Edwɛkpa ne kɛmɔ Luku hɛlɛle la 5 - BAEBOLO ANZƐƐ BULUKU NWUANZANWUANZA

Gyisɛse fɛlɛ alumua ɛdoavolɛma

¹ Kenle ko bie mɔɔ Gyisɛse gyi Ginazalɛte Tandane ne anloa la, menli dɔɔnwo rale ɔ nwo ɛkɛ ne kɛ bɛbadie Nyamenle edwɛkɛ ne; na bɛhyelele ɔ nwo zo kpalɛ.

² Ɔnwunle nlɛne nwiɔ kɛ bɛgyigyi ɛvoleɛ ne na bɛ menle mɔ ɛdwu aze, bɛlɛnrinzinrinzi bɛ avonle ne mɔ anu.

³ Gyisɛse vole nlɛne ne mɔ ko, mɔɔ le Saemɔn ɛdeɛ la anu, na ɔzele Saemɔn kɛ ɔzuhu ye ɔhɔ azukunlu ekyii. Gyisɛse akee dɛnlanle aze wɔ ɛlɛne ne anu na ɔhilehilele menli ne.

⁴ Ɔ nloa penle la, ɔzele Saemɔn kɛ, “Ɛ nee ɛ sa zo ne mɔ bɛdu bɛ ɛlɛne ne bɛhɔ buma ne anu na bɛdo avonle ne bɛhye fɛlɛ.”

⁵ Saemɔn buale ye kɛ, “Kilehilevolɛ, sumunli nɔe, yɛyɛ gyima dedee, noko yɛangye fɛlɛ. Na kɛmɔ ɛdawɔ wɔha la, yɛbahɔ yɛahɔdo avonle ne.”

⁶ Bɛhɔdole avonle ne na bɛhyele fɛlɛ dɔɔnwo kpalɛ mɔɔ bɛ avonle ne anrɛɛ kpuke a.

⁷ Yemɔti bɛdole bɛ sa bɛvɛlɛle bɛ gɔnwo mɔ mɔɔ wɔ ɛlɛne ɛhendeɛ ne anu la kɛ bɛrɛla bɛraboa bɛ. Bɛrale la nlɛne nwiɔ ne yiyile tetɛkɛɛ mɔɔ ɛnee asɛɛ bɛwie sia a.

⁸ Mɔɔ Saemɔn Pita nwunle mɔɔ ɛzi la, ɔhotole Gyisɛse anyunlu ɛkɛ ne na ɔzele ye kɛ, “Awulae, twe ɛ nwo fi me nwo kɔ. Mele ɛtanevolɛ!”

⁹ Ɔlua fɛlɛ dɔɔnwo mɔɔ bɛhyele la ati, ɛzulolɛ kpole hanle Pita nee bɛdabɛ mɔɔ bɛwɔ ɛkɛ ne la amuala.

¹⁰ Zɔhane ala noko yɛɛ Saemɔn agɔnwo mɔ, Gyemise nee Dwɔn, mɔɔ le Zɛbɛdi amra ne mɔ, bɛdabɛ ɛzulolɛ hanle bɛ a. Gyisɛse zele Saemɔn kɛ, “Mmasulo, ɔvi ɛnɛ mɔɔ kɔ la ɛbahye menli wɔamaa Nyamenle.”

¹¹ Bɛhwenle bɛ nlɛne ne mɔ aze, bɛgyakyile debie biala ɛkɛ, na bɛdoale Gyisɛse.

Gyisɛse yɛ nrenya bie ayile

¹² Mekɛ bie ɛnee Gyisɛse wɔ sua bie azo, na nrenya ko mɔɔ ɛnee kokobɛ ɛgua ɔ nwo amuala la wɔ ɛkɛ ne. Mɔɔ ɔnwunle Gyisɛse la ɔdule ɔdɔle ɔ gyakɛ anu na ɔbodole ye kɛ, “Awulae, saa ɔyɛ wɔ ɛhulolɛ a, ɛkola ɛmaa me nwo sa.”

¹³ Gyisɛse vale ɔ sa hanle ye na ɔzele ye kɛ, “Mekulo! Ɛ nwo ɛza!” Na ɛkɛ ne ala ɔ nwo zale.

¹⁴ Gyisɛse bɔle ɔ nloa kɛ ɔmmaka ɔkile awie biala, ɔzele ye kɛ, “Kɔ na kɔva ɛ nwo kile sɛlɛvolɛ ne, na bɔ wɔ anwonzalɛ azu ne mɔɔ Mosisi hyehyɛle dole ɛkɛ ne la fa kile kɛ ɛ nwo ɛza.”

¹⁵ Na Gyisɛse nganeɛ dendenle hɔle ndɛndɛ kpalɛ, na menli somaa ne ala pianle rale kɛ bɛbadie ye edwɛkɛ ne na yeayɛ bɛ ayile;

¹⁶ noko ɔyɛ a ɛnee yehwe ɔ nwo yehɔ ɛleka sulokoko bie yehɔzɛlɛ.

Gyisɛse yɛ nrenya bie mɔɔ ɛdwidwe la ayile

¹⁷ Kenle ko bie mɔɔ ɛnee Gyisɛse ɛlɛkilehile la, Falasiima bie nee mɛla kilehilevolɛma mɔɔ vi azua mɔɔ wɔ Galeli nee Dwudiya maanzinli ne mɔ anu nee Gyɛlusalɛm la radɛnlanle ɛkɛ ne bie. Nyamenle tumi ne rale Gyisɛse anwo zo na ɔyɛle wuleravolɛma ayile.

¹⁸ Menli bie vale nrenya bie mɔɔ ɛdwidwe la wɔ ɛkpa nu rale, na bɛbɔle mɔdenle kɛ bɛfa ye bɛawolo sua ne anu bɛahɔdo Gyisɛse anyunlu ɛkɛ ne.

¹⁹ Na kɛmɔ menli ne zonle la ati, bɛannyia adenle bɛangɔ sua ne anu. Yemɔti bɛvale ye bɛvole sua ne ati zo, bɛpɛle sua ne ati zo tokule na bɛvale ye nee ɛkpa ne mɔɔ ɔla zo la bɛdwulale ye aze wɔ menli ne avinli bɛdole ye Gyisɛse anyunlu ɛkɛ ne.

²⁰ Gyisɛse nwunle menli ne mɔ diedi la, ɔzele nrenya ne mɔɔ ɛdwidwe la kɛ, “Me gɔnwo, bɛva wɔ ɛtane ne mɔ bɛhyɛ wɔ.”

²¹ Mɛla kilehilevolɛma nee Falasiima ne mɔ bɔle ɔ bo kɛ bɛka bɛahile bɛ nwo ngoko kɛ, “Nwane a le ɛhye mɔɔ ɔka munzule edwɛkɛ zɛhae a? Awie biala ɛngola ɛnva ɛtane ɛngyɛ kyesɛ Nyamenle angomekye.”

²² Gyisɛse nwunle bɛ adwenle na ɔzele bɛ kɛ, “Duzu ati a bɛdwenle ninyɛne ɛhye mɔ anwo ɛ?

²³ Boni a ye ɛhanlɛ yɛ se a, kɛ ɛka kɛ, ‘Bɛva wɔ ɛtane ne mɔ bɛhyɛ wɔ,’ anzɛɛ ‘Dwazo na tia?’

²⁴ Memaa bɛanwu kɛ medame Sonla Ra, melɛ tumi wɔ azɛlɛ ye azo kɛ mefa ɛtane mekyɛ.” Yemɔti ɔzele nrenya ne mɔɔ ɛdwidwe la kɛ, “Mese, dwazo, fa wɔ ɛkpa ne, na kɔ sua nu!”

²⁵ Ɛkɛ ne ala nrenya ne dwazole, na wɔ bɛ muala bɛ nyunlu ɛkɛ ne, ɔvale ye ɛkpa ne mɔɔ ɔla zo la, na ɔyele Nyamenle ayɛlɛ ɔhɔle sua nu.

²⁶ Ɔzinle bɛ muala bɛ nwo kpole, na bɛvale sulosulo bɛyele Nyamenle ayɛlɛ bɛzele kɛ, “Ɛnɛ yɛnwu ninyɛne ɛzulolɛ kpalɛ!”

Gyisɛse fɛlɛ Livae

²⁷ Nzinlii Gyisɛse vindele alie nwo na ɔnwunle adwuledievolɛ bie mɔɔ bɛfɛlɛ ye Livae la kɛ ɔde ye gyima nu. Gyisɛse zele ye kɛ, “Bɛla maa yɛhɔ.”

²⁸ Livae dwazole, ɔgyakyile debie biala ɛkɛ na ɔdoale ye.

²⁹ Nzinlii Livae dole ɛkponle kpole bie wɔ ye sua nu ɛkɛ ne manle Gyisɛse, na adwuledievolɛma dɔɔnwo nee menli mɔɔ bɛdabɛ noko awie ɛmbu bɛ la hɔle ɛkponledolɛ ne abo.

³⁰ Falasiima bie nee mɛla kilehilevolɛma bie mɔ mɔɔ boka Falasiima fane ne anwo la bizale Gyisɛse ɛdoavolɛma ne kɛ, “Duzu ati a bɛ nee adwuledievolɛma nee menli mɔɔ awie ɛmbu bɛ la to bɛ sa ɛyɛba ko anu ɛ?”

³¹ Gyisɛse buale bɛ kɛ, “Menli mɔɔ te kpɔkɛ la ɛngyia ninsinli nwo kɛ wuleravolɛma.

³² Bɛse membale kɛ mebavɛlɛ bɛdabɛ mɔɔ bɛkpazi la? Membale menli mɔɔ awie ɛmbu bɛ la ɛvɛlɛlɛ, amaa bɛanlu bɛ nwo.”

Ɛhɔnehyelɛ nwo kpuyia

³³ Menli bie bizale Gyisɛse kɛ, “Dwɔn ɛdoavolɛma ne ta kɛ bɛkye ɛhɔne na bɛsɛlɛ, Falasiima ɛdoavolɛma ne noko yɛ zɔhane ala; na wɔ ɛdoavolɛma ɛdeɛ dahuu bɛdi debie.”

³⁴ Gyisɛse buale bɛ kɛ, “Bɛdwenle kɛ menli mɔɔ bɛkɛyia bɛ wɔ atɔfolɛ bo la kɛhye ɛhɔne wɔ mekɛ mɔɔ atɔfolɛ nrenya ne nee bɛ de la ɔ? Ɔnrɛyɛ zɔhane ɛlɛ.

³⁵ Noko saa mekɛ dwu na bɛbaye atɔfolɛ nrenya ne wɔ bɛ nu a, ɛnee bɔ zo mɔɔ yedwu mɔɔ bɛbua bɛda a.”

³⁶ Gyisɛse eza bule bɛ ɛrɛlɛ ɛhye: “Awie ɛnde tɛladeɛ fofolɛ ɛdanlɛ ɛnda tɛladeɛ dɛba nu; saa ɔyɛ ye zɔhane a, ɛnee yede fofolɛ ne mgbane, ɛdanlɛ fofolɛ ne bɔbɔ nee dɛba ne ɛnrɛyɛ ko.

³⁷ Eza sonla biala ɛnva nwanye ndokuma ɛngua nwanye nwoma kodoku dɛba nu. Saa ɔyɛ ye zɔhane a, nwanye ndokuma ne kɛkpuke kodoku ne na nwanye ne kɛzɛkye.

³⁸ Mɔɔ bɛyɛ la a le kɛ, bɛfa nwanye ndokuma bɛgua nwoma kodoku fofolɛ nu.

³⁹ Eza bɔbɔ awie biala ɛnrɛnlo nwanye dɛba na nzinlii eza yeakpondɛ nwanye ndokuma bo zo. Mɔɔ ɔbaha la a le kɛ, ‘Dɛba ne le kpalɛ.’ ”