Mosisi Buluku ne mɔɔ lumua mɔɔ bɛfɛlɛ ye Mɔlebɛbo 10 - BAEBOLO ANZƐƐ BULUKU NWUANZANWUANZA

Nowa amra mrenya ne mɔ abo zo amra

¹ Nowa amra mrenya Hyɛm, Ham, yɛɛ Gyeefɛte nee bɛ bo zo amra awolɛndoazo ne mɔ ɛne: Azuyilɛ ne anzi Nowa amra ne mɔ wole mralɛ mrenya.

² Gyeefɛte amra mrenya a le: Gomɛ, Meegɔgo, Meedae, Gyeevan, Tubale, Mihyɛke, yɛɛ Taelase. Bɛ bo zo amra a bɛfa bɛ aluma bɛfɛlɛ bɛ la.

³ Gomɛ abo zo amra a le menli mɔɔ wɔ Ahyekinaze, Relaefate, yɛɛ Togama la.

⁴ Gyeevan abo zo amra a le menli mɔɔ wɔ Yilaehya, Sepeen, Saepelɛse, yɛɛ Wulodese la.

⁵ Bɛ bo zo amra a le bɛdabɛ mɔɔ bɛdede ɛnweanloa nee mɔɔ dede nyevile ne anu bɔra ne mɔ azo la. Menli ɛhye mɔ amuala le Gyeefɛte abo zo amra. Bɛdɛnlɛdɛnlanle ye mbusua ekpulike ekpulike, asolo ekpulike ko biala maanle nee ye ɛdendɛlɛ.

⁶ Ham amra mrenya a le Kɛhye, Yigyibiti, Lebea, yɛɛ Keena. Bɛ bo zo amra a bɛfa bɛ aluma bɛfɛlɛ bɛ la.

⁷ Kɛhye abo zo amra a le menli mɔɔ wɔ Siba, Havelaa, Sabeta, Releeyamaa, yɛɛ Sabetika la. Releeyamaa abo zo amra a le menli mɔɔ wɔ Hyiba nee Didan la.

⁸ Kɛhye wole Nemelɔdo. Yemɔ a ɔle sonla mɔɔ lumuale yɛle katakyie wɔ ewiade ye anu a.

⁹ Ɔlua Ɛdɛnkɛma moalɛ zo Nemelɔdo yɛle bɔvolɛ kpole kpalɛ, yemɔti a bɛva bɛyɛ mgbanyidwɛkɛ kɛ “Ɛdɛnkɛma ɛmaa ɛyɛ bɔvolɛ kpole kɛ Nemelɔdo la.”

¹⁰ Alumua ne ɛnee Ɛlɛke, Akade, yɛɛ Kaleni, azuamgbole nsa ɛhye mɔ mɔɔ wɔ Babelonia maanle nu la amuala boka Nemelɔdo maanle ne anwo.

¹¹ Ɔvi maanle zɔhane anu ɔhɔle Aselea ɔhɔkyekyele azuamgbole Nenɛvɛ, Rilihɔbo Ɛɛ, Keelaa,

¹² yɛɛ Relɛsɛn, mɔɔ wɔ Nenɛvɛ nee suakpole Keelaa avinli la. Keelaa le suakpole mɔɔ ɛlie duma a.

¹³ Yigyibiti abo zo amra a le menli mɔɔ wɔ Ledea, Anam, Lɛheebe, Nafetu,

¹⁴ Patulusu, Kaselu, yɛɛ Kiliti, mɔɔ Filisitiama vi bɛ nuhua la.

¹⁵ Keena ara nrenya kpanyinli a le Saedɛn. Nzinlii ɔwole Hɛte, bɛ bo zo amra a bɛfa bɛ aluma bɛfɛlɛ bɛ la.

¹⁶ Keena abo zo amra ne bie mɔ a le Gyibɛsema, Amɔlema, yɛɛ Gɛgahyema.

¹⁷ Havaema, Akaema, Saenaema,

¹⁸ Avadema, Zɛmalema, yɛɛ Heematema. Keena abusua ekpulike ekpulike ne mɔ dɛlɛle,

¹⁹ manle Keenama ɛweɛne ne anloa dwule Saedɛn nyiakɛ mɔɔ kɔ Gilaa mɔɔ zua Gaza la, eza ɔdɛlɛle ɔhɔle aduduleɛ ɔhɔdwule Sodɔm, Gomɔla, Ademaa, yɛɛ Zɛboyem mɔɔ zua Leehya la.

²⁰ Menli ɛhye mɔ amuala le Ham abo zo amra. Bɛdɛnlɛdɛnlanle ye mbusua ekpulike ekpulike, asolo ekpulike ko biala maanle nee ye ɛdendɛlɛ.

²¹ Gyeefɛte adiema kpanyinli Hyɛm ɔdaye ɔ bo zo amra a le Hibuluma amuala.

²² Hyɛm amra mrenya ne mɔ a le Yilam, Ahyɛ, Apakyehyade, Lɛɛde, yɛɛ Ɛlam. Bɛ bo zo amra a bɛfa bɛ aluma bɛfɛlɛ bɛ la.

²³ Ɛlam abo zo amra a le menli mɔɔ wɔ Ɛɛze, Hɛle, Gitɛ, yɛɛ Mɛhyɛke la.

²⁴ Apakyehyade ara a le Hyila, yɛɛ Hyila ara a le Yibɛ.

²⁵ Yibɛ wole mrenya nwiɔ, bɛfɛlɛ ko Pilɛge, ɔluakɛ ye mekɛ zo a ewiade amra anu kpakyekpakyele a, yɛɛ bɛfɛlɛ ko ne Dwɔketan.

²⁶ Dwɔketan abo zo amra a le menli mɔɔ wɔ Alemodade, Hyilɛfe, Heezameevɛte, Gyilaa,

²⁷ Hadɔlam, Yuzale, Dekelaa,

²⁸ Ɔbale, Abemeeyɛle, Hyiba

²⁹ Ofɛ, Havelaa, yɛɛ Dwobabe la. Ɛhye mɔ amuala le Dwɔketan abo zo amra.

³⁰ Bɛ azɛlɛ mɔɔ bɛdɛnlanle zolɛ la tɛlɛ vi Mihya kɔdwu Sifaa wɔ aduduleɛ maanle ne awoka ne mɔ anu.

³¹ Hyɛm abo zo amra ɛne. Bɛdɛnlɛdɛnlanle ye mbusua ekpulike ekpulike, asolo ekpulike ko biala maanle nee ye ɛdendɛlɛ.

³² Nowa amra ne abo zo amra, kɛmɔ bɛ mbusua ekpulike ekpulike ne mɔ de la ɛne. Azuyilɛ ne anzi bɛdele bɛkpondenle ewiade na bɛkyekyele maanle maanle bɛdɛnlɛdɛnlanle nu. Maanle ko biala anu amra le abusua ekpulike ko.