Edwɛkpa ne kɛmɔ Luku hɛlɛle la 24 - BAEBOLO ANZƐƐ BULUKU NWUANZANWUANZA

Ewudwazo ne

¹ Molɛ nwonlomɔ mangyee ne ala mraalɛ ne mɔ vale bɛ alufuanlɛ ne mɔɔ bɛyɛle la hɔle sɛka ne azo.

² Bɛnwunle kɛ bɛhundo bolɛ ne bɛvi nla ne anloa,

³ yemɔti bɛwolole nuhua, na bɛannwu Awulae Gyisɛse funli ne.

⁴ Bɛ adwenle yɛle bɛ kpomgbondee, na arɛlevilɛ nu ala mrenya nwiɔ mɔɔ wula adɛladeɛ nwohyee la ragyinlanle bɛ nwo ɛkɛ ne.

⁵ Ɛzulolɛ hanle bɛ la ati, bɛbutubutule bɛ nye aze, na menli ne mɔ bizale bɛ kɛ, “Duzu ati a bɛlɛkpondɛ mɔɔ de aze la wɔ mɔwuamra anu ɛ?

⁶ Ɔnle ɛke, bɛdwazo ye. Bɛhakye mɔɔ ɔhanle ɔhilele bɛ wɔ mekɛ mɔɔ ɛnee ɔwɔ Galeli la. Ɔhanle kɛ, Luk 9.22; 18.31-33

⁷ ‘Ɔwɔ kɛ bɛye Sonla Ra ne bɛwula ɛtanevolɛma asa anu, na bɛbɔ ye meanubaka nu bɛku ye; na ye kenle nsa ne anzi ɔdwazo ɔba ngoane nu.’ ”

⁸ Mraalɛ ne mɔ hakyele ye edwɛkɛ ne,

⁹ bɛvi sɛka ne azo bɛziale bɛhɔle, na bɛhɔhanle edwɛkɛ ne bɛhilele bulu nee ko ne nee bɛdabɛ mɔɔ bɛha la amuala.

¹⁰ Mraalɛ ne mɔ a le Mɛle mɔɔ vi Magedala la, Dwowana, yɛɛ Gyemise ɔ nli Mɛle. Bɛmɛ yɛɛ mraalɛ ɛhendeɛ ne mɔ mɔɔ nee bɛ lua la a hanle edwɛkɛ ne hilele ɛzoanvolɛma ne mɔ a.

¹¹ Na ɛzoanvolɛma ne dwenlenle kɛ mɔɔ mraalɛ ne mɔ hanle la le adalɛ, yemɔti bɛanlie bɛ bɛanli. [

¹² Na Pita dwazole na ɔnriandile ɔhɔle sɛka ne azo. Ɔbutule ɔnleanle nla ne anu, na ɔnwunle kɛ lenen ndanlɛ ne mɔɔ bɛvale bɛkyekyele funli ne la gua nu na yeannwu debie gyɛne bieko. Mɔɔ ɛzi la yɛle ye azibɛnwo kpole na ɔziale ɔhɔle sua nu.]

Gyisɛse ye ɔ nwo ahile ye ɛdoavolɛma nwiɔ wɔ Ɛmeeyɛse adevinli

¹³ Kenle ko ne ala ɛnee Gyisɛse ɛdoavolɛma nwiɔ bie ɛlɛkɔ sua bie mɔɔ bɛfɛlɛ ye Ɛmeeyɛse la azo; ɔ nee Gyɛlusalɛm bɛ avinli kɛyɛ kilomita bulu nee ko,

¹⁴ na ɛnee bɛlɛdi bɛ adwelie wɔ ninyɛne mɔɔ ɛsisi la anwo.

¹⁵ Mɔɔ bɛ nloa wɔ zo na bɛlɛsuzu mɔɔ ɛzi la anwo la, Gyisɛse ɔdaye mumua ne ɔbikyele bɛ na ɔ nee bɛ luale nwolɛ.

¹⁶ Bɛnwunle ye, noko bɛannwu ye sonla holɛ.

¹⁷ Na Gyisɛse zele bɛ kɛ, “Duzu a bɛlɛka nwolɛ edwɛkɛ wɔ adenle ye anu la?” Alɔbɔlɛ ngome manle bɛgyinlanle,

¹⁸ na bɛ nuhua ko mɔɔ bɛfɛlɛ ye Kiliopase la bizale ye kɛ, “Ɛ ngomekye ala yɛɛ ɛle ɛyɛvolɛ wɔ Gyɛlusalɛm a, mɔɔ ɛnze edwɛkɛ mɔɔ ɛzi nehane kenle nsa ye la ɔ?”

¹⁹ Ɔbizale bɛ kɛ, “Duzu edwɛkɛ?” Bɛbuale ye kɛ, “Edwɛkɛ mɔɔ ɛzi Gyisɛse mɔɔ vi Nazalɛte la anwo zo la.” Akee bɛvale bɛzɔle zolɛ kɛ, “Nrenya ɛhye le Nyamenle kpɔmanvolɛ, yɛɛ wɔ Nyamenle nee menli kɔsɔɔti anyunlu, ɔhilele kɛ tumi wɔ ye edwɛkɛhanlɛ nee ye nyɛleɛ nu.

²⁰ Yɛ sɛlɛvolɛ mgbanyinli nee mgbanyima ne mɔ yele ye manle bɛbule ye ewule fɔlɛ, na bɛbɔle ye meanubaka nu.

²¹ Ɛnee yɛ nye la kɛ yemɔ yɛɛ ɔbarakpɔne Yizilayɛma a! Yeanga ɛhye angome, edwɛkɛ ne zile la ɛnɛ le kenle nsa.

²² Mraalɛ bie noko mɔɔ wɔ yɛ avinli la yɛɛ akee dule yɛ kunlu bɔbɔ a. Bɛhɔle sɛka ne azo nwonlomɔ mangyee ne,

²³ na bɛannwu ye funli ne. Bɛziale bɛrahanle kɛ bɛnwunle anwuma soanvolɛ bie mɔɔ ɛha ɛhile bɛ kɛ ɔde ngoane nu a.

²⁴ Yɛ bie mɔ noko hɔle sɛka ne azo la bɛhɔnwunle ye, kɛmɔ mraalɛ ne mɔ hanle la, na ɔdaye mumua ne ɛdeɛ, bɛannwu ye.”

²⁵ Na Gyisɛse zele bɛ kɛ, “Bɛdabɛ, bɛle ahɔnwɔne kpalɛ. Duzu ati a bɛngola bɛnlie mɔɔ Nyamenle kpɔmanvolɛma ɛha nwolɛ edwɛkɛ la amuala bɛnli ɛ?

²⁶ Asoo bɛnnwu ye kɛ ɔwɔ kɛ Mɛzaya ne nwu amaneɛ ɛhye mɔ amuala na yeahɔ ye anyunlunyia ne anu?”

²⁷ Akee Gyisɛse bɔle ɔ bo vile Mosisi mbuluku ne mɔ nee mɔɔ Nyamenle kpɔmanvolɛma ɛha na bɛhɛlɛ wɔ Nyamenle Edwɛkɛ ne anu wɔ ɔ nwo la azo na ɔhilehilele nu ɔhilele bɛ.

²⁸ Bɛbikyele sua ne mɔɔ bɛkɔ zo la azo la, Gyisɛse yɛle kɛ ɔpɛ nuhua yeahɔ;

²⁹ na bɛzele ye kɛ, “Maa yɛhɔla na mekɛ ne ɛhɔ, aleɛ ɛlɛdwo.” Yemɔti Gyisɛse nee bɛ hɔle sua nu.

³⁰ Ɔ nee bɛ dɛnlanle aze kɛ bɛdi debie la, ɔvale kpanwo ne, ɔyilale zolɛ, ɔbubule nuhua na ɔvale ɔmanle bɛ.

³¹ Ɛkɛ ne ala bɛ nye zo dele na bɛnwunle ye sonla holɛ, na eza ɛkɛ ne ala ɔminliminlinle bɛ nye zo.

³² Na bɛhanle bɛhilele bɛ nwo ngoko kɛ, “Mekɛ mɔɔ ɔlɛtendɛ wɔ adenle ne anu na ɔlɛkilehile yɛ Nyamenle Edwɛkɛ ne anu la ɛnee ɔle kɛ asɛɛ bɛwuda senle yɛ ahonle nu la.”

³³ Na ɛkɛ ne ala bɛdwazole na bɛziale bɛhɔle Gyɛlusalɛm. Bɛhɔdwule la ɛnee ɛdoavolɛma bulu nee ko ne nee menli mɔɔ nee bɛ wɔ ɛkɛ ne la ɛyia nu

³⁴ na bɛlɛka kɛ, “Amgba, Awulae ɛdwazo! Yeye ɔ nwo yehile Saemɔn!”

³⁵ Na menli nwiɔ ne mɔɔ vi Ɛmeeyɛse la noko hanle edwɛkɛ mɔɔ zile adenle ne anu, nee kɛ bɛzile bɛnwunle Awulae sonla holɛ wɔ mekɛ mɔɔ ɔbubule kpanwo ne ɔmanle bɛ la hilele ɛdoavolɛma ne mɔ.

Gyisɛse ye ɔ nwo ahile ye ɛdoavolɛma ne

³⁶ Mɔɔ bɛ nloa wɔ zolɛ bɛlɛka ɛhye mɔ anwo bie la, Awulae mumua ne ragyinlanle bɛ avinli [na ɔzele bɛ kɛ, “Anzonudwolɛ ɛha bɛ.”]

³⁷ Ɛzulolɛ kpole hanle bɛ na bɛdwenlenle kɛ bɛnwu nwomenle.

³⁸ Na Gyisɛse zele bɛ kɛ, “Duzu ati a ɛzulolɛ ɛha bɛ a? Duzu ati a bɛ ti akunlu ɛyɛ bɛ kesee ɛ?

³⁹ Bɛnlea me sa nee me gyakɛ, na bɛnwu ye kɛ medame mumua ne ɛne. Bɛsosɔ me na bɛnlea, ɔluakɛ nwomenle ɛnlɛ nwonane nee mbowule, kɛmɔ bɛnwu me kɛ melɛ la.” [

⁴⁰ Mɔɔ ɔhanle ɛhye ɔwiele la, ɔvale ɔ sa nee ɔ gyakɛ ɔhilele bɛ.]

⁴¹ Noko fɛlɛko kpole nee azibɛnwo ammaa bɛanlie bɛanli. Yemɔti ɔbizale bɛ kɛ, “Bɛlɛ aleɛ wɔ ɛke ɔ?”

⁴² Na bɛmanle ye fɛlɛ sinli mɔɔ bɛze la,

⁴³ na ɔlile ye bɛ nyunlu ɛkɛ ne.

⁴⁴ Akee ɔzele bɛ kɛ, “Ɛhye mɔ a le ninyɛne mɔɔ menganle nwolɛ edwɛkɛ mengilele bɛ wɔ mekɛ mɔɔ ɛnee me nee bɛ de la: debie biala mɔɔ bɛhɛlɛ ye wɔ Mosisi mɛla ne anu, nee mɔɔ wɔ Nyamenle kpɔmanvolɛma, nee Edwɛndolɛ mbuluku ne mɔ anu mɔɔ fane me nwo la kpokpoti ɔwɔ kɛ yɛ nɔhalɛ.”

⁴⁵ Akee ɔbukele bɛ adwenle ɔmanle bɛdele Nyamenle Edwɛkɛ ne abo,

⁴⁶ na ɔzele bɛ kɛ, “Mɔɔ bɛhɛlɛ bɛdo ɛkɛ ne la ɛne: Ɔwɔ kɛ Mɛzaya ne nwu amaneɛ na ye kenle nsa ne anzi bɛdwazo ye bɛfi mɔwuamra anu.

⁴⁷ Akee bɛbɔ ɔ bo wɔ Gyɛlusalɛm ɛke bɛva me duma bɛbɔ anlubɛnwo nolo bɛhile maanle maanle kɔsɔɔti, na saa bɛdie bɛdi a, Nyamenle ava bɛ ɛtane ahyɛ bɛ.

⁴⁸ Bɛmɛ a bɛdi ninyɛne ɛhye mɔ anwo daselɛ a.

⁴⁹ Medame mumua ne mebazoa deɛ mɔɔ Egya vale bɔle ɛwɔkɛ la wɔ bɛ nwo. Bɛdɛnla suakpole ɛhye azo ɛke kɔkpula kɛ tumi vi anwuma kɛra bɛ nwo zo la.”

Bɛva Gyisɛse bɛhɔ anwuma

⁵⁰ Akee Gyisɛse nee bɛ vi suakpole ne azo hɔle mɔɔ asɛɛ bɛdwu Bɛtani la, na ɔmanle ɔ sa zo ɔyilale bɛ.

⁵¹ Mɔɔ ɔyila bɛ la, ɔdele ɔ nwo ɔvile bɛ nwo [na bɛvale ye bɛhɔle anwuma.]

⁵² Ɛzoanvolɛma ne mɔ zonlenle ye na bɛvale fɛlɛkolilɛ kpole bɛziale bɛhɔle Gyɛlusalɛm,

⁵³ na bɛhɔle Ɛzonlenlɛ Sua ne anu dahuu bɛhɔyɛle Nyamenle mo.