abubule.

¹⁷ Bɛnlea bɛ nwo boɛ wɔ menli sa nu, ɔluakɛ bɛbahye bɛ bɛ nee bɛ ahɔ kɔɔto; bɛbabila bɛ empele wɔ bɛ nyianu azua ne mɔ anu,

¹⁸ yɛɛ eza bɛbahwe bɛ bɛahɔ maanle mgbanyima nee arelemgbunli nyunlu wɔ me ti, na bɛabɔ Edwɛkpa ne nolo bɛahile bɛ nee bɛdabɛ mɔɔ bɛnle Dwuuma la.

¹⁹ Saa bɛfa bɛ bɛkɔ kɛ bɛli bɛ edwɛkɛ a, bɛmmadwenle mɔɔ bɛbaha la anwo anzɛɛ kɛ bɛbazi bɛaha ye la anwo; saa mekɛ ne dwu a, bɛbava mɔɔ bɛbaha la bɛamaa bɛ.

²⁰ Ɔluakɛ tɛ bɛmɛ a bɛbadendɛ a; bɛ Ze mɔɔ wɔ anwuma la Sunsum ne balua bɛ nwo zo adendɛ.

²¹ “Adiema baye adiema amaa kɛ bɛhu ye. Selɛ baye ralɛ amaa, mralɛ badwazo bɛ awovolɛma anwo zo na bɛaye bɛ bɛamaa bɛahu bɛ.

²² Me ti, menli kɔsɔɔti bakpɔ bɛ. Noko mɔɔ kɛgyinla kpundii kɛhɔ awieleɛ la, Nyamenle kɛlie ye ngoane.

²³ Saa bɛyɛ bɛ kpɔdekpɔde wɔ sua ko azo a, bɛnriandi bɛhɔ mɔɔ doa ye la azo. Na meka meahile bɛ kɛ bɛnrɛwie Yizilayɛ azua ne mɔ amuala azo kɔ na Sonla Ra ne ara.

²⁴ “Ɛdoavolɛ biala ɛndɛla ye kilehilevolɛ, yɛɛ akɛlɛ ɛndɛla ɔ menle.

²⁵ Ɔwɔ kɛ ɛdoavolɛ biala yɛ kɛ ɔ menle la, yɛɛ ɔwɔ kɛ akɛlɛ yɛ kɛ ɔ menle la. Saa bɛvɛlɛ sua menle ne Biyɛlezɛbɛle a, ɛnee ye sua nu ɛkɛ ne amra ɛdeɛ bɛkɛvɛlɛ bɛ aluma dɔɔnwo kpalɛ.

Mɔɔ ɔwɔ kɛ bɛsulo ye la

²⁶ “Yemɔti bɛmmasulo awie biala, ɔluakɛ debie biala ɛnle ɛkɛ mɔɔ bɛheda zolɛ mɔɔ bɛnrɛdukue zolɛ a, yɛɛ debie biala ɛnle fealera nu mɔɔ ɛnrɛla ali a.

²⁷ Mɔɔ menwɔha menwɔhile bɛ wɔ awozinli nu la, bɛha ye bagua nu, yɛɛ mɔɔ bɛde ye azukue nu la, bɛbɔ ye nolo wɔ azua ti zo.

²⁸ Bɛmmasulo bɛdabɛ mɔɔ bɛkola bɛku nwonane ne na bɛngola ɛkɛla ne ku la; bɛzulo Nyamenle mɔɔ kola nwonane ne nee ɛkɛla ne amuala ku, na ɔsɛkye bɛ wɔ ɛbolɔ senle nu la.

²⁹ Bɛtɔ nyamenleakatiba nwiɔ ɛkpɔsɛba ko, noko akee ko bɔbɔ ɛndɔ aze wɔ mekɛ mɔɔ bɛ Ze mɔɔ wɔ anwuma la ɛnze nu a.

³⁰ Na bɛmɛ, bɛ ti zo enrinli bɔbɔ bɛdia.

³¹ Zɔhane ati bɛmmasulo, ɔluakɛ bɛsonle bolɛ kpole bɛtɛla nyamenleakatiba dɔɔnwo.

Kelaese ɛlielɛ nee ye ɛkpolɛ

³² “Awie biala mɔɔ kɛha ye baguase kɛ ɔle me ɛdeɛ la, medame menwɔyɛ ye zɔhane ala menwɔmaa ye wɔ Egya mɔɔ wɔ anwuma la anyunlu.

³³ Na awie biala mɔɔ kɛkpo me wɔ bagua nu la, medame noko menwɔkpo ye wɔ Egya mɔɔ wɔ anwuma la anyunlu.

Tɛ anzonudwolɛ ɔ, konle ɔ

³⁴ “Bɛmmadwenle kɛ me nee anzonudwolɛ a rale ewiade a; kyɛkyɛ, meanva anzonudwolɛ meamba. Me nee konle a rale a.

³⁵ Membale kɛ mebamaa mralɛ mrenya adwazo atia bɛ ze mɔ, mralɛ mraalɛ adwazo atia bɛ nli mɔ, nwuvolɛ mraalɛ adwazo atia bɛ hu mɔ bɛ nli mɔ;

³⁶ sonla biala kpɔvolɛma kpalɛ vi ɔdaye ye sua nu.

³⁷ “Mɔɔ kulo ɔ ze anzɛɛ ɔ nli tɛla me la ɛnfɛta kɛ ɔkɛyɛ me ɛdoavolɛ, yɛɛ mɔɔ kulo ɔ ra nrenya anzɛɛ ɔ ra raalɛ tɛla me la ɛnfɛta kɛ ɔkɛyɛ me ɛdoavolɛ.

³⁸ Awie biala mɔɔ anva ye meanubaka ne ando ɔ kɔme zo antietia me gyakɛ abo zo la ɛnfɛta kɛ ɔkɛyɛ me ɛdoavolɛ.

³⁹ Mɔɔ kɛpele ye ngoane nwo la kɛminli ye; na mɔɔ kɛminli ye ngoane wɔ me ti la kɛnyia ngoane mɔɔ ɛnlɛ awieleɛ.

Ahatualɛ

⁴⁰ “Awie mɔɔ kɛlie bɛ la ɛlie medame; mɔɔ kɛlie me noko la ɛlie mɔɔ zoanle me la.

⁴¹ Mɔɔ kɛlie Nyamenle kpɔmanvolɛ kɛ ɔle Nyamenle kpɔmanvolɛ la, kɛnyia Nyamenle kpɔmanvolɛ nwo ahyɛlɛdeɛ, yɛɛ mɔɔ kɛlie sonlakpalɛ wɔ sonlakpalɛ duma nu la, kɛnyia sonlakpalɛ nwo ahatualɛ.

⁴² Na bɛhakye ɛhye: Awie biala mɔɔ kɛmaa ngakula ngyikyi ɛhye mɔ anu ko nzule fɔlɔdɔdɔ kanrɛlɛ ko bɔbɔ kɛnlo, kɛ ɔle me ɛdoavolɛ la, kɛnyia nwolɛ ahatualɛ somaa!”