Pɔɔlo Kɛlata mɔɔ ɔhɛlɛle ɔhɔmanle Galeehyeama la 3 - BAEBOLO ANZƐƐ BULUKU NWUANZANWUANZA

Mɛla anzɛɛ diedi

¹ O Galeehyeama ahɔnwɔne! Nwane a ɛhye bɛ sili a? Asoo bɛngakye mɔɔ bɛhanle bɛhilele bɛ, mɔɔ fane kɛ ɔzile ɔyɛle mɔɔ bɛhunle Gyisɛse Kelaese wɔ meanubaka ne azo la?

² Bɛha ko ɛhye bɛmaa mendie, asoo mɛla ne mɔɔ bɛlile zo la ati a Nyamenle vale ye Sunsum ne manle bɛ a, anzɛɛ bɛdiele Edwɛkpa ne na bɛliele bɛlile la ati ɔ?

³ Duzu ati a bɛde bɛ nwo bɛdo zɛhae ɛ? Bɛbɔle ɔ bo kɛnlɛma wɔ Nyamenle Sunsum ne anu, na kɛ ɔyɛle mɔɔ bɛlɛwie ye nwonane nu ɛ?

⁴ Anzɛɛ bɛkpondɛ kɛ mɔɔ bɛnwu ye nee mɔɔ bɛnyia ye la amuala yɛ mgbane ɔ? Ɔnle kɛ ɔba ye zɔhane fee!

⁵ Yemɔti bɛdwenle kɛ Nyamenle fa ye Sunsum ne amaa bɛ, yeava bɛ yeayɛ nwanwane ninyɛne yeahile kɛ bɛlile mɛla ne azo, anzɛɛ bɛdie Edwɛkpa ne na bɛlie bɛli la ati ɔ?

⁶ Bɛhɛlɛ ye wɔ Nyamenle Edwɛkɛ ne anu kɛ, “Ebileham liele Nyamenle lile, na ɔlua ye diedi ti ɔzɔle Nyamenle anye.”

⁷ Ɛhye ati bɛkola bɛnwu kɛ Ebileham nlɔnra kpalɛ ne a le bɛdabɛ mɔɔ bɛdie Nyamenle bɛdi la.

⁸ Nyamenle Edwɛkɛ ne se, “Nyamenle balua bɛdabɛ mɔɔ bɛnle Dwuuma la diedi zo yeamaa bɛazɔ ɔ nye.” Ɛhye kile kɛ Nyamenle Edwɛkɛ ne lumuale nwunle ye, na ɔbɔle Edwɛkpa ne nolo ɔhilele Ebileham kɛ, “Ɛ nwo zo yɛɛ Nyamenle balua ayila maanle maanle kɔsɔɔti a.”

⁹ Ebileham liele lile na bɛyilale ye. Zɔhane ala yɛɛ bɛdabɛ mɔɔ bɛdie bɛdi la amuala nyia nyilalɛ a.

¹⁰ Bɛdabɛ mɔɔ bɛdwenle kɛ bɛdi mɛla ne azo na bɛazɔ Nyamenle anye la ɛnwu amaneɛ. Ɔluakɛ Nyamenle Edwɛkɛ ne se, “Awie biala mɔɔ anli mɛla ne ngyehyɛlɛ ne amuala azo, kɛmɔ bɛhɛlɛ ye wɔ Nyamenle Mɛla buluku ne anu la, munzule ɛha ye.”

¹¹ Kɛkala, yɛnwu ye wienyi kɛ awie ko biala ɛnrɛhola ɛnrɛli mɛla ne amuala azo na yeazɔ Nyamenle anye, ɔluakɛ Nyamenle Edwɛkɛ ne se, “Sonla ne mɔɔ kɛlie Nyamenle kɛli na ɔkɛzɔ ɔ nye la a banyia ngoane a.”

¹² Noko mɛla ne azo ɛlilɛ nee Nyamenle mɔɔ ɛdie ye wɔali la ɛnle ko. Ɔluakɛ, Nyamenle Edwɛkɛ ne se, “Awie mɔɔ di mɛla ne amuala azo la a banyia ngoane a.”

¹³ Kelaese ɛralie ndeanlɛ muala, na yelie yɛ yevi munzule mɔɔ anrɛɛ mɛla ne fa yɛ ahɔ nu la anu, ɔluakɛ Nyamenle Edwɛkɛ ne se, “Mɔɔ bɛkɛhenda ye wɔ baka zo la munzule ɛha ye.”

¹⁴ Bɛhendanle Kelaese wɔ baka zo wɔ yɛmɛ yɛ ti, amaa ɔlua ɔ nwo zo bɛdabɛ mɔɔ bɛnle Dwuuma la bɛanyia nyilalɛ ne mɔɔ Nyamenle vale bɔle Ebileham ɛwɔkɛ la bie, na kɛmɔ yɛdie Kelaese yɛdi la ati yɛ muala yɛ sa aha ye Sunsum ne mɔɔ ɔvale ɔbɔle yɛ ɛwɔkɛ la.

Mɛla ne nee ɛwɔkɛ ne

¹⁵ Mediema, memaa bɛ ndonwo ko na bɛnlea: Saa menli nwiɔ kponle ngyehyɛlɛ bie azo na bɛkye ɔ bo a, awie ɛngola ɛnzɛkye ye anzɛɛ ɛnva bie ɛmboka nwolɛ.

¹⁶ Nyamenle bɔle ɛwɔkɛ ne manle Ebileham nee ye anlɔnra. Nyamenle Edwɛkɛ ne ɛnga kɛ “ye nlɔnra,” mɔɔ kile kɛ nlɔnra ne mɔ zonle a. Ɔse “ye anlɔnra,” mɔɔ kile anlɔnra kokye, na anlɔnra ɛhye, yemɔ a le Kelaese.

¹⁷ Mɔɔ meka la a le kɛ, Nyamenle nee Ebileham yɛle ngyehyɛlɛ ne na bɛhyele ɔ bo la, ɔ nzi ɛvolɛ ɛya nna abulasa yɛɛ bɛvale mɛla ne bɛmanle Dwuuma a. Ɛhye ati mɛla ne ɛngola ɛntulu ngyekyeleɛ ne na ɔnzɛkye Nyamenle ɛwɔkɛ ne.

¹⁸ Ɔluakɛ saa Nyamenle ahyɛlɛdeɛ ne gyi mɛla ne azo ɛlilɛ zo a ɛnee noko ɔnle ahyɛlɛdeɛ mɔɔ gyi ye ɛwɔkɛ ne azo a. Na ɔle nɔhalɛ kɛ ye ɛwɔkɛ ne mɔɔ ɔbɔle Ebileham la ati a Nyamenle ɛmaa ahyɛlɛdeɛ mɔɔ le zɛhae la a.

¹⁹ Saa ɔle zɛhae a ɛnee mɛla ne kpɔkɛ mɔɔ gyi zolɛ la a le boni? Nyamenle vale mɛla ne manle, amaa sonla anwu ɛtane deɛ holɛ. Mɛla ne hilehilele yɛ ekyii hɔdwule kɛ Ebileham anlɔnra ne mɔɔ yemɔti bɛbɔle ɛwɔkɛ ne la rale la. Nyamenle manle ye soanvolɛma a vale mɛla ne luale sonla nwo zo rale a.

²⁰ Ɛwɔkɛ ne ɛdeɛ, ɔdaye Nyamenle mumua ne yɛɛ ɔbɔle a, yeanva yeanlua awie anwo zo.

Mɛla ne gyima

²¹ Ɛnee ɛhye kile kɛ mɛla ne tia Nyamenle ɛwɔkɛ ne mɔ ɔ? Kyɛkyɛ, ɔnle zɔhane fee. Saa mɛla bie wɔ ɛkɛ mɔɔ zolɛ ɛlilɛ maa menli ngoane a, anrɛɛ awie mɔɔ kɛli zolɛ la kɛzɔ Nyamenle anye.

²² Nyamenle Edwɛkɛ ne se ɛtane gyale ewiade amuala; ɛhye ati bɛdabɛ mɔɔ bɛdie Gyisɛse Kelaese bɛdi la angome a Nyamenle bava ye ɛwɔkɛ ne mɔɔ ɔbɔle la yeamaa bɛ a.

²³ Mɔɔ ɛnee bɛtɛbukele diedi adenle ne la, mɛla ne bɔle yɛ kpanwu hɔdwule kɛ bɛbukele diedi adenle ne la.

²⁴ Mɛla ne dɛnlanle yɛ nwo zo kpalɛ hɔdwule mekɛ mɔɔ Kelaese rale la, amaa saa yɛdie ye yɛdi a, yɛazɔ Nyamenle anye.

²⁵ Kɛkala mɔɔ diedi mekɛ ne ɛra la, saa yɛdie Kelaese yɛdi a mɛla ne ɛnrɛdɛnla yɛ nwo zo bieko.

²⁶ Bɛhakye ɛhye: Bɛlie Gyisɛse bɛli la ati bɛ kɔsɔɔti bɛ nee Gyisɛse Kelaese ɛbɔ nu ɛyɛ Nyamenle amra.

²⁷ Bɛdabɛ mɔɔ bɛzɔne bɛ wɔ Kelaese duma nu la ɛva Kelaese agyakɛ.

²⁸ Zɔhane ati ngakyile biala ɛnle Dwuuma nee sonla mɔɔ ɛnle Dwuunli la avinli, akɛlɛ nee dehelɛ, anzɛɛ nrenya nee raalɛ avinli. Ɔluakɛ Kelaese ati bɛ muala bɛle menli ko.

²⁹ Saa bɛle Kelaese ɛdeɛ a, ɛnee bɛle Ebileham nlɔnra mɔɔ asa baha Nyamenle ahyɛlɛdeɛ ne mɔɔ ɔvale ɔbɔle ɛwɔkɛ ne la a.