Mosisi Buluku ne mɔɔ lumua mɔɔ bɛfɛlɛ ye Mɔlebɛbo 37 - BAEBOLO ANZƐƐ BULUKU NWUANZANWUANZA

Dwosefi nee ɔ mediema mrenya ne mɔ

¹ Gyekɔbo dɛnlanle ɔ ze abo zo ne wɔ Keena azɛlɛ zo.

² Gyekɔbo abusua ne anwo tetedwɛkɛ ɛne: Dwosefi lile ɛvolɛ bulu nee nsuu la ɛnee ɔ nee ɔ mediema ne mɔ a fa mboane ne mɔ kɔ adidi a. Ɔ nee ɔ mediema mɔɔ le ɔ ze mraalɛ Belehaa nee Zelepa amra mrenya ne mɔ a kɔ a. Ɛnee mɔɔ ɔ mediema ne mɔ yɛ la ɛnyɛ ye fɛ, yemɔti ɔbaka ɔkile ɔ ze.

³ Ɛnee Gyekɔbo kulo Dwosefi tɛla ɔ mra mɔɔ ɛha la amuala, ɔboalekɛ ɔyɛle ɛrelera la yɛɛ ɔwole ye a. Ɔkpomgbale tɛladeɛ tendenle mɔɔ lɛ ɔ sa ndendenle la ɔmanle ye.

⁴ Na mɔɔ ɔ mediema ne mɔ nwunle kɛ bɛ ze kulo ye edwɛkɛ tɛla bɛ la, bɛangulo ye edwɛkɛ yɛɛ bɛ nee ye ambɔ nzɛmedɛ.

⁵ Kenle ko Dwosefi hanle ɛlalɛ, na mɔɔ ɔhanle ɔhilele ɔ mediema ne mɔ la, akee bɛhyile ye bɔkɔɔ.

⁶ Ɔhanle ɔhilele bɛ kɛ, “Bɛdie ɛlalɛ bie mɔɔ meha la:

⁷ Ɛnee ɔle kɛ yɛwɔ ɛya nu yɛlɛkyekye hwiiti mɔɔ yɛpɛ la avile avile. Na nea, me file ɛdeɛ ne dwazole gyinlanle senze, na bɛ ɛdeɛ ne mɔ rabɔle yiale ye na bɛbɔle bɛ ti aze bɛmanle me ɛdeɛ ne.”

⁸ Ɔ mediema ne mɔ bizale ye kɛ, “Ɛnee ɛdwenle kɛ ɛbali yɛ nwo zo belemgbunli ɔ? Anzɛɛ ɛdwenle kɛ wɔmɔ yɛɛ ɛbazie yɛ a?” Yemɔti ye ɛlalɛ ne mɔɔ ɔhanle nee ɔ nloa edwɛkɛ ne ati, bɛhyile ye bɔkɔɔ.

⁹ Dwosefi eza hanle ɛlalɛ bieko, na ɔhanle ɔhilele ɔ mediema ne mɔ. Ɔse, “Bɛdie, meha ɛlalɛ bieko. Menwunle kɛ sɛnzɛne ne, yɛɛ siane ne, yɛɛ nwɔlɔra bulu nee ko ɛlɛbɔ bɛ ti aze amaa me.”

¹⁰ Ɔhanle ɛlalɛ ne ɔhilele ɔ ze nee ɔ mediema ne mɔ la, ɔ ze hwile ɔ nyunlu, na ɔzele ye kɛ, “Duzu ɛlalɛ a wɔha la? Ɛkpondɛ wɔaze kɛ medame, ɛ nli, yɛɛ ɛ mediema mrenya ne mɔ yɛbaradu yɛagua ɛ nyunlu yeabɔ yɛ ti aze yɛamaa wɔ ɔ?”

¹¹ Na akee ɔ mediema mrenya ne mɔ anye bolole ɔ nwo na ɔ ze ɛdeɛ, ɔvale edwɛkɛ ne ɔziele ɔ ti anu.

Bɛdɔne Dwosefi na bɛva ye bɛhɔ Yigyibiti

¹² Kenle ko Dwosefi amediema ne mɔ vale bɛ ze mboane ne mɔ hɔle adidi wɔ Hyikɛm.

¹³ Gyekɔbo zele Dwosefi kɛ, “Ɛ mediema ne mɔ ɛva mboane ne mɔ ɛhɔ adidi wɔ Hyikɛm. Bɛla maa menzoa wɔ bɛ nwo lɔ.” Dwosefi buale kɛ, “Egya, mewɔ ɛke, soa me.”

¹⁴ Gyekɔbo zele ye kɛ, “Kɔ kɔnlea ɛ mediema ne mɔ saa bɛ nwo le kpalɛ a, na wɔanlea kɛ mboane ne mɔ noko si de la, na sia baha kile me.” Yemɔti Dwosefi ɔ ze zoanle ye vi Hibulɔn Bɔnza na ɔhɔle Hyikɛm. Dwosefi dwule Hyikɛm

¹⁵ na ɔnnwu ɔ mediema ne mɔ la, ɛnee akee ɔluolua nu wɔ Hyikɛm ɛbɔ ne anu. Nrenya bie nwunle ye na ɔbizale ye kɛ, “Duzu a ɛkpondɛ a?”

¹⁶ Dwosefi buale ye kɛ, “Melɛkpondɛ me mediema mrenya ne mɔ. Mebodo wɔ, kile me ɛleka mɔɔ bɛva bɛ mboane ne mɔ bɛhɔ adidi la.”

¹⁷ Nrenya ne buale ye kɛ, “Mendele kɛ bɛlɛka kɛ bɛkɔ Dotan, yemɔti bɛhɔ.” Na Dwosefi doale bɛ na ɔhɔnwunle bɛ wɔ Dotan.

¹⁸ Bɛnwunle kɛ ɔlua moa moa lɔ ɔlɛba la, bɛhɔle ɔ ti akpamo kɛ bɛku ye.

¹⁹ Bɛhanle bɛhilele bɛ nwo ngoko kɛ, “Ahenle ne mɔɔ ka ɛlalɛ ne la a ɛlɛba la.

²⁰ Bɛrɛla bɛmaa yɛhu ye na yɛvuandi ye funli ne yɛdo ahuma ne mɔ ko anu; na yɛhɔha kɛ nanemgbole bie ɛhye ye ɛli; na yɛnlea kɛ ye ɛlalɛ ne mɔɔ ɔka la kɛzi kɛwie ye la.”

²¹ Na mɔɔ Wulubɛn dele la, ɔliele ye ɔvile bɛ sa nu. Ɔzele kɛ, “Bɛmmamaa yɛku ye.

²² Bɛmmamaa yɛka mogya biala yɛgua. Bɛvuandi ye bɛdo kuma ɛhye mɔɔ wɔ fienemgbole ye anu la anu. Bɛmmafa bɛ sa bɛka ye.” Ɔyɛle ɛhye, amaa yealie ye yeavi bɛ sa nu, na nzinlii yeava ye yeahɔmaa ɔ ze.

²³ Yemɔti mɔɔ Dwosefi radwule ɔ mediema mrenya ne mɔ anwo ɛkɛ ne la, bɛhyele ye, bɛkpolole ye tɛladeɛ tendenle anu meɛbea ne mɔɔ ɔwula la,

²⁴ na bɛvale ye bɛdole kuma ne anu. Ɛnee nzule ɛnle kuma ne anu, yɛɛ ɛhwee ɛnle nu.

²⁵ Akee bɛdɛnlanle aze kɛ bɛdi debie; na bɛmanle bɛ nye zo la, bɛnwunle kɛ Yehyemeeyɛle adendulɛma ekpunli bie ɛlɛba. Bɛvi Geleade, bɛlɛ bɛ afunlumu mɔɔ zozo ɛyɛlɛ, alufuanlɛ, yɛɛ ayile ndɔkɛ bɛlɛkɔ Yigyibiti.

²⁶ Na Dwuda zele ɔ mediema ne mɔ kɛ, “Saa yɛku yɛ diema ne na yɛminli ɔ bo zo a, duzu nvasoɛ a yɛnyia a?

²⁷ Bɛrɛla, bɛmaa yɛdɔne ye yɛmaa Yehyemeeyɛlema ɛhye mɔ. Bɛmmamaa yɛfa yɛ sa yɛka ye, na ɔle yɛ diema. Yɛdayɛ ko ne ala ɔ.” Na ɔ mediema ne mɔ kponlenle zolɛ.

²⁸ Medean gualilɛma ne radwule ɛkɛ ne la, bɛyele Dwosefi bɛvile kuma ne anu, na bɛdɔnenle ye dwɛtɛ fufule abulanwiɔ bɛmanle Yehyemeeyɛlema, na bɛ nee ye hɔle Yigyibiti.

²⁹ (Ɛnee Wulubɛn ɛnle ɛkɛ.) Mɔɔ ɔziale ɔrale la, ɔhɔle kuma ne anwo na ɔnwunle kɛ Dwosefi ɛnle nu. Ɔsuosuanle ye tɛladeɛ ne mɔɔ ɔwula la anu,

³⁰ na ɔziale ɔhɔle ɔ mediema ne mɔ anwo ɛkɛ ne ɔhɔbizale bɛ kɛ, “Kakula ne ɛnle ɛkɛ; na mame, kɛ menyɛ me nwo ɛ?”

³¹ Na bɛhunle abɔnkye ko, bɛvale ye mogya bɛyɛle Dwosefi tɛladeɛ ne anu.

³² Bɛvale tɛladeɛ anu meɛbea ne bɛrɛlɛle ɔ ze na bɛhanle kɛ, “Debie mɔɔ yɛnwu ye la ɛne, nea saa ɛ ra ne tɛladeɛ ne a?”

³³ Gyekɔbo nleanle tɛladeɛ ne na ɔzele kɛ, “Me ra nrenya ne tɛladeɛ ne ɔ; nanemgbole bie ɛhu ye, ɛtete Dwosefi bɔkɔɔ?”

³⁴ Na Gyekɔbo suosuanle ye tɛladeɛ ne mɔɔ ɔwula la anu, ɔvale ɛrele ɔpɛle ɔ bo, na ɔzunle ɔ ra ne mekɛ dɔɔnwo.

³⁵ Ɔ mra mrenya ne mɔ nee ɔ mra mraalɛ ne mɔ amuala rakyekyele ɔ rɛle, noko yeamkponle na ɔhanle kɛ, “Kyɛkyɛ, mebava nyane meawu meahɔ ɛbolɔ lɔ meahɔdo me ra ne.” Na ɔ ze hɔle zolɛ zunle ye.

³⁶ Mekɛ ne anu ɛnee Medeanema ne mɔɔ dɔle Dwosefi la ɛdɔne ye bieko wɔ Yigyibiti ɛmaa Pɔtefaa, Yigyibiti Falo ne sinzavolɛma safohyenle ne.