Dwɔhyua Buluku ne 15 - BAEBOLO ANZƐƐ BULUKU NWUANZANWUANZA

Azɛlɛ mɔɔ bɛvale bɛmanle Dwuda la

¹ Dwuda abusua ekpunli ne nyianle azɛlɛ ɛhye: ɔwɔ mɔɔ kɔne nyevile nu la na ɔdwu Zen ɛsɛlɛ ne anloa wɔ ye nyiakɛ kpalɛ ɔkɔkpula Yidɔm ɛweɛne zo.

² Ye nyiakɛ ɛweɛne ne vi Nyevile Ngyenle ne nyiakɛ ebolo ne anloa ɔkɔ aze.

³ Ɔvi Akelabem Bɔnza ne nyiakɛ ɔkɔ toonwo ɔkɔdwu Zen, ɔlua Keedɛhye Baanɛya nyiakɛ, ɔpɛ nu Hɛzelɔn, ɔfo ɔkɔ Edaa, ɔbele ɔkɔ Kaakaa,

⁴ ɔkɔ Azemɔn, ɔlua azudenle ne mɔɔ wɔ Yigyibiti ɛweɛne zo la anloa toonwo ɔkɔgua ye Mɛdetɛlenia Nyevile ne anloa. Ɛnee Dwuda azɛlɛ ne, ye nyiakɛ ɛweɛne ne ɛne.

⁵ Aduduleɛ ɛweɛne ne a le Nyevile Ngyenle ne, ɔkɔ toonwo ɔkɔdwu tandane ne anu ebolo ne mɔɔ Dwɔdan ne se gua nu la anloa. Sɔlɔ ɛweɛne ne bɔ ɔ bo wɔ ebolo ɛhye anu,

⁶ ɔlua Bɛte Hɔgela, ɔfa ye boka tɛtɛlɛ ne mɔɔ keda Dwɔdan Bɔnza ne azo la anwo. Akee ɔfa ye ɛkɛ ne ɔkɔ ye anwuma, ɔkɔdwu Bohan Bolɛ ne anwo (Bohan le Wulubɛn ara),

⁷ ɔvi Ngyegyelɛ Bɔnza ɔkɔ Dibɛ, na yeabele ye ɛbɔ nu yeavinde Gelegale ɛleka mɔɔ nee Adɛmem anye bɔ zolɛ la, wɔ bɔnza ne nyiakɛ. Akee ɔlua Ɛnhyimɛhye azule ne anloa, ɔdwu Ɛnlogɛle.

⁸ Akee ɛweɛne ne dua Henɛm Bɔnza wɔ boka ne mɔɔ bɛkyekyele Gyibɛsema suakpole Gyɛlusalɛm zolɛ la nyiakɛ. Ɛweɛne ne akee kɔdua boka ne azo wɔ Henɛm Bɔnza ne adɔleɛ, ɔkɔsɔ Relɛfeeyem Bɔnza ne sɔlɔ.

⁹ Ɔvi ɛkɛ ne ɔkɔ Nɛfetowa Nzubula ne mɔ azo, ɔdwu azuamgbole ne mɔɔ bikye Yifolɔn Boka la. Ɔbele ɛkɛ ne ɔkɔ Beeyala (anzɛɛ Keleate Gyialem)

¹⁰ na ɔfa ye wɔ Beeyala adɔleɛ ɔkɔ Siyɛ wɔ awoka ne mɔ azo lɔ, ɔlua Gyialem Boka (anzɛɛ Kyɛsalɔn) ne sɔlɔ, ɔtolo ɔkɔ Bɛte Hyimɛhye, ɔpɛ nu Temena.

¹¹ Ɛweɛne ne akee lua boka ne azo wɔ Ɛkelɔn sɔlɔ, ɔbele ɔkɔ Hyekɔlɔn, ɔpɛ nu Beeyala Boka, ɔdwu Gyamenea, ɔkɔgua ye wɔ Mɛdetɛlenia Nyevile ne anloa.

¹² Mɛdetɛlenia Nyevile ne a le adɔleɛ ɛweɛne ɛdeɛ ne a. Ɛweɛne ɛhye mɔ anu yɛɛ Dwuda abusua ekpunli ne anu amra dɛnlanle a.

Kalɛbe ko ava Hibulɔn nee Dibɛ

¹³ Kɛmɔ Ɛdɛnkɛma zele Dwɔhyua la, ɔvale Dwuda abusua ekpunli ne azɛlɛ ne bie ɔmanle Kalɛbe mɔɔ le Gyɛfɛni mɔɔ ɔdaye ɔbɔ Dwuda abusua ne bie la ara ne. Kalɛbe nyianle Hibulɔn, suakpole ne mɔɔ le Enake ɔ ze Aaba ɛdeɛ la.

¹⁴ Kalɛbe dule Enake abo zo amra ne wɔ suakpole ne azo. Bɛmɛ a le Hyihyae, Ahaeman, yɛɛ Talemae nee bɛ sua nu amra.

¹⁵ Ɔvi ɛkɛ ne la ɔ nee Dibɛ amra hɔhonle. (Suakpole ɛhye, anrɛɛ bɛfɛlɛ ye Keleate Sifɛ.)

¹⁶ Kalɛbe hanle kɛ, “Nrenya biala mɔɔ kɛhola kɛho kɛva Keleate Sifɛ la, mebava me ra raalɛ Akesa meamaa yeagya ye.”

¹⁷ Kalɛbe adiema nrenya Kinaze ara Ɔteneɛle a honle vale suakpole ne a, yemɔti Kalɛbe vale ɔ ra raalɛ Akesa manle ɔgyale ye.

¹⁸ Kenle mɔɔ bɛdie ye atɔfolɛ la, Ɔteneɛle zele ɔ ye kɛ ɔbiza ɔ ze ɔmaa ɔmaa ye azɛlɛ. Akesa vi ye asoaso ne azo dwule aze, na Kalɛbe bizale ye deɛ mɔɔ ɔkpondɛ la.

¹⁹ Ɔbuale ye kɛ, “Mekpondɛ azɛlɛ mɔɔ nzule dɔɔnwo wɔ zolɛ la, ɔboalekɛ azɛlɛ mɔɔ wɔva wɔmaa me la di nzule nwo ehyia.” Yemɔti Kalɛbe vale ɛleka bie mɔɔ nzubula dɔɔnwo wɔ la manle ye wɔ azɛlɛ ne sɔlɔ nee ye nyiakɛ.

Dwuda azuamgbole ne mɔ

²⁰ Azɛlɛ ne mɔɔ Dwuda abusua ekpunli ne nyianle ye yɛle bɛ ɛdeɛ la ɛne:

²¹ Azuamgbole mɔɔ wɔ azɛlɛ ne nyiakɛ kpalɛ mɔɔ le bɛ ɛdeɛ la a le azuamgbole ne mɔ mɔɔ bikye Yidɔm ɛweɛne ne azo la. Bɛmɛ a le Kabezii, Yidɛ, Gyega,

²² Kaenaa, Daemona, Adeeda,

²³ Kidɛhye, Heezɔ, Yetenan,

²⁴ Zefe, Tilɛm, Bɛyeelo,

²⁵ Heezɔ Hadata, Kɛlio Hɛzelɔn (anzɛɛ Heezɔ),

²⁶ Emam, Hyima, Moleeda,

²⁷ Heezaa Gada, Hɛhyemɔn, Bɛtepilɛte,

²⁸ Heezaa Hyuale, Biyɛhyiba, Bezeyotaya,

²⁹ Beeyala, Ayem, Ezɛm,

³⁰ Ɛletolade, Kyɛsele, Hɔɔma,

³¹ Zekelage, Mademana, Sansana,

³² Lɛbeeyo, Hyelehem, Eyen, yɛɛ Relemɔn: bɛ muala bɛle azuamgbole abulanwiɔ nee ngɔnla, nee bɛ namunamu mɔɔ zuozua bɛ la.

³³ Azuamgbole mɔɔ wɔ maanle ne anu awoka ngyikyi ne mɔ azo la a le Ɛhyeteeyɔlo, Zola, Ahyena,

³⁴ Zanowa, Ɛnganem, Tapua, Yinam,

³⁵ Gyaamutu, Adulam, Soko, Azika,

³⁶ Hyaleeyem, Gɛdila, yɛɛ Gɛdiloteeyem: bɛ muala bɛle azuamgbole bulu nee nna, nee bɛ namunamu mɔɔ zuozua bɛ la.

³⁷ Eza Zinan, Hadahya, Megedalegade,

³⁸ Daelian, Mezepa, Dwɔketii,

³⁹ Leekehye, Bɔzokate, Ɛgelɔn,

⁴⁰ Kabɔn, Laaman, Ketelehye,

⁴¹ Gɛdilo, Bɛtedeegɔn, Neeyama, yɛɛ Makidaa: azuamgbole bulu nee nsia, nee namunamu mɔɔ zuozua bɛ la boka nwolɛ.

⁴² Akee Lebena, Yitɛ, Ahyan,

⁴³ Yefeta, Ahyena, Nɛzebe,

⁴⁴ Kiyaela, Akezebe, yɛɛ Malihya: azuamgbole ngɔnla, nee bɛ namunamu boka nwolɛ.

⁴⁵ Ɛkelɔn nee ye azua nee namunamu,

⁴⁶ yɛɛ azuamgbole nee namunamu mɔɔ bikye Ahyedɔdo, ɔvi Ɛkelɔn toonwo mɔɔ kɔgua Mɛdetɛlenia Nyevile ne anloa la boka nwolɛ.

⁴⁷ Ahyedɔdo nee Gaza nee bɛ namunamu toonwo mɔɔ kɔkpula azule ne mɔɔ la Yigyibiti ɛweɛne zo, ɔkɔ Mɛdetɛlenia Nyevile ne anloa la boka nwolɛ.

⁴⁸ Wɔ awoka ne mɔ azo, Hyeemɛ, Gyatɛ, Soko,

⁴⁹ Dana, Keleate Sifɛ (anzɛɛ Dibɛ),

⁵⁰ Anabe, Ɛhyetɛmowa, Enim,

⁵¹ Gohyɛn, Hɔlɔn, yɛɛ Gaelo: azuamgbole bulu nee ko, nee namunamu mɔɔ zuozua bɛ la boka nwolɛ.

⁵² Alabe, Dumaa, Ɛhyan,

⁵³ Gyeenɛm, Bɛte Tapua, Afika,

⁵⁴ Hɛmeta, Hibulɔn, yɛɛ Ziyɔ: azuamgbole ngɔnla nee bɛ namunamu boka nwolɛ.

⁵⁵ Meeyɔn, Kamɛle, Zefe, Gyɛta,

⁵⁶ Gyɛzɛli, Dwɔkedɛyam, Zanowa,

⁵⁷ Keen, Gebɛya, yɛɛ Temena: azuamgbole bulu nee bɛ namunamu boka nwolɛ.

⁵⁸ Halehɛle, Bɛtezuli, Gidɔ,

⁵⁹ Meeyala, Bɛtano, yɛɛ Ɛletɛkɔn: azuamgbole nsia, nee bɛ namunamu boka nwolɛ.

⁶⁰ Keleate Beeyale (anzɛɛ Keleate Gyialem) nee Laba: azuamgbole nwiɔ, nee bɛ namunamu, bɛ muala bɛboka nwolɛ.

⁶¹ Akee wɔ ɛsɛlɛ ne azo, Bɛte Alaba, Meden, Sɛkeeka,

⁶² Nebehyan, Ngyenle Suakpole, yɛɛ Ɛngidae: azuamgbole nsia, nee namunamu mɔɔ zuozua bɛ la boka nwolɛ.

⁶³ Na Dwudama angola andu Gyibɛsema wɔ Gyɛlusalɛm. Ɛnɛ nee ɛnɛ ala Gyibɛsema nee Dwudama a de a.