Mosisi Buluku ne mɔɔ lumua mɔɔ bɛfɛlɛ ye Mɔlebɛbo 45 - BAEBOLO ANZƐƐ BULUKU NWUANZANWUANZA

Dwosefi kile ɔ nwo ahile ɔ mediema ne mɔ

¹ Akee Dwosefi nea a ɛnee ɔngola ɔ nwo sɔ wɔ menli mɔɔ ɛrayia ɛkɛ ne la anyunlu; na ɔdeanle nu kɛ, “Awie biala vi me nwo ɛke ɛhɔ.” Yemɔti bɛ muala bɛvindele na ɔhale Dwosefi angome, na ɔhilele ɔ nwo ɔmanle ɔ mediema ne mɔ nwunle ye sonla holɛ.

² Na ɔzunle kpole kpalɛ ɔmanle Yigyibitima ne dele, yɛɛ belemgbunli ne sua nu amra dele.

³ Na Dwosefi hanle hilele ɔ mediema ne mɔ kɛ, “Medame a mele Dwosefi. Egya tɛte aze ɔ?” Na ɔ mediema ne mɔ angola bɛ nloa anu tɛ, ɔluakɛ ɛnee bɛ ahonle ɛdu.

⁴ Yemɔti Dwosefi zele ɔ mediema ne mɔ kɛ, “Mebodo bɛ bɛbikye me.” Na bɛhwenle bɛbikyele ye. Na ɔzele bɛ kɛ, “Bɛ diema Dwosefi, mɔɔ bɛdɔnenle ye bɛmanle bɛ nee ye hɔle Yigyibiti la, yemɔ a le me.

⁵ Bɛmmamaa ɔyɛ bɛ nyane, yɛɛ bɛmmafa bɛ nwo ɛya kɛ bɛdɔnenle me bɛmanle bɛ nee me rale ɛke a, ɔluakɛ Nyamenle a zoanle me kɛ menlumua bɛ nyunlu na memanlie menli dɔɔnwo ngoane a.

⁶ Ɛhɔne ne mɔɔ ɛra la, bɔ zo mɔɔ yenyia ɛvolɛ nwiɔ ɔ. Ɛvolɛ nnu ɛhɔne bieko tɛdi ɔ nzi mɔɔ awie ɛnrɛzo ɛya na yealua na yeabu a.

⁷ Nyamenle zoanle me manle menlumuale bɛ nyunlu amaa mealie bɛ nee bɛ bo zo amra mɔɔ bara la ngoane.

⁸ Yemɔti tɛ bɛmɛ yɛɛ bɛmanle membale ɛke a, Nyamenle ɔ. Yemɔ yɛɛ yemaa meyɛ belemgbunli ne sonvolɛ kpanyinli mɔɔ nea ye sua nu ɛke nee Yigyibiti maanle ye kɔsɔɔti a.

⁹ “Yemɔti bɛha bɛ nwo waa bɛhɔ egya ɛkɛ na bɛhɔze ye kɛ, ‘Ɛ ra Dwosefi se: Nyamenle ɛyɛ me Yigyibitima kpanyinli na bɛla. Mmasi aze fee.

¹⁰ Saa ɛba a ɛ nee ɛ mra nee wɔ nlɔnra nee wɔ mboane nee wɔ nlankɛ ne mɔ amuala nee debie biala mɔɔ bɛlɛ la badɛnla Gohyɛn, amaa bɛabikye me.

¹¹ Saa bɛwɔ Gohyɛn a, yɛɛ me nye bado bɛ nwo zo, wɔ ɛhɔne ɛvolɛ nnu ne mɔɔ ɛha la anu a. Saa tɛ ye zɔhane ɛdeɛ a, yemɔ ɛdawɔ nee wɔ sua nu amra bali ehyia na debie biala mɔɔ bɛlɛ la abo zo aminli bɔkɔɔ.’

¹² “Na kɛkala, bɛdabɛ bɛnwu debie, me diema Bɛngyaman bɔbɔ nwu debie, na bɛnwu kɛ medame Dwosefi yɛɛ melɛtendɛ meahile bɛ la.

¹³ Bɛha me tumi mɔɔ melɛ la anwo edwɛkɛ bɛhile egya. Bɛha bɛ nwo bɛhɔva egya bɛrɛla ɛke.”

¹⁴ Akee ɔbɛkale ɔ diema Bɛngyaman akɔme nu na ɔzunle. Na Bɛngyaman ɔdaye ɔzunle ɔguale ɔ diema ne akɔme nu.

¹⁵ Na Dwosefi vole ɔ mediema ne mɔ anvoka anwo, na ɔzunle ɔguale bɛ nwo zo. Ɛhye anzi, akee ɔ mediema ne mɔ nee ye dendɛle.

¹⁶ Nrɛlaleɛ hɔdole belemgbunli ne kɛ, “Dwosefi amediema mrenya ne mɔ ɛra.” Na belemgbunli ne nee ye mgbanyima ne mɔ anye liele kpalɛ.

¹⁷ Na belemgbunli ne zele Dwosefi kɛ, “Ka kile ɛ mediema ne mɔ kɛ, bɛyɛ ɛhye: Bɛva aleɛ bɛgua bɛ asoaso ne mɔ azo na bɛzia bɛhɔ Keena;

¹⁸ bɛhɔva bɛ ze nee bɛ sua nu amra amuala bɛrɛla, na mebamaa bɛ azɛlɛ kpalɛ bɛadɛnla zolɛ wɔ Yigyibiti ɛke. Saa bɛwɔ ɛke a bɛbanyia debie biala mɔɔ bɛkpondɛ wɔ azɛlɛ ne azo la.

¹⁹ Eza ka kile bɛ maa bɛyɛ ɛhye: Bɛva ehwili bɛvi ɛke bɛhɔ na bɛava ngakula ne mɔ nee bɛ ye mɔ, na bɛva bɛ ze bɛrɛla.

²⁰ Bɛmmadwenle bɛ ninyɛne ne mɔ anwo, ɔluakɛ debie kpalɛ biala mɔɔ wɔ Yigyibiti la le bɛ ɛdeɛ.”

²¹ Gyekɔbo amra ne mɔ yɛle mɔɔ bɛzele bɛ la. Dwosefi manle bɛ ehwili, kɛmɔ belemgbunli ne hanle la, na ɔmanle bɛ aleɛ mɔɔ bɛbali wɔ adenle nu la.

²² Ɔmanle ko biala ɛvoyialilɛ adɛladeɛ ngɛnlɛma na ɔmanle Bɛngyaman adɛladeɛ ngɛnlɛma ngakyile nnu yɛɛ dwɛtɛ fufule ɛya nsa.

²³ Ɔnwanle ɔ ze noko Yigyibiti ninyɛne ngɛnlɛma asoaso bulu adesoa, asoaso mbelɛ bulu mɔɔ zozo abɛlɛ, kpanwo, yɛɛ akee aleɛ mɔɔ saa ɔ ze ɛlɛba a ɔbali ye wɔ adenle nu la.

²⁴ Akee ɔgyakyile ɔ mediema ne mɔ adenle, na mɔɔ bɛkɔ la ɔzele bɛ kɛ, “Bɛmmakɔdi butule wɔ adenle nu o!”

²⁵ Yemɔti mediema ne mɔ vi Yigyibiti hɔle na bɛradwule bɛ ze Gyekɔbo anwo ɛkɛ wɔ Keena.

²⁶ Na bɛhanle bɛhilele ye kɛ, “Dwosefi tɛte aze, na yemɔ yɛɛ ɔnea Yigyibiti azɛlɛ ne kɔsɔɔti azo a.” Na Gyekɔbo anwo golole ye, ɔluakɛ ɛnee ɔnlie bɛ ɔnli.

²⁷ Na mɔɔ bɛhanle mɔɔ Dwosefi hanle hilele bɛ la amuala bɛhilele ye, na ɔnwunle ehwili ne mɔ mɔɔ Dwosefi ɛmaa bɛ nee bɛ ɛra kɛ bɛva bɛrava ye la, Gyekɔbo anwo gyinlanle ye,

²⁸ na ɔhanle kɛ, “Yeyɛ boɛ. Me ra Dwosefi tɛte aze. Mekɔ meahɔnwu ye kolaa na meawu.”