Mosisi Buluku ne mɔɔ lumua mɔɔ bɛfɛlɛ ye Mɔlebɛbo 25 - BAEBOLO ANZƐƐ BULUKU NWUANZANWUANZA

Ebileham abo zo amra bie mɔ

¹ Ebileham gyale raalɛ bieko. Bɛfɛlɛ ye Kɛtula.

² Ɔ nee ye wole Zemelan, Dwɔkohyan, Midan, Medean, Yehyebake yɛɛ Hyua.

³ Dwɔkohyan wole Hyiba nee Didan. Didan amra a le Ahyulem, Lɛtuhyem, yɛɛ Lɛɛmem.

⁴ Medean amra mrenya a le Yifaa, Yifɛ, Heenɔko, Abaeda, yɛɛ Ɛledeeya. Ɛhye mɔ amuala le Kɛtula abo zo amra.

⁵ Ebileham vale ye debie biala mɔɔ ɔlɛ la manle Ayezeke.

⁶ Na ye mgbɔnla ne mɔ amra ɛdeɛ, ɔmanle bɛ ahyɛlɛ ninyɛne, yɛɛ mekɛ mɔɔ ɛnee ɔtɛwule la, ɔmanle ngakula zɔhane mɔ hwenle bɛ nwo vile Ayezeke anwo, hɔle aduduleɛ maanle bie anu.

Ebileham ewule nee ye ɛzielɛ

^7-8 Ebileham yɛle kpanyinli kpalɛ, ɔyɛle ɛrelera nwosonwoso na yeawu. Ɔlile ɛvolɛ ɛya ko abulasuu nee nnu.

⁹ Ɔ mra mrenya Ayezeke nee Yehyemeeyɛle ziele ye wɔ Makepilaa Bolɛ bɔne ne anu wɔ Hɛtenli Zohaa ara Yifolɔn azɛlɛ ne azo aduduleɛ afoa nu mɔɔ kɔne Mameli la.

¹⁰ Azɛlɛ ɛhye a Ebileham dɔle vile Hɛtema ɛkɛ ne la. Ɛkɛ ne a bɛziele Ebileham nee ɔ ye Sɛla a.

¹¹ Ebileham ewule ne anzi, Nyamenle yilale Ayezeke. Na Ayezeke dɛnlanle bula ne mɔɔ bɛfɛlɛ ye “Teasenli ne mɔɔ nwu me la Bula” ne anwo.

Yehyemeeyɛle abo zo amra

¹² Ebileham ara Yehyemeeyɛle, mɔɔ ɔ nee Sɛla Yigyibitinli sonvolɛ raalɛ Heega wole la,

¹³ wole mralɛ mrenya ɛhye mɔ. Bɛ aluma yɛɛ bɛ awolɛ nu, kɛ bɛsi bɛdoa zolɛ la ɛne: Nɛbeeyo a le kpanyinli a. Akee Kidaa, Adebili, Mebesam,

¹⁴ Mehyema, Dumaa, Masa,

¹⁵ Heedade, Tima, Gyitɛ, Neefehye, yɛɛ Kidɛmaa.

¹⁶ Menli ɛhye mɔ yɛle mbusua ekpunli ekpunli bulu nee nwiɔ mgbanyinli yɛɛ bɛvale bɛ aluma bɛtotonle bɛ namunamu nee bɛ azokoɛleɛ ne mɔ.

¹⁷ Yehyemeeyɛle lile ɛvolɛ ɛya ko ɛvolɛ abulasa nee nsuu, na ɔwule, na bɛziele ye.

¹⁸ Yehyemeeyɛle abo zo amra ne dɛnlanle Havelaa nee Hyulu mɔɔ saa ɛlɛkɔ Aselea a ɛnee ɔwɔ Yigyibiti aduduleɛ la. Bɛ nee Ebileham abo zo amra mɔɔ hale la andɛnla.

Yisɔ nee Gyekɔbo awolɛ ne

¹⁹ Ebileham ara nrenya Ayezeke abo zo amra ɛne: Ebileham wole Ayezeke.

²⁰ Ayezeke lile ɛvolɛ abulanla la yɛɛ ɔgyale Relɛbɛka a. Relɛbɛka le Arelamenli Bɛtuwɛle mɔɔ vi Mɛsɔpɔteemea la ara raalɛ. Ɔ diema nrenya a le Leeban.

²¹ Kɛmɔ ɛnee Relɛbɛka ɛnwo la ati, Ayezeke zɛlɛle Ɛdɛnkɛma maanle ye; Ɛdɛnkɛma diele ye nzɛlɛlɛ na ɔ ye Relɛbɛka nrenzɛle.

²² Ɛnee ɔlɛnrenzɛ ndalɛ, na ngakula ne mɔ bɔle ɔ bo kɛ bɛko bɛ nli akunlu. Relɛbɛka zele kɛ, “Na duzu edwɛkɛ a ɛra me nwo zo a?” Yemɔti ɔhɔle kɛ ɔkabiza nwolɛ wɔ Ɛdɛnkɛma ɛkɛ.

²³ Na Ɛdɛnkɛma zele ye kɛ, “Maanle nwiɔ a gua ɛ kunlu a; Ɛbawo ndalɛ, na bɛ nloa ɛnrɛzɛ. Ko anwo bayɛ se adɛla ko; Kpanyinli ne bazonle ekyi ne.”

²⁴ Mekɛ ne dwule na ɔ ko hanle ye la, ɔwole ndalɛ, mrenya nwiɔ.

²⁵ Kpanyinli ne le kɔkɔlɛ, ɔ nwo amuala le enrinli dɔɔnwo, na bɛdonle ye Yisɔ.

²⁶ Akee bɛwole ekyi ne, na yemɔ ɔkara la, ɛnee ɔlɛ Yisɔ agyakɛ taboa ne anzi. Na bɛdonle ye Gyekɔbo. Ayezeke lile ɛvolɛ abulasia la yɛɛ ɔwole bɛ a.

Yisɔ tɔne ye awolɛ kpanyinli gyinlabelɛ ne

²⁷ Ngakula ne mɔ nyinle la Yisɔ nyianle ɛbɔlɛ di yɛɛ ɔze ɛbɔlɛlilɛ nye zo. Gyekɔbo noko yɛle sonla bɛtɛɛ, na dahuu ɔwɔ sua nu.

²⁸ Ayezeke hulole Yisɔ, ɔboalekɛ ɛnee ɔmaa ɔnyia ɛbɔ nu nane ɔdi; na Relɛbɛka noko hulole Gyekɔbo.

²⁹ Kenle ko mɔɔ ɛnee Gyekɔbo ɛlɛto ye aluba tolo la Yisɔ vi ɛbɔ nu rale, na ɛnee ɛhɔne ɛlɛku ye kpalɛ.

³⁰ Ɔzele Gyekɔbo kɛ, “Maa me aluba kɔkɔlɛ tolo ye bie meno na me nye zo ɛlɛbulu!” (Ɛhye ati a bɛvɛlɛle ye Yidɔm la).

³¹ Gyekɔbo zele ye kɛ, “Ɛnee dumua tɔne wɔ awolɛ kpanyinli gyinlabelɛ ne maa me.”

³² Yisɔ buale kɛ, “Melɛwu, awolɛ kpanyinli noko ɔdaye ɔkile duzu?”

³³ Gyekɔbo zele ye kɛ, “Ɛnee ka ndane kɛ ɔvi ɛnɛ mɔɔ kɔ la, medame a mele kpanyinli a.” Yemɔti Yisɔ hanle ndane ne na ɔdɔnenle ye awolɛ kpanyinli gyinlabelɛ ne ɔmanle Gyekɔbo.

³⁴ Akee Gyekɔbo manle Yisɔ kpanwo nee aluba kɔkɔlɛ tolo ne bie. Yisɔ lile kpanwo ne, ɔnlonle tolo ne, ɔnlonle nzule ɔguale zolɛ na ɔdwazole ɔhɔle. Ɛnee kɛ ɔyɛle mɔɔ Yisɔ kpole ye awolɛ nu gyinlabelɛ la ɛne.