Dwɔhyua Buluku ne 3 - BAEBOLO ANZƐƐ BULUKU NWUANZANWUANZA

Yizilayɛma pɛ Dwɔdan ne

¹ Aleɛ hyenle la Dwɔhyua nee Yizilayɛma amuala dwazole nwonlomɔ mangyee ne ala; bɛvi Akasea azokoɛleɛ ne bɛdule bɛ bo bɛrazokoɛle Dwɔdan ne anloa bɛrahendɛle bɛ nwo kolaa na bɛapɛ.

² Ye kenle nsa ne azo, mgbanyima ne mɔ kpɔsale menli ne anwo zo

³ na bɛzele bɛ kɛ, “Saa bɛnwu kɛ Livaema ne mɔɔ bɛmɛ a bɛle sɛlɛvolɛma la ɛmaa Ɛdɛnkɛma bɛ Nyamenle ne Ngyekyeleɛ Ɛlɛka ne zo bɛvi azokoɛleɛ ɛke bɛlɛkɔ a, bɛdabɛ noko bɛdu bɛ bo bɛdoa bɛ.

⁴ Kɛmɔ bɛ biala ɛtɛbale ɛke ɛlɛ la, sɛlɛvolɛma ye ala yɛɛ bahile adenle ne a. Noko anrɛɛ bɛmmabikye Ngyekyeleɛ Ɛlɛka ne somasoma. Bɛmaa adenle kɛyɛ kilomita ko ɛla bɛ nee sɛlɛvolɛma ne avinli.”

⁵ Dwɔhyua zele menli ne kɛ, “Bɛdu bɛ nwo bɛzie ahane bɛmaa Ɛdɛnkɛma, ɔboalekɛ ɛhyema Ɛdɛnkɛma bayɛ nwanwane ninyɛne ahile bɛ.”

⁶ Akee ɔzele sɛlɛvolɛma ne kɛ, “Bɛva Ngyekyeleɛ Ɛlɛka ne bɛze bɛlumua menli ne anyunlu.” Na bɛyɛle ye zɔhane.

⁷ Ɛdɛnkɛma zele Dwɔhyua kɛ, “Ɛnɛ kenle ye mebayɛ wɔ sonlakpole meamaa Yizilayɛma amuala abɔ ɔ bo ali wɔ eni na bɛanwu ye wienyi kɛ me nee wɔ lua, kɛmɔ me nee Mosisi luale la.

⁸ Se sɛlɛvolɛma mɔɔ zo Ngyekyeleɛ Ɛlɛka ne la kɛ, ‘Saa bɛdwu Azule Dwɔdan ne anloa a, bɛwudwu bɛhɔ ye pemgbɛne ne azo na bɛgyinla.’ ”

⁹ Akee Dwɔhyua zele Yizilayɛma kɔsɔɔti kɛ, “Bɛrɛla ɛke bɛradie mɔɔ Ɛdɛnkɛma bɛ Nyamenle ne ɛlɛka la!

¹⁰ Akee bɛbanwu kɛ tease Nyamenle ne nee bɛ a lua a, ɔluakɛ ɔbavoa Keenama, Hɛtema, Haevaema, Pɛlɛzema, Gɛgahyema, Amɔlema, yɛɛ Gyibɛsema na yeamaa bɛali bɛ nwo zo konim.

¹¹ Bɛnlea, Awulae mɔɔ bɔle azɛlɛ ye amuala la Ngyekyeleɛ Ɛlɛka ne ɛlɛdi bɛ nyunlu ahɔpɛ Azule Dwɔdan ne.

¹² Zɔhane ati bɛdu menli bulu nee nwiɔ bɛvi Yizilayɛ mbusua ekpunli ekpunli ne mɔ anu, abusua ekpunli ko biala anu sonla ko.

¹³ Saa sɛlɛvolɛma mɔɔ zo ewiade amuala Ɛdɛnkɛma Ngyekyeleɛ Ɛlɛka ne la wula bɛ gyakɛ Dwɔdan ne anu a, ɔbagyakyi ɛzenlɛ, na nzule ne mɔɔ vi ye sɔlɔ ba la bagyinla ayɛ bonrabonra wɔ ɛleka ko.”

^14-15 Mekɛ ne le ɛbuhenle, na azule ne ɛyi ɛbu aze. Na menli ne mɔ vi bɛ azokoɛleɛ ne dule bɛ bo kɛ bɛkɔ bɛahɔpɛ Dwɔdan ne. Sɛlɛvolɛma mɔɔ zo Ngyekyeleɛ Ɛlɛka ne la li bɛ ti. Mɔɔ sɛlɛvolɛma mɔɔ zo Ngyekyeleɛ Ɛlɛka ne la agyakɛ hanle nzule ne mɔɔ wɔ azule ne pemgbɛne ne anloa ala la yɛɛ

¹⁶ ɔgyakyile ɛzenlɛ a; ye sɔlɔ nzule ne tikale na ɔyɛle bonrabonra toonwo ɔhɔdwule suakpole ne mɔɔ bikye Zalɛtan mɔɔ bɛfɛlɛ ye Adam la. Nyiakɛ azule ne mɔɔ kɔgua Nyevile Wulera ne anu la sesanle yɛle resee, na menli ne luale azɛlɛ resee zo pɛle, wɔ ɛleka mɔɔ bikye Gyɛleko la.

¹⁷ Na sɛlɛvolɛma ne mɔɔ zo Ɛdɛnkɛma Ngyekyeleɛ Ɛlɛka ne la gyinlanle azɛlɛ resee zo wɔ azule ne avinli, wɔ mekɛ mɔɔ ɛnee Yizilayɛma ɛlɛpɛ azule ne la. Sɛlɛvolɛma ne gyinlanle bɛ gyakɛ anu ɛkɛ ne toonwo Yizilayɛma amuala wiele pɛ kɔ sunvoa.