Mosisi Buluku ne mɔɔ lumua mɔɔ bɛfɛlɛ ye Mɔlebɛbo 12 - BAEBOLO ANZƐƐ BULUKU NWUANZANWUANZA

Nyamenle fɛlɛ Ebilam

¹ Ɛdɛnkɛma zele Ebilam kɛ, “Ɛvi wɔ maanle ye anu tu, ye ɛ nwo fi ɛ ze sua nu nee ɛ nwo amra avinli, na kɔ azɛlɛ ne mɔɔ mebahile wɔ la azo.

² Mebayila wɔ, meamaa wɔayɛ sonlakpole, ɛ bo zo amra adɛlɛ ayɛ maanle kpole, na ɛ nwo ayɛ aso.

³ Mebayila bɛdabɛ mɔɔ bɛyila wɔ la, Na meamaa munzule ado mɔɔ kɛzuzu munzule kɛmaa wɔ la; Na ɔlua ɛ nwo zo nyilalɛ aha maanle maanle kɔsɔɔti mɔɔ wɔ ewiade la.”

⁴ Yemɔti Ebilam hɔle, kɛmɔ Ɛdɛnkɛma ɛze ye la; na Lɔɔto nee ye hɔle. Ebilam lile ɛvolɛ abulasuu nee nnu la, yɛɛ ɔvile Hɛlan a.

⁵ Na ɔvale ɔ ye Sɛleeyae, ɔ diema nrenya ara Lɔɔto, yɛɛ bɛ nwo ninyɛne kɔsɔɔti mɔɔ bɛlɛ, nee menli mɔɔ bɛnyia bɛ wɔ Hɛlan la amuala, na bɛzile nu kɛ bɛkɔ Keena azɛlɛ zo. Bɛhɔdwule Keena azɛlɛ zo la,

⁶ Ebilam telele zolɛ hɔle Moli oku baka ne abo wɔ Hyikɛm. Mekɛ ne anu ɛnee Keenama wɔ azɛlɛ ne azo.

⁷ Akee Ɛdɛnkɛma yele ɔ nwo hilele Ebilam, na ɔzele ye kɛ, “Mebava azɛlɛ ɛhye meamaa ɛ bo zo amra.” Yemɔti Ebilam zile azukponle wɔ ɛkɛ ne manle Ɛdɛnkɛma, mɔɔ ɛye ɔ nwo ɛhile ye la.

⁸ Akee ɔvi ɛkɛ ne ɔhɔle boka bie mɔɔ wɔ Bɛtɛle aduduleɛ la azo na ɔbɔle aseseɛ wɔ ɛkɛ ne. Ɛnee Bɛtɛle ɛha ye adɔleɛ yɛɛ Eyae wɔ ye aduduleɛ. Ɔzile azukponle wɔ ɛkɛ ne ɔmanle Ɛdɛnkɛma na ɔzonlenle ye.

⁹ Na Ebilam zɔle ye adendulɛ ne azo, ɔhɔle ɔ nyunlu wɔ Keena nyiakɛ afoa nu.

Ebilam wɔ Yigyibiti

¹⁰ Akee ɛhɔne zile Keena azɛlɛ zo. Yemɔti Ebilam hɔdɛnlanle Yigyibiti, ɔluakɛ ɛhɔne ne mɔɔ zile azɛlɛ ne azo la le kpole kpalɛ.

¹¹ Mɔɔ ɔka ekyii na Ebilam adwu Yigyibiti maanle ne anu la, ɔzele ɔ ye Sɛleeyae kɛ, “Meze kɛ ɛle raalɛ mɔɔ anwo yɛ fɛ a.

¹² Saa Yigyibitima nwu wɔ ala a, bɛbanwu kɛ me ye a le wɔ; bɛbahu me na bɛagyakyi wɔ.

¹³ Yemɔti anrɛɛ ka kɛ ɛle me diema raalɛ, amaa wɔmɔ ti, bɛanlea me boɛ, na bɛangu me.”

¹⁴ Mɔɔ Ebilam dwule Yigyibiti la, Yigyibitima nwunle kɛ raalɛ ne anwo yɛ fɛ kpalɛ.

¹⁵ Yemɔti mɔɔ Yigyibiti belemgbunli ne mgbanyima ne mɔ nwunle ye la, bɛhanvole ye bɛhilele belemgbunli ne. Bɛravale raalɛ ne bɛhɔle belemgbunli ne sua nu.

¹⁶ Na ɔlua yemɔ ɔ ti belemgbunli nee Ebilam lile ye kɛnlɛma; ɔmanle ye mboane, nlankɛ, asoaso nyinli nee mbelɛ, mraalɛ nee mrenya sonvolɛma, yɛɛ afunlumu mɔ.

¹⁷ Noko Ebilam aye Sɛleeyae ati, Ɛdɛnkɛma manle ewule nzane bie radɔle Yigyibiti belemgbunli ne sua nu.

¹⁸ Yemɔti belemgbunli ne vɛlɛle Ebilam na ɔbizale ye kɛ, “Duzu debie a wɔyɛ la? Duzu ati a wɔanga wɔangile me kɛ ɔle ɛ ye ɛ?

¹⁹ Duzu ati a ɛhanle kɛ ɛ diema raalɛ a, mɔɔ anrɛɛ ɛmaa meava ye meayɛ me ye ɛ? Ɛ ye ne ɛne, fa ye na ɛ nee ye bɛhɔ.”

²⁰ Na Yigyibiti belemgbunli ne manle ye menli ne dole ye nee ɔ ye adenle zo, na ɔvale mɔɔ ɔnyianle la amuala ɔhɔle.