Kɛlata mɔɔ bɛhɛlɛle bɛhɔmanle Hibuluma la 2 - BAEBOLO ANZƐƐ BULUKU NWUANZANWUANZA

Ngoanelielɛ kpole ne

¹ Zɔhane ati ɔwɔ kɛ yɛsɔ nɔhalɛ edwɛkɛ ne mɔɔ yɛde la anu ɛsesebɛ, amaa yɛamminli.

² Edwɛkɛ ne mɔɔ Nyamenle soanvolɛma vale rɛlɛle yɛ nlenya mɔ la ɛrayɛ nɔhalɛ, yemɔti mɔɔ anli zo la banyia nwolɛ ndeanlɛ mɔɔ ɔfɛta la.

³ Na saa yɛanzɔ ngoanelielɛ kpole mɔɔ le zɛhae la anu a, ɛnee kɛ ɔkɛyɛ na yɛavi ɛsalɛ ɛ? Awulae mumua ne lumuale bɔle ngoanelielɛ ɛhye anwo nolo, yɛɛ bɛdabɛ mɔɔ bɛdiele ye la ɛhile ɛmaa yɛnwu kɛ ɔle nɔhalɛ.

⁴ Mekɛ ko ne ala Nyamenle ɔdaye ɔlile daselɛ ɔvoale bɛ ɛdeɛ ne azo, na ɔvale Sunsum Nwuanzanwuanza nu ahyɛlɛdeɛ ɔmanle bɛ, ɔmanle bɛyɛle nwanwane ninyɛne, kɛmɔ ye ɛhulolɛdeɛ ne de la.

Sonla mɔɔ die yɛ kɔ ngoane nu la

⁵ Nyamenle ɛtɛfale ye soanvolɛma kɛ bɛzie ewiade fofolɛ ne mɔɔ yɛka nwolɛ edwɛkɛ kɛ ɔbara la.

⁶ Bɛha ye wɔ Nyamenle Edwɛkɛ ne anu ɛleka bie kɛ, “Sonla le duzu, mɔɔ ɛdwenle ɔ nwo zɛhae a? Anzɛɛ sonla ra mɔɔ ɛ nye wɔ ɔ nwo zo zɛhae a?

⁷ Ɛbɔle ye ɛmanle wɔ soanvolɛma dɛlale ye mekɛ ekyi bie ala anu, ɛwulale ye anyunlunyia na ɛmanle bɛlile ye eni,

⁸ na ɛvale ninyɛne kɔsɔɔti ɛwulale ɔ bo.” Saa ɔvale “ninyɛne kɔsɔɔti ɔwulale ɔ bo” a, ɛnee ɔkile kɛ debie biala boka nwolɛ. Noko mɔɔ kɛkala yɛnwu ye la a le kɛ sonla ɛnzie ninyɛne muala.

⁹ Na yɛnwu Gyisɛse mɔɔ mekɛ ekyi bie anu ɔdaye noko bɛyɛle ye ekyi bɛdɛlale Nyamenle soanvolɛma la, kɛ bɛwula ye anyunlunyia na bɛdi ye eni wɔ nyane ewule mɔɔ ɔwule la ati. Nyamenle luale ɔdaye ye ɛlolɛ zo yɛɛ ɔmanle ɔwule wɔ awie biala ati a.

¹⁰ Ɔle kpalɛ kɛ Nyamenle, mɔɔ ɔdaye yɛɛ ɔbɔle ninyɛne kɔsɔɔti na bɛle ye ɛdeɛ la, kɛmaa Gyisɛse kɛnwu amaneɛ kolaa na yeali munli, amaa yeahola yeava mralɛ somaa yeahɔ Nyamenle anyunlunyia ne anu.

¹¹ Ɔte menli nwo ɔfi bɛ ɛtane nwo na ɔ nee bɛdabɛ mɔɔ yede bɛ nwo la nyia Selɛ ko. Ɛhye ati Gyisɛse ɛnze nyiane kɛ ɔkɛvɛlɛ bɛ ɔ mediema.

¹² Nyamenle Edwɛkɛ ne se, “Mebabɔ wɔ duma meahile me mediema ne mɔ; mebado edwɛne meaye wɔ ayɛlɛ mekɛ biala mɔɔ yɛkɛyia la.”

¹³ Eza ɔse, “Mebava me rɛle meawula Nyamenle anu.” Eza ɔhanle ye bieko kɛ, “Me nee ngakula mɔɔ Nyamenle ɛva bɛ ɛmaa me la ɛra.”

¹⁴ Zɔhane ati kɛmɔ ngakula ne mɔ le nwonane nee mogya la, Gyisɛse ɔdaye ɔyɛle ɔ nwo kɛ bɛdabɛ la na ɔnyianle bɛ nwonane ne bie, amaa yealua ye ewule zo yeazɛkye Abɔnsam, mɔɔ ɛnee lɛ tumi wɔ ewule nwo zo la,

¹⁵ na yealie bɛdabɛ mɔɔ ɔlua kɛ bɛsulo ewule la ati bɛyɛle ahanra wɔ mekɛ mɔɔ bɛde ngoane nu la.

¹⁶ Ɔluakɛ ɔla ɛkɛ wienyi kɛ tɛ Nyamenle soanvolɛma yɛɛ ɔrale bɛ ɛboalɛ a na ɔrale ɔbaboa Ebileham abo zo amra.

¹⁷ Ɛhye kile kɛ ɔwɔ kɛ ɔyɛ kɛ ɔ mediema ne mɔ la wɔ adenle biala anu, amaa yeayɛ bɛ Sɛlɛvolɛ Kpanyinli mɔɔ di nɔhalɛ na ɔse anwunvɔne wɔ ye Nyamenle gyimayɛlɛ nu, na yeali bɛ ti mgbɔdalɛ, amaa bɛava menli ɛtane bɛahyɛ bɛ.

¹⁸ Kɛkala ɔkola ɔboa bɛdabɛ mɔɔ bɛwɔ sɔnea nu la, ɔboalekɛ bɛzɔ ɔdaye bɛnlea ɛlɛ, yɛɛ yenwu amaneɛ ɛlɛ.