Mosisi Buluku ne mɔɔ lumua mɔɔ bɛfɛlɛ ye Mɔlebɛbo 28 - BAEBOLO ANZƐƐ BULUKU NWUANZANWUANZA

¹ Ayezeke vɛlɛle Gyekɔbo na ɔyileyilale ye, na akee ɔzele ye kɛ, “Ɔnle kɛ ɛgya Keena mraalɛ ne mɔ bie.

² Dwazo kɔ Mɛsɔpɔteemea wɔ ɛ nli ɔ ze Bɛtuwɛle sua nu na kɔgya ɛ nli adiema nrenya Leeban amra mraalɛ ne mɔ anu ko.

³ Nyamenle Bedevinli ne ɛyila wɔ na ɔmaa wɔ mralɛ dɔɔnwo na bɛyɛ mɔnwo amaa bɛayɛ ɛlɔne.

⁴ Mesɛlɛ kɛ ɔva Ebileham nyilalɛ ne ɔmaa wɔ nee ɛ bo zo amra, amaa bɛahola bɛava azɛlɛ ye mɔɔ Nyamenle vale manle Ebileham, mɔɔ bɛluolua zolɛ la!”

⁵ Yemɔti Ayezeke manle Gyekɔbo hɔle Mɛsɔpɔteemea, wɔ Arelamenli Bɛtuwɛle ara Leeban, mɔɔ ɔ diema a le Relɛbɛka mɔɔ wole Gyekɔbo nee Yisɔ la anwo lɔ.

Yisɔ gya raalɛ bieko

⁶ Yisɔ nwunle kɛ Ayezeke ɛyila Gyekɔbo na yemaa yehɔ Mɛsɔpɔteemea kɛ ɔhɔgya raalɛ wɔ nehane, yɛɛ wɔ ye ɛyilalɛ ne anu, ɔbɔle ye kɔkɔ kɛ ɔmmagya Keena mraalɛ ne mɔ bie.

⁷ Eza Gyekɔbo ɛdie ɔ ze nee ɔ nli ane na yehɔ Mɛsɔpɔteemea.

⁸ Yemɔti mɔɔ Yisɔ nwunle kɛ ɔ ze Ayezeke anye ɛnlie Keena mraalɛ ne mɔ anwo la,

⁹ ɔhɔle Ebileham ara Yehyemeeyɛle ɛkɛ ne na ɔhɔgyale ɔ ra raalɛ Meehalate, mɔɔ ɔ diema nrenya a le Nɛbeeyo la.

Gyekɔbo ka ɛlalɛ wɔ Bɛtɛle

¹⁰ Gyekɔbo vile Biyɛhyiba na ɔvale ɔ ti ɔbɔle Hɛlan.

¹¹ Ɔhɔdwule ɛleka bie la, ɛnee aleɛ ɛdwo ye, yemɔti ɔhale ɛkɛ ne ɔlale. Ɔvale ɛkɛ ne awolɛ ne mɔ ko ɔzɔle ɔ ti na ɔlafele.

¹² Nɔe ne ɔka ɛlalɛ la, ɛnee kpolike gyi azɛlɛ ye azo na ɔ ti kpula Nyamenle ne ako abo lɔ, na Nyamenle soanvolɛma ɛlɛdi fodwu.

¹³ Ɛdɛnkɛma gyi ɔ ti zo lɔ na ɔlɛka kɛ, “Mame a mele Ɛdɛnkɛma, ɛ nlenya Ebileham nee ɛ ze Ayezeke Nyamenle ne a. Azɛlɛ ne mɔɔ ɛla zolɛ la, mebava meamaa wɔ nee ɛ bo zo amra.

¹⁴ Ɛ bo zo amra bayɛ kɛ azɛlɛ nwo anwea. Bɛbadende bɛadwu adɔleɛ, aduduleɛ, sɔlɔ nee nyiakɛ. Na ɛdawɔ nee ɛ bo zo amra anwo zo yɛɛ ewiade amra kɔsɔɔti balua anyia nyilalɛ a.

¹⁵ Na nea, me nee wɔ lua na mebanlea ɛ nwo zo wɔ ɛleka biala mɔɔ ɛkɔ la, na meava wɔ meazia meara azɛlɛ ɛhye azo. Ɔluakɛ menrɛgyakyi wɔ, kyesɛ mewie mɔɔ meva me nloa meha la yɛ.”

¹⁶ Na Gyekɔbo vi nafelɛ nu dunwuele na ɔhanle kɛ, “Amgba, Ɛdɛnkɛma wɔ ɛke, yɛɛ menze a.”

¹⁷ Ɛzulolɛ kpole hanle ye na ɔhanle kɛ, “Ɛke yɛ ɛzulolɛ kpole kpalɛ! Ɛke a le Nyamenle sua nu a, na anuhɔlɛ mɔɔ bɛfa nu bɛkɔ anwuma maanle nu la a le ɛke.”

¹⁸ Yemɔti Gyekɔbo dwazole nwonlomɔ mangyee ne ala, ɔvale bolɛ ne mɔɔ ɔvale ɔzɔle ɔ ti la ɔkpɔnlanle ye sika na ɔguale nwole zolɛ.

¹⁹ Ɔdonle ɛleka zɔhane Bɛtɛle. (Ɛnee bɛfɛlɛ suakpole ne Lɛze.)

²⁰ Akee Gyekɔbo bɔle ɛwɔkɛ kɛ, “Saa Nyamenle nee me dua, ɔnea me nwo zo wɔ ɛleka mɔɔ melɛkɔ la, na ɔmaa menyia aleɛ medi, menyia ɛdanlɛ mekeda,

²¹ na mesia meba Egya sua nu anzonudwolɛ nu a, yemɔ Ɛdɛnkɛma bayɛ me Nyamenle,

²² yɛɛ bolɛ ɛhye mɔɔ mekpɔnla ye sika wɔ ɛke la, bayɛ Nyamenle sua nu. Na debie biala mɔɔ ɛdawɔ Ɛdɛnkɛma ɛkɛmaa menwɔnyia la, menwɔhyɛ nu bulu menwɔdu ɛkpɔ ko menwɔmaa wɔ.”