Ɛzela Buluku ne 1 - BAEBOLO ANZƐƐ BULUKU NWUANZANWUANZA

Saelɛse se Dwuuma ɛzia ɛhɔ

¹ Mekɛ mɔɔ bɛkava Saelɛse bɛazie Pɛhyea Maanle Maanle Belemgbunli la, ɛnee Ɛdɛnkɛma ɛlua ye kpɔmanvolɛ Gyɛlɛmaya anwo zo ɛha edwɛkɛ bie ɛdo ɛkɛ. Zɔhane ati amaa edwɛkɛ ne ayɛ nɔhalɛ la, mɔɔ Saelɛse yɛle Pɛhyea Maanle Maanle Belemgbunli la, ye ɛvolɛ ne mɔɔ lumua la anu, Ɛdɛnkɛma hanle ye ahonle manle ɔvale edwɛkɛ ne ɔdole gua. Saelɛse manle bɛhɛlɛle edwɛkɛ ne wɔ ngɛlata zo bɛhɔle maanle maanle ne mɔ mɔɔ ɔsie bɛ la amuala anu. Edwɛkɛ ne se:

² “Kɛ Belemgbunli Saelɛse mɔɔ nea Pɛhyea Maanle Maanle ne mɔ azo la se la ɛne: Ɛdɛnkɛma, mɔɔ le Anwuma Nyamenle ne ɛva maanle maanle mɔɔ wɔ azɛlɛ ye azo la amuala ɛwula me sa nu kɛ menzie bɛ. Na yeze me kɛ menzi Ɛzonlenlɛ Sua memaa ye wɔ Gyɛlusalɛm mɔɔ wɔ Dwuda la.

³ Nyamenle nee ye menli ne mɔ mɔɔ wɔ yɛ avinli la ɛdɛnla. Bɛmaa bɛ adenle bɛmaa bɛhɔ Gyɛlusalɛm mɔɔ wɔ Dwuda la na bɛhɔzi Ɛdɛnkɛma, Yizilayɛ Nyamenle ne, Nyamenle ne mɔɔ bɛsonle ye wɔ Gyɛlusalɛm la Ɛzonlenlɛ Sua ne bieko.

⁴ Menli kɔsɔɔti mɔɔ wɔ ɛleka mɔɔ Nyamenle menli ne bie mɔ tɛbɔ la ɛmaa bɛ moalɛ biala mɔɔ fɛta la: dwɛtɛ fufule, ezukoa nvutuke, ninyɛne nee nyɛmoa, nee ahunlundwolɛ ahyɛlɛ ninyɛne mɔɔ bɛfa bɛahɔbɔ azu wɔ Nyamenle Ɛzonlenlɛ Sua ne mɔɔ wɔ Gyɛlusalɛm la anu la.”

⁵ Na Dwuda nee Bɛngyaman mbusua ekpunli ne mɔ anu mgbanyima, sɛlɛvolɛma nee Livaema, nee awie biala mɔɔ Nyamenle ɛva ɔ sa ɛha ye ahonle la boɔboale bɛ nwo kɛ bɛkɔ bɛahɔboa Ɛdɛnkɛma Ɛzonlenlɛ Sua ne ɛzilɛ bieko wɔ Gyɛlusalɛm.

⁶ Bɛ gɔnwo mɔ amuala boale bɛ. Bɛmanle bɛ ahyɛnze mɔɔ bɛva dwɛtɛ fufule nee ezukoa nvutuke bɛyɛ la, nane mɔɔ soa ninyɛne, aleɛ, yɛɛ ninyɛne mɔɔ sonle bolɛ, yɛɛ akee ahunlundwolɛ ahyɛlɛ ninyɛne mɔɔ bɛfa bɛahɔbɔ azu la.

⁷ Ɛhye mɔ amuala anzi Belemgbunli Saelɛse noko yele ninyɛne mɔɔ ɛnee wɔ Ɛdɛnkɛma Ɛzonlenlɛ Sua ne anu wɔ Gyɛlusalɛm mɔɔ Belemgbunli Nɛbukadenɛza yeyele hɔle la amuala manle bɛ. Belemgbunli Nɛbukadenɛza vale ninyɛne zɔhane mɔ vi Gyɛlusalɛm hɔle la, ɔvale bɛ ɔhɔguale ye awozonle sua ne anu.

⁸ Pɛhyea Belemgbunli Saelɛse manle bɛyele ninyɛne ne mɔ amuala bɛvindele na bɛvale bɛwulale Metelɛde, mɔɔ le belemgbunli ne gyasievolɛ la asa anu. Ɔdaye noko ɔdianle bɛ muala ɔwulale Hyɛhyebazaa, mɔɔ le Dwuda amɛnlado la asa anu.

^9-10 Bɛdianle la, kɛ bɛ dodo de la ɛne: Ezukoa nvutuke azubɔlɛ dwora Abulasa Dwɛtɛ fufule azubɔlɛ dwora Apenle ko Dwora gyɛne gyɛne Abulanwiɔ nee ngɔnla Ezukoa nvutuke dwora ngyikyi Abulasa Dwɛtɛ fufule dwora ngyikyi Ɛya nna nee bulu Ahyɛnze nee dwora ngakyile Apenle ko

Ezukoa nvutuke azubɔlɛ dwora Abulasa

¹¹ Bɛ muala bɛle ezukoa nvutuke nee dwɛtɛ fufule ninyɛne apenle nnu, ɛya nna. Hyɛhyebazaa a vale ninyɛne ɛhye mɔ rale a, wɔ mekɛ mɔɔ bɛdabɛ mɔɔ bɛhyele bɛ bɛhɔle nlɔnu wɔ Babelɔn la ziale rale Gyɛlusalɛm la.