Mosisi Buluku ne mɔɔ lumua mɔɔ bɛfɛlɛ ye Mɔlebɛbo 3 - BAEBOLO ANZƐƐ BULUKU NWUANZANWUANZA

Sonla anzosesebɛyɛlɛ

¹ Ɛwɔlɛ le mɛlɛbɛla tɛla ɛbɔ nu nane biala mɔɔ Ɛdɛnkɛma Nyamenle bɔle la. Ɔbizale raalɛ ne kɛ, “Yemɔti Nyamenle ɛze bɛ kɛ, ‘Bɛmmadi mbakama mɔɔ wɔ tola ye anu la biala bie’ ɔ?”

² Raalɛ ne buale ɛwɔlɛ ne kɛ, “Yɛkola yɛdi mbakama mɔɔ wɔ tola ye anu la biala bie;

³ na Nyamenle zele yɛ kɛ, ‘Bɛmmadi baka ne mɔɔ gyi tola ne avinli lɔ la ma ne bie, eza bɛmmafa bɛ sa bɛka ye anrɛɛ bɛkɛwu.’ ”

⁴ Ɛwɔlɛ ne hanle hilele raalɛ ne kɛ, “Bɛnrɛwu.

⁵ Nyamenle ze kɛ saa bɛdi baka ne ma ne bie a bɛ nye babuke na bɛayɛ kɛ ɔdaye Nyamenle la, na bɛanwu mɔɔ le kpalɛ, bɛannwu mɔɔ le ɛtane la.”

⁶ Yemɔti mɔɔ raalɛ ne nwunle kɛ baka ne ma ne le kɛnlɛma, na bɛdi a ɔle kpalɛ, na ɔwɔ kɛ sonla di bie na ɔnwu nrɛlɛbɛ la, ɔdele bie ɔlile, na ɔdele bie ɔhɔmanle ɔ hu lile.

⁷ Ɛkɛ ne ala bɛ mu nwiɔ bɛ nye dele na bɛnwunle kɛ bɛlɛ bɛ nwo zɔ; bɛkpomgbale feege nya bɛwowale bɛ nwo.

⁸ Nzinlii mɔɔ aleɛ ne bɔle ɔ nloa aze la, bɛdele Ɛdɛnkɛma Nyamenle agyakɛ abo kɛ ɔlɛkpɔsa tola ne anu, na bɛnriandile bɛhɔveale tola ne anu mbaka ne mɔ anu, amaa yeannwu bɛ.

⁹ Na Ɛdɛnkɛma Nyamenle vɛlɛle nrenya ne na ɔbizale ye kɛ, “Ɛwɔ nienwu?”

¹⁰ Nrenya ne buale kɛ, “Mendele ɛ gyakɛ abo wɔ tola ne anu, na ɛnee mesulo, ɔboalekɛ melɛ me nwo zɔ, yɛɛ menveale a.”

¹¹ Nyamenle bizale ye kɛ, “Nwane a hanle hilele wɔ kɛ ɛlɛ ɛ nwo zɔ a? Ɛnee wɔli bakama ne mɔɔ menduale wɔ kɛ ɛmmadi bie la bie ɔ?”

¹² Nrenya ne buale kɛ, “Raalɛ ne mɔɔ ɛvale ye ɛmanle me la, yemɔ a vale manle me a, yɛɛ menlile a.”

¹³ Ɛdɛnkɛma Nyamenle bizale raalɛ ne kɛ, “Duzu debie a wɔyɛ la?” Raalɛ ne buale kɛ, “Ɛwɔlɛ ne bɛlɛbɛlale me, lile me adwenle yɛɛ menlile bie a.”

Nyamenle bua ndɛne

¹⁴ Ɛdɛnkɛma Nyamenle zele ɛwɔlɛ ne kɛ, “Ɔlua ɛhye mɔɔ wɔyɛ la ati, munzule ɛha wɔ wɔ nyɛmoa nee nanemgbole kɔsɔɔti avinli. Ɔvi ɛnɛ mɔɔ kɔ la ɛbahwenle ɛ ko aze na wɔali ndɛtɛlɛ kɔkpula mekɛ mɔɔ ɛkɛwu la.

¹⁵ Mebava ɛkpɔlɛ meado wɔ nee raalɛ ne, nee ɛ ra nee raalɛ ne ara avinli. Raalɛ ne ara bagelegele ɛ ti na ɛdawɔ wɔaha ɔ gyakɛ anzi.”

¹⁶ Akee ɔzele raalɛ ne kɛ, “Mebamaa wɔade nyane kpalɛ wɔ awolɛ nu; ɛbade nyane wɔ wɔ ralɛ ɛwolɛ nu, noko ɛ nwo balɔ ɛ hu na yeazie wɔ.”

¹⁷ Na ɔzele Adam kɛ, “Kɛmɔ wɔdie ɛ ye aneɛ na wɔli bakama ne mɔɔ menzele wɔ kɛ ɛmmadi la bie la ati, ɔlua ɛ ti, munzule ɛha azɛlɛ ye; ɛtɛwule a ɛbavɛ na wɔanyia aleɛ wɔali.

¹⁸ Mbaka nee ndile mɔɔ anwo le mbowule la bafifi azɛlɛ ye azo, noko ɛbɔ nu ala a ɛbadidi a.

¹⁹ Ɛbahwi ɛ ti anwo na wɔanyia aleɛ wɔali, kɔkpula mekɛ mɔɔ ɛkɛzia ɛkɛhɔ azɛlɛ ye anu bieko la, ɔluakɛ nuhua yɛɛ ɛvi ɛrale a; ɛle ndɛtɛlɛ na ɛbazia wɔahɔ ndɛtɛlɛ nu.”

²⁰ Ɛhye anzi, nrenya ne donle ɔ ye duma na ɔvɛlɛle ye Yive, ɔboalekɛ ɔle menli kɔsɔɔti bɛ nli.

²¹ Akee Ɛdɛnkɛma Nyamenle kpomgbale nane nwoma adɛladeɛ manle Adam nee ɔ ye Yive wulale.

Bɛvoa Adam nee Yive bɛvi tola ne anu

²² Akee Ɛdɛnkɛma Nyamenle zele kɛ, “Bɛnlea, kɛkala sonla ɛyɛ kɛ yɛ nuhua ko la, yenwu kpalɛ nee ɛtane. Saa yɛannea ye boɛ a ɔbali ngoane baka ne ɔdaye ye ma ne bie na yeadɛnla ngoane nu dahuu.”

²³ Yemɔti Ɛdɛnkɛma Nyamenle voanle ye vile Yidɛn tola ne anu kɛ ɔhɔ ɔhɔyɛ azɛlɛ ne mɔɔ ɔvi nu ɔrale la azo egyinli.

²⁴ Ɛdɛnkɛma Nyamenle voanle sonla vile tola ne anu, na ɔvale tease abɔdeɛma nee dadeɛ mɔɔ ɛlɛsɔ na ɔpɛnepɛne ɔ nwo ɛleka biala la ɔrazinzale Yidɛn tola ne aduduleɛ adenle ne mɔɔ kɔ ngoane baka ne anwo la.