Ɛzela Buluku ne 8 - BAEBOLO ANZƐƐ BULUKU NWUANZANWUANZA

Menli mɔɔ vi nlɔnu ziale rale la

¹ Mbusua mgbanyinli mɔɔ ɛnee wɔ nlɔnu wɔ Babelonia mɔɔ nee me ziale rale Gyɛlusalɛm wɔ Belemgbunli Atazɛzɛse mekɛ zo la aluma ɛne:

^2-14 Fenɛhase abusua kpanyinli ne a le Gɛhyɔn Yetama abusua kpanyinli ne a le Daneɛle Devidi abusua kpanyinli ne a le Hyɛkanaya ara nrenya Hatɛhye. Pɛlɔhye abusua kpanyinli ne a le Zɛkalaya, ɔlɛ mrenya ɛya ko abulanlu mɔɔ bɛ aluma wɔ ngɛlata zo a Peehate Mowabe abusua kpanyinli ne a le Zɛlahaya ara Ɛleɛhoyinae, ɔlɛ mrenya ɛya nwiɔ Zatu abusua kpanyinli ne a le Gyaheezeɛle ara Hyɛkanaya, ɔlɛ mrenya ɛya nsa Eden abusua kpanyinli ne a le Dwɔnatan ara Yibɛde, ɔlɛ mrenya abulanlu Yilam abusua kpanyinli ne a le Atalaya ara Gyɛhyaya, ɔlɛ mrenya abulasuu Hyɛfataya abusua kpanyinli ne a le Maekeɛle ara Zɛbadaya, ɔlɛ mrenya abulatwɛ Dwowabe abusua kpanyinli ne a le Gyɛhayɛle ara Obadaya, ɔlɛ mrenya ɛya nwiɔ bulu nee mɔtwɛ Beenae abusua kpanyinli ne a le Dwɔsefaya ara Hyɛlomete, ɔlɛ mrenya ɛya ko abulasia Bibeyae abusua kpanyinli ne a le Bibeyae ara Zɛkalaya, ɔlɛ mrenya abulanwiɔ nee mɔtwɛ Azegade abusua kpanyinli ne a le Hakatan ara Dwoheenan, ɔlɛ mrenya ɛya ko nee bulu Yilefɛlɛte, Gyɛyuwɛle, yɛɛ Hyɛmaya mɔɔ vi Adonaekam abusua nu la bɛdabɛ bɛrale. Bɛlɛ mrenya abulasia (nzinlii a bɛmɛ bɛrale a) Yutae nee Zakɛ mɔɔ vi Begeveeyae abusua nu la noko rale. Bɛ nee mrenya abulasuu a rale a.

Ɛzela kpondɛ Livaema yeamaa bɛanlea Ɛzonlenlɛ Sua ne

¹⁵ Memboɔboale menli ne amuala anloa wɔ azule ne mɔɔ bɛdukue ye na ɔse ɔkɔ Aheeva sua zo la anloa, na yɛdɛnlanle ɛkɛ ne kenle nsa. Meneɛnleanle menli ne mɔ nee sɛlɛvolɛma ne mɔ anu la, menwunle kɛ Livaenli biala ɛnle nu.

¹⁶ Zɔhane ati menvɛlɛle mgbanyima ngɔnla nee kilehilevolɛma nwiɔ. Mgbanyima ne mɔ a le Ɛlieza, Ɛleɛle, Hyɛmaya, Ɛleneetan, Gyɛlebe, Ɛleneetan, Neetan, Zɛkalaya, yɛɛ Mehyɛlam; menli ɛhye mɔ le mbusua mgbanyinli. Akee menvɛlɛle Dwɔyalebe nee Ɛleneetan kɛ bɛle kilehilevolɛma.

¹⁷ Menzoanle bɛ wɔ Kasefaya wɔ Dwuuma kpanyinli ne mɔɔ bɛfɛlɛ ye Yedo la ɛkɛ ne. Menvale nrɛlaleɛ memanle bɛ kɛ bɛva bɛhɔmaa Yedo nee ɔ gɔnwo mɔ Ɛzonlenlɛ Sua ne sonvolɛma ne kɛ bɛva sɛlɛvolɛma mɔɔ yɛ gyima wɔ yɛ Nyamenle ne Ɛzonlenlɛ Sua ne anu la bɛraboka yɛ nwo.

¹⁸ Na ɔlua Nyamenle ɛlolɛ zo, bɛvale Hyɛlibaya, mɔɔ le Livae ara Malae abusua nu amra ne bie, mɔɔ lɛ adwenle na ɔle Yizilayɛnli tɛnyetɛnye la, yɛɛ ɔ mra nee ɔ mediema ne mɔ bɛrɛlɛle yɛ, bɛlua bulu nee mɔtwɛ.

¹⁹ Eza bɛvale Hahyabaya nee Gyɛhyaya mɔɔ vi Mɛlɛlae abusua nu la, nee bɛ mediema nee bɛ nwo amra mɔɔ dwu abulanwiɔ la bɛrɛlɛle yɛ.

²⁰ Bɛ nee menli ɛya nwiɔ abulanwiɔ mɔɔ le Ɛzonlenlɛ Sua nu sonvolɛma la noko rale. Menli ɛhye mɔ, Belemgbunli Devidi nee ye mgbanyima a yele bɛ ziele ɛkɛ kɛ bɛboa Livaema a. Bɛhɛlɛle menli ɛhye mɔ aluma wɔ buluku nu.

Ɛzela di menli ne ati yeamaa bɛahye ɛhɔne, bɛazɛlɛ

²¹ Aheeva azule ne anloa yɛɛ mengyehyɛle kɛ ɔwɔ kɛ yɛ muala yɛkye ɛhɔne na yɛbɛlɛ yɛ nwo aze wɔ yɛ Nyamenle ne anyunlu na yɛsɛlɛ ye kɛ ɔnlea yɛ, yɛ mra nee yɛ nwo ninyɛne zo na ɔzinza yɛ wɔ yɛ adendulɛ nu a.

²² Ɔyɛle me nyiane kɛ kpɔvolɛ ti menwɔbiza belemgbunli kɛ ɔmaa ɛlɔnema ɛzinza yɛ wɔ adenle nu a, ɔluakɛ ɛnee meha mehile ye kɛ Nyamenle yila awie biala mɔɔ fa ɔ rɛle wula ye nu la. Ɔ nye ɛnlie bɛdabɛ mɔɔ bɛmbu ye la anwo, na ɔtea bɛdabɛ mɔɔ bɛkakyi bɛ nzi bɛsi ye la.

²³ Ɛhye ati yɛhyele ɛhɔne yɛvale yɛ nzɛlɛlɛ yɛdole Nyamenle anyunlu, na ɔdiele yɛ nzɛlɛlɛ.

Ɛzonlenlɛ Sua ne ahyɛlɛ ninyɛne

²⁴ Akee menyele sɛlɛvolɛ mgbanyinli bulu nee nwiɔ. Bɛmɛ a le Hyɛlibaya nee Hahyabaya, nee bɛ nwo amra bulu.

²⁵ Menzuzule dwɛtɛ fufule, ezukoa nvutuke, nee azubɔlɛ ninyɛne mɔɔ Nyamenle Sua ne ati belemgbunli, ye mgbanyima mɔɔ tu ye folɛ, nee ye mbɔlɔba, nee Yizilayɛma mɔɔ wɔ maanle ne anu la ɛva ɛmaa la amuala memanle bɛ.

^26-27 Ninyɛne mɔɔ menzuzule memanle bɛ la ɛne: dwɛtɛ fufule - Tɔno abulanwiɔ nee nwiɔ dwɛtɛ fufule ahyɛnze ɛya ko - kilo abulasuu ezukoa nvutuke - Kilo apenle nsa, ɛya nna ezukoa nvutuke ahyɛnze akunlu kuloonwu abulanwiɔ-Kilo mɔtwɛ nee foa ko kɔbele ahyɛnze akunlu kuloonwu nwiɔ mɔɔ bɛhwi nwolɛ bɛmaa bɛ kɛnlɛma ɛyɛ kɛ ezukoa nvutuke la

²⁸ Menganle mengilele bɛ kɛ, “Bɛ nwo te wɔ Ɛdɛnkɛma anyunlu, yɛɛ ninyɛne ne mɔ noko anwo te. Dwɛtɛ fufule ne nee ezukoa nvutuke ne le azubɔlɛ ninyɛne mɔɔ bɛfa bɛahɔbɔ azu bɛamaa Ɛdɛnkɛma, bɛ ze mɔ Nyamenle ne a.

²⁹ Bɛnlea bɛ boɛ kpalɛ kpalɛ kɔkpula kɛ bɛkɛzuzu bɛ pɛpɛ pɛpɛ wɔ Ɛdɛnkɛma Sua ne anu wɔ Gyɛlusalɛm bɛkɛmaa sɛlɛvolɛ mgbanyinli, Livaema, nee Yizilayɛma mbusua mgbanyinli ne mɔ la.”

³⁰ Na sɛlɛvolɛma ne nee Livaema ne liele dwɛtɛ fufule ne, ezukoa nvutuke ne, nee ninyɛne ne mɔ kɛ bɛfa bɛahɔ Ɛzonlenlɛ Sua ne anu wɔ Gyɛlusalɛm.

Bɛsia bɛara Gyɛlusalɛm

³¹ Siane ne mɔɔ lumua la anu kenle bulu nee nwiɔ ne azo yɛɛ yɛvi Aheeva azokoɛleɛ ne yɛzile nu kɛ yɛkɔ Gyɛlusalɛm a. Yɛ Nyamenle ne lole yɛ na ɔzinzale yɛ, ɔbɔle yɛ nwo bane wɔ yɛ adendulɛ nu, na ɔliele yɛ ɔvile yɛ agbɔvolɛ nee nwule sa nu.

³² Yemɔti yɛhɔdwule Gyɛlusalɛm na yɛliele yɛ ɛnwomenle kenle nsa.

³³ Ye kenle nna ne azo yɛzuzule dwɛtɛ fufule ne, ezukoa nvutuke ne, nee ninyɛne ne mɔ yɛwulale sɛlɛvolɛ Mɛlɛmo, mɔɔ le Yulaya ara ne asa anu wɔ Nyamenle Sua ne anu. Fenɛhase ara Ɛlieza yɛɛ Livaema nwiɔ, Gyɛhyua ara Dwozabade nee Benuwae ara Nowadaya wɔ ɛkɛ ne bie.

³⁴ Bɛdianle na bɛzuzule debie biala na bɛhɛlɛle debie biala wɔ buluku nu wɔ mekɛ ne anu ala.

³⁵ Akee bɛdabɛ mɔɔ bɛhyele bɛ nuokɛ bɛhɔle nlɔnu na bɛzia bɛra la vale azubɔlɛ ninyɛne rale kɛ bɛyela bɛ bɛbɔ azu bɛmaa Yizilayɛ Nyamenle ne. Bɛbɔle Yizilayɛma kɔsɔɔti ati bɛvale nlankɛ bulu nee nwiɔ, mboane nyinli abulahɔnla nee nsia, mboane mralɛ abulasuu nee nsuu, yɛɛ ɛtanefakyɛ nwo azubɔlɛ mbɔnkye nyinli bulu nee nwiɔ. Bɛyelale nane ɛhye mɔ amuala bɛbɔle azu bɛmanle Ɛdɛnkɛma.

³⁶ Eza bɛvale belemgbunli kɛlata ne mɔɔ ɔvale ɔmanle bɛ la bɛmanle mbɔlɔba mgbanyinli nee amɛnladoma mɔɔ nea maanzinli ne mɔ azo wɔ Azule Yufileti Adɔleɛ la. Bɛdabɛ noko bɛboale Yizilayɛma ne mɔ wɔ Nyamenle Sua ne ɛzilɛ nu.