Mosisi Buluku ne mɔɔ lumua mɔɔ bɛfɛlɛ ye Mɔlebɛbo 48 - BAEBOLO ANZƐƐ BULUKU NWUANZANWUANZA

Gyekɔbo yileyila Yifelaem nee Manasɛ

¹ Ɛhye anzi bɛhanle bɛhilele Dwosefi kɛ, “Nea, ɛ ze ɛnde kpɔkɛ.” Yemɔti ɔvale ɔ mra mrenya nwiɔ ne, Yifelaem nee Manasɛ ɔhɔle kɛ ɔkakpɔla ye.

² Na bɛhanle bɛhilele Gyekɔbo kɛ, “Ɛ ra Dwosefi ɛra bakpɔla wɔ.” Yemɔti ɔmianle ɔ nye ɔdwazole ɔdɛnlanle ye ɛkpa ne azo.

³ Gyekɔbo zele Dwosefi kɛ, “Nyamenle Bedevinli ne yele ɔ nwo hilele me wɔ Lɛze mɔɔ wɔ Keena maanle nu la na ɔyilale me, ɔzele me kɛ,

⁴ ‘Mebamaa wɔawo, na ɛ nwo azo. Mebamaa wɔanyia menli dɔɔnwo; mebamaa bɛayɛ ɛlɔne; mebava azɛlɛ ɛhye meamaa ɛ bo zo amra ayɛ bɛ ɛdeɛ bɔkɔɔ.’ ”

⁵ Gyekɔbo zɔle zolɛ hanle kɛ, “Kɛkala, ɛ mra nwiɔ ne mɔɔ ɛwole bɛ wɔ Yigyibiti ɛke kolaa na meara la le me ɛdeɛ. Yifelaem nee Manasɛ le me mra, kɛmɔ Wulubɛn nee Semɛyɔn de ala la.

⁶ Ngakula mɔɔ ɛbawo bɛ wɔ ɛhye mɔ anzi la le wɔ ɛdeɛ. Saa bɛnyia agyadeɛ bie a, bɛbava bɛ mediema ɛhye mɔ aluma a bɛado zolɛ a.

⁷ Ɔluakɛ mevi Peedan mendule me bo la yɛɛ Relahyɛle wule nyane nyane wɔ Keena adenle ne anu, mɔɔ ɛnee ɔka ekyii yɛdwu Yifelate la; ɔmanle menziele ye Yifelate adevinli ne.” (Yifelate a eza bɛfɛlɛ ye Bɛtelɛhɛm la.)

⁸ Mɔɔ Gyekɔbo nwunle Dwosefi amra ne mɔ la, ɔbizale ye kɛ, “Nwane mɔ ɛne?”

⁹ “Dwosefi buale kɛ, Ɛhye mɔ a le me mra mrenya mɔɔ Nyamenle ɛva ɛmaa me wɔ Yigyibiti ɛke a.” Gyekɔbo zele ye kɛ, “Fa bɛ bɛlɛ me maa menyileyila bɛ.”

¹⁰ Gyekɔbo ɛyɛ kpanyinli la ati ɔ nye ɛyɛ, yemɔti ɔnnwu debie kpalɛ. Dwosefi vale ngakula ne mɔ bikyele ɔ ze, na ɔ ze vole bɛ nvoka anwo na ɔvale bɛ ɔbɔle ye ɛbolɛ.

¹¹ Na Yizilayɛ zele Dwosefi kɛ, “Meanla meandwenle kɛ menwɔnwu ɛ nyunlu, noko nea, Nyamenle ɛmaa menwu ɛ mra noko.”

¹² Na Dwosefi manle ngakula ne mɔ zo vile ɔ ze agyakɛ azo, na ɔbutule ɔ ze anyunlu ɔvale ɔ nye ɔbutule aze.

¹³ Akee Dwosefi dwule ngakula nwiɔ ne, Yifelaem wɔ ye fema zo, mɔɔ kile kɛ ɔwɔ Gyekɔbo bɛne zo, yɛɛ Manasɛ wɔ ye bɛne zo, mɔɔ kile kɛ ɔwɔ Gyekɔbo fema zo la, na ɔvale bɛ ɔbikyele ɔ ze.

¹⁴ Na Yizilayɛ denrɛle ɔ sa kɛ ɔyileyila bɛ, ɔdole ɔ sa ɔbɛkale nu, ɔvale ɔ sa fema ne ɔdole Yifelaem mɔɔ le kakula la ati zo, na yeava ɔ sa bɛne ne yeado Manasɛ mɔɔ le kpanyinli la ati zo.

¹⁵ Na ɔyileyilale Dwosefi, ɔhanle kɛ: “Nyamenle ne mɔɔ me ze mɔ Ebileham nee Ayezeke zonlenle, Nyamenle ne mɔɔ ɛli me nyunlu wɔ me ɛbɛlabɔlɛ nu toonwo yeradwu ɛnɛ,

¹⁶ Nyamenle soanvolɛ ne mɔɔ ɛlie me ɛvi munzule kɔsɔɔti anu la, Ɛyila mgbavolɛ ɛhye mɔ; na ɔlua bɛ nwo zo bɛbɔ me nee me ze mɔ Ebileham nee Ayezeke aluma atɛnlase; Na bɛ nwo ɛzo bɛyɛ ɛlɔne wɔ azɛlɛ ye azo!”

¹⁷ Mɔɔ Dwosefi nwunle kɛ ɔ ze ɛva ɔ sa fema ne ɛdo Yifelaem ati zo la, yeanyɛ ye fɛ, yemɔti ɔyele ɔ ze asa wɔ Yifelaem ati zo kɛ ɔfa yeado Manasɛ ati zo.

¹⁸ Ɔhanle ɔhilele ɔ ze kɛ, “Kyɛkyɛ, egya, mmayɛ ye zɔhane, ɔluakɛ ɛhye a le kpanyinli a na fa ɛ sa fema ne to ɔ ti zo.”

¹⁹ Gyekɔbo amkponle na ɔbuale kɛ, “Me ra, meze ye zɔhane. Ɔdaye noko ɔbayɛ ɛlɔne, eza ɔbayɛ kpole. Noko ɔ diema kakula ye bayɛ sonlakpole adɛla ye, yɛɛ ɔ bo zo amra bayɛ maanle maanle dɔɔnwo.”

²⁰ Yemɔti ɔyileyilale ngakula ne mɔ kenle ko ne ɔzele kɛ, “Bɛ duma nu yɛɛ Yizilayɛma balua ayila menli na bɛaha kɛ, ‘Nyamenle ɛmaa bɛyɛ kɛ Yifelaem nee Manasɛ la.’ ” Gyekɔbo luale adenle zɛhae azo vale Yifelaem yɛle Manasɛ kpanyinli.

²¹ Akee Yizilayɛ zele Dwosefi kɛ, “Kɛmɔ wɔnwu ye la, ɔka ekyii mɔɔ mekɔ me ɛkɛla nzi a. Nyamenle nee bɛ badɛnla, na yeava bɛ gyɛlɛɛnye yeazia yeahɔ bɛ ze mɔ azɛlɛ ne azo.

²² Yeanga ye zɔhane, meva Hyikɛm azɛlɛ ne mɔɔ kye aleɛ, mɔɔ menvale dadeɛ nee ɛda menliele menvile Amɔlema asa anu la memaa wɔ. Meanva meammaa ɛ mediema ne mɔ biala. Medame me anwosesebɛ yɛɛ menvale me nee Amɔlema honle mɔɔ menliele azɛlɛ ne a.”