Kɛlata mɔɔ bɛhɛlɛle bɛhɔmanle Hibuluma la 10 - BAEBOLO ANZƐƐ BULUKU NWUANZANWUANZA

¹ Dwuuma mɛla ne ɛnle ninyɛne fɔɔnwo ne mɔɔ wɔ ɛkɛ ne la nɔhalɛ sɔhovolɛ. Ɔle ninyɛne kpalɛ mɔɔ bara la sɔhovolɛ ekyi bie. Azu ko ne ala yɛɛ ɛvolɛ biala bɛbɔ a. Ɛhye ati bɛnrɛhola bɛnrɛlua mɛla ne azo bɛnrɛmaa menli mɔɔ kpondɛ Nyamenle la ɛnrɛlua dahuu azubɔlɛ ko ne ala azo ɛnrɛzɔ Nyamenle anye.

² Saa azubɔlɛ ne te menli mɔɔ sonle Nyamenle la anwo bɔkɔɔ a, anrɛɛ bɛ adwenle ɛnyɛ bɛ kesee kɛ bɛnli ɛtane nwo fɔlɛ bieko, yɛɛ eza anrɛɛ bɛgyakyi azu ne ɛbɔlɛ.

³ Na kɛ ɔde la a le kɛ, ɛvolɛ biala azubɔlɛ ne kakye bɛ ɛtane mɔɔ mekɛ biala bɛyɛ la.

⁴ Ɔluakɛ ɔyɛ se kɛ mbɔnkye nee nlankɛ mogya kɛhola kɛnunu ɛtane mɔɔ mekɛ biala bɛyɛ la abo zo.

⁵ Ɔlua ɛhye ati mɔɔ Kelaese bara ewiade la, ɔzele Nyamenle kɛ, “Ɛmkpondɛ azubɔlɛ nee azubɔdeɛ noko wɔmaa me nwolɛ nwonane.

⁶ Ɛ nye ɛnlie nane mumua ɛyelalɛ anzɛɛ ɛtanefakyɛ azubɔlɛ nwo.

⁷ Ɛhye ati menganle kɛ, ‘O Nyamenle, mera kɛ mebayɛ mɔɔ ɛkpondɛ la, kɛmɔ bɛhɛlɛ ye wɔ me nwo wɔ mɛla buluku ne anu la.’ ”

⁸ Alumua ne ɔhanle kɛ, “Ɛmkpondɛ, yɛɛ ɛ nye ɛnlie azubɔdeɛ anzɛɛ nane ɛyelalɛ nee ɛtanefakyɛ azubɔlɛ nwo.” Ɔhanle ɛhye, noko mɛla ne maa adenle maa bɛbɔ azu mɔɔ le kɛ ɛhye mɔ la amuala.

⁹ Eza ɔhanle kɛ, “O Nyamenle, mera kɛ mebayɛ mɔɔ ɛkpondɛ la.” Yemɔti Nyamenle kpole dɛba ne azubɔlɛ ne na ɔvale Kelaese azubɔlɛ ɛdeɛ ne ɔziele ɔ bo zo.

¹⁰ Ɔlua ɛhye ati, kɛmɔ Gyisɛse Kelaese yɛle mɔɔ Nyamenle kpondɛ la, ye azu ne mɔɔ ɔvale ɔ nwo ɔyɛle azubɔdeɛ ɔbɔle ye kokye ne ala la ɛde yɛ nwo bɔkɔɔ ɛvi ɛtane nwo.

¹¹ Dwuuma sɛlɛvolɛ biala bɔ azu dahuu yɛɛ ɔbɔ zɔhane azu ne ala wɔ mekɛ dɔɔnwo, noko azubɔlɛ ɛhye mɔ ɛngola ɛnye yɛ ɛnvi yɛ ɛtane ne mɔ anu.

¹² Kelaese bɔle ɛtanefakyɛ nwo azu kpalɛ ne mɔɔ yɛ nla la kokye, na ɔhɔdɛnlanle Nyamenle asa fema zo.

¹³ Ɛkɛ ne yɛɛ ɔlɛkendɛ kɔkpula mekɛ mɔɔ Nyamenle kɛva ye kpɔvolɛma kɛwula ɔ gyakɛ abo la.

¹⁴ Ɔluakɛ yeva azubɔlɛ kokye yemaa bɛdabɛ mɔɔ yede bɛ nwo la ɛli munli dahuu.

¹⁵ Sunsum Nwuanzanwuanza ne di daselɛ kile yɛ, ɔluakɛ alumua ne ɔhanle kɛ,

¹⁶ “Awulae se, Saa kenle zɔhane pɛ nu a ngyekyeleɛ mɔɔ me nee bɛ bakyekye la ɛne: Mebava me mɛla meawula bɛ ahonle nu, na meahɛlɛ ye wɔ bɛ adwenle nu.”

¹⁷ Akee ɔvale ɔzɔle zolɛ kɛ, “Menrɛhakye bɛ ɛtane ne nee bɛ amumuyɛ ne mɔ bieko.”

¹⁸ Ɔluakɛ ɛleka mɔɔ fakyɛ wɔ la, ɛtanefakyɛ nwo azubɔlɛ ɛngyia bieko.

Bɛmaa yɛhwe yɛbikye Nyamenle

¹⁹ Zɔhane ati, mediema, yɛlɛ adenle bɔkɔɔ kɛ yɛdua Gyisɛse ewule ne azo yɛfa mgbɛnu ɛdanlɛ ne anu yɛkɔ Nwuanzanwuanza nu Nwuanzaanwu Ɛleka ne.

²⁰ Gyisɛse ɛlua mgbɛnu ɛdanlɛ ne, mɔɔ le ɔdaye ye nwonane ne anu ɛkpakye ngoane adenle fofolɛ ɛmaa yɛ.

²¹ Kɛmɔ yɛlɛ sɛlɛvolɛ kpole mɔɔ nea Nyamenle sua ne azo la,

²² bɛmaa yɛva ahonle kpalɛ nee diedi mɔɔ si pi, ahonle mɔɔ bɛde nwolɛ bɛvi adwenle nu fɔlɛlilɛ nwo, nee sonlabaka mɔɔ bɛva nzule anye komikomi bɛbia ye la yɛhwe yɛbikye Nyamenle.

²³ Bɛmaa yɛzɔ anyelazo ne mɔɔ yɛlɛ ye la anu kpalɛ, ɔboalekɛ Nyamenle ne mɔɔ bɔle yɛ ɛwɔkɛ ne la le nɔhalɛ.

²⁴ Bɛmaa yɛdwenle yɛkpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la.

²⁵ Bɛmmamaa yɛgyakyi kɛ yɛkɛhɔ yɛ nyianu ne, kɛmɔ bie mɔ yɛ la. Bɛdabɛ bɛkola bɛnwu kɛ Awulae Kenle ne ɛbikye, yemɔti bɛmaa yɛsosɔ yɛ nwo ngoko ngoko.

²⁶ Ɔluakɛ kɛkala mɔɔ yɛnwu nɔhalɛ ne la, saa yɛ nye fuu yɛkɔ zolɛ yɛyɛ ɛtane a, azubɔlɛ bieko ɛnle ɛkɛ mɔɔ kɛhola kɛye yɛ ɛtane ne mɔ a.

²⁷ Ɛnee mɔɔ ɛha la a le kɛ yɛkɛva anwowozolɛ yɛkɛhendɛ Nyamenle Ndɛnebualɛ ne nee ye ɛya ne mɔɔ sɔ hulenyi kɛ senle mɔɔ bazɛkye bɛdabɛ mɔɔ bɛtia Nyamenle la.

²⁸ Awie mɔɔ kɛdo Mosisi Mɛla ne la, saa bɛnyia alasevolɛ nwiɔ anzɛɛ nsa di daselɛ tia ye na ɔdi fɔlɛ a, bɛku ye mɔɔ anwunvɔnezelɛ biala ɛnle nu a.

²⁹ Ɛnee ɛdawɔ fa ɛ nye to na nea sonla mɔɔ kɛkpo Nyamenle Ara ne, na yeambu mogya ne mɔɔ bɛlua zo a bɛ nwo te na Nyamenle vale zɔle ngyekyeleɛ ne anloa, na ɔkɛva Nyamenle ɛlolɛ Sunsum ne anyunlu ɔkɛkyikyi aze la ɛ? Ye ndeanlɛ mɔɔ ɔbanyia ye la le kpole kpalɛ.

³⁰ Ɔluakɛ yɛze ahenle mɔɔ hanle kɛ, “Nzenralɛlilɛ le me ɛdeɛ, mebadua ɛtane kakɛ” la; yɛɛ eza yɛze Nyamenle Edwɛkɛ ne mɔɔ se, “Nyamenle babua ye menli ndɛne” la.

³¹ Ɔkɛyɛ ɛzulolɛ ɛdeɛ, kɛ ɛkɛdɔ tease Nyamenle ne ɛhane nu a!

³² Bɛhakye mɔɔ zile bɛ nwo zo wɔ mekɛ mɔɔ Nyamenle wienyi ne dale bɛ nwo zo la. Bɛnwunle amaneɛ dɔɔnwo, noko abodelɛ ne ambo bɛ nwo zo ɛlɛ.

³³ Ɔdwule mekɛ ne bie la, bɛguale bɛ nyunlu aze wɔ bagua nu, bɛhilele bɛ nyane, yɛɛ ɔdwule mekɛ ne bie noko la, ɛnee akee bɛ nuhua ko biala bɔbɔ kpondɛ kɛ ɔdaye ɔnwu amaneɛ ne bie.

³⁴ Bɛ nee menli mɔɔ bɛguale bɛ efiade la lile nyane, yɛɛ mɔɔ bɛzale bɛ bɛliele bɛ nwo ninyɛne bɔbɔ la, yeanvane bɛ nwo fee, ɔboalekɛ ɛnee bɛze kɛ bɛlɛ ninyɛne kpalɛ mɔɔ ɛnzɛkye ɛlɛ la wɔ ɛkɛ.

³⁵ Zɔhane ati bɛmmakpo aze fee, ɔluakɛ ɛhye mɔ amuala, ahatualɛ kpole bie li ɔ nzi.

³⁶ Ɔwɔ kɛ bɛnyia abotane, amaa bɛahola bɛayɛ Nyamenle ɛhulolɛdeɛ na bɛanyia ye ɛwɔkɛ ne.

³⁷ Nyamenle Edwɛkɛ ne se, “Ɔnrɛhyɛ biala na sonla ne mɔɔ ba la ara, ɔnrɛzi aze fee.

³⁸ Diedi zo yɛɛ sonla ne mɔɔ sɔ me nye la balua anyia ngoane a. Saa ɔsia ɔ nzi a, me nye ɛnrɛlie ɔ nwo.”

³⁹ Yɛnle menli mɔɔ yɛsia yɛ nzi na yɛminli a. Yɛlɛ diedi, yemɔti yɛlɛ ngoane.