Mosisi Buluku ne mɔɔ lumua mɔɔ bɛfɛlɛ ye Mɔlebɛbo 18 - BAEBOLO ANZƐƐ BULUKU NWUANZANWUANZA

Bɛfa ralɛ nrenya bɛabɔ Ebileham ɛwɔkɛ

¹ Kenle ko ewiazo mɔɔ ɛnee maanle nu yɛ wuluwulu, na Ebileham de ye ndanlɛ sua ne anuhɔlɛ ne wɔ Mameli oku mbaka ne mɔ abo la, Ɛdɛnkɛma yele ɔ nwo hilele ye.

² Ɔkpogyale ɔ nye zo la, mɔɔ ɔnwunle ye la a le kɛ, menli nsa gyigyi ɔ nyunlu nehane. Ɔnwunle bɛ la, ɔvi ye anuhɔlɛ ne ɔnriandile ɔhɔyiale bɛ, ɔbɔle ɔ ti aze ɔmanle bɛ,

³ na ɔzele kɛ, “Me menle mɔ, saa bɛyɛ na ɔkɛyɛ boɛ a, ɛnee bɛmmapɛ nu wɔ me anuhɔlɛ ɛke bɛkɔ.

⁴ Bɛmaa membɛlɛ bɛ nzule ekyi bɛnrinzi bɛ gyakɛ anwo, na bɛlie bɛ ɛnwomenle ekyii wɔ mbaka ye abo.

⁵ Mekava kpanwo ekyi noko mearɛlɛ bɛ, meamaa bɛakpula bɛ sa na akee bɛahɔ. Ɔluakɛ bɛra bɛ sonvolɛ sua nu.” Bɛzele ye kɛ, “Yɛ, kɛmɔ wɔha la.”

⁶ Ebileham ziale wolole ye ndanlɛ sua ne anu ndɛndɛ na ɔhɔzele Sɛla kɛ, “Ka ɛ nwo suzu esamo kpalɛ ekyi yɛ kpanwo.”

⁷ Eza ɔnriandile ɔhɔle nlankɛ ne mɔ anu ɔhɔhyele ekyi ko mɔɔ ɛlɔ, na ɔle kpalɛ la ɔmanle ye sonvolɛ ne hunle ye, biale ye na ɔzenle.

⁸ Akee ɔvale meleke, bɛta, yɛɛ ɛnlankɛ ralɛ ne mɔɔ bɛze la ɔhɔziele menli nsa ne anyunlu kɛ bɛkpula bɛ sa, na ɔgyinlanle bɛ nwo ɛkɛ ne ɔnleanle ɔmanle bɛlile.

⁹ Menli nsa ne bizale ye kɛ, “Ɛ ye Sɛla wɔ nienwu?” Ɔbuale kɛ, “Ɔwɔ ndanlɛ sua ne anu.”

¹⁰ Na ko zele ye kɛ, “Mebazia meara ɛ nwo ɛke ɛvolɛ bieko kabezɛhae wɔ nyenyesuo mekɛ ne anu, na ɛ ye Sɛla bawo ralɛ nrenya.” Ɛnee Sɛla wɔ ndanlɛ sua ne anu anlenkɛ ne anloa, wɔ bɛ nzi ɛkɛ na ɔlɛtie edwɛkɛ mɔɔ bɛlɛka la.

¹¹ Ebileham nee ɔ ye Sɛla ɛyɛ mgbanyinli kpalɛ, na Sɛla bɔbɔ ɛdeɛ, ɛnee yebo ralɛwolɛ zo.

¹² Yemɔti Sɛla zelele na ɔbizale ɔ nwo kɛ, “Asoo kɛkala mɔɔ mewie ɛrelera yɛ, na me hu ɔdaye yeyɛ ɛrelera la, yɛɛ akee mebalie me nye a?”

¹³ Na Ɛdɛnkɛma bizale Ebileham kɛ, “Duzu ati a mɔɔ meha la ati Sɛla ɛzele, na yeha kɛ, ‘Asoo kɛkala mɔɔ mewie ɛrelera yɛ la yɛɛ mebawo ralɛ nrenya a?’

¹⁴ Debie biala ɛnyɛ se ɛmmaa Ɛdɛnkɛma. Mekɛ ne dwu a mebazia meara, ɛvolɛ bieko kabezɛhae, na Sɛla bawo ralɛ nrenya.”

¹⁵ Kɛmɔ ɛnee Sɛla sulo la ati, ɔzale na ɔhanle kɛ, “Meanzele.” Ɛdɛnkɛma zele ye kɛ, “Kyɛkyɛ, ɛzelele.”

Ebileham kpa Sodɔm ati kyɛlɛ

¹⁶ Akee menli ne mɔ dwazole kɛ bɛkɔ, na bɛvale bɛ ti bɛbɔle Sodɔm. Ebileham nee bɛ dudule agyakɛ kɛ ɔkazɔho bɛ.

¹⁷ Na Ɛdɛnkɛma hanle kɛ, “Ɔnle kɛ mefa mɔɔ mebayɛ la mefea Ebileham,

¹⁸ ɔboalekɛ Ebileham abo zo amra bayɛ maanle kpole, na maanle maanle kɔsɔɔti mɔɔ wɔ ewiade la balua ɔ nwo zo anyia nyilalɛ.

¹⁹ Mekpa nu meye ye, amaa yeanlea yeamaa ɔ mra nee ye sua nu amra alua Ɛdɛnkɛma adenle ne azo, na bɛayɛ menli mɔɔ le tenlene na bɛdi pɛlepɛle a, amaa meava debie biala mɔɔ meva mebɔ Ebileham ɛwɔkɛ la meamaa ye.”

²⁰ Akee Ɛdɛnkɛma zele Ebileham kɛ, “Sodɔm nee Gomɔla ɛtane ne ɛyɛ kpole, yɛɛ bɛ ɛtane ne mɔ anwo ngehanleɛ akee ɛzo somaa.

²¹ Yemɔti mekɔ ɛkɛ meahɔnlea saa mɔɔ bɛlɛkeha bɛatia ye la amuala le zɔhane a. Saa ɔnle zɔhane noko a eza mebanwu ye.”

²² Yemɔti Ebileham hale Ɛdɛnkɛma anyunlu ɛkɛ ne gyinlanle, na menli nwiɔ ne mɔɔ ɛha la telele zolɛ kɛ bɛkɔ Sodɔm.

²³ Na Ebileham hwenle bikyele Ɛdɛnkɛma na ɔhanle kɛ, “Asoo amgba ala ɛbazɛkye tenlenema wɔaboka amumuyɛma ne anwo?

²⁴ Saa ngyengyene nu bie ala ɛnyia menli abulanlu mɔɔ di boɛ la wɔ ɛkɛ ne a, asoo ɛnrɛnlea menli abulanlu ne ati na ɛnrɛgyakyi sua ne ɛzɛkyelɛ?

²⁵ Munzule ɛhɔ ɛbɔ nu, kɛ ɛkɛyɛ debie mɔɔ le zɛhae, na ɛkɛhu tenlenema ɛkɛboka amumuyɛma, na ɛkɛmaa tenlenema kɛwie ye kɛ amumuyɛma la. Ɛhye ɛmbɔnle ɛ nwo! Asoo azɛlɛ ye amuala ndɛnebuavolɛ ɛnrɛli pɛlepɛle?”

²⁶ Ɛdɛnkɛma buale ye kɛ, “Saa menyia menli abulanlu mɔɔ le tenlenema la wɔ suakpole ne azo a, bɛdabɛ bɛ ti, menrɛzɛkye suakpole ne.”

²⁷ Ebileham buale ye kɛ, “Mmafa me nwo ɛya kɛ metɛgyi me gyakɛ anu me nee me Awulae tɛtendɛ a; medame mɔɔ mele ndɛtɛlɛ nee nzonle la.

²⁸ Saa ɔba ye kɛ menli abulanlu ne, amuanrɛɛ nuhua nnu ɛnli munli a, asoo ɛbazɛkye suakpole ne, kɛmɔ wɔannyia nnu ne wɔanzɔ zolɛ la?” Ɛdɛnkɛma buale ye kɛ, “Saa menyia menli abulanla nee nnu a, menrɛzɛkye suakpole ne.”

²⁹ Eza ɔbizale ye kɛ, “Na saa bɛle abulanla ala ɛ?” Ɛdɛnkɛma buale kɛ, “Menli abulanla ne ati, menrɛzɛkye suakpole ne.”

³⁰ Akee Ebileham hanle kɛ, “O Awulae, mmafa me nwo ɛya, na maa menga ɛhye. Saa ɛnwu abulasa ɛkɛ ɛ?” Ɛdɛnkɛma buale ye kɛ, “Saa menwu menli abulasa wɔ ɛkɛ a, menrɛzɛkye suakpole ne.”

³¹ Ebileham hanle kɛ, “Mebodo wɔ kɛ kɛkala metɛgyi me gyakɛ anu me nee wɔ tɛtendɛ a. Na saa ɛnyia abulanwiɔ ɛ?” Ɛdɛnkɛma buale kɛ, “Saa menyia menli abulanwiɔ a, bɛ ti, menrɛzɛkye suakpole ne.”

³² Na Ebileham hanle kɛ, “O Awulae, mmafa me nwo ɛya, na maa menga kokye ɛhye. Na saa ɛnwu bulu wɔ ɛkɛ ne ɛ?” Ɛdɛnkɛma buale kɛ, “Saa menwu bulu wɔ ɛkɛ a, menli bulu ne ati, menrɛzɛkye suakpole ne.”

³³ Ɛdɛnkɛma nee Ebileham wiele tendɛ la, ɔhɔle. Na Ebileham ziale hɔle sua nu.