Kɛlata mɔɔ bɛhɛlɛle bɛhɔmanle Hibuluma la 5 - BAEBOLO ANZƐƐ BULUKU NWUANZANWUANZA

¹ Sɛlɛvolɛ Kpanyinli biala, bɛye ye bɛfi menli avinli na bɛtu ye kɛ ɔgyinla bɛ gyakɛ anu wɔ Nyamenle anyunlu na ɔva bɛ ahyɛlɛdeɛ ne mɔ ɔbɔ azu ɔzɛlɛ ɛtanefakyɛ ɔmaa bɛ.

² Kɛmɔ ɔdaye mumua ne ɔtɔ sinli wɔ ndenle dɔɔnwo anu la ati, ɔmaa ɔ nee bɛdabɛ mɔɔ bɛnze nwolɛ bie na bɛvo la di ye bɛtɛɛ.

³ Eza kɛmɔ ɔtɔ sinli la ati, saa ɔbɔ azu a ɔwɔ kɛ ɔdumua ɔbɔ ye ɛtane nwo azu kolaa na akee yeabɔ bie yeamaa menli kɔsɔɔti wɔ bɛ ɛtane nwo.

⁴ Awie ko ɔdaye ɔngola ɔnyɛ ɔ nwo sɛlɛvolɛ kpanyinli. Bɛdua Nyamenle ɛvɛlɛlɛ zo a bɛyɛ sonla sɛlɛvolɛ kpanyinli a, kɛmɔ bɛyɛle Aalɔn la.

⁵ Zɔhane ala yɛɛ Kelaese ɔdaye yeanyɛ ɔ nwo sɛlɛvolɛ kpanyinli a. Nyamenle ɔdaye mumua ne a ɔzele ye kɛ, “Ɛle me Ra; ɛnɛ merayɛ ɛ Ze.”

⁶ Eza yeha ye wɔ ɛleka gyɛne kɛ, “Ɛbayɛ sɛlɛvolɛ dahuu, kɛ Mɛlekezidɛke la.”

⁷ Mekɛ mɔɔ Gyisɛse wɔ ewiade ye anu la, ɔvale ɛzunlɛ nee nyane ɔdeɛdeanle nu ɔvale ye nzɛlɛlɛ ɔdole Nyamenle mɔɔ yemɔ ala a kɛhola kɛye ye kɛvi ewule nu la anyunlu. Kɛmɔ ɔhanle ɔ nwo aze na ɔvale ɔ nwo amuala ɔmanle la ati, Nyamenle diele ye.

⁸ Ɔle Nyamenle Ara bɔbɔ ɛdeɛ, noko ɔluale ye amaneɛnwunlɛ zo ɔzukoale ɔyɛle tieyɛ.

⁹ Mɔɔ bɛmanle ɔlile munli la, akee ɔrayɛle ngoanelielɛ mɔɔ ɛnlɛ awieleɛ la ɔmanle bɛdabɛ mɔɔ bɛtie ye la,

¹⁰ na Nyamenle yɛle ye Sɛlɛvolɛ Kpanyinli kɛ Mɛlekezidɛke la.

Azekpolɛ nwo kɔkɔbɔlɛ

¹¹ Yɛlɛ dɔɔnwo yɛka wɔ edwɛkɛ ɛhye anwo, noko nuhua ngilenu bayɛ se amaa bɛ, ɔboalekɛ bɛ ndelebɛbo le ekyi.

¹² Ɔluakɛ mekɛ ɛdwu mɔɔ saa bɛle kilehilevolɛma bɔbɔ a anrɛɛ ɔmbɔ nzonle a, noko kɛkala bɛtɛkpondɛ awie mɔɔ bɔ ɔ bo yeahilehile bɛ Nyamenle Edwɛkɛ ne ɛzukoalɛdeɛ ne mɔ mɔɔ lumua la. Bɛngola aleɛ mɔɔ anu yɛ se la di. Ɛhye ati bɛkpondɛ nyɛfonzule bɛanlo.

¹³ Awie mɔɔ no nyɛfonzule la tɛde adɔma; ɔnlɛ adwenle biala wɔ ɛtane nee kpalɛ nwo.

¹⁴ Aleɛ mɔɔ anu yɛ ɛnlomboɛ la wɔ ɛkɛ maa mgbanyinli, ɔluakɛ bɛzukoa na bɛkola bɛnwu ngakyile mɔɔ wɔ kpalɛ nee ɛtane nu la.