Ɛzela Buluku ne 6 - BAEBOLO ANZƐƐ BULUKU NWUANZANWUANZA

Bɛnwu Belemgbunli Saelɛse mɛla ne

¹ Zɔhane ati Belemgbunli Dalayɛse lile mɛla manle bɛnleɛnleanle ye ngɛlata mɔɔ wɔ ye ngɛlata ɛzielɛ ɛleka ne mɔ mɔɔ wɔ Babelɔn la anu.

² Na bɛnwunle mɛla ne wɔ suakpole ne mɔɔ bɛfɛlɛ ye Ɛkebatana mɔɔ wɔ Midea maanzinli nu la kɛ bɛhɛlɛ ɛhye wɔ nu:

³ “Wɔ ɛvolɛ ne ala mɔɔ bɛvale Belemgbunli Saelɛse bɛziele ebia zo la anu, belemgbunli manle bɛvale mɛla ɛhye bɛdole gua. Mɛla ne fane Nyamenle Sua ne mɔɔ wɔ Gyɛlusalɛm la anwo. Ɔse, ‘Bɛzi Nyamenle Ɛzonlenlɛ Sua ne bieko na ɔyɛ ɛleka mɔɔ ɛkɛ ne a bɛfa azubɔlɛ ninyɛne bɛkɔ, na bɛyela ninyɛne bɛbɔ azu a. Ɔwɔ kɛ ye anwuma ɛhɔlɛ yɛ mita abulanwiɔ nee nsuu yɛɛ ye tɛtɛlɛ noko zɔhane ala.

⁴ Bɛva awolɛ mgbole bɛdo ye fadum ɛhonlone nsa na bɛva mbaka bɛzɔ zolɛ ɛhonlone ko. Nwolɛ kakɛ ne amuala, bɛde bɛvi belemgbunli gya ne anu.

⁵ Akee ninyɛne mɔɔ bɛvale ezukoa nvutuke nee dwɛtɛ fufule a bɛyɛle, mɔɔ Belemgbunli Nɛbukadenɛza yeyele bɛ vile Ɛzonlenlɛ Sua ne anu wɔ Gyɛlusalɛm rale Babelɔn la, bɛva bɛ muala bɛhɔzie bɛ bo zo ne mɔ wɔ Ɛzonlenlɛ Sua ne anu wɔ Gyɛlusalɛm.’ ”

Dalayɛse se bɛhɔ zolɛ bɛzi sua ne

⁶ Na Belemgbunli Dalayɛse vale mualɛ ɛhye hɔmanle bɛ. Ɔse, “Melɛ mekamaa Yufileti Adɔleɛ Amɛnlado Tatenae, nee Hyita Bɔzenae, nee bɛdabɛ arane mbɔlɔba kɔsɔɔti mɔɔ wɔ maanzinli ne anu la. Bɛhwe bɛ nwo bɛvi Ɛzonlenlɛ Sua ne ɛzilɛ nwo.

⁷ Bɛmmafa bɛ nwo bɛdielie Nyamenle Sua ɛhye ɛzilɛ nu. Bɛmaa Dwuda amɛnlado ne nee Dwuu mgbanyima ne mɔ ɛzi Nyamenle Sua ɛhye bieko wɔ ɔ bo zo ne ala.

⁸ Akee mɛla mɔɔ mefa meamaa wɔ, mɔɔ fane mɔɔ ɔwɔ kɛ ɛyɛ ɛmaa Dwuu mgbanyima ne mɔ wɔ Nyamenle Sua ne ɛzilɛ nu la ɛne: Kakɛ mɔɔ menli ne kɛbɔ la, fa belemgbunli gya ne mɔɔ wɔ Yufileti la anu ezukoa tua ye ndɛndɛ, amaa sua ne ɛzilɛ amkpo ɛhɛlɛ.

⁹ Debie biala mɔɔ bɛkpondɛ la, saa nlankɛ nyinli o, mboane o, anzɛɛ mboane mralɛ mɔɔ bɛyela bɛabɔ azu bɛamaa Nyamenle ne mɔɔ wɔ anwuma la o, hwiiti, ngyenle, nwanye, anzɛɛ nwole, kɛmɔ sɛlɛvolɛma mɔɔ wɔ Gyɛlusalɛm la kpondɛ la, fa maa bɛ kenle biala mɔɔ bɛkɛbiza la, mmamaa ɔkpa nwolɛ fee,

¹⁰ amaa bɛabɔ azu mɔɔ sɔ Nyamenle ne mɔɔ wɔ anwuma la anye na bɛazɛlɛ bɛamaa belemgbunli nee ɔ mra mrenya kpalɛyɛlɛ.

¹¹ Akee meli mɛla ɛhye kɛ: Awie biala mɔɔ kɛhakyi mɛla ne mɔɔ meli la, bɛhwe ye sua ne anu mgbunla ne mɔ ko, bɛzinzi ɔ ti na bɛva bɛwɔ ɔ kunlu bɛmaa ɔvinde ɔ nzi, na akee bɛgologolo ye sua ne bɛgua.

¹² Yɛsɛlɛ kɛ Nyamenle mɔɔ ɔdaye yehyehyɛ kɛ ye duma ɛdɛnla ɛkɛ ne dahuu la, ɛmaa bɛdu belemgbunli anzɛɛ bɛhu maanlema mɔɔ kɛdwazo kɛ bɛsɛkye mɛla ɛhye, anzɛɛ bɛsɛkye Ɛzonlenlɛ Sua ne mɔɔ wɔ Gyɛlusalɛm la. Medame Dalayɛse a meyɛ mɛla ɛhye a. Bɛmaa awie biala ɛli zolɛ kpalɛ.”

Bɛdu Ɛzonlenlɛ Sua ne bɛwula Nyamenle asa anu

¹³ Akee ɔlua Belemgbunli Dalayɛse mɛla ɛhye mɔɔ ɔvale ɔhɔmanle bɛ la ati, Amɛnlado Tatenae mɔɔ nea Yufileti Adɔleɛ maanzinli zo, nee Hyita Bɔzenae, nee bɛ gɔnwo mɔ arane mbɔlɔba lile mɛla ne azo kpalɛ na bɛyɛle mɔɔ belemgbunli ne kpondɛ kɛ bɛyɛ la.

¹⁴ Zɔhane ati Dwuu mgbanyima ne mɔ hɔle sua ne ɛzilɛ zo na bɛhɔle bɛ nyunlu kpalɛ. Mekɛ ne anu ɛnee Nyamenle kpɔmanvolɛma, Hagae nee Yido ara Zɛkalaya a ka Nyamenle nrɛlaleɛ ne kile bɛ a. Bɛwiele Ɛzonlenlɛ Sua ne si, kɛmɔ Yizilayɛ Nyamenle ne hyehyɛle la nee mɛla mɔɔ Pɛhyea Maanle Maanle arelemgbunli nsa ne, Saelɛse, Dalayɛse, nee Atazɛzɛse lile la se la.

¹⁵ Bɛwiele Ɛzonlenlɛ Sua ne si wɔ siane ne mɔɔ bɛfɛlɛ ye Eda la anu, ye kenle nsa ne azo wɔ mekɛ mɔɔ ɛnee Belemgbunli Dalayɛse ɛli ɛvolɛ nsia wɔ Pɛhyea ebia ne azo la.

¹⁶ Na menli mɔɔ wɔ Yizilayɛ la, sɛlɛvolɛma, Livaema, nee bɛdabɛ mɔɔ bɛhyele bɛ nuokɛ bɛhɔle nlɔnu na bɛzia bɛra la vale anyelielɛ bukele Nyamenle Ɛzonlenlɛ Sua ne na bɛdule bɛwulale Nyamenle asa anu.

¹⁷ Wɔ sua ne ɛbukelɛ nee ye ɛdulɛ mɔɔ bɛtu bɛawula Nyamenle asa anu la, bɛvale nlankɛ nyinli ɛya ko, mboane nyinli ɛya nwiɔ, yɛɛ mboane mralɛ ɛya nna a bɛbɔle azu bɛmanle Nyamenle a. Akee bɛvale mbɔnkye nyinli bulu nee nwiɔ bɛbɔle ɛtanefakyɛ azu bɛmanle Nyamenle wɔ Yizilayɛma amuala ati. Bɛbɔle abusua ekpunli ko biala ati bɛvale abɔnkye ko bɛbɔle azu.

¹⁸ Akee bɛhyɛle sɛlɛvolɛma gyima ne bɛmanle bɛ. Bɛhyɛle bɛ nu ekpunli ekpunli. Bɛyɛle Livaema noko zɔhane ala, kɛmɔ bɛhɛlɛ ye wɔ Mosisi buluku ne anu mɔɔ fane Nyamenle ɛzonlenlɛ gyima ne mɔɔ wɔ Gyɛlusalɛm la anwo la.

Akpabɛnwo Ɛvoyia ne

¹⁹ Siane ne mɔɔ lumua la anu kenle mɔɔ tɔ zolɛ bulu nee nna la, bɛdabɛ mɔɔ bɛhyele bɛ nuokɛ bɛhɔle nlɔnu na bɛzia bɛra la lile Akpabɛnwo Ɛvoyia ne.

²⁰ Sɛlɛvolɛma nee Livaema mɔɔ wɔ nu la nluanle bɛ nwo na bɛyɛle menli mɔɔ nyamenlezonlenlɛ nu bɛ nwo ɛde a. Livaema ne a hunle Akpabɛnwo Ɛvoyia Boaneralɛ ne a, bɛbɔle azu ne wɔ bɛdabɛ mumua ne bɛ ti, bɛdabɛ mɔɔ bɛvi nlɔnu bɛra la ati, yɛɛ bɛ mediema sɛlɛvolɛma ne mɔ amuala ati.

²¹ Na Yizilayɛma mɔɔ vi nlɔnu rale la nee Yizilayɛma mɔɔ wɔ maanle ne anu na bɛde bɛ nwo bɛvi bɛdabɛ mɔɔ bɛnle Dwuuma la ɛzonlenlɛ ɛtane ɛtane nwo na bɛra bɛbazonle Ɛdɛnkɛma, Yizilayɛ Nyamenle ne la, lile Akpabɛnwo aleɛ ne bie.

²² Bɛvale fɛlɛkolilɛ bɛlile Angye Ɛvoyia ne toonwo kenle nsuu. Bɛ nye liele, ɔluakɛ Ɛdɛnkɛma ɛmaa Aselea belemgbunli ne ɛhakyi ye nyɛleɛ na yeboa bɛ yemaa bɛzi Yizilayɛ Nyamenle ne Ɛzonlenlɛ Sua ne.