Mosisi Buluku ne mɔɔ lumua mɔɔ bɛfɛlɛ ye Mɔlebɛbo 21 - BAEBOLO ANZƐƐ BULUKU NWUANZANWUANZA

Ayezeke awolɛ ne

¹ Ɛdɛnkɛma rakpɔlale Sɛla, kɛmɔ ɔhanle ala la, na ɔyɛle mɔɔ ɔvale ɔbɔle ye ɛwɔkɛ la ɔmanle ye.

² Na Sɛla nrenzɛle na ɔwole ralɛ nrenya ɔmanle Ebileham wɔ ye mrelera nu, wɔ mekɛ ne mɔɔ Nyamenle nee ye dendɛle nwolɛ la.

³ Ebileham donle ralɛ nrenya ne mɔɔ ɔ ye Sɛla wole manle ye la, Ayezeke.

⁴ Ayezeke lile kenle mɔtwɛ la, Ebileham yɛle ye mrenyanu nzonlɛ, kɛmɔ Nyamenle zele ye la.

⁵ Ɛnee Ebileham ɛli ɛvolɛ ɛya yɛɛ ɔwole ɔ ra Ayezeke a.

⁶ Na Sɛla hanle kɛ, “Nyamenle ɛmaa ɛzelekɛ ɛdɔ me nwo. Awie biala mɔɔ kɛde me nganeɛ la nee me bazele.”

⁷ Na ɔvale ɔzɔle zolɛ kɛ. “Nwane ala bɔbɔ yɛɛ anrɛɛ kɛhola kɛze Ebileham kɛ Sɛla banloa ngakula nyɛfonlɛ a? Noko akee mɔɔ yeyɛ ɛrelera la mewo ralɛ nrenya memaa ye.”

⁸ Kakula ne nyinli, na kenle ko ne mɔɔ ɔpɛle nyɛfonlɛ la, ɔ ze Ebileham dole nwolɛ ɛkponle kpole bie.

Bɛvoa Heega nee Yehyemeeyɛle

⁹ Kenle ko Sɛla nwunle kɛ Yigyibitinli Heega ara Yehyemeeyɛle, mɔɔ ɔ nee Ebileham wole ye la ɛlɛsi Ayezeke amgbu.

¹⁰ Yemɔti ɔzele Ebileham kɛ, “To raalɛ akɛlɛ ne nee ɔ ra nrenya ne adenle zo, ɔluakɛ akɛlɛ ɛhye ara nrenya ne nee me ra Ayezeke ɛnrɛbɔ nu ɛnrɛli agya ko.”

¹¹ Ebileham anye anlie ɛhye anwo fee, ɔluakɛ ɔ ra nrenya a le kakula ne.

¹² Na Nyamenle zele Ebileham kɛ, “Mmadwenle ɛ ra nrenya ne nee wɔ akɛlɛ raalɛ ne anwo. Di edwɛkɛ biala mɔɔ Sɛla ɛha ɛhile wɔ la azo, ɔluakɛ ɛ bo zo amra vi Ayezeke anu a bara a.

¹³ Mebamaa ɛ ra nrenya ne mɔɔ akɛlɛ raalɛ ne ɛwo ye la noko ada ayɛ maanle, ɔboalekɛ ɔle ɛ ra.”

¹⁴ Yemɔti Ebileham dwazole nwonlomɔ mangyee ne ala na ɔvale aleɛ nee nzule nwoma kodoku ko ɔmanle Heega vale dole ɔ kɔme zo, na ɔdole ye nee ɔ ra ne adenle zo. Heega hɔle na ɔhɔluoluale Biyɛhyiba fienemgbole ne anu.

¹⁵ Ye nzule ne wiele la, ɔgyakyile ɔ ra ne ɔdole aziakɛ bie abo.

¹⁶ Akee ɔhɔdɛnlanle amozi moa kɛyɛ mita ɛya ko, na ɔhanle ɔhilele ɔ nwo kɛ, “Menrɛhola me ra ye anyunlu nea wɔ ye ewule nu.” Heega de ɛkɛ ne la ɛnee yehakyi ɔ nzi yezi kakula ne, na kakula ne bɔle ɔ bo kɛ ɔsu.

¹⁷ Nyamenle dele kakula ne ane, na Nyamenle soanvolɛ vi anwuma vɛlɛle Heega na ɔbizale ye kɛ, “Heega, duzu a ɛlɛgyegye wɔ a? Mmasulo, ɔluakɛ Nyamenle ɛde kakula ne ane wɔ ɛleka mɔɔ ɔwɔ la.

¹⁸ Dwazo, kɔmaa kakula ne zo na nea ye boɛ kpalɛ, ɔluakɛ mebamaa yeayɛ maanle kpole.”

¹⁹ Akee Nyamenle bukele ɔ nye, na Heega nwunle bula bie mɔɔ nzule wɔ nu la, na ɔhɔle nwolɛ ɔhɔzale bie ɔguale ye nwoma kodoku ne anu ɔmanle ɔyile na ɔnloanle ɔ ra ne bie.

²⁰ Na Nyamenle boale kakula ne manle ɔnyinle. Ɔdɛnlanle fienemgbole ne anu na ɔbenle ɛda ɛdolɛ nu.

²¹ Ɔdɛnlanle Pɛlan fienemgbole ne anu, na ɔ nli gyale Yigyibiti raalɛ maanle ye.

Ebileham nee Abemɛlɛke ngyehyɛlɛ ne

²² Mekɛ ne anu Belemgbunli Abemɛlɛke nee Faekɔlo, ye safohyenlema kpanyinli ne mɔɔ nea ye ɛlɔnema ne anwo zo la, hɔle Ebileham ɛkɛ hɔzele ye kɛ, “Nyamenle boa wɔ wɔ debie biala mɔɔ ɛkɛze kɛ ɛyɛ la anu.

²³ Zɔhane ati fa Nyamenle ka ndane kile me kɛ, ɛnrɛbɛlɛbɛla me, anzɛɛ me mra, anzɛɛ me bo zo amra mɔɔ bara la amuala, na kɛmɔ meli nɔhalɛ memaa wɔ la, zɔhane ala yɛɛ ɛbayɛ wɔamaa me nee azɛlɛ ye mɔɔ wɔra zolɛ la azo amra a.”

²⁴ Na Ebileham zele kɛ, “Mebɔ ɛwɔkɛ zɔhane.”

²⁵ Ebileham hanle nzule bula bie mɔɔ Abemɛlɛke sonvolɛma ne liele vile ɔ sa nu la anwo edwɛkɛ hilele ye.

²⁶ Na Abemɛlɛke zele kɛ, “Menze ahenle mɔɔ yɛle zɔhane debie la. Wɔanga wɔangile me, yɛɛ metɛtele ye ɛlɛ kɛ ɛnɛ.”

²⁷ Akee Ebileham vale mboane nee nlankɛ manle Abemɛlɛke, na bɛ mu nwiɔ bɛyɛle ngyehyɛlɛ na bɛhyele ɔ bo.

²⁸ Ebileham yele mboane mbelɛ nsuu vile ye mboane ne anu ziele ahane.

²⁹ Na Abemɛlɛke bizale Ebileham kɛ, “Mboane mbelɛ nsuu ɛhye mɔɔ wɔkpa nu wɔye wɔzie ahane la abo a le duzu?”

³⁰ Ebileham buale kɛ, “Die me sa nu mboane nsuu ɛhye fa di daselɛ, kɛ medame yɛɛ membɔle bula ɛhye a.”

³¹ Ɛhye ati bɛvɛlɛle ɛleka ne Biyɛhyiba, ɔboalekɛ ɛkɛ ne yɛɛ bɛ mu nwiɔ bɛlile amonle a.

³² Yemɔti bɛyɛle ngyekyeleɛ ɛhye wɔ Biyɛhyiba, na Abemɛlɛke nee Faekɔlo, ye safohyenlema kpanyinli ne mɔɔ nea ye ɛlɔnema anwo zo la ziale hɔle Filisitia.

³³ Ebileham luale “Tamaleseke” baka wɔ Biyɛhyiba ɛkɛ, na ɔzonlenle Ɛdɛnkɛma, Damɛnlangoate Nyamenle ne wɔ ɛkɛ ne.

³⁴ Na Ebileham dɛnlanle Filisitia maanle nu hyɛle kpalɛ.