Dwɔhyua Buluku ne 9 - BAEBOLO ANZƐƐ BULUKU NWUANZANWUANZA

Gebɛyɔnoma bɛlɛbɛla Dwɔhyua

¹ Arelemgbunli mɔɔ wɔ Dwɔdan ne anzi mɔɔ di kɔ adɔleɛ azua ne mɔ mɔɔ gua awoka ne mɔ azo, nee mɔɔ gua awoka ne mɔ abo, nee mɔɔ gua Mɛdetɛlenia Nyevile ne anloa nee ye ɛbɔ nu mɔɔ kɔkpula Lɛbanɔn la dele Yizilayɛma konimlilɛ ne mɔ; arelemgbunli ɛhye mɔ a le Hɛte, Amɔle, Keena, Pɛlɛze, Haevae, yɛɛ Gyibɛse arelemgbunli ne mɔ.

² Bɛ muala bɛbɔle nuhua bɛvale adwenle ko kɛ bɛ nee Dwɔhyua nee Yizilayɛma kaho.

³ Na Gebɛyɔnoma mɔɔ le Haevae asa azo la dele mɔɔ Dwɔhyua vale hilele Gyɛlekoma nee Eyaema la,

⁴ bɛyiale nu bɛbɔle adwenle, bɛwulale aleɛ wɔ ahodoku mɔɔ ɛtete la anu, na bɛvale nza bɛguale nwanye ahodoku mɔɔ ɛyɛ dɛba na bɛteta nu la anu, na bɛvale bɛzoale bɛ asoaso ne mɔ.

⁵ Bɛwulale adɛladeɛ mɔɔ ɛtete kpasakpasa nee mgbɔlaboa dɛba mɔɔ ɛtete na bɛsosɔ bɛ la. Aleɛ mɔɔ bɛvale bɛziale bɛ nwo la le reresee na eza bie mɔ ɛbɔ adubue.

⁶ Akee bɛhɔle Yizilayɛma azokoɛleɛ ne wɔ Gelegale na bɛhɔzele Dwɔhyua nee Yizilayɛma kɛ, “Yɛvi moa kpalɛ a yɛra a. Yɛkulo kɛ bɛ nee yɛ yɛ ngyehyɛlɛ.”

⁷ Na Yizilayɛma bizale bɛ kɛ, “Duzu ati a yɛ nee bɛ ɛyɛ ngyehyɛlɛ a? Ɔkɛyɛ kɛ bɛde yɛ nwo ɛke ala bie.”

⁸ Bɛbuale Dwɔhyua kɛ, “Yɛra kɛ yɛbazonle wɔ.” Dwɔhyua bizale bɛ kɛ, “Bɛvi nienwu? Bɛmɛ a le nwane mɔ?”

⁹ Na bɛhanle bɛhilele Dwɔhyua kɛ, “Yɛmenle, yɛvi moa kpalɛ a yɛra a, ɔboalekɛ yɛde Ɛdɛnkɛma bɛ Nyamenle ne anwo edwɛkɛ. Yɛde mɔɔ ɔyɛle ye wɔ Yigyibiti la amuala,

¹⁰ nee mɔɔ ɔvale ɔhilele Amɔle arelemgbunli nwiɔ ne mɔɔ wɔ Dwɔdan ne anzi mɔɔ di kɔ aduduleɛ la. Arelemgbunli ɛhye mɔ a le Saehɔn, mɔɔ le Hɛhyebɔn belemgbunli ne nee Ɔɔgo mɔɔ le Beehyan belemgbunli ne mɔɔ dɛnlanle Ahyetalo la.

¹¹ Yɛ mgbanyima ne mɔ nee maanle ne anu amra amuala ɛzoa yɛ kɛ yɛva aleɛ yɛzia yɛ nwo na yɛrayia bɛ, na yɛha yɛhile bɛ kɛ yɛle bɛ ngɛkɛlɛ, na ɛ nee yɛ ɛyɛ ngyehyɛlɛ.

¹² Nea yɛ kpanwo ne mɔ; yɛtu yɛ bo wɔ yɛ maanle nu la ɛnee bɛle wuluwulu. Noko nea kɛ bɛzi bɛyɛ reresee bie a; bɛbɔ adubue!

¹³ Mɔɔ yɛgua nwanye ne wɔ nwoma ahodoku ɛhye mɔ anu la, ɛnee bɛle fofolɛ, noko nea kɛ bɛzi bɛkpukekpuke bɛmaa yɛteta nu bie a! Adenle ne mɔɔ wale la ati yɛ adɛladeɛ nee yɛ mgbɔlaboa ɛwie yɛ nwo tete.”

¹⁴ Yizilayɛma ne liele nyɛvolɛ ne mɔ aleɛ ne bie lile wɔ mekɛ mɔɔ bɛambiza Ɛdɛnkɛma bɛandie ɔ nloa edwɛkɛ la.

¹⁵ Dwɔhyua nee Gebɛyɔnoma ne yɛle anzonudwolɛ ngyehyɛlɛ mɔɔ bamaa bɛadɛnla ngoane nu a. Yizilayɛma mgbanyinli ne mɔ hanle ndane kɛ bɛkɛli ngyehyɛlɛ ne azo.

¹⁶ Bɛyɛle ngyehyɛlɛ ne la ye kenle nsa yɛɛ Yizilayɛma ne mɔ dele kɛ amuanrɛɛ menli ne de bɛ nwo ɛkɛ ne ala a.

¹⁷ Yemɔti Yizilayɛma zile nu kɛ bɛkɔ ɛleka mɔɔ bɛwɔ la na ye kenle nsa ne azo bɛdwule azua ne mɔ mɔɔ menli zɔhane mɔ vi zolɛ rale la azo. Azua ne mɔ a le Gebɛyɔn, Kɛfaela, Biyɛlo, yɛɛ Keleate Gyialem.

¹⁸ Noko Yizilayɛma angu bɛ, ɔboalekɛ bɛ mgbanyima ne mɔ ɛva Ɛdɛnkɛma mɔɔ le Yizilayɛ Nyamenle ne ɛha ndane ɛyɛ ngyehyɛlɛ. Zɔhane ati Yizilayɛma amuala dendɛle bɛ nzo abo tiale bɛ mgbanyima ne mɔ wɔ ɛhye anwo.

¹⁹ Mgbanyima ne mɔ zele kɛ, “Yɛva Ɛdɛnkɛma mɔɔ le Yizilayɛ Nyamenle ne duma yɛha ndane yɛhile bɛ. Yemɔti bɛmmamaa yɛfa yɛ sa yɛka bɛ.

²⁰ Ɔlua yɛ ɛwɔkɛ mɔɔ yɛbɔ bɛ la ati, ɔwɔ kɛ bɛnyia bɛ ti. Saa yeanyɛ ye zɔhane a Nyamenle badea yɛ.”

²¹ Na mgbanyima ne mɔ zuzule kɛ, “Bɛmaa bɛnyia bɛ ti na bɛzoa ɛyɛne nee nzule bɛmaa yɛ.” Yemɔti menli ne kponlenle na bɛmanle Gebɛyɔnoma zonlenle bɛ.

²² Dwɔhyua manle bɛvɛlɛle Gebɛyɔnoma na ɔbizale bɛ kɛ, “Kɛmɔti yɛɛ bɛbɛlɛbɛla yɛ kɛ bɛvi moa a bɛrale a, wɔ mekɛ mɔɔ bɛzua yɛ nwo ɛke ala la ɛ?

²³ Mɔɔ bɛyɛ la, Nyamenle ɛbua bɛ ewule fɔlɛ ɛwie. Bɛ menli ne mɔ bayɛ ahanra dahuu azoa ɛyɛne nee nzule ahɔ me Nyamenle ne sua nu.”

²⁴ Bɛbuale kɛ, “Yɛyɛle ye zɔhane, ɔboalekɛ yɛnwunle kɛ ɔle nɔhalɛ kɛ Ɛdɛnkɛma bɛ Nyamenle ne zele ye sonvolɛ Mosisi kɛ ɔva azɛlɛ ne amuala ɔmaa bɛ na bɛhu menli mɔɔ wɔ zolɛ la. Zɔhane ati ɛnee ɛzulolɛ kpalɛ kpalɛ ɛha yɛ; yɛsulo kɛ bɛkɛhu yɛ bɛkɛbɔ yɛ bo zo.

²⁵ Kɛkala, yɛwɔ bɛ sa nu; mɔɔ bɛdabɛ bɛnea a ɔle kpalɛ la, bɛva bɛyɛ yɛ.”

²⁶ Zɔhane ati Dwɔhyua bɔle bɛ nwo bane na yeammaa Yizilayɛma adenle yeammaa bɛangu bɛ.

²⁷ Na ɔyɛle bɛ ahanra ɔmanle bɛzoale ɛyɛne nee nzule bɛmanle Yizilayɛma na bɛvale bie bɛhɔle ɛleka mɔɔ Ɛdɛnkɛma azukponle ne wɔ la. Ɛnɛ nee ɛnɛ ala bɛtɛdi zɔhane gyima ne wɔ ɛleka mɔɔ Ɛdɛnkɛma kɛhile kɛ bɛzonle ye la.