Mosisi Buluku ne mɔɔ lumua mɔɔ bɛfɛlɛ ye Mɔlebɛbo 42 - BAEBOLO ANZƐƐ BULUKU NWUANZANWUANZA

Dwosefi amediema ne mɔ kɔ Yigyibiti ahɔdɔ abɛlɛ

¹ Gyekɔbo dele kɛ abɛlɛ wɔ Yigyibiti, na ɔzele ɔ mra ne mɔ kɛ, “Bɛmmatɛnla ɛkɛ bɛneɛnlea bɛ nyunlu.

² Mede kɛ abɛlɛ wɔ Yigyibiti. Bɛhɔ bɛhɔdɔ bie bɛrɛla na yɛanyia bie yɛali, na yɛanwu.”

³ Yemɔti Dwosefi amediema ne mɔ anu bulu hɔle Yigyibiti kɛ bɛkadɔ abɛlɛ.

⁴ Gyekɔbo ammaa Bɛngyaman nee ɔ mediema ne mɔ angɔ, ɔluakɛ ɔnze mɔɔ kɛzi ɔ nwo zo a. Bɛngyaman nee Dwosefi vi ɛkolɛ ko anu.

⁵ Gyekɔbo amra ne mɔ nee awie mɔ gyɛne a hɔle kɛ bɛkadɔ abɛlɛ ne a, ɔluakɛ ɛnee ɛhɔne ne ɛyɛ kpole wɔ Keena azɛlɛ zo.

⁶ Mekɛ ne anu ɛnee Dwosefi a le amɛnlado mɔɔ nea Yigyibiti azɛlɛ ne kɔsɔɔti azo a. Ɔdaye a ɔtɔne abɛlɛ ɔmaa bɛdabɛ mɔɔ bɛwɔ maanle ne anu la amuala a. Na Dwosefi amediema ne mɔ rabɔle bɛ ti aze manle ye, bɛbutubutule bɛ nyunlu aze.

⁷ Dwosefi nwunle ɔ mediema ne mɔ ala la yɛɛ ɔnwunle bɛ a, noko ɔyɛle bɛ kɛ bɛle nyɛvolɛ wɔ ɔ nye zo, na ɔdendɛle ɔhilele bɛ kɛ asɛɛ ɔnze bɛ. Ɔbizale bɛ kɛ, “Bɛvi nienwu a bɛra a?” Bɛbuale kɛ, “Yɛvi Keena; yɛra kɛ yɛbadɔ aleɛ.”

⁸ Dwosefi nwunle ɔ mediema ne mɔ, noko bɛmɛ bɛannwu ye sonla holɛ.

⁹ Na Dwosefi hakyele ɛlalɛ ne mɔɔ ɔhanle wɔ bɛ nwo la, na ɔzele bɛ kɛ, “Bɛdabɛ, bɛle busiama mɔɔ ɛra banleɛnlea yɛ maanle ye anu bɛanwu ɛleka mɔɔ yɛtɔ sinli la.”

¹⁰ Bɛbuale kɛ, “Yɛmenle, kyɛkyɛ, ɔnle zɔhane. Abɛlɛ mɔɔ yɛbadɔ la ati yɛɛ wɔ sonvolɛma yɛra a.

¹¹ Yɛdayɛ mɔɔ yɛra la yɛ muala yɛ ze ko. Nɔhalɛ a yɛlɛka la. Yɛnle busiama.”

¹² Dwosefi zele kɛ, “Kyɛkyɛ, menlie bɛ menli. Bɛra kɛ bɛbali busia bɛanleɛnlea ɛleka mɔɔ yɛ maanle ye tɔ sinli la.”

¹³ Bɛbuale kɛ, “Yɛmenle, wɔ sonvolɛma ye le mediema mrenya bulu nee nwiɔ. Yɛ muala yɛ ze ko, yɛɛ yɛwɔ Keena maanle nu. Nuhua kazima ne wɔ yɛ ze anwo lɔ kɛkala, yɛɛ yɛ nuhua ko ɛwu.”

¹⁴ Dwosefi zele kɛ, “Ɔle kɛ mɔɔ meha ala la. Bɛle busiama.

¹⁵ Na saa bɛse ɔnle nɔhalɛ a ɛnee yɛfa ɛhye yɛanlea bɛ nɔhalɛ. Meka yɛ belemgbunli ne ati kɛ saa bɛtɛkɔfale bɛ diema ekyi zɔhane bɛtɛbale a, bɛndu bɛ gyakɛ ko bɛnvi ɛke.

¹⁶ Bɛzoa bɛ nuhua ko bɛmaa ɔhɔva bɛ diema ne ɔrɛla. Bɛdabɛ mɔɔ bɛha la, bɛbagua bɛ efiade, na bɛbagua ɛkɛ ne toonwo kɔkpula kɛ yɛkɛnwu nɔhalɛ mɔɔ wɔ bɛ edwɛkɛ ne anu la. Tɛ ye zɔhane ɛdeɛ a, meka yɛ belemgbunli ne ati kɛ bɛle busiama.”

¹⁷ Na ɔvale bɛ ɔguale efiade kenle nsa.

¹⁸ Ye kenle nsa ne azo, Dwosefi zele ɔ mediema ne mɔ kɛ, “Bɛyɛ ɛhye na bɛkɛnyia bɛ ti, ɔluakɛ mele sonla mɔɔ mesulo Nyamenle a.

¹⁹ Saa bɛdabɛ bɛse bɛle menli mɔɔ ka nɔhalɛ a, ɛnee bɛgyakyi bɛ nuhua ko wɔ efiade ɛke, na bɛdabɛ mɔɔ bɛha la bɛva abɛlɛ ne bɛhɔ bɛmaa bɛ sua nu amra ɛnyia bie ɛli.

²⁰ Na akee bɛva bɛ diema nrenya kakula ne bɛrɛla, amaa meanwu kɛ bɛ edwɛkɛ ne le nɔhalɛ na bɛangu bɛ.” Na bɛkponlenle zolɛ.

²¹ Akee bɛhanle bɛhilele bɛ nwo ngoko kɛ, “Nɔhalɛ, yɛdi fɔlɛ bɔkɔɔ wɔ mɔɔ yɛvale yɛyɛle yɛ diema nrenya ne la anwo. Yɛdayɛ yɛnwunle ye ɛbolɛ mɔɔ ɛnee ɛlɛte, wɔ mekɛ mɔɔ ɛnee ɔlɛkpa yɛ kyɛlɛ la, noko yɛandie ye. Yemɔti a abodelɛ ɛhye ɛra yɛ nwo zo la.”

²² Wulubɛn buale bɛ kɛ, “Se menganle mengilele bɛ kɛ bɛmmafa bɛ sa bɛka kakula ne. Noko bɛandie. Ye mogya ne anwo kakɛ a bɛlɛtua yɛ la.”

²³ Ɛnee bɛnze kɛ Dwosefi te aneɛ ne mɔɔ bɛlɛka la, ɔluakɛ ɛnee awie a tendɛ bɛ nloa zo a.

²⁴ Na Dwosefi gyakyile bɛ ɛkɛ ne hɔle na ɔhɔzunle. Ɔziale ɔrale bɛ nwo ɛkɛ ne na ɔradendɛle ɔhilele bɛ. Akee ɔyele Semɛyɔn na ɔmanle bɛkyekyele ye wɔ bɛ muala bɛ nye zo ɛkɛ ne.

Dwosefi amediema ne mɔ sia ahɔ Keena

²⁵ Dwosefi manle bɛvale abɛlɛ bɛguale bɛ ahodoku ne mɔ anu, eza ɔmanle bɛvale ko biala ezukoa bɛziale bɛwulale ye kodoku ne anu. Eza ɔmanle bɛmanle bɛ aleɛ mɔɔ bɛbali wɔ adenle nu la.

²⁶ Akee bɛvale abɛlɛ ne bɛguale bɛ asoaso ne mɔ azo na bɛhɔle.

²⁷ Mɔɔ bɛkɔ na bɛhɔdwule adenle nu la, bɛ nuhua ko yɛle kɛ ɔmaa ye asoaso ne aleɛ, yemɔti ɔdele ye kodoku ne anloa, na nea, ye ezukoa ye a la kodoku ye anloa la.

²⁸ Ɔzele ɔ mediema ne mɔ kɛ, “Bɛnlea, bɛziane me ezukoa ne; yemɔ a zia me kodoku ye anloa la!” Bɛnwunle ɛhye la, bɛ nwo bubule bɛ na bɛvale anwowozolɛ bɛbizebizale bɛ nwo kɛ, “Duzu munzule a Nyamenle ɛlɛmaa yeara yɛ nwo zo a?”

²⁹ Bɛdwule sua nu wɔ Keena la, bɛhanle mɔɔ ɛzi bɛ nwo zo la amuala bɛhilele bɛ ze Gyekɔbo, na bɛhanle kɛ,

³⁰ “Nrenya ne mɔɔ nea azɛlɛ ne azo la dendɛle ɛdendɛlɛ ɛtane hilele yɛ, na ɔbule yɛ kɛ yɛle busiama mɔɔ ɛhɔ kanleɛnlea bɛ azɛlɛ ne azo a.

³¹ Na yɛhanle yɛhilele ye kɛ yɛnle busiama. Yɛle menli mɔɔ di nɔhalɛ a.

³² Yɛlua mediema mrenya bulu nee nwiɔ, yɛ ze ko. Ko ɛwu, yɛɛ kazima ne wɔ yɛ ze anwo lɔ kɛkala wɔ Keena.

³³ Na nrenya ne mɔɔ nea azɛlɛ ne azo la zele kɛ, saa ɔkɛnwu yɛ nɔhalɛ, na amgba yɛlɛka nɔhalɛ a, ɛnee yɛgyakyi yɛ nuhua ko ɔ nwo ɛkɛ ne, na yɛva abɛlɛ ne yɛrɛlɛ sua nu amra.

³⁴ Na saa yɛsia yɛahɔ a, ɛnee yɛva yɛ diema kazima ne yɛrɛla. Saa yɛyɛ ye zɔhane a yɛɛ ɔkɛnwu kɛ yɛnle busiama, na yɛlɛka nɔhalɛ a. Ɛhye bahile yɛ nɔhalɛlilɛ na yeaye yɛ diema ne yeamaa yɛ, na yɛali gua wɔ maanle ne anu.”

³⁵ Mɔɔ bɛtulutulule bɛ ahodoku ne mɔ, bɛwolɔwolale bɛ abɛlɛ ne la, bɛnwunle kɛ bɛ nuhua ko biala ezukoa bɔlɛ mɔɔ ɔ nee ye hɔle la wɔ ye kodoku ne anu. Mɔɔ bɛ nee bɛ ze bɛnwunle ezukoa ne mɔ la, bɛ rɛle bɔle kpole.

³⁶ Na bɛ ze zele kɛ, “Bɛmaa me mra ne mɔ ɛvi me sa. Dwosefi ɛwu, yɛɛ Semɛyɔn ɛvi me sa; eza bɛbava Bɛngyaman ɔdaye noko bɛahɔ. Duzu edwɛkɛ bɔbɔ yɛɛ akee ɛlɛsisi me nwo zo a?”

³⁷ Na Wulubɛn hanle kɛ, “Egya, saa meanva Bɛngyaman meanzia meamba a, ku me mra mrenya nwiɔ ne sie ɔ bo zo. Fa ye wula me sa nu, na me nee ye bara.”

³⁸ Na Gyekɔbo zele kɛ, “Me ra ne nee bɛ ɛnrɛhɔ ɛnɛ nee ɛhyema. Ɔluakɛ ɔ diema ne ɛwu ɛmaa yeha ɔ ngome. Kɛkala mɔɔ mewie kpanyinli yɛ la, saa munzule bie to ye adenle nu wɔ bɛ adendulɛ ye anu a, bɛkɛmaa menwɔva nyane menwɔhɔ ewule nu.”