Mosisi Buluku ne mɔɔ lumua mɔɔ bɛfɛlɛ ye Mɔlebɛbo 23 - BAEBOLO ANZƐƐ BULUKU NWUANZANWUANZA

Sɛla ɛwu na Ebileham tɔ azɛlɛ azie ye

¹ Sɛla dɛnlanle aze lile ɛvolɛ ɛya ko, ɛvolɛ abulanwiɔ nee nsuu.

² Ɔwule Hibulɔn (Keleate Aaba), wɔ Keena maanle nu, na Ebileham zunle ye.

³ Mɔɔ Sɛla wule la, Ebileham gyakyile funli ne ɛkɛ ne hɔle Hɛtema ɛkɛ ne na ɔzele bɛ kɛ,

⁴ “Mele ɛyɛvolɛ a mede bɛ avinli ɛke a; bɛmaa me azɛlɛ mendɔ menyɛ me azie menzie me funli wɔ zolɛ.”

⁵ Hɛtema buale ye kɛ,

⁶ “Yɛmenle, tie mɔɔ yɛka la. Ɛle belemgbunli kpole a ɛwɔ yɛ avinli a. Ɛdawɔ neɛnlea yɛ nla ne mɔ na sie wɔ funli ne wɔ nla biala mɔɔ ɛkulo la anu. Yɛ nuhua biala ɛnrɛva ye nla ɛnrɛyɛ wɔ abokɛ, yɛɛ awie biala ɛnrɛgyegye wɔ wɔ funli ne ɛzielɛ nu.”

⁷ Ebileham dwazole bɔle ɔ ti aze manle Hɛtema mɔɔ lɛ azɛlɛ ne la, yɛle bɛ mo

⁸ na ɔzele bɛ kɛ, “Saa bɛkulo kɛ mesie me funli ne a, ɛnee mesɛlɛ bɛ, bɛzɛlɛ Zohaa ara Yifolɔn

⁹ bɛmaa ɔva ye bolɛ bɔne ne mɔɔ wɔ Makepilaa la ɔmaa me. Ɔwɔ ye azɛlɛ ne abo lɔ. Metɔ meadua ye kakɛ wɔ bɛdabɛ bɛ nyunlu ɛke, na meava meayɛ azie.”

¹⁰ Ɛnee Yifolɔn de Hɛtema ne avinli, na ɔbuale Ebileham ɔmanle Hɛtema mɔɔ yiale ɛkɛ ne la kɔsɔɔti dele. Ɔse,

¹¹ “Me menle, kyɛkyɛ, tie mɔɔ meka la. Mefa azɛlɛ ne memaa wɔ, yɛɛ bolɛ bɔne ne mɔɔ wɔ zolɛ la le wɔ ɛdeɛ. Mefa memaa wɔ, wɔ me menli ye mɔɔ ɛyia ɛke la amuala anyunlu. Fa sie wɔ funli ne.”

¹² Na Ebileham dwazole bɔle ɔ ti aze wɔ Hɛtema anyunlu,

¹³ na ɔhanle ɔhilele Yifolɔn, ɔmanle Hɛtema mɔɔ ɛrayia ɛkɛ ne la amuala dele bie kɛ, “Mesɛlɛ wɔ, tie medame noko. Metua azɛlɛ ne kakɛ. Die, na maa menzie me funli ne wɔ zolɛ.”

¹⁴ Yifolɔn buale Ebileham kɛ,

¹⁵ “Me menle, tie me. Azɛlɛ mɔɔ bɛtɔ ye dwɛtɛ fufule ɛya nna la le duzu wɔ yɛ mu nwiɔ yɛ avinli? Wɔmɔ kɔzie wɔ funli ne wɔ ɛkɛ.”

¹⁶ Ebileham kponlenle zolɛ na ɔzuzule dwɛtɛ fufule ne ɔmanle Yifolɔn, ɔmanle Hɛtema mɔɔ rayiale ɛkɛ ne la amuala nwunle ye. Ɔle dwɛtɛ fufule ɛya nna, kɛmɔ gualilɛma ɛzuzudeɛ ne mɔɔ bɛfa bɛsuzu bɛ ezukoa la kile la.

¹⁷ Yemɔti Yifolɔn azɛlɛ ne mɔɔ wɔ Makepilaa, bolɛ bɔne ne mɔɔ wɔ zolɛ, yɛɛ mbaka kɔsɔɔti mɔɔ wɔ zolɛ la

¹⁸ rayɛle Ebileham ɛdeɛ, kɛ ɔdaye ye agyadeɛ ɔ, wɔ Hɛtema mɔɔ rayiale la kɔsɔɔti anyunlu.

¹⁹ Ɛhye anzi akee Ebileham hɔziele ɔ ye Sɛla wɔ bolɛ bɔne ne mɔɔ wɔ Makepilaa mɔɔ wɔ Mameli aduduleɛ la anu, wɔ Keena azɛlɛ zo.

²⁰ Hɛtema vale azɛlɛ ne manle Ebileham yɛle ye ɛdeɛ kɛ ɔva ɔyɛ azie.