Dwɔhyua Buluku ne 10 - BAEBOLO ANZƐƐ BULUKU NWUANZANWUANZA

Bɛli Amɔlema anwo zo konim

¹ Gyɛlusalɛm Belemgbunli Adonaezidɛke dele kɛ Dwɔhyua ɛho ɛva Eyae, yebɔ sua ne bɔkɔɔ na yehu ye belemgbunli ne, kɛmɔ ɔyɛle Gyɛleko nee ye belemgbunli ne la. Eza ɔdele kɛ Gebɛyɔnoma nee Yizilayɛma ɛyɛ anzonudwolɛ ngyehyɛlɛ na ɔlua zolɛ Gebɛyɔnoma nee bɛ a de a.

² Ɛhye manle Gyɛlusalɛm belemgbunli ne zulole kpole, ɔboalekɛ Gebɛyɔn le suakpole mɔɔ zolɛ belemgbunli ne di munli a; ɔle kpole ɔtɛla Eyae yɛɛ eza ye menli ne mɔ ze konle nye zo kpalɛ.

³ Yemɔti Adonaezidɛke vale nrɛlaleɛ hɔmanle Hibulɔn Belemgbunli Hoham, Gyaamutu Belemgbunli Paelam, Leekehye Belemgbunli Gyafaya, yɛɛ Ɛgelɔn Belemgbunli Dibɛ kɛ,

⁴ “Gebɛyɔnoma nee Dwɔhyua yɛɛ Yizilayɛma ɛyɛ anzonudwolɛ ngyehyɛlɛ. Zɔhane ati bɛraboa me bɛmaa me nee Gebɛyɔnoma ɛhɔho.”

⁵ Yemɔti Amɔle arelemgbunli nnu ɛhye mɔ, Gyɛlusalɛm, Hibulɔn, Gyaamutu, Leekehye, yɛɛ Ɛgelɔn bɔle nu bɔle yiale Gebɛyɔn na bɛtetale ye kɛ bɛ nee Gebɛyɔnoma ko.

⁶ Gebɛyɔnoma zoanle manle bɛhɔzele Dwɔhyua wɔ Gelegale azokoɛleɛ ne kɛ, “Yɛmenle, mmaye yɛ ɛmaa! Bɛla ndɛndɛ baboa yɛ na die yɛ ngoane. Amɔle arelemgbunli mɔɔ wɔ awoka ne mɔ azo lɔ la ɛbɔ nu ɛra nee yɛ baho.”

⁷ Na Dwɔhyua nee ye ɛlɔnema ne amuala, nee ye menli mɔɔ ze konle nye zo kpalɛ la zile nu vi Gelegale hɔle.

⁸ Ɛdɛnkɛma zele Dwɔhyua kɛ, “Mmasulo bɛ na meva konimlilɛ memaa wɔ dɛbadɛba. Bɛ nuhua ko bɔbɔ ɛnrɛhola ɛ nyunlu gyinla.”

⁹ Zɔhane ati Dwɔhyua nee ye ɛlɔnema ne zile nu nɔe ne; bɛvi Gelegale bɛgyi zolɛ toonwo bɛhɔdwule Gebɛyɔn na bɛhɔlile Amɔlema nvunu.

¹⁰ Amɔlema nwunle Yizilayɛ ɛlɔnema ne la, Ɛdɛnkɛma manle ɛzulolɛ hanle bɛ na bɛ nye zo danle bɛ. Yizilayɛma hunle bɛ dɔɔnwo wɔ Gebɛyɔn ɛkɛ ne na bɛdoale bɛ ndinlizo, bɛlua Bɛte Hɔlɔn Boka ne ndololeɛ nu adenle zo toonwo bɛrale Azika nee Makidaa.

¹¹ Mekɛ mɔɔ Amɔlema nriandi Yizilayɛma wɔ Bɛte Hɔlɔn Boka ne ndololeɛ nu la, Ɛdɛnkɛma manle ezuawolɛ mgbole dɔle guale bɛ nwo zo toonwo bɛdwule Azika. Ezuawolɛ mgbole zɔhane mɔɔ dɔle la hunle Amɔlema dɔɔnwo dɛlale mɔɔ Yizilayɛma mumua ne hunle bɛ la.

¹² Kenle ko ne mɔɔ Ɛdɛnkɛma vale konimlilɛ ne manle Yizilayɛma la, Dwɔhyua nee Ɛdɛnkɛma dendɛle. Wɔ Yizilayɛma amuala anyunlu, Dwɔhyua zele kɛ, “Sɛnzɛne, mmatu ɛ bo ɛfi Gebɛyɔn, Siane, gyinla koonwu wɔ Ayegyalɔn Bɔnza.”

¹³ Na sɛnzɛne ne gyinlanle yɛɛ siane ne andu ɔ bo hɔkpulale kɛ Yizilayɛma asa homonle bɛ kpɔvolɛma ne anwo zo la. Bɛhɛlɛ ɛhye wɔ Gyahya Buluku ne anu. Sɛnzɛne ne gyinlanle anwomanyunlu na yeandɔ kenle ko ne.

¹⁴ Kenle zɔhane, bie ɛtɛsile ɛlɛ, yɛɛ ɔnrɛzi ɛlɛ, kɛ Ɛdɛnkɛma yɛle tieyɛ manle dasanli. Ɛdɛnkɛma ɔdaye a ɔhonle ɔmanle Yizilayɛma a.

¹⁵ Ɛhye anzi, Dwɔhyua nee ye ɛlɔnema ne ziale hɔle bɛ azokoɛleɛ ne wɔ Gelegale.

Dwɔhyua kye Amɔle arelemgbunli nnu ne

¹⁶ Amɔle arelemgbunli nnu ne nriandile la, bɛhɔveale bolɛ bɔne bie anu wɔ Makidaa.

¹⁷ Awie mɔ nwunle bɛ na bɛhɔhanle bɛhilele Dwɔhyua kɛ, “Yɛnwu kɛ Amɔle arelemgbunli nnu ne vea bolɛ bɔne bie anu wɔ Makidaa.”

¹⁸ Na Dwɔhyua zele bɛ kɛ, “Bɛhundo awolɛ mgbole bɛnyi bɔne ne. Bɛmaa menli ɛzinza ɛkɛ ne

¹⁹ na bɛmɛ, bɛmmatɛnla ɛkɛ. Bɛdoa bɛ kpɔvolɛma ne na bɛbu bɛ nzi bɛ nee bɛ ɛho; bɛmmamaa bɛkɔ bɛ azua ne mɔ azo. Ɛdɛnkɛma bɛ Nyamenle ne ɛye bɛ ɛmaa kɛ bɛli bɛ nwo zo konim.”

²⁰ Dwɔhyua nee Yizilayɛ ɛlɔnema ne hunle Amɔlema dɔɔnwo kpalɛ, mɔɔ asɛɛ bɛ bo zo ɛbɔ bɔkɔɔ a. Menli mɔɔ bɛ sa anga bɛ la a le bɛdabɛ mɔɔ bɛziale bɛhɔveale suakpole ne azo la.

²¹ Akee Dwɔhyua menli ne mɔ ziale rale ɔ nwo ɛkɛ ne wɔ Makidaa azokoɛleɛ ne. Awie biala ɛnle maanle ne anu mɔɔ dendɛle tiale Yizilayɛma a.

²² Akee Dwɔhyua zele kɛ, “Bɛdukue bɔne ne na bɛva arelemgbunli nnu ne bɛrɛla ɛke.”

²³ Zɔhane ati bɛdukuele bɔne ne na bɛvale Gyɛlusalɛm, Hibulɔn, Gyaamutu, Leekehye, yɛɛ Ɛgelɔn arelemgbunli ne mɔ bɛvindele.

²⁴ Bɛvale bɛ bɛrɛlɛle Dwɔhyua. Dwɔhyua vɛlɛle Yizilayɛ ɛlɔnema ne amuala na ɔzele bɛ safohyenlema ne mɔɔ nee bɛ a hɔle la kɛ bɛva bɛ gyakɛ bɛtietia arelemgbunli ne mɔ akɔme zo. Na bɛyɛle ye zɔhane.

²⁵ Akee Dwɔhyua zele safohyenlema ne kɛ, “Bɛmmasulo yɛɛ bɛmmamaa bɛ nwo bubu bɛ. Bɛgyinla ye mrenya zo na bɛmaa bɛ nwo ɛyɛ se, ɔluakɛ ɛhye yɛɛ Ɛdɛnkɛma bava ayɛ bɛ kpɔvolɛma mɔɔ bɛ nee bɛ baho la a.”

²⁶ Nzinlii akee Dwɔhyua hunle arelemgbunli ne mɔ na ɔhendɛhendanle bɛ wɔ mbaka nnu azo; bɛhendanle zolɛ toonwo nɔsolɛ.

²⁷ Mɔɔ sɛnzɛne ne ɛlɛkɔ ahɔdɔ la, Dwɔhyua manle bɛyeyele avunli ne mɔ na bɛvuandinle bɛ bɛguale bɔne ne mɔɔ ɛnee bɛvea nu la anu. Bɛhundole awolɛ mgbole bɛduale bɔne ne, na ɛnɛ nee ɛnɛ ala ɔtɛbɔ ɛkɛ.

Dwɔhyua ko ava Amɔle maanle ne dɔɔnwo

²⁸ Kenle ko ne Dwɔhyua honle vale Makidaa na ɔhyele ye belemgbunli ne ɔhunle ye nee awie biala mɔɔ wɔ suakpole ne azo la; ko bɔbɔ anga. Ɔyɛle Makidaa belemgbunli ne kɛ mɔɔ ɔyɛle Gyɛleko belemgbunli ne la.

²⁹ Ɛhye anzi, Dwɔhyua nee ye ɛlɔnema ne vi Makidaa hɔle Lebena na ɔ nee Lebenama hɔhonle.

³⁰ Ɛdɛnkɛma manle Yizilayɛma lile konim na bɛvale suakpole ne na bɛhyele belemgbunli ne noko. Bɛangyakyi sonla ko bɔbɔ; bɛhunle bɛ muala. Na Dwɔhyua yɛle belemgbunli ne kɛ mɔɔ ɔyɛle Gyɛleko belemgbunli ne la.

³¹ Ɛhye anzi, Dwɔhyua nee ye ɛlɔnema ne vile Lebena hɔle Leekehye. Bɛbɔle bɛyiale suakpole ne na bɛtetale ye bɛ nee menli mɔɔ wɔ zolɛ la honle.

³² Ye kenle nwiɔ ne azo Ɛdɛnkɛma manle Yizilayɛma lile Leekehyema anwo zo konim. Kɛmɔ bɛyɛle ye wɔ Lebena la, bɛangyakyi sonla ko bɔbɔ. Bɛhunle awie biala mɔɔ wɔ suakpole ne azo la.

³³ Belemgbunli Hɔlam mɔɔ vi Gizɛ la rale kɛ ɔbaboa Leekehyema, na Dwɔhyua bɛlɛle ye nee ye ɛlɔnema ne aze na ɔhunle bɛ muala; ko bɔbɔ anga.

³⁴ Bieko, Dwɔhyua nee ye ɛlɔnema ne vile Leekehye hɔle Ɛgelɔn; bɛbɔle bɛyiale ye na bɛtetale ɔdaye noko.

³⁵ Bɛhonle bɛvale ye wɔ kenle ko ne ala na bɛhunle awie biala kɛ mɔɔ bɛyɛle ye wɔ Leekehye la.

³⁶ Ɛhye anzi, Dwɔhyua nee ye ɛlɔnema ne vile Ɛgelɔn na bɛhɔle Hibulɔn, wɔ awoka ne mɔ azo lɔ; bɛtetale ye bɛ nee sua ne azo amra honle

³⁷ na bɛvale. Bɛhunle belemgbunli ne nee awie biala mɔɔ wɔ suakpole ne azo la; bɛzɛkyele azua mɔɔ bikye suakpole ne la. Dwɔhyua zɛkyele suakpole ne bɔkɔɔ kɛ mɔɔ ɔyɛle Ɛgelɔn la. Sonla ko bɔbɔ anga.

³⁸ Akee Dwɔhyua nee ye ɛlɔnema ne ziale bɛ nzi hɔtetale Dibɛ ɔ nee sua ne azo amra honle.

³⁹ Ɔvale sua ne na ɔhyele ye belemgbunli ne. Eza ɔvale azua mɔɔ zuozua suakpole ne la. Bɛhunle awie biala mɔɔ wɔ azua ne mɔ azo la. Dwɔhyua yɛle Dibɛ nee ye belemgbunli ne kɛ mɔɔ ɔyɛle Hibulɔn yɛɛ Lebena nee bɛ arelemgbunli ne mɔ la.

⁴⁰ Dwɔhyua honle vale maanle ne amuala. Arelemgbunli mɔɔ wɔ maanle ne anu awoka ne mɔ azo, nee mɔɔ wɔ aduduleɛ ndololeɛ ne mɔ anu, nee mɔɔ wɔ adɔleɛ awoka ne mɔ azo, nee bɛdabɛ mɔɔ bɛwɔ nyiakɛ maanle ne mɔ anu la amuala; yeanvavi sonla ko bɔbɔ; ɔhunle awie biala, kɛmɔ Ɛdɛnkɛma, Yizilayɛ Nyamenle ne zele kɛ bɛyɛ la.

⁴¹ Dwɔhyua honle vale maanle maanle ne mɔ; ɔbɔle ɔ bo ɔvile Keedɛhye Baanɛya wɔ nyiakɛ nehane ɔhɔkpulale Gaza mɔɔ bikye nyevile ne anloa la, nee Gohyɛn azɛlɛ ne sɔlɔ, ɔhɔkpulale Gebɛyɔn.

⁴² Dwɔhyua lile arelemgbunli ɛhye mɔ amuala anwo zo konim, ɔvale bɛ azɛlɛ ne, ɔboalekɛ Ɛdɛnkɛma, Yizilayɛ Nyamenle ne, honle manle Yizilayɛma.

⁴³ Ɛhye anzi, Dwɔhyua nee ye ɛlɔnema ne akee ziale rale bɛ azokoɛleɛ ne wɔ Gelegale.