Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 6 - BAEBOLO ANZƐƐ BULUKU NWUANZANWUANZA

¹ Na Ɛdɛnkɛma zele Mosisi kɛ, “Akee ɛbanwu debie mɔɔ mebava meahile belemgbunli ne la, ɔluakɛ ɔlua tumi kpole zo ɔbamaa bɛahɔ, ɛhɛe, ɔlua tumi kpole zo akee bɔbɔ ɔbavoa bɛ kɛ bɛvi ye maanle ne anu bɛhɔ.”

Nyamenle fɛlɛ Mosisi

² Na Nyamenle zele Mosisi kɛ, “Medame a mele Ɛdɛnkɛma a.

³ Menyele me nwo mengilele Ebileham, Ayezeke, nee Gyekɔbo kɛ Tumivolɛ Nyamenle, noko me duma, Ɛdɛnkɛma ne, meammaa bɛannwu ye.

⁴ Eza me nee bɛ kyekyele ngyekyeleɛ kɛ mebava Keena azɛlɛ ne mɔɔ bɛdɛnlanle zolɛ kɛ nyɛvolɛ la meamaa bɛ.

⁵ Eza mede Yizilayɛma mɔɔ Yigyibitima ɛyɛ bɛ ahanra la ɛzunlɛ ne, na mehakye me ngyekyeleɛ ne.

⁶ Yemɔti ka kile Yizilayɛma kɛ, ‘Medame a mele Ɛdɛnkɛma ne a. Mebazokoɛ bɛ adesoa ne mɔɔ Yigyibitima ɛva ɛzoa bɛ la, mebaye bɛ meavi akɛlɛzonlenlɛ nu. Mebava tumi kpole mealie bɛ na meadua Yigyibitima kakɛ.

⁷ Mebava bɛmɛ Yizilayɛma meayɛ me menli, na meayɛ bɛ Nyamenle, na bɛanwu kɛ medame a mele Ɛdɛnkɛma bɛ Nyamenle ne mɔɔ ɛye bɛ ɛvi Yigyibitima adesoa ne mɔ abo la.

⁸ Mebava bɛ meahɔ azɛlɛ ne mɔɔ menganle ndane kɛ mebava meamaa Ebileham, Ayezeke, nee Gyekɔbo la azo. Mebava meamaa bɛ meamaa yeayɛ bɛ ɛdeɛ bɔkɔɔ. Medame a mele Ɛdɛnkɛma a.’ ”

⁹ Mosisi hanle ɛhye hilele Yizilayɛma, noko bɛandie ye, ɔboalekɛ bɛ nwo ɛvɔ yɛɛ bɛtɛbɔ atisesebɛ akɛlɛzonlenlɛ nu.

¹⁰ Na Ɛdɛnkɛma zele Mosisi kɛ,

¹¹ “Kɔ kɔze Yigyibiti belemgbunli ne kɛ ɔmaa Yizilayɛma ɛvi ye maanle ne anu ɛhɔ.”

¹² Na Mosisi hanle hilele Ɛdɛnkɛma kɛ, “Yizilayɛma bɔbɔ andie me, kɛ ɔkɛyɛ na belemgbunli ne adie me ɛ, nwane a le mame, mɔɔ menze tendɛ la?”

¹³ Na Ɛdɛnkɛma zele Mosisi nee Aalɔn kɛ, “Bɛha bɛhile Yizilayɛma nee Yigyibiti belemgbunli ne kɛ memaa bɛdabɛ, Mosisi nee Aalɔn tumi kɛ bɛrava Yizilayɛma bɛvi Yigyibiti azɛlɛ zo bɛhɔ.”

Mosisi nee Aalɔn mbusua ekpunli ne mɔ anu edwɛkɛ

¹⁴ Mbusua mgbanyinli mɔɔ gyigyi bɛ ze mɔ awuke ne mɔ ati la ɛne: Wulubɛn, Gyekɔbo ara nrenya kpanyinli ne wole mrenya nna: Heenɔko, Palu, Hɛzelɔn, yɛɛ Kaamae.

¹⁵ Semɛyɔn wole mrenya nsia: Gyɛmuwɛle, Gyeemen, Ohade, Gyeeken, Zohaa, yɛɛ Hyeewulu. Bɛ nli le Keenanli.

¹⁶ Livae amra mrenya, kɛmɔ bɛsi bɛdoɔdoa bɛ nwo wɔ awolɛ nu la ɛne: Gɛhyɔn, Kohate, yɛɛ Mɛlɛlae. Livae lile ɛvolɛ ɛya ko ɛvolɛ abulasa nee nsuu.

¹⁷ Gɛhyɔn wole mrenya nwiɔ: Lebenae nee Hyemɛyae. Bɛnyianle bɛ bo zo amra dɔɔnwo.

¹⁸ Kohate wole mrenya nna: Amelam, Yezehaa, Hibulɔn, yɛɛ Ɛzeɛle. Kohate lile ɛvolɛ ɛya ko ɛvolɛ abulasa nee nsa.

¹⁹ Mɛlɛlae wole mrenya nwiɔ: Maalae nee Muhyae. Livae mbusua ne mɔ, kɛmɔ bɛ awolɛndoazo ne mɔ de la ɛne.

²⁰ Amelam gyale ɔ ze adiema raalɛ Dwɔkɛbɛde na ɔwole Aalɔn nee Mosisi. Aalɔn lile ɛvolɛ ɛya ko abulasa nee nsuu.

²¹ Yezehaa wole mrenya nsa: Kɔla, Nɛfɛge, yɛɛ Zekelae.

²² Ɛzeɛle noko wole mrenya nsa: Maehyeeyɛle, Ɛlezeefan, yɛɛ Setelae.

²³ Aalɔn gyale Amenadabe ara raalɛ Yilaehyɛba mɔɔ ɔ diema raalɛ a le Nahyɔn la. Yilaehyɛba wole Needabe, Abaehu, Ɛlieza, yɛɛ Yetamaa.

²⁴ Kɔla wole mrenya nsa: Asɛ, Ɛlekana, yɛɛ Abayasafe. Kɔla mbusua ne ɛne.

²⁵ Aalɔn ara nrenya Ɛlieza gyale Puteɛle ara raalɛ na ɔwole Fenɛhaze. Ɛhye mɔ a le Livae abusua ekpunli ne anu mbusua mgbanyinli a.

²⁶ Aalɔn nee Mosisi a Ɛdɛnkɛma zele bɛ kɛ, “Bɛye Yizilayɛ ɛlɔne ne amuala bɛvi Yigyibiti azɛlɛ zo” la.

²⁷ Mosisi ɛhye nee Aalɔn ɛhye a hanle Yizilayɛma ɛvilɛ mɔɔ bɛfi Yigyibiti la anwo edwɛkɛ hilele Yigyibiti belemgbunli ne a.

Ɛdɛnkɛma kɔ zolɛ azoa Mosisi nee Aalɔn

²⁸ Kenle ko ne mɔɔ Ɛdɛnkɛma dendɛle hilele Mosisi wɔ Yigyibiti azɛlɛ zo la,

²⁹ ɔzele Mosisi kɛ, “Medame a mele Ɛdɛnkɛma a. Ka edwɛkɛ mɔɔ melɛka meahile wɔ la amuala kile Yigyibiti belemgbunli ne.”

³⁰ Mosisi hanle hilele Ɛdɛnkɛma kɛ, “Ɛdawɔ ɛze kɛ me nloa ɛnde, kɛ ɔkɛyɛ na belemgbunli ne adie me ɛ?”