Dwɔhyua Buluku ne 4 - BAEBOLO ANZƐƐ BULUKU NWUANZANWUANZA

Yizilayɛma fa awolɛ ayɛ ngakyelɛ sɛkɛlɛneɛ

¹ Mɔɔ Yizilayɛma amuala wiele Azule Dwɔdan ne pɛ la, Ɛdɛnkɛma zele Dwɔhyua kɛ,

² “Ye menli bulu nee nwiɔ, ye ko fi abusua ekpunli ko biala anu,

³ na se bɛ kɛ, ‘Bɛhɔsesa awolɛ bulu nee nwiɔ wɔ Azule Dwɔdan ne avinli lɔ, ɛleka mɔɔ sɛlɛvolɛma ne mɔ gyi la.’ Se bɛ kɛ bɛva awolɛ zɔhane mɔ bɛhɔ bɛhɔgua ɛleka mɔɔ bɛbazokoɛ ɛnɛ nɔe la.”

⁴ Akee Dwɔhyua vɛlɛle menli bulu nee nwiɔ ne mɔɔ ɔyele bɛ ɔvile Yizilayɛ mbusua ekpunli ekpunli bulu nee nwiɔ ne anu la

⁵ na ɔzele bɛ kɛ, “Bɛhɔ Azule Dwɔdan ne anu na bɛhɔ Ɛdɛnkɛma bɛ Nyamenle ne Ɛlɛka ne anwo ɛkɛ, bɛ nuhua ko biala ɛva bolɛ ko ɛdo ɔ kɔme zo ɛrɛla, bolɛ ko biala gyi ɛkɛ ne maa Yizilayɛ abusua ekpunli ko.

⁶ Awolɛ ɛhye mɔ bamaa menli ne ahakye mɔɔ Ɛdɛnkɛma ɛyɛ la. Saa kenle bie bɛ mra biza kɛ, ‘Na ɛhye abo a le duzu?’ a,

⁷ bɛze bɛ kɛ mekɛ mɔɔ Ɛdɛnkɛma Ngyekyeleɛ Ɛlɛka ne pɛ Azule Dwɔdan ne la, azule ne tikale na ɔgyakyile ɛzenlɛ. Awolɛ ɛhye mɔ bayɛ ngakyelɛ sɛkɛlɛneɛ amaa Yizilayɛma kɔsɔɔti wɔ mɔɔ zile la anwo.”

⁸ Menli ne lile mɔɔ Dwɔhyua hanle hilele bɛ la azo. Kɛmɔ Ɛdɛnkɛma hanle hilele Dwɔhyua la, bɛsesale awolɛ bulu nee nwiɔ wɔ Azule Dwɔdan ne avinli lɔ (bolɛ ko biala gyi ɛkɛ ne maa Yizilayɛ abusua ekpunli ko) na bɛzoale bɛraguale bɛ azokoɛleɛ ne.

⁹ Dwɔhyua noko huohuanle awolɛ bulu nee nwiɔ anloa wɔ Azule Dwɔdan ne avinli, ɛleka mɔɔ sɛlɛvolɛma ne mɔɔ zo Ngyekyeleɛ Ɛlɛka ne la gyinlanle la. (Awolɛ zɔhane tɛbɔ ɛkɛ ne ɛnɛ nee ɛnɛ ala.)

¹⁰ Sɛlɛvolɛma ne gyinlanle azule ne avinli hɔkpulale mekɛ mɔɔ debie biala mɔɔ Ɛdɛnkɛma zele Dwɔhyua kɛ ɔha ɔhile menli ne ɔmaa bɛyɛ la lile munli la. Mosisi a hyehyɛle kɛ anrɛɛ Dwɔhyua ɛyɛ a. Menli ne pɛle azule ne ndɛndɛ.

¹¹ Mɔɔ bɛ muala bɛpɛle bɛlile azule ne anzi lɔ la, sɛlɛvolɛma ne mɔɔ zo Ɛdɛnkɛma Ngyekyeleɛ Ɛlɛka ne la zenle hɔlile menli ne anyunlu.

¹² Wulubɛn nee Gaade mbusua ekpunli ne mɔ anu mrenya nee Manasɛ abusua ekpunli foa ko ne boɔboale bɛ nwo kɛ bɛkɔ konle na bɛpɛle bɛlile menli ne mɔ anyunlu, kɛmɔ Mosisi zele bɛ la.

¹³ Mrenya kɛyɛ apenle ngoko abulanla a boɔboale bɛ nwo a; bɛvuale bɛhilele Ɛdɛnkɛma kɛ bɛkɔ konle nloa na bɛhɔle Gyɛleko fienemgbole ne anu lɔ.

¹⁴ Mɔɔ Ɛdɛnkɛma yɛle ye kenle ko ne la manle Yizilayɛma anye zɔle Dwɔhyua kpole kpalɛ na bɛzulole ye, kɛmɔ bɛzulole Mosisi toonwo ɔhɔle ewule nu la.

¹⁵ Akee Ɛdɛnkɛma zele Dwɔhyua kɛ,

¹⁶ “Maa sɛlɛvolɛma ne mɔɔ zo Ngyekyeleɛ Ɛlɛka ne la ɛvi Dwɔdan ne anu ɛvo file zo.”

¹⁷ Zɔhane ati Dwɔhyua vɛlɛle bɛ kɛ bɛvo file zo.

¹⁸ Mɔɔ sɛlɛvolɛma ne vole file zo ala la yɛɛ azule ne bɔle ɔ bo kɛ ɔse a, na ɔyile ɔbule aze bieko.

¹⁹ Siane ne mɔɔ lumua la kenle bulu ne azo yɛɛ menli ne pɛle azule Dwɔdan ne a, na bɛyɛle bɛ azokoɛleɛ wɔ Gelegale, wɔ Gyɛleko aduduleɛ.

²⁰ Ɛke yɛɛ Dwɔhyua huohuanle awolɛ bulu nee nwiɔ ne mɔɔ bɛsesale bɛ wɔ Azule Dwɔdan ne anu la anloa a.

²¹ Akee ɔzele Yizilayɛma kɛ, “Saa kenle bie bɛ bo zo amra biza bɛ ze mɔ kɛ, ‘Awolɛ ɛhye mɔ abo a le duzu’ a,

²² bɛha bɛmaa bɛde ɔ bo kɛ Yizilayɛma luale azɛlɛ resee zo a pɛle Azule Dwɔdan ne a!

²³ Bɛha bɛhile bɛ kɛ Ɛdɛnkɛma bɛ Nyamenle ne manle azule ne sesanle dole azɛlɛ resee ne hɔkpulale kɛ bɛ muala bɛpɛle nu la, kɛmɔ ɔyɛle Ndɔ Nyevile ne ɔmanle yɛpɛle la.

²⁴ Ɔlua ɛhye ati awie biala mɔɔ wɔ azɛlɛ ye azo la banwu kɛ Ɛdɛnkɛma lɛ tumi kpole, na bɛazulo Ɛdɛnkɛma bɛ Nyamenle ne wɔ mekɛ mɔɔ ɛnlɛ awieleɛ la.”