Dwɔhyua Buluku ne 13 - BAEBOLO ANZƐƐ BULUKU NWUANZANWUANZA

Azɛlɛ mɔɔ ɛha mɔɔ ɔwɔ kɛ Yizilayɛma die la

¹ Dwɔhyua akee ɛli ɛvolɛ dɔɔnwo na yeyɛ kpanyinli kpalɛ. Ɛdɛnkɛma zele ye kɛ, “Wɔnyi, wɔli ɛvolɛ dɔɔnwo, noko azɛlɛ dɔɔnwo tɛbɔ ɛkɛ mɔɔ ɔwɔ kɛ bɛfa bɛyɛ bɛ ɛdeɛ a.

² Azɛlɛ zɛhae mɔ tɛbɔ ɛkɛ: Filisitiama nee Gɛhyɔnoma azɛlɛ ne amuala,

³ nee Evem azɛlɛ ne (mɔɔ vi azudenle Saehɔn ne anloa wɔ Yigyibiti aduduleɛ, ɔlua ɛbɔ nu ɔkɔdwu Ɛkelɔn ɛweɛne zo, mɔɔ bɛfa ye kɛ ɔle Keenama azɛlɛ la; Filisitia arelemgbunli nnu dɛnlanle Gaza, Ahyedɔdo, Ahyekɛlɔn, Gate, yɛɛ Ɛkelɔn).

⁴ Keenama azɛlɛ ne amuala yɛɛ Mɛɛla (mɔɔ le Saedɛnema azɛlɛ la) toonwo mɔɔ kɔdwu Efɛke wɔ Amɔlema ɛweɛne zo;

⁵ Gibale azɛlɛ ne, Lɛbanɔn azɛlɛ ne amuala mɔɔ di kɔ aduduleɛ, ɔvi Beeyalegade wɔ Hɛmɔn Boka ne nyiakɛ ɔfinde Heemate Ademgbolezo;

⁶ Saedɛnema mɔɔ de awoka ne mɔ azo la azɛlɛ ne, ɔvi Lɛbanɔn awoka ne mɔ anu mɔɔ kɔdwu Mezelɛfo Meeyem la amuala. Medame mebadu bɛ muala meavi azɛlɛ ne azo na meava meamaa Yizilayɛma. Ɔwɔ kɛ ɛkyɛ azɛlɛ ne ɛmaa Yizilayɛma, kɛmɔ meha mehile wɔ kɛ ɛyɛ la.

⁷ Kyɛ azɛlɛ ɛhye maa mbusua ngɔnla ne nee Manasɛ abusua ekpunli ne foa ko ne maa ɔyɛ bɛ ɛdeɛ bɔkɔɔ.”

Azɛlɛ ne mɔɔ la Dwɔdan Aduduleɛ la ɛhyɛlɛ

⁸ Wulubɛn nee Gaade mbusua ekpunli ne mɔ nee Manasɛ abusua ekpunli foa ko ne asa hanle azɛlɛ ne mɔɔ wɔ Azule Dwɔdan ne aduduleɛ la. Mosisi a vale manle bɛ a.

⁹ Bɛ azɛlɛ ne tɛlɛ dwu Alowɛ (wɔ Anɔn Bɔnza ne anloa) nee suakpole ne mɔɔ wɔ bɔnza ne avinli la, nee Midɛba boka ne mɔɔ azo le sɛsɛ la toonwo mɔɔ kɔdwu Daebɔn la.

¹⁰ Ɔkɔ toonwo ɔkɔdwu Amɔnoma ɛweɛne zo yɛɛ azuamgbole mɔɔ Amɔle belemgbunli Saehɔn ziele bɛ la. Belemgbunli zɔhane dɛnlanle Hɛhyebɔn.

¹¹ Geleade, Gɛhyɛ, yɛɛ Meeyaka azɛlɛ ne, Hɛmɔn Boka, yɛɛ Beehyan mɔɔ kɔ Salika la,

¹² Belemgbunli Ɔɔgo, mɔɔ ɔ ngome a ɔhale Relɛfeeyem menli ekpunli ne anu, na ɔlile belemgbunli wɔ Ahyetalo nee Ɛdelɛyae la belemgbunli maanle ne boka nwolɛ. Mosisi lile menli ɛhye mɔ anwo zo konim na ɔvoanle bɛ.

¹³ Noko Yizilayɛma anvoa Gɛhyɛma nee Meeyakama; kɛkala bɔbɔ bɛtɛte Yizilayɛma avinli.

¹⁴ Mosisi anva azɛlɛ ammaa Livae abusua ekpunli ne. Kɛmɔ Ɛdɛnkɛma zele Mosisi la, bɛ afoa nu ɛdeɛ a le azubɔlɛ ninyɛne ne mɔɔ bɛyela bɛabɔ azu bɛamaa Yizilayɛ Ɛdɛnkɛma Nyamenle ne la anu bie.

Wulubɛn azɛlɛ ɛdeɛ ne

¹⁵ Mosisi vale azɛlɛ ne manle Wulubɛn abusua ekpunli ne, kɛmɔ bɛ mrɛladane ne mɔ de la kɛ ɔle bɛ ɛdeɛ.

¹⁶ Bɛ azɛlɛ ne anloa pɛ Alowɛ (wɔ Anɔn Bɔnza ne anloa) nee suakpole ne mɔɔ wɔ bɔnza ne avinli la, nee azɛlɛ ne mɔɔ wɔ boka azo sɛsɛ ne mɔɔ bikye Midɛba la azo.

¹⁷ Hɛhyebɔn nee azuamgbole ne mɔ mɔɔ gua boka azo sɛsɛ ne azo: Daebɔn, Beemo-beeyale, yɛɛ Bɛte Beeyalemiyɔn amuala boka nwolɛ.

¹⁸ Akee Gyeehaze, Kidɛmo, Mɛfeeyate,

¹⁹ Keleateeyem, Sebema, Zɛlɛte Hyeehaa mɔɔ wɔ bɔnza ne anzi boka ne azo la,

²⁰ Bɛtepiyɔ. Pesega Boka ne ndololeɛ nu nee Bɛte Gyɛhyemo;

²¹ azuamgbole mɔɔ wɔ boka azo sɛsɛ ne azo la amuala, nee Belemgbunli Saehɔn mɔɔ le Amɔlenli ne mɔɔ dɛnlanle Hɛhyebɔn la belemgbunli maanle ne amuala. Mosisi lile Belemgbunli Saehɔn anwo zo konim, ɔlile Medean arelemgbunli mɔɔ le Yivae Rilikɛm, Zuuli, Huuli, yɛɛ Riliba noko anwo zo konim. Menli ɛhye mɔ nleanle azɛlɛ ne manle Belemgbunli Saehɔn.

²² Biyɔ mɔɔ bɔ menli munzule la ara Beelam ɔdaye ɔboka menli mɔɔ Yizilayɛma hunle bɛ la anwo.

²³ Azule Dwɔdan ne a le Wulubɛn abusua ekpunli ne adɔleɛ ɛweɛne a. Azuamgbole nee azua ngyikyi ɛhye mɔ a bɛvale bɛmanle Wulubɛn abusua ekpunli ne anu amra kɛ bɛva bɛ bɔkɔɔ a.

Gaade azɛlɛ ɛdeɛ ne

²⁴ Mosisi eza vale azɛlɛ ne bie manle Gaade abusua ekpunli ne kɛ bɛva.

²⁵ Bɛ azɛlɛ ne fa Gyeezɛ nee Geleade azuamgbole ne mɔ amuala, Amɔnoma azɛlɛ ne foa ko toonwo kɔkpula Alowɛ wɔ Relaba aduduleɛ afoa nu.

²⁶ Azɛlɛ ne eza bɔ ye wɔ Hɛhyebɔn, ɔtɛlɛ ɔkɔ Releemate Mezepa nee Bɛtonem, ɔvi Meehaneeyem ɔkɔ Lodiba ɛweɛne zo.

²⁷ Wɔ Dwɔdan Bɔnza ne anu noko, Bɛte Hɛlam, Bɛtenemela, Sɛko, yɛɛ Zeefɔn boka nwolɛ. Ɛhye mɔ a le Belemgbunli Saehɔn mɔɔ wɔ Hɛhyebɔn la belemgbunli maanle ne mɔɔ ɛha la a. Bɛ adɔleɛ ɛweɛne ne a le Azule Dwɔdan ne mɔɔ kɔkpula Galeli sɔlɔ la.

²⁸ Azuamgbole nee ngyikyi mɔɔ bɛvale bɛmanle Gaade abusua ekpunli ne kɛ bɛva la ɛne.

Manasɛ Aduduleɛ azɛlɛ ɛdeɛ ne

²⁹ Mosisi eza vale azɛlɛ ne bie manle Manasɛ abusua ekpunli foa ko ne mɔɔ ɛha la kɛ bɛ ɛdeɛ ɔ.

³⁰ Bɛ azɛlɛ ne tɛlɛ dwu Meehaneeyem nee Beehyan, ɔfa Belemgbunli Ɔɔgo mɔɔ de Beehyan la maanle ne, yɛɛ Gyeeyɛɛ namunamu abulasia ne amuala.

³¹ Geleade azɛlɛ ne foa ko, Ahyetalo, yɛɛ Ɛdelɛyae mɔɔ le Beehyan Belemgbunli Ɔɔgo azuamgbole wɔ ye maanle ne anu la boka nwolɛ. Bɛvale ɛhye mɔ amuala bɛmanle Manasɛ abusua ekpunli foa ko ne mɔɔ le ɔ ra Meekɛ asa azo la.

³² Mekɛ mɔɔ Mosisi wɔ ɛsɛlɛ ne azo wɔ Mowabe la yɛɛ ɔhyɛle azɛlɛ ne mɔɔ wɔ Gyɛleko aduduleɛ nee Dwɔdan la a.

³³ Na Mosisi anva azɛlɛ biala ammaa Livae abusua ekpunli ne. Ɔzele bɛ kɛ Yizilayɛ Ɛdɛnkɛma Nyamenle ne a le bɛ agyadeɛ a.