Dwɔhyua Buluku ne 24 - BAEBOLO ANZƐƐ BULUKU NWUANZANWUANZA

Dwɔhyua tendɛ ahile Yizilayɛma wɔ Hyikɛm

¹ Dwɔhyua manle Yizilayɛ mbusua ekpunli ekpunli ne mɔ amuala yiale Hyikɛm. Ɔvɛlɛle mgbanyima ne mɔ, mbusua mgbanyinli nee, ndɛnebuavolɛma ne mɔ, yɛɛ Yizilayɛ mbɔlɔba kɔsɔɔti ɔmanle bɛrayiale Nyamenle duma nu wɔ Hyikɛm.

² Dwɔhyua zele menli ne amuala kɛ, “Kɛ Ɛdɛnkɛma, Yizilayɛ Nyamenle ne se la ɛne: ‘Mekɛ bie mɔɔ ɛraze ɛhɔ la bɛ nlenya mɔ dɛnlanle Azule Yufileti anzi lɔ na bɛzonlenle awozonle. Bɛ nlenya mɔ zɔhane anu ko a le Ebileham nee Neehɔ bɛ ze Tilaa.

³ Na menyele bɛ nlenya Ebileham menvile azɛlɛ ne mɔɔ la Azule Yufileti ne anzi lɔ la azo, na mengilele ye Keena azɛlɛ ye amuala. Memanle ɔ sa zo dale. Memanle ɔwole Ayezeke,

⁴ na Ayezeke wole Gyekɔbo nee Yisɔ. Menvale Yidɔm azɛlɛ ne mɔɔ la awoka ne mɔ azo lɔ la memanle Yisɔ kɛ ɔva ɔdɛnla zolɛ, na bɛ nlenya Gyekɔbo nee ɔ mra ne mɔ hɔle Yigyibiti.

⁵ Nzinlii menzoanle Mosisi nee Aalɔn, na mengyegyele Yigyibitima kpole kpalɛ. Na menyele bɛmɛ menvile ɛkɛ;

⁶ menyele bɛ nlenya mɔ menvile Yigyibiti, na Yigyibitima vale ɛlɔnema mɔɔ dede mgbɔnwɔ zo nee konle ehwili nu la doale bɛ ndinlizo. Mɔɔ bɛ nlenya mɔ dwule Ndɔ Nyevile ne anloa la

⁷ bɛzunle bɛvɛlɛle me kɛ memboa bɛ, na menvale awozinli mendole bɛ nee Yigyibitima avinli. Memanle nyevile azɛlɛkye bule guale bɛ nwo zo na bɛwule. Bɛze mɔɔ menvale menyɛle Yigyibitima la. “ ‘Bɛdɛnlanle ɛsɛlɛ ne azo bɛhyɛle dɔɔnwo.

⁸ Akee menvale bɛ membale Amɔlema azɛlɛ zo wɔ Dwɔdan aduduleɛ. Amɔlema nee bɛ honle, noko memanle bɛlile Amɔlema anwo zo konim. Bɛvale Amɔlema azɛlɛ ne, na mɔɔ bɛkɛze kɛ bɛkɔ bɛ nyunlu la ɛnee melɛsɛkye bɛ kpɔvolɛma ne meamaa bɛ.

⁹ Akee Zepɔ ara Balake, mɔɔ le Mowabe belemgbunli ne, ɔdaye ɔ nee bɛ rahonle. Ɔmanle Biyɔ ara Beelam dele na ɔzɛlɛle ye kɛ ɔhye bɛ sili.

¹⁰ Na meandie Beelam, yemɔti ɔyilale bɛ; adenle ɛhye azo yɛɛ mempenle menliele bɛ ngoane wɔ Balake asa anu a.

¹¹ Bɛpɛle Azule Dwɔdan ne bɛrale Gyɛleko. Gyɛlekoma nee bɛ honle; zɔhane ala yɛɛ Amɔlema, Pɛlɛzema, Keenama, Hɛtema, Gɛgahyema, Haevaema, yɛɛ Gyibɛsema noko nee bɛ honle a. Na memanle bɛlile bɛ muala bɛ nwo zo konim.

¹² Mekɛ mɔɔ bɛ nee Amɔle arelemgbunli nwiɔ ne ko la, membɔle bɛ ɛlɔnema ne asande, amaa bɛadu bɛ ɛkɛ ne. Tɛ bɛ anwosesebɛ anzɛɛ asɛɛ bɛze konle nye zo la ati ɔ. (Bɛ konle dadeɛ nee bɛ ɛda ne mɔ anyɛ ɛhwee.)

¹³ Memanle bɛ azɛlɛ mɔɔ tɛ bɛ a bɛbule ye ɛhoayelɛ la, nee azuamgbole mɔɔ tɛ bɛ a bɛkyekyele la. Kɛkala, bɛde zolɛ yɛɛ bɛlɛdi vanye ma nee ɔlivi ma wɔ mbaka mɔɔ tɛ bɛ a bɛluale la azo.’ ”

¹⁴ Dwɔhyua vale zɔle zolɛ kɛ, “Ye zɔhane ati bɛli Ɛdɛnkɛma eni na bɛzonle ye nɔhalɛ nu. Awozonle ne mɔ mɔɔ bɛ nlenya mɔ zonlenle bɛ wɔ Mɛsɔpɔteemea nee Yigyibiti la, bɛgua bɛ lɔ na bɛzonle Ɛdɛnkɛma angomekye.

¹⁵ Saa bɛ kunlu ɛndwo kɛ bɛkɛzonle ye a, ɛnee ɛnɛ demua ye, bɛhile mɔɔ bɛkɛzonle ye la, awozonle ne mɔ mɔɔ bɛ nlenya mɔ zonlenle bɛ wɔ Mɛsɔpɔteemea la anzɛɛ saa Amɔlema mɔɔ bɛ azɛlɛ zo a bɛde la awozonle ne mɔ a. Na mame, me nee me sua nu amra, yɛbazonle Ɛdɛnkɛma.”

¹⁶ Yizilayɛma ne buale kɛ, “Yɛnrɛgyakyi Ɛdɛnkɛma yɛnrɛzonle awozonle fee!

¹⁷ Ɛdɛnkɛma yɛ Nyamenle ne a yele yɛ nlenya mɔ nee yɛdayɛ vile ahanra ɛzonlenlɛ nu wɔ Yigyibiti a, yɛɛ yɛnwunle nwanwane ninyɛne mɔɔ ɔyɛle la. Ɛdɛnkɛma bɔle yɛ nwo bane wɔ maanle maanle mɔɔ yɛluale bɛ avinli yɛrale la asa anu.

¹⁸ Mɔɔ yɛba maanle ye anu la, Ɛdɛnkɛma lumuale yɛ nyunlu, ɔvoanle Amɔlema mɔɔ de ɛke la amuala. Yemɔti yɛdayɛ yɛbazonle Ɛdɛnkɛma; yemɔ a ɔle yɛ Nyamenle a.”

¹⁹ Dwɔhyua zele menli ne mɔ kɛ, “Bɛnrɛhola Ɛdɛnkɛma sonle! Ɔle Nyamenle Nwuanzanwuanza yɛɛ ɔnrɛva bɛ ɛtane ɔnrɛhyɛ bɛ. Ɔngulo ahola ɛzilɛ,

²⁰ yemɔti saa bɛgyakyi ye na bɛkɔsonle nyamenle gyɛne biala anzɛɛ awozonle a, ɔbahakyi ɔ nzi yeazi bɛ na yeadea bɛ. Ɔnvane ɔ nwo kɛ yeyɛ kpalɛ yemaa bɛ ɛlɛ, ɔbazɛkye bɛ.”

²¹ Yizilayɛma ne hanle hilele Dwɔhyua kɛ, “Yɛmɛ, yɛtua yɛ nzo! Yɛbazonle Ɛdɛnkɛma.”

²² Dwɔhyua zele bɛ kɛ, “Bɛdabɛ bɛdi daselɛ kɛ Ɛdɛnkɛma ala a bɛbazonle ye a.” Bɛbuale ye kɛ, “Ɛhɛe, yɛdi daselɛ.”

²³ Dwɔhyua zele bɛ kɛ, “Ɛnee bɛvuandi awozonle ne mɔ mɔɔ bɛlɛ la bɛgua, na bɛvua bɛhile Ɛdɛnkɛma, Yizilayɛ Nyamenle ne kɛ bɛbali nɔhalɛ bɛamaa ye.”

²⁴ Menli ne zele Dwɔhyua kɛ, “Yɛbazonle Ɛdɛnkɛma yɛ Nyamenle ne. Yɛbali ye mɛla ne mɔ azo.”

²⁵ Kenle ko ne Dwɔhyua nee menli ne yɛle ngyehyɛlɛ wɔ Hyikɛm na ɔvale mɛla ɔmanle bɛ kɛ bɛli zolɛ.

²⁶ Dwɔhyua hɛlɛle mɛla ne mɔ wɔ Nyamenle Mɛla Buluku ne anu. Akee ɔvale bolɛ ko ɔdole oku baka kpole ne mɔɔ gyi Ɛdɛnkɛma Ɛleka Nwuanzanwuanza ne la abo,

²⁷ na ɔzele Yizilayɛma amuala kɛ, “Bolɛ ɛhye bayɛ yɛ daselɛ. Yede edwɛkɛ mɔɔ Ɛdɛnkɛma ɛha ɛhile yɛ la amuala. Zɔhane ati ɔbayɛ daselɛ yeatia bɛ kɛ bɛkɛho bɛkɛtia bɛ Nyamenle ne a.”

²⁸ Na Dwɔhyua manle menli ne mɔ hɔle, awie biala ziale hɔle ɔdaye ye sua zo.

Dwɔhyua nee Ɛlieza ewule

²⁹ Ɛhye anzi, Ɛdɛnkɛma sonvolɛ Dwɔhyua, Nɛn ara ne wule. Ɔlile ɛvolɛ ɛya, ɛvolɛ bulu.

³⁰ Bɛziele ye wɔ ɔdaye ye azɛlɛ ɛdeɛ ne azo wɔ Temenate Sila, wɔ Geeyahye Boka ne sɔlɔ, wɔ Yifelaem maanzinli nu awoka ne mɔ azo.

³¹ Mɔɔ ɛnee Dwɔhyua de aze la, Yizilayɛma zonlenle Ɛdɛnkɛma, ye ewule ne anzi, mɔɔ ɛnee mgbanyinli ne mɔ mɔɔ nwunle debie biala mɔɔ Ɛdɛnkɛma yɛle manle Yizilayɛma la de aze la, menli ne hɔle zolɛ zonlenle Ɛdɛnkɛma.

³² Yizilayɛma vale Dwosefi mbowule vile Yigyibiti rale, na bɛraziele ye wɔ Hyikɛm wɔ azɛlɛ ne mɔɔ Gyekɔbo dɔle wɔ Heemɔ amra mrenya ne mɔ lɔ la azo. Heemɔ le Hyikɛm ɔ ze, na bɛdɔle azɛlɛ ne dwɛtɛ fufule ɛya. Azɛlɛ zɔhane, Dwosefi abo zo amra a vale a.

³³ Aalɔn ara Ɛlieza wule na bɛziele ye wɔ Gebɛya. Gebɛya le sua wɔ Yifelaem maanzinli nu awoka ne mɔ azo. Ɛkɛ ne azɛlɛ ne, bɛvale bɛmanle ɔ ra Fenɛhaze.