Dwɔhyua Buluku ne 21 - BAEBOLO ANZƐƐ BULUKU NWUANZANWUANZA

Livae azuamgbole ne mɔ

¹ Livae abusua ekpunli ne anu mgbanyinli hɔle sɛlɛvolɛ Ɛlieza, Nɛn ara Dwɔhyua, nee mgbanyinli mɔɔ gyigyi Yizilayɛ mbusua ne mɔ ati la ɛkɛ

² wɔ Hyaelo mɔɔ wɔ Keena azɛlɛ zo la, na bɛzele bɛ kɛ, “Ɛdɛnkɛma luale Mosisi anwo zo zele kɛ bɛmaa yɛ azuamgbole bɛmaa yɛdɛnla zolɛ, yɛɛ azɛlɛ mɔɔ yɛ nee yɛ nyɛmoa yɛbadidi zolɛ la, wɔ bɛ azɛlɛ ne mɔ azo.”

³ Yemɔti ɔlua Ɛdɛnkɛma edwɛkɛ ne azo, Yizilayɛma manle Livaema azuamgbole nee nwolɛ azɛlɛ mɔɔ bɛbadidi zolɛ la wɔ bɛ azɛlɛ ne mɔ azo.

⁴ Livae abusua ekpunli ne anu amra mɔɔ lumuale nyianle bie la a le Kohate asa azo ne. Abusua ekpulike ɛhye le sɛlɛvolɛ Aalɔn abo zo amra, yɛɛ bɛmanle bɛ azuamgbole bulu nee nsa wɔ Dwuda, Semɛyɔn, nee Bɛngyaman azɛlɛ ne mɔ azo.

⁵ Kohate asa azo mɔɔ hale la nyianle azuamgbole bulu wɔ Yifelaem, Dan, nee Manasɛ Adɔleɛ azɛlɛ ne mɔ azo.

⁶ Gɛhyɔn asa azo nyianle azuamgbole bulu nee nsa wɔ Yesakaa, Ahya, Nafetalae, nee Manasɛ Aduduleɛ azɛlɛ ne mɔ azo.

⁷ Mɛlɛlae asa azo nyianle azuamgbole bulu nee nwiɔ wɔ Wulubɛn, Gaade, nee Zɛbulɛn azɛlɛ ne mɔ azo.

⁸ Bɛguale nzeleba kolaa na Yizilayɛma ava azuamgbole ɛhye mɔ nee nwolɛ azɛlɛ mɔɔ bɛdidi zolɛ la amaa Livaema, kɛmɔ Ɛdɛnkɛma luale Mosisi anwo zo hanle la.

⁹ Azuamgbole mɔɔ bɛvale bɛ wɔ Dwuda nee Semɛyɔn azɛlɛ ne mɔ azo bɛmanle

¹⁰ Aalɔn abo zo amra mɔɔ le Kohate asa azo ne mɔɔ bɔ Livae abusua ekpunli ne bie la aluma ɛne: bɛmɛ a bɛlumuale bɛnyianle azuamgbole ne mɔ bie a.

¹¹ Bɛnyianle Aaba (Aaba le Anake ɔ ze), ɛnɛ bɛfɛlɛ sua ne Hibulɔn; ɔwɔ Dwuda maanle nu awoka ne mɔ azo, yɛɛ nwolɛ adidileka.

¹² Na ɛnee bɛva suakpole ne kpɔkɛ ne nee namunamu mɔɔ zuozua ye la bɛmaa Kalɛbe mɔɔ le Gyɛfɛni ara ne dɛbadɛba kɛ ye ɛdeɛ ɔ.

¹³ Bɛvale azuamgbole ɛhye mɔ nee Hibulɔn (Hibulɔn le ɛvealeka),

¹⁴ Gyatɛ, Ɛhyetɛmowa,

¹⁵ Hɔlɔn, Dibɛ,

¹⁶ Eyen, Gyɛta, yɛɛ Bɛte Hyimɛhye nee nwolɛ adidileka; bɛle azuamgbole ngɔnla. Bɛvale bɛ wɔ Dwuda nee Semɛyɔn maanzinli ne mɔ anu.

¹⁷ Bɛmanle bɛ azuamgbole nna wɔ Bɛngyaman maanzinli nu: bɛmɛ a le Gebɛyɔn, Giba,

¹⁸ Anato, yɛɛ Alemɔn, nee nwolɛ adidileka.

¹⁹ Azuamgbole bulu nee nsa, nee nwolɛ adidileka yɛɛ bɛvale bɛmanle sɛlɛvolɛma ne a. Sɛlɛvolɛma ne le Aalɔn abo zo amra.

²⁰ Livae abusua ekpunli ne anu amra mɔɔ le Kohate asa azo mɔɔ hale la nyianle azuamgbole ne bie wɔ Yifelaem maanzinli nu.

²¹ Bɛle azuamgbole nna. Bɛmɛ a le Hyikɛm nee nwolɛ adidileka, ɔwɔ Yifelaem awoka ne mɔ azo (ɔle ɛvealeka), Gizɛ,

²² Kebezeeyem, yɛɛ Bɛte Hɔlɔn nee azɛlɛ mɔɔ bɛdidi zolɛ la.

²³ Wɔ Dan maanzinli nu, bɛnyianle azuamgbole nna: Ɛletɛki, Gebɛtɔn,

²⁴ Ayegyalɔn, yɛɛ Gatelemɔn, nee nwolɛ adidileka.

²⁵ Manasɛ Adɔleɛ maanzinli nu noko, bɛnyianle azuamgbole nwiɔ: Teeyanake nee Gatelemɔn, nee nwolɛ adidileka.

²⁶ Kohate asa azo ɛhye mɔ nyianle azuamgbole bulu, nee azɛlɛ mɔɔ bɛdidi zolɛ la.

²⁷ Livae abusua ekpunli ne anu amra mɔɔ le Gɛhyɔn asa azo ne nyianle azuamgbole nwiɔ: Golan mɔɔ wɔ Beehyan (ɔle ɛvealeka) nee Bɛɛhyetɛla, nee nwolɛ azɛlɛ mɔɔ bɛdidi zolɛ la.

²⁸ Yesakaa maanzinli nu, bɛnyianle azuamgbole nna: Kaehyɔn, Dabɛlate,

²⁹ Gyaamutu, yɛɛ Ɛnganem, nee azɛlɛ mɔɔ bɛdidi zolɛ la.

³⁰ Ahya maanzinli nu, bɛnyianle azuamgbole nna: Mehyale, Abedɔn,

³¹ Hɛlekate, yɛɛ Rilihɔbo, nee nwolɛ adidileka.

³² Nafetalae maanzinli nu, bɛnyianle azuamgbole nsa: Kidɛhye mɔɔ wɔ Galeli (ɔle ɛvealeka), nee nwolɛ adidileka, Hamotu Dɔɔ, yɛɛ Kaatan, nee nwolɛ adidileka.

³³ Gɛhyɔn asa azo ne noko nyianle azuamgbole bulu nee nsa, nee nwolɛ adidileka.

³⁴ Livae abusua ekpunli ne anu amra mɔɔ hale la a le Mɛlɛlae asa azo ne. Bɛnyianle azuamgbole nna wɔ Zɛbulɛn maanzinli nu: Dwɔkenɛyam, Kaata,

³⁵ Demena, yɛɛ Neehalale, nee nwolɛ adidileka.

³⁶ Wɔ Wulubɛn maanzinli nu, bɛnyianle azuamgbole nna: Bizɛ, Gyeehaze

³⁷ Kedɛmo, yɛɛ Mɛfeeyate, nee nwolɛ adidileka.

³⁸ Gaade maanzinli nu noko, bɛnyianle azuamgbole nna: Releemɔto mɔɔ wɔ Geleade (ɔle ɛvealeka), nee nwolɛ adidileka, Meehaneeyem,

³⁹ Hɛhyebɔn, yɛɛ Gyeezɛ, nee nwolɛ adidileka.

⁴⁰ Yemɔti Mɛlɛlae asa azo ne nyianle azuamgbole bulu nee nwiɔ.

^41-42 Azɛlɛ mɔɔ Yizilayɛma ne nyianle ye la, azuamgbole mɔɔ Livaema nyinle wɔ nu la amuala le abulanla nee mɔtwɛ, nee nwolɛ adidileka.

Yizilayɛma fa azɛlɛ ne ayɛ bɛ ɛdeɛ

⁴³ Yemɔti Ɛdɛnkɛma vale azɛlɛ ne amuala manle Yizilayɛma, kɛmɔ ɔvale ɔbɔle bɛ nlenya mɔ ɛwɔkɛ la. Akee mɔɔ bɛ sa hanle ye la, bɛdɛnlanle ɛkɛ ne kpɔkpɔ.

⁴⁴ Ɛdɛnkɛma manle bɛ anzonudwolɛ wɔ bɛ azɛlɛ ne azo, kɛmɔ ɛwɔkɛ ne mɔɔ ɔbɔle bɛ nlenya mɔ la se la. Bɛ kpɔvolɛma ne anu ko bɔbɔ angola bɛ nyunlu gyinla, ɔboalekɛ Ɛdɛnkɛma manle bɛlile konim wɔ bɛ muala bɛ nwo zo.

⁴⁵ Ɛdɛnkɛma lile ɛwɔkɛ biala mɔɔ ɔbɔle Yizilayɛma la azo.