Kɛlata mɔɔ bɛhɛlɛle bɛhɔmanle Hibuluma la 13 - BAEBOLO ANZƐƐ BULUKU NWUANZANWUANZA

Kɛ yɛsi yɛsɔ Nyamenle anye la

¹ Bɛhɔ zo bɛhulo bɛ nwo ngoko ngoko kɛ mediema mɔɔ nee Kelaese a lua la.

² Bɛhakye kɛ bɛkɛlie nyɛvolɛ wɔ bɛ azua nu. Bie mɔ ɛyɛ bie zɔhane na bɛlie Nyamenle soanvolɛma wɔ bɛ azua nu mɔɔ bɛnze a.

³ Bɛhakye bɛdabɛ mɔɔ bɛgua bɛ efiade la, na bɛdwenle bɛ nwo kɛ asɛɛ bɛ nee bɛ a gua efiade ne a. Bɛhakye menli mɔɔ ɛlɛnwu amaneɛ la, na bɛdwenle bɛ nwo kɛ bɛdabɛ noko bɛlɛnwu nyane ne bie.

⁴ Ɔwɔ kɛ bɛbu agyalɛ bie kpalɛ kpalɛ, na kunli nee yelɛ di nɔhalɛ maa bɛ nwo. Nyamenle badea bɛdabɛ mɔɔ bɛle adwɔmane nee bɛdabɛ mɔɔ bɛkɛdo awuvolɛvalɛ mɛla ne la.

⁵ Bɛye ezukoa nwo anyebolo bɛvi bɛ ɛbɛla nu, na bɛmaa bɛ kunlu ɛdwo mɔɔ bɛlɛ ye la anwo. Ɔluakɛ Nyamenle ɛha ye kɛ, “Menrɛgyakyi bɛ ɛlɛ, yɛɛ me rɛle ɛnrɛvi bɛ fee.”

⁶ Zɔhane ati, yɛkola yɛsi yɛ kɛnra yɛka kɛ, “Awulae le me boavolɛ, menrɛzulo ɛhwee. Duzu yɛɛ sonla kola yɛ me a?”

⁷ Bɛhakye bɛ mgbanyima ne mɔ, mɔɔ hanle Nyamenle edwɛkɛ ne hilele bɛ la. Bɛdwenle bɛnwu kɛ bɛzile bɛbɔle bɛ ɛbɛla ne la, nee bɛ ewule nu, na bɛzukoa bɛ diedi ne mɔɔ ɛnee bɛlɛ la.

⁸ Kɛ Gyisɛse Kelaese si de anoma la, ɔle zɔhane ɛnɛ nee kenle biala.

⁹ Bɛmmamaa ngilehilelɛ ngakyile biala twe bɛ fi adenle kpalɛ ne mɔɔ bɛlua zo la azo. Ɔle kpalɛ kɛ yɛkɛmaa Nyamenle ɛlolɛ ne kɛmaa yɛ ɛkɛla nwo kɛyɛ se tɛla kɛ yɛkɛli aleɛ nwo ngyehyɛlɛ zo la, ɔluakɛ bɛdabɛ mɔɔ bɛlile ngyehyɛlɛ zɛhae mɔ anzi la, yeamboa bɛ.

¹⁰ Yɛlɛ azukponle mɔɔ bɛdabɛ mɔɔ bɛyɛ gyima wɔ ndanlɛ sua ne anu la ɛnlɛ adenle kɛ bɛkɛli zolɛ a.

¹¹ Ɔluakɛ saa Sɛlɛvolɛ Kpanyinli ne fa nane ne mɔɔ bɛfa bɛabɔ ɛtanefakyɛ azu ne la mogya ba Nwuanzanwuanza nu Nwuanzaanwu Ɛleka ne baye ɛdɛne a, nane mumua ne, bɛyela ye wɔ nzeseɛ ne anzi lɔ.

¹² Zɔhane ala yɛɛ Gyisɛse wule suakpole ne kandiba lɔ, amaa yeava ye mogya ne yeanrinzi menli ne ɛtane ne mɔ.

¹³ Zɔhane ati, bɛmaa yɛvinde yɛdoa ye wɔ kandiba lɔ, na ye nyiane ne ɛha yɛ muala.

¹⁴ Ɔluakɛ wɔ azɛlɛ ye azo, yɛnlɛ suakpole biala mɔɔ gyi ɛkɛ ne kpɔkpɔ a; yɛ nye la suakpole kpalɛ bie mɔɔ bara la ade.

¹⁵ Yemɔti, bɛmaa yɛva ayɛlɛyelɛ yɛlua Gyisɛse anwo zo yɛmaa Nyamenle. Ɛhye a le azubɔlɛ kpalɛ mɔɔ ɛnloanlɛ mɔɔ bɔ ye duma kɛ ɔle Awulae la kola bɔ a.

¹⁶ Bɛmmamaa bɛ rɛle fi kɛ bɛkɛyɛ kpalɛ na bɛkɛboa bɛ nwo ngoko ngoko, ɔboalekɛ ɛhye a le azubɔlɛ mɔɔ sɔ Nyamenle anye a.

¹⁷ Bɛdie bɛ mgbanyima ne mɔ na bɛli bɛ mɛla zo. Mgbanyima zɛhae mɔ a dahuu nea bɛ ɛkɛla zo a, ɔboalekɛ bɛbabu bɛ gyima nwo mgbonda bɛahile Nyamenle. Saa bɛtie bɛ nloa edwɛkɛ a, bɛdabɛ noko bɛbava fɛlɛkolilɛ bɛayɛ bɛ gyima. Saa tɛ ye zɔhane ɛdeɛ a, bɛbava nyanelilɛ a bɛayɛ a, na ɛhye noko ɛnrɛboa bɛ kpalɛ biala.

¹⁸ Bɛhɔ zolɛ bɛzɛlɛ bɛmaa yɛ. Yɛsi pi kɛ yɛ adwenle nu le wienyi, ɔboalekɛ yɛkpondɛ kɛ dahuu yɛyɛ mɔɔ le kpalɛ la.

¹⁹ Mesɛlɛ bɛ kɛ anrɛɛ bɛyɛ nzɛlɛlɛ kɛ Nyamenle kɛmaa menwɔzia menwɔra bɛ nwo lɔ bieko ndɛndɛ.

Nzɛlɛlɛ

²⁰ Anzonudwolɛ Nyamenle ne mɔɔ dwazole yɛ Awulae Gyisɛse, mɔɔ le Mboaneneavolɛ Kpole ne, mɔɔ luale ye ewule azubɔlɛ zo zɔle ngyekyeleɛ ne mɔɔ bɛntulu ye ɛlɛ la anloa la vile ewule nu la,

²¹ ɛmaa bɛ sa ɛha debie biala mɔɔ le kpalɛ la. Nyamenle ɛmaa bɛhola bɛyɛ mɔɔ ɔkulo la, na ɔlua Gyisɛse Kelaese anwo zo ɔva bɛ ɔyɛ gyima mɔɔ sɔ ɔ nye la. Anyunlunyia ɛha Kelaese dahuu! Amen.

Nrɛlaleɛ mɔɔ li amozi

²² Mebodo bɛ, me mediema, bɛzi abotane bɛdie akɛnrazilɛ nrɛlaleɛ ɛhye, ɔluakɛ kɛlata ɛhye mɔɔ mehɛlɛ bɛ la anwa biala.

²³ Memaa bɛade kɛ bɛye adiema nrenya Temɔte bɛvi efiade. Saa ɔba ɛke ndɛndɛ a, me nee ye yɛbarakpɔla bɛ.

²⁴ Yɛbiza bɛ mgbanyima ne nee Nyamenle menli ne mɔ amuala ahye. Mediema mɔɔ vi Yetale ɛra ɛke la se bɛbiza bɛ ahye.

²⁵ Nyamenle ɛlo bɛ na ɔ nee bɛ muala ɛdɛnla! Amen.