Kɛlata mɔɔ bɛhɛlɛle bɛhɔmanle Hibuluma la 12 - BAEBOLO ANZƐƐ BULUKU NWUANZANWUANZA

Nyamenle le yɛ ze

¹ Zɔhane ati, kɛmɔ yɛlɛ dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la, bɛmaa yɛye debie biala mɔɔ si yɛ aze, nee ɛtane mɔɔ ɛgya yɛ la ali, na yɛmia yɛ nwo kpalɛ yɛnlea ɛnriandilɛ ne mɔɔ gyi yɛ nyunlu la.

² Bɛmaa yɛnlea Gyisɛse angome ala, yemɔ yɛɛ ɔli yɛ nyunlu wɔ diedi nu na ɔmaa yɛ diedi di munli a. Ɔlua anyelielɛ mɔɔ ɛnee la ɔ nyunlu la ati, yeandwenle anyiemgba ewule ne mɔɔ ɔbawu meanubaka ne azo la anwo, na kɛkala ɔde Nyamenle belemgbunli ebia ne fema zo.

³ Bɛdwenle ɛkpɔlɛ mɔɔ Gyisɛse nyianle ye, nee kɛ ɔzile ɔgyinlanle kpundii wɔ ɛkpɔlɛ bebelebe ne anloa, wɔ ɛtanevolɛma asa nu la anwo, na bɛmmamaa bɛ rɛle bɔ anzɛɛ bɛ gyakɛ anzi tuto.

⁴ Bɛ nee ɛtane bɛ konle ye anu, bɛtɛdwule ye kpɔmgbɔse ne mɔɔ ɛhunlɛ bɔbɔ finde nu a.

⁵ Anzɛɛ bɛ rɛle ɛvi akɛnrazilɛ edwɛkɛ ne mɔɔ Nyamenle ka kile bɛ kɛ bɛle ɔ mra la ɔ? Ɔse, “Me ra, saa Awulae tea wɔ a die ye fɛlɛko nu, yɛɛ saa ɔtwi ɛ nyunlu a mmamaa ɛ rɛle bɔ.

⁶ Ɔluakɛ Awulae tea mɔɔ ɔkulo ye la, na ɔtwi ɔ ra biala mɔɔ ɔdie ye la anyunlu.”

⁷ Bɛlie nyane biala mɔɔ kɛdo bɛ la kɛ ɔle Nyamenle Selɛ ne ndeanlɛ, na bɛ nyanenwunlɛ ne kile kɛ Nyamenle ɛlɛyɛ bɛ kɛ ɔkɛyɛ ɔ mra la. Asoo ralɛ bie wɔ ɛkɛ mɔɔ ɔ ze ɛnrɛdea ye kenle ko bɔbɔ ɛlɛ?

⁸ Saa bɛandea bɛ kɛ mralɛ ɛhendeɛ ne mɔ la a, ɛnee ɔkile kɛ bɛnle mralɛ kpalɛ, na bɛle arelazinli mralɛ.

⁹ Saa yɛ ze mɔ mɔɔ wole yɛ la tea yɛ a, yɛdi bɛ eni. Fane nyɛ yɛɛ akee yɛnrɛli yɛ sunsum nu Selɛ ne eni na yɛnrɛnyia ngoane a?

¹⁰ Yɛ ze mɔ mɔɔ wole yɛ la tea yɛ mekɛ ekyi bie ala, kɛmɔ bɛdabɛ bɛnea a ɔle kpalɛ la, na Nyamenle tea yɛ wɔ yɛdayɛ yɛ kpalɛ ti, amaa kenle bie yɛanyia ye nwuanzanwuanzayɛlɛ ne bie.

¹¹ Kɛkala, ndeanlɛ biala ɛnyɛ fɛ, ɔyɛ nyane, noko nzinlii bɛdabɛ mɔɔ bɛkɛzɔ bɛ ndeanlɛ nu na bɛkɛva nu ma la sɔ ɛnyelɛ na bɛnyia anzonudwolɛ wɔ bɛ ɛbɛlabɔlɛ nu.

Folɛdulɛ nee kɔkɔbɔlɛ

¹² Zɔhane ati bɛ sa ne mɔ mɔɔ bɛyɛ bɛ dwɔlɔmgbɔɔnwo la, bɛmaa bɛ zo na bɛmiemia bɛ gyakɛ ne mɔ mɔɔ ɛtuto la anu!

¹³ Bɛlua ndenle kpalɛ nu, amaa bɛ agbɔkɛ ne mɔ mɔɔ ɛtuto la andwɔlɔdwɔlɔ, na bɛazianyizianyi.

¹⁴ Bɛbɔ mɔdenle kɛ bɛ nee menli kɔsɔɔti kɛdɛnla anzonudwolɛ nu na bɛmaa bɛ ɛbɛla nwo ɛde nwuanzaanwu, ɔboalekɛ mɔɔ anyɛ ye zɔhane la ɔyɛ se kɛ ɔkɛnwu Nyamenle.

¹⁵ Bɛnlea boɛ na bɛ bie ande anvi Nyamenle ɛlolɛ ne anwo. Bɛnlea boɛ na bɛ bie angakyi ɔ nwo “baka gyangoyi” ambɛkɛbɛka mbaka gyɛne nwo anguhu ɔ gɔnwo mɔ.

¹⁶ Bɛnlea boɛ na bɛ bie annyia subane ɛtane anzɛɛ anyɛ kɛ Yisɔ mɔɔ nyamenlezonlenlɛ ɛnle ye nu la ati, yeangola ɔ nwo sɔ na aleɛ ti ɔdɔnenle ye kpanyinli la.

¹⁷ Bɛdabɛ bɛze kɛ nzinlii, ɛnee akee ɔkpondɛ ɔ ze nyilalɛ, na ɔzunle ɔhwinle monle, noko ɔ sa anga ye, ɔluakɛ yeannwu adenle mɔɔ ɔfa zolɛ a mɔɔ yeyɛ la ɔkɛhola ɔkɛhakyi ye a.

¹⁸ Ɔluakɛ bɛtɛbadwule Boka Saenae azo, ɛleka mɔɔ Yizilayɛma dwule la, na bɛanwu sendɔlɔra ne, awozinli kabikabi ne nee ye kumɔɔnwo ne, nee ahumu ne,

¹⁹ na bɛade aweɛne tendenle ne ane yɛɛ ɛnelɛ totohyia ne, mɔɔ Yizilayɛma dele a bɛzele kɛ akee yebo zo, na bɛzɛlɛle kɛ edwɛkɛ ne ɛyɛ boɛ la.

²⁰ Ɔboalekɛ ɛnee mɛla ne mɔɔ bɛvale bɛmanle bɛ kɛ, “Saa nane bɔbɔ agyakɛ tia boka ne anwo a, bɛzi ye awolɛ bɛhu ye” la, bɛngola nu sɔ.

²¹ Nɔhalɛ, ɛkɛ ne yɛle ɛzulolɛ kpalɛ, manle Mosisi bɔbɔ hanle kɛ, “Mesulo, megyinla a ɔngyinla!”

²² Na bɛmɛ bɛra Boka Zayɔn, wɔ tease Nyamenle ne suakpole ne mɔɔ le anwuma lɔ Gyɛlusalɛm ne, mɔɔ Nyamenle soanvolɛma apenle apenle mɔɔ bɛnze bɛ nloa la ɛyi ye tɛkɛɛ la azo.

²³ Bɛra anyelielɛ ayia ne mɔɔ Nyamenle amra mgbanyinli ne mɔ mɔɔ bɛhɛlɛ bɛ aluma wɔ anwuma lɔ la a kɔ la bie. Bɛra Nyamenle mɔɔ le menli kɔsɔɔti ndɛnebuavolɛ la ɛkɛ, yɛɛ bɛra fɔɔnwoma mɔɔ bɛmaa bɛ sunsum ɛli munli la ɛkɛ.

²⁴ Bɛra Gyisɛse, mɔɔ kyekyele Ngyekyeleɛ Fofolɛ ne abo, nee mogya ne mɔɔ bɛhwinle bɛguale na ɔtendɛ kpalɛ ɔkile yɛ ɔtɛla Ebulu ɛdeɛ ne la ɛkɛ.

²⁵ Zɔhane ati, bɛnlea boɛ, na bɛamkpo kɛ bɛnrɛdie mɔɔ ɛlɛtendɛ la. Bɛdabɛ mɔɔ bɛkpole kɛ bɛnrɛdie mɔɔ hanle Nyamenle anloa edwɛkɛ ne hilele bɛ wɔ azɛlɛ ye azo la, anvi ɛsalɛ. Na saa akee yɛmɛ yɛkpo kɛ yɛnrɛdie mɔɔ tendɛ fi anwuma lɔ kile yɛ la a, kɛ ɔkɛyɛ na yɛavi ɛsalɛ ɛ?

²⁶ Mekɛ ne anu ɔ ne manle azɛlɛ kpusule, na ɛnɛ noko yevua kɛ, “Eza mebakpusu ye bieko. Tɛ azɛlɛ ye angome, na mebakpusu anwuma noko.”

²⁷ Edwɛkɛ kpɔkɛ ɛhye, “eza bieko” ne kile kɛ abɔdeɛ muala bakpusu na bɛadudu bɛ bɛavi ɛkɛ, na mɔɔ kɛhola kɛgyinla na ɔ bo andu la baha ɛkɛ.

²⁸ Zɔhane ati, bɛmaa yɛyɛ Nyamenle mo kɛ yemaa yɛ belemgbunlililɛ kpalɛ mɔɔ abo ɛmkpusu ɛlɛ, na yɛva ɛzulolɛ, enililɛ yɛɛ moyɛlɛ yɛzonle ye yɛmaa ɔzɔ ɔ nye,

²⁹ ɔluakɛ yɛ Nyamenle ne le sendɔlɔra.