Mosisi Buluku ne mɔɔ lumua mɔɔ bɛfɛlɛ ye Mɔlebɛbo 20 - BAEBOLO ANZƐƐ BULUKU NWUANZANWUANZA

Ebileham nee Abemɛlɛke

¹ Ebileham vi ɛleka mɔɔ ɔde la ɔhɔle Keena nyiakɛ na ɔhɔdɛnlanle Keedɛhye nee Hyulu avinli, eza ɔhɔdɛnlanle Gilaa.

² Na Ebileham zele kɛ, “Sɛla le me diema raalɛ.” Yemɔti Gilaa Belemgbunli Abemɛlɛke zoanle manle bɛhɔvale Sɛla bɛrale ye sua nu.

³ Na Nyamenle rahanle Abemɛlɛke ɛlalɛ kɛ, “Nea, raalɛ ne mɔɔ wɔhɔva ye la ati, wɔwu wɔwie; ɔluakɛ ɔle awie aye.”

⁴ Ɛnee Abemɛlɛke ɛtɛfale ɔ sa ɛtɛkanle ye, yemɔti ɔzɛlɛle kɛ, “Awulae, menze nwolɛ bie na mmaku yɛ.

⁵ Ɔdaye nrenya ne yɛɛ ɔhanle ɔhilele me kɛ ɔ diema raalɛ a, yɛɛ ɔdaye raalɛ ne ɔdole zolɛ kɛ ɔ diema nrenya ɔ. Me ti anu wienyi, yɛɛ metɛfale me sa metɛkanle ye.”

⁶ Na Nyamenle buale ye kɛ, “Meze kɛ ɛ ti anu wienyi, yɛɛ medame yɛɛ menzɔle wɔ mɔɔ wɔannyia adenle wɔanyɛ ɛtane wɔantia me a, yemɔti a meammaa wɔanva ɛ sa wɔanga ye a.

⁷ Yemɔti fa nrenya ne aye ne kɔmaa ye. Ɔle Nyamenle kpɔmanvolɛ, ɔbazɛlɛ yeamaa wɔ, na wɔanyia ngoane. Na saa wɔanva raalɛ ne wɔangɔ a, ɛnee nwu ye kɛ ɛdawɔ nee wɔ menli ne kɔsɔɔti bawu.”

⁸ Yemɔti Abemɛlɛke dwazole nwonlomɔ mangyee ne ala na ɔvɛlɛle ye sonvolɛma ne amuala na ɔhanle edwɛkɛ ne amuala ɔhilele bɛ. Na ɛzulolɛ hanle menli ne mɔ.

⁹ Akee Abemɛlɛke vɛlɛle Ebileham na ɔbizale ye kɛ, “Duzu debie a wɔva wɔyɛ yɛ la? Duzu ɛtane yɛɛ meyɛ metia wɔ, mɔɔ wɔva munzule kpole ɛhye wɔra me nee me maanlema anwo zo a? Wɔyɛ mɔɔ bɛnyɛ la wɔmaa me.

¹⁰ Duzu a ɛnee ɛlɛdwenle nwolɛ mɔɔ yemɔti ɛyɛle deɛ ɛhye a?”

¹¹ Ebileham buale kɛ, “Menyɛle ye zɔhane, ɔboalekɛ ɛnee medwenle kɛ ɛke amra ɛnzulo Nyamenle fee, na me ye ati bɛkɛhu me.

¹² Yeanga ye zɔhane, nɔhalɛ, eza ɔle me diema. Ɔle me ze ara raalɛ, na me nee ye ɛnvi ɛkolɛ ko anu, yɛɛ ɔrayɛle me ye a.

¹³ Mekɛ mɔɔ Nyamenle maanle mendule egya sua nu kɛ menlɔ nu la, menganle mengilele ye kɛ, ‘Ɔwɔ kɛ ɛyɛ nyɛleɛ ɛhye ɛmaa me; ɛleka biala mɔɔ yɛkɛhɔ la, ka kɛ ɛ diema nrenya a le me.’ ”

¹⁴ Akee Abemɛlɛke vale mboane, nlankɛ, yɛɛ ahanra mrenya nee mraalɛ manle Ebileham, na ɔvale ɔ ye Sɛla ɔmanle ye.

¹⁵ Abemɛlɛke zele Ebileham kɛ, “Nea, me azɛlɛ ne a ɛ nye dua ye la; tɛnla ɛleka biala mɔɔ ɛkulo la.”

¹⁶ Akee ɔzele Sɛla kɛ, “Nea, meva dwɛtɛ fufule ngoko apenle memaa ɛ diema nrenya ne. Ɔle wɔ ɛbialɛ ezukoa kɛ ɛnli fɔlɛ, na ɛdi benle wɔ awie biala anyunlu.”

^17-18 Ɔlua mɔɔ Abemɛlɛke yɛle la ati, Ɛdɛnkɛma manle Abemɛlɛke aye nee ye sonvolɛ mraalɛ mɔɔ wɔ sua nu ɛkɛ ne la amuala pɛle awolɛ. Na Ebileham zɛlɛle Nyamenle manle Abemɛlɛke. Na Nyamenle yɛle Abemɛlɛke nee ɔ ye ayile na eza ɔyɛle sonvolɛ mraalɛ mɔɔ wɔ sua nu ɛkɛ ne la ayile, ɔmanle bɛ awolɛ dukuele.