Ɛzela Buluku ne 3 - BAEBOLO ANZƐƐ BULUKU NWUANZANWUANZA

Bɛbɔ ɛzonlenlɛ bo bieko

¹ Mɔɔ Yizilayɛma akee nyianle ɛleka dɛnlanle wɔ bɛ azua ne mɔ azo la, ye siane nsuu ne azo, bɛ muala bɛ nloa yiale Gyɛlusalɛm.

² Na Gyɛhozadake ara nrenya Dwɔhyua, nee ɔ gɔnwo mɔ sɛlɛvolɛma ne, nee Hyialeteɛle ara Zɛlɛbabɛle nee ye mbusuafoɔ zile Yizilayɛ Nyamenle ne azukponle ne bieko, amaa bɛayela nane zolɛ bɛabɔ azu bɛamaa Nyamenle, kɛmɔ bɛhɛlɛ ye wɔ Nyamenle sonla Mosisi Mɛla ne anu la.

³ Ɛnee bɛsulo menli mɔɔ wɔ maanle ne anu la ɛdeɛ, noko bɛzile azukponle ne wɔ ɔ bo zo ne ala. Na bɛyelale nane wɔ zolɛ bɛbɔle azu bɛmanle Ɛdɛnkɛma nwonlomɔ nee nɔsolɛ biala.

⁴ Akee bɛlile Kpɔda Bo Ɛdɛnlanlɛ Ɛvoyia ne, kɛmɔ bɛhɛlɛ bɛdo ɛkɛ ne la, bɛyelale nane bɛbɔle azu dahuu biala, kɛmɔ ngyehyɛlɛ ne kile la.

⁵ Eza bɛyelale nane bɛbɔle azu ngakyile ngakyile ne mɔ, Siane Fofolɛ azubɔlɛ nee azu ngakyile mɔɔ ɛha mɔɔ ɔwɔ kɛ bɛbɔ bɛmaa Ɛdɛnkɛma dahuu la amuala. Eza bɛvale awie biala ɔdaye ye ahunlundwolɛ ahyɛlɛdeɛ mɔɔ ɔvale ɔrale la bɛbɔle azu bɛmanle Ɛdɛnkɛma.

⁶ Kenle ne mɔɔ lumua siane nsuu ne anu la yɛɛ bɛbɔle ɔ bo kɛ bɛbɔ azu ne mɔ bɛamaa Ɛdɛnkɛma a, noko ɛnee bɛtɛwulale Ɛzonlenlɛ Sua mumua ne aze.

Bɛbɔ Ɛzonlenlɛ Sua ne ɛzilɛ bo bieko

⁷ Akee bɛvale ezukoa bɛmanle menli mɔɔ si sua la nee kapentama, yɛɛ bɛvale aleɛ, nza, nee nwole bɛhɔmanle menli mɔɔ wɔ Saedɛn nee Taya la, amaa bɛava sida mbaka mgbole bɛalua nyevile nye bɛvi Lɛbanɔn bɛara Dwɔpa. Pɛhyea Maanle Maanle Belemgbunli Saelɛse a manle adenle kɛ bɛyɛ ye zɔhane a.

⁸ Menli ne vi nlɔnu rale Ɛzonlenlɛ Sua ne anwo wɔ Gyɛlusalɛm la, ye ɛvolɛ nwiɔ, siane nwiɔ ne azo yɛɛ bɛbɔle sua ne ɛzilɛ bo a. Zɛlɛbabɛle, Dwɔhyua, nee bɛ mediema mɔɔ ɛha la, sɛlɛvolɛma nee Livaema mɔɔ ɛnee bɛ muala bɛhye bɛ bɛhɔ nlɔnu na bɛzia bɛra Gyɛlusalɛm la amuala zɔle nu kɛ bɛsi sua ne. Bɛvale Livaema mɔɔ ɛli ɛvolɛ abulanwiɔ mɔɔ kɔ la kɛ bɛnlea bɛmaa bɛzi Ɛdɛnkɛma Ɛzonlenlɛ Sua ne.

⁹ Gyɛhu nee ɔ mra nee ɔ mediema, yɛɛ Kademeɛle nee ɔ mra (bɛle Hodavaya abo zo amra) bɔle nu bɛ nee Hɛneedade abo zo amra mɔɔ bɛ muala bɛle Livaema la nleanle Ɛdɛnkɛma Ɛzonlenlɛ Sua ne mɔɔ bɛlɛsi ye bieko la azo.

¹⁰ Mɔɔ menli ne wula sua ne aze la, sɛlɛvolɛma ne wulale bɛ adɛladeɛ na bɛvale bɛ aweɛne ndendenle ne mɔ, yɛɛ Livaema mɔɔ le Esafe abo zo amra la vale sɔnwosɔnwo na bɛyele Ɛdɛnkɛma ayɛlɛ, kɛmɔ Yizilayɛ Belemgbunli Devidi hyehyɛle la.

¹¹ Bɛdole ayɛlɛyelɛ nee moyɛlɛ edwɛne bɛmanle Ɛdɛnkɛma bɛzele kɛ, “Ɛdɛnkɛma le kpalɛ, ye ɛhulolɛ kpundii ne wɔ ɛkɛ maa Yizilayɛma dahuu.” Menli ne amuala deanle nu yele Ɛdɛnkɛma ayɛlɛ, ɔboalekɛ bɛbɔ Ɛdɛnkɛma Ɛzonlenlɛ Sua ne adiabo ɛwulalɛ gyima ne abo.

¹² Na mɔɔ sɛlɛvolɛ mgbanyinli, Livaema mgbanyinli, nee mbusua mgbanyinli bie mɔ mɔɔ nwunle Ɛzonlenlɛ Sua dɛba ne la nwunle kɛ bɛlɛwula Ɛzonlenlɛ Sua ne aze bieko la, bɛzunle, bɛyele awolɛ, yɛɛ bie mɔ dɔɔnwo noko anye liele.

¹³ Ɛzunlɛ nee anyelielɛ ɛdeɛdeanlɛ ne bɔle nu mɔɔ ɛnee akee awie ɛngola ɛnnwu ɛdeanlɛ mɔɔ kile ɛzunlɛ anzɛɛ anyelielɛ a, ɔboalekɛ ɛnee menli ne ɛlɛteɛdea di wulupe na bɛ ne pɛ gua.