Mosisi Buluku ne mɔɔ lumua mɔɔ bɛfɛlɛ ye Mɔlebɛbo 5 - BAEBOLO ANZƐƐ BULUKU NWUANZANWUANZA

Adam abo zo amra

¹ Adam nee ɔ bo zo amra awolɛndoazo ne ɛne. (Mekɛ mɔɔ Nyamenle bɔle sonla la, ɔbɔle ye kɛ ɔdaye ye ɛsaso.

² Ɔbɔle bɛ nrenya nee raalɛ, ɔyilale bɛ na ɔvɛlɛle bɛ “Sonla Dasanli.”)

³ Adam lile ɛvolɛ ɛya ko abulasa la, ɔwole ye ɛsaso ralɛ nrenya na ɔdonle ye Sɛte.

⁴ Sɛte awolɛ ne anzi, Adam dɛnlanle aze lile ɛvolɛ ɛya mɔtwɛ, na ɔwole mralɛ mrenya nee mraalɛ.

⁵ Adam lile ɛvolɛ ɛya ngɔnla abulasa, na ɔwule.

⁶ Sɛte lile ɛvolɛ ɛya ko ɛvolɛ nnu la, ɔwole ralɛ nrenya, ɔdonle ye Yinɔhye.

⁷ Yinɔhye awolɛ ne anzi, Sɛte lile ɛvolɛ ɛya mɔtwɛ ɛvolɛ nsuu bokale ye ɛvolɛ ne anwo, na ɔwole mralɛ mrenya nee mraalɛ.

⁸ Sɛte lile ɛvolɛ ɛya ngɔnla ɛvolɛ bulu nee nwiɔ, na ɔwule.

⁹ Yinɔhye lile ɛvolɛ abulahɔnla la, ɔwole Kinan.

¹⁰ Ɔwole Kinan la, ɔdɛnlanle aze ɛvolɛ ɛya mɔtwɛ ɛvolɛ bulu nee nnu, ɔwole mralɛ mrenya nee mraalɛ.

¹¹ Yinɔhye lile ɛvolɛ ɛya ngɔnla ɛvolɛ nnu, na ɔwule.

¹² Kinan lile ɛvolɛ abulasuu la, ɔwole Mahalalile.

¹³ Ɛhye anzi ɔdɛnlanle aze ɛvolɛ ɛya mɔtwɛ ɛvolɛ abulanla, ɔwole mralɛ mrenya nee mraalɛ.

¹⁴ Kinan lile ɛvolɛ ɛya ngɔnla ɛvolɛ bulu, na ɔwule.

¹⁵ Mahalalile lile ɛvolɛ abulasia nee nnu la, ɔwole ralɛ nrenya Gyɛlɛde.

¹⁶ Ɛhye anzi ɔdɛnlanle aze ɛvolɛ ɛya mɔtwɛ ɛvolɛ abulasa, ɔwole mralɛ mrenya nee mraalɛ.

¹⁷ Mahalalile lile ɛvolɛ ɛya mɔtwɛ ɛvolɛ abulahɔnla nee nnu, na ɔwule.

¹⁸ Gyɛlɛde lile ɛvolɛ ɛya ko abulasia nee nwiɔ la, ɔwole Yinɔko.

¹⁹ Ɛhye anzi ɔdɛnlanle aze ɛvolɛ ɛya mɔtwɛ, ɔwole mralɛ mrenya nee mraalɛ.

²⁰ Gyɛlɛde lile ɛvolɛ ɛya ngɔnla abulasia nee nwiɔ, na ɔwule.

²¹ Yinɔko lile ɛvolɛ abulasia nee nnu la, ɔwole Mɛtusɛla.

²² Ɛhye anzi Yinɔko dɛnlanle aze ɛvolɛ ɛya nsa, ɔwole mralɛ mrenya nee mraalɛ. Mekɛ ɛhye anu Yinɔko nee Nyamenle luale.

²³ Yinɔko lile ɛvolɛ ɛya nsa abulasia nee nnu.

²⁴ Yinɔko nee Nyamenle luale na yeanwu, ɔminliminlinle, ɔboalekɛ Nyamenle vale ye hɔle.

²⁵ Mɛtusɛla lile ɛvolɛ ɛya ko abulatwɛ nee nsuu la, ɔwole Leemɛke.

²⁶ Ɛhye anzi ɔlile ɛvolɛ ɛya nsuu abulatwɛ nee nwiɔ, ɔwole mralɛ mrenya nee mraalɛ.

²⁷ Yemɔti Mɛtusɛla lile ɛvolɛ ɛya ngɔnla abulasia nee ngɔnla, na ɔwule.

²⁸ Leemɛke lile ɛvolɛ ɛya ko abulatwɛ nee nwiɔ la, ɔwole ralɛ nrenya.

²⁹ Ɔhanle kɛ, “Nyamenle ɛmaa munzule ɛha azɛlɛ ye. Ɔlua zo ɛnɛ yɛyɛ zolɛ egyinli a yɛnwu nyane kpalɛ. Noko kakula ɛhye bamaa yɛ nyanenwunlɛ ne aha aze.” Ɛhye ati ɔdonle ye Nowa.

³⁰ Ɛhye anzi ɔlile ɛvolɛ ɛya nnu abulahɔnla nee nnu, ɔwole mralɛ mrenya nee mraalɛ.

³¹ Leemɛke lile ɛvolɛ ɛya nsuu abulasuu nee nsuu, na ɔwule.

³² Nowa lile ɛvolɛ ɛya nnu la, ɔwole mralɛ mrenya nsa: Hyɛm, Ham, yɛɛ Gyeefɛte.