Mosisi Buluku ne mɔɔ lumua mɔɔ bɛfɛlɛ ye Mɔlebɛbo 50 - BAEBOLO ANZƐƐ BULUKU NWUANZANWUANZA

¹ Akee Dwosefi dule dɔle ɔ ze anwo zo na ɔzunle, na ɔvole ɔ nvoka anwo.

² Na Dwosefi zele ye ninsinlima kɛ bɛva ayile bɛkpokpa ɔ ze funli ne, amaa yeanzɛkye. Yemɔti ninsinlima ne yɛle Gyekɔbo funli ne zɔhane.

³ Bɛvale kenle abulanla a bɛyɛle a, ɔluakɛ kɛ amaamuo ne kile la ɛne. Yigyibitima vale kenle abulasuu zunle ye.

⁴ Mekɛ mɔɔ bɛfa bɛazu ye la pɛle nu la, Dwosefi hanle hilele bɛdabɛ mɔɔ bɛwɔ belemgbunli ne sua nu la kɛ, “Saa mezɔ bɛ nye ɛdeɛ a, ɛnee mebodo bɛ, bɛha bɛhile belemgbunli ne bɛmaa me kɛ

⁵ egya manle menganle ndane kɛ saa ɔwu a, menwɔzie ye wɔ ɔdaye ye nla mɔɔ yepɛ wɔ Keena la anu. Ɛhye ati mesɛlɛ ye na meahɔ meahɔzie egya, na meazia meara.”

⁶ Belemgbunli ne manle ye adenle, ɔse, “Kɔ na kɔzie ɛ ze, kɛmɔ wɔ ndane ne mɔɔ ɛhanle la se la.”

⁷ Yemɔti Dwosefi hɔle kɛ ɔkazie ɔ ze. Ɔ nee belemgbunli ne sua nu ɛkɛ ne amra nee ye mbɔlɔba mgbanyinli, Yigyibiti maanle ne anu mgbanyima,

⁸ ɔdaye Dwosefi ye sua nu ɛkɛ ne amra, ɔ mediema ne mɔ, yɛɛ ɔ ze sua nu amra a hɔle a. Menli mɔɔ angɔ bie la a le ngakula, bɛ mboane nee nlankɛ, mɔɔ bɛgyakyile bɛ wɔ Gohyɛn azɛlɛ zo la.

⁹ Bɛvale ehwili mɔɔ mgbɔnwɔ twe bɛ nee menli mɔɔ ka mgbɔnwɔ la a hɔle a. Nɔhalɛ, ɛnee bɛ nwo zonle kpalɛ.

¹⁰ Mɔɔ bɛradwule Etade ɛleka mɔɔ bɛwozo ma ne, wɔ azule Dwɔdan ne anloa la, bɛzunle nyane nyane bie bɛyele awolɛ kpalɛ. Dwosefi manle bɛzunle ɔ ze wɔ ɛkɛ ne toonwo kenle nsuu.

¹¹ Mɔɔ Keenama mɔɔ wɔ maanle ne anu la nwunle kɛ bɛlɛsi bɛdi nyane bɛsu wɔ Etade ma ɛwozolɛ ɛleka ne la, bɛhanle kɛ, “Yigyibitima nyanelilɛ ɛhye le kpole.” Yemɔti bɛdonle ɛkɛ ne Ebɛle Mezeleeyem.

¹² Yemɔti Gyekɔbo amra ne mɔ yɛle mɔɔ bɛ ze kpondɛ la manle ye.

¹³ Bɛvale ye funli ne bɛhɔle Keena na bɛhɔziele ye bolɛ bɔne nu wɔ Makepilaa azɛlɛ zo, wɔ Mameli aduduleɛ. Ebileham dɔle azɛlɛ ne vile Hɛtenli Yifolɔn ɛkɛ, kɛ ɔfa yeayɛ ye azie.

¹⁴ Dwosefi ziele ɔ ze wiele la akee ɔ nee ɔ mediema ne mɔ nee menli mɔɔ hɔzɔhonle ye la amuala ziale rale Yigyibiti.

Dwosefi si ɔ mediema ne mɔ ahonle

¹⁵ Mɔɔ Dwosefi amediema ne mɔ nwunle kɛ bɛ ze ɛwu la, bɛhanle kɛ, “Ɔkɛyɛ kɛ Dwosefi akee bakpo yɛ, na yeadua yɛ munzule ɛbɛla ne mɔɔ yɛbɔle la anwo kakɛ.”

¹⁶ Yemɔti bɛzoanle bɛmanle bɛvale nrɛlaleɛ bɛhɔmanle Dwosefi kɛ, “Ɛ ze bawu la,

¹⁷ ɔhanle kɛ, ‘Bɛha bɛhile Dwosefi kɛ, mebodo wɔ, fa ɛ mediema ne mɔ mɛladonlɛ nee bɛ ɛtane kyɛ bɛ, ɔboalekɛ bɛyɛle wɔ ɛtane.’ Zɔhane ati kɛkala, yɛbodo wɔ, fa ɛ ze Nyamenle ne sonvolɛma mɛladonlɛ kyɛ bɛ.” Bɛhanle ɛhye bɛhilele Dwosefi la, ɔzunle.

¹⁸ Akee ɔ mediema ne mɔ radule guale ɔ nyunlu na bɛzele kɛ, “Yɛra kɛ yɛle wɔ ahanra.”

¹⁹ Na Dwosefi zele bɛ kɛ, “Bɛmmasulo; na tɛ mame a megyi Nyamenle agyakɛ anu a!

²⁰ Bɛmɛ ɛdeɛ, ɛnee bɛkpondɛ me nee munzule, na Nyamenle kpondɛle me nee saleɛ, amaa yeara ye zɔhane na mealie menli dɔɔnwo ngoane, kɛmɔ ɛnɛ bɛde la.

²¹ Yemɔti bɛmmasulo; mebanlea bɛ nee bɛ mra ne mɔ amuala.” Ɔzile bɛ ɛbolɛ na ɔkyekyele bɛ rɛle.

Dwosefi ewule ne

²² Dwosefi nee ɔ ze sua nu amra dɛnlanle Yigyibiti. Ɔlile ɛvolɛ ɛya ko ɛvolɛ bulu na yeawu.

²³ Dwosefi nwunle Yifelaem amra nee nlɔnra yɛɛ Manasɛ ara Meekɛ amra mɔɔ ɔwole bɛ ɔguale ɔdaye Dwosefi ɔ gyakɛ azo la.

²⁴ Na Dwosefi zele ɔ mediema ne mɔ kɛ, “Ɔka ekyii mewu; Nyamenle banlea bɛ na yeaye bɛ yeavi azɛlɛ ɛhye azo yeahɔ azɛlɛ ne mɔɔ ɔhanle ndane ɔhilele bɛ ze mɔ Ebileham, Ayezeke nee Gyekɔbo kɛ ɔbava yeamaa bɛ la azo.”

²⁵ Na Dwosefi manle ɔ mediema ne mɔ bɔle ɛwɔkɛ na ɔzele kɛ, “Bɛbɔ me ɛwɔkɛ kɛ, saa Nyamenle baye bɛ fi azɛlɛ ɛhye azo kɛ ɔ nee bɛ kɔ a, bɛkɛva me mbowule bɛkɛhɔ.”

²⁶ Yemɔti Dwosefi wule. Ɛnee yeli ɛvolɛ ɛya ko ɛvolɛ bulu. Na bɛkpokpale ye ayile mɔɔ ɔmmaa ɔnzɛkye la na bɛdole ye ɛlɛka nu wɔ Yigyibiti.