Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 40 - BAEBOLO ANZƐƐ BULUKU NWUANZANWUANZA

Ɛdɛnkɛma Ndanlɛ Sua ne ɛhyehyɛlɛ nee ye ɛbukelɛ

¹ Ɛdɛnkɛma zele Mosisi kɛ,

² “Alumua siane ne, ye kenle ne mɔɔ lumua la, kyehyɛ Ɛdɛnkɛma Ndanlɛ Sua ne.

³ Fa Ngyekyeleɛ Ɛlɛka ne sie nu, na fa mgbɛnu ɛdanlɛ ne wa ɔ nyunlu.

⁴ Fa ɛkponle ne sie nu na fa nwolɛ ninyɛne ne mɔ kɔsɔɔti gua zolɛ. Eza fa kɛnlaneɛ baka ne sie nu na fa ahɛnlaneɛ ne mɔ siezie zolɛ.

⁵ Fa ezukoa nvutuke azukponle ne mɔɔ bɛbakpu ɛyɛlɛ zolɛ la sie Ngyekyeleɛ Ɛlɛka ne anyunlu na fa Ndanlɛ Sua ne anlenkɛ ne anu ɛdanlɛ ne kenda ɛkɛ.

⁶ Fa azukponle ne mɔɔ bɛbava bɛayela azubɔdeɛ ne mɔ la sie Ndanlɛ Sua ne anuhɔlɛ kpole ne,

⁷ na fa kyɛnze ne mɔɔ bɛbawowo bɛ sa nee bɛ gyakɛ anwo nuhua la sie Ndanlɛ Sua ne nee azukponle ne avinli na gua nzule nu.

⁸ Fa alie ne anwo bane ne anwo ndanlɛ ne mɔ wowa nwo, na fa ɛdanlɛ wa ye anlenkɛ ne anu.

⁹ “Akee fa ɛkpokpalɛ nwole ne kpokpa Ndanlɛ Sua ne nee nuhua debie biala, tu bɛ maa Ɛdɛnkɛma na bɛkɛyɛ nwuanzanwuanza.

¹⁰ Bieko, fa nwole kpokpa azukponle ne nee nwolɛ debie biala, tu bɛ maa Ɛdɛnkɛma na bɛkɛyɛ nwuanzanwuanza kpalɛ.

¹¹ Eza pe adenle ko ne ala anu tu kyɛnze ne mɔɔ bɛwowo bɛ sa nee bɛ gyakɛ anwo nu la maa Ɛdɛnkɛma.

¹² “Akee fa Aalɔn nee ɔ mra mrenya ne mɔ bɛla Ndanlɛ Sua ne anlenkɛ ne anloa na fa nzule bia bɛ.

¹³ Fa sɛlɛvolɛ adɛladeɛ ne mɔ wulowula Aalɔn, kpokpa ye nwole na tu ye sie ahane maa me, amaa yeazonle me kɛ ɔle sɛlɛvolɛ.

¹⁴ Fa ɔ mra mrenya ne mɔ noko bɛla na fa anwuma adɛladeɛ ne mɔ wulowula bɛ.

¹⁵ Akee kpokpa bɛ nwole, kɛmɔ ɛkpokpale bɛ ze ala la, amaa bɛazonle me kɛ bɛle me sɛlɛvolɛma. Ɛkpokpalɛ ɛhye bamaa bɛayɛ sɛlɛvolɛma dahuu.”

¹⁶ Mosisi yɛle debie biala, kɛmɔ Ɛdɛnkɛma zele ye la.

¹⁷ Yemɔti bɛvile Yigyibiti la, ye ɛvolɛ nwiɔ ne anu, ye siane ne mɔɔ lumua la, kenle ne mɔɔ lumua la azo, bɛhyehyɛle Ɛdɛnkɛma Ndanlɛ Sua ne.

¹⁸ Mosisi hyehyɛle Ndanlɛ Sua ne. Ɔlumuale ɔzieziele adiabo ne mɔ, ɔgyinlegyinlanle felɛmo ne mɔ, ɔvale meɛbeanu mbaka ne mɔ ɔbobɔle nwo, na ɔkpɔnlɔkpɔnlanle ye azika ne mɔ.

¹⁹ Ɔdɛlɛle zolɛhedalɛ ndanlɛ ne mɔ anu ɔhedale Ndanlɛ Sua ne azo na ɔvale nwolɛ ɛwowalɛ ɛdeɛ ne mɔ ɔwowale nwo, kɛmɔ Ɛdɛnkɛma zele ye ala la.

²⁰ Akee ɔvale awolɛ ndɛbandɛba nwiɔ ne ɔguale Ngyekyeleɛ Ɛlɛka ne anu. Ɔvale Ɛlɛka ne mbaka ne mɔ ɔwulowulale ye ngɛba ne mɔ anu na ɔvale ɔ ti ne ɔduale zolɛ.

²¹ Akee ɔvale Ɛlɛka ne ɔziele Ndanlɛ Sua ne anu na ɔvale mgbɛnu ɛdanlɛ ne ɔwale ɔ nyunlu, kɛmɔ Ɛdɛnkɛma zele ye la.

²² Ɔvale ɛkponle ne ɔziele Ndanlɛ Sua ne anu sɔlɔ afoa nu wɔ mgbɛnu ɛdanlɛ ne anyunlu,

²³ na ɔvale kpanwo ne mɔɔ bɛva bɛbɔ azu bɛmaa Ɛdɛnkɛma la ɔguale zolɛ, kɛmɔ Ɛdɛnkɛma zele ye la.

²⁴ Ɔvale kɛnlaneɛ baka ne ɔziele Ndanlɛ Sua ne anu nyiakɛ afoa nu ɔmanle ɔ nee ɛkponle ne bɛ nye bɔle zo;

²⁵ na ɛkɛ ne, wɔ Ɛdɛnkɛma anyunlu, ɔsosɔle ahɛnlaneɛ ne mɔ, kɛmɔ Ɛdɛnkɛma zele ye ala la.

²⁶ Ɔvale ezukoa nvutuke azukponle ne ɔziele Ndanlɛ Sua ne anu mgbɛnu ɛdanlɛ ne anyunlu

²⁷ na ɔyelale ɛyɛlɛ evuanlɛ wɔ zolɛ, kɛmɔ Ɛdɛnkɛma zele ye ala la.

²⁸ Ɔvale Ndanlɛ Sua ne anlenkɛ ne anu ɛdanlɛ ne ɔhendanle ɛkɛ,

²⁹ na ɔvale azukponle ne mɔɔ bɛfa bɛyela azubɔdeɛ ne mɔ la ɔziele Ndanlɛ Sua ne anuhɔlɛ ne anloa. Ɔvale ɛyelalɛ azubɔdeɛ nee ma azubɔdeɛ ɔbɔle azu wɔ zolɛ, kɛmɔ Ɛdɛnkɛma zele ye ala la.

³⁰ Ɔvale kyɛnze ne mɔɔ bɛwowo bɛ sa nee bɛ gyakɛ anwo wɔ nuhua la ɔziele Ndanlɛ Sua ne nee azukponle ne avinli na ɔguale nzule nu.

³¹ Mosisi, Aalɔn, yɛɛ ɔ mra mrenya ne mɔ wowole bɛ sa nee bɛ gyakɛ anwo ɛkɛ

³² mekɛ biala mɔɔ bɛlɛkɔ Ndanlɛ Sua ne anu anzɛɛ bɛlɛsia bɛara azukponle ne anwo la, kɛmɔ Ɛdɛnkɛma zele Mosisi ala la.

³³ Mosisi wowale Ndanlɛ Sua ne nee azukponle ne anwo na ɔvale ɛdanlɛ ɔhendanle ye anuhɔlɛ kpole ne anu. Na Mosisi wiele gyima ne yɛ.

Ɛdɛnkɛma Ndanlɛ Sua ne azo amungu ne

³⁴ Akee amungu hedale Ndanlɛ Sua ne azo, na Ɛdɛnkɛma anyunlunyia ne yile sua ne tɛkɛɛ.

³⁵ Ɛhye ati Mosisi angola Ndanlɛ Sua ne anu wolo. Ɔboalekɛ amungu ne ɛva sua ne, yɛɛ Ɛdɛnkɛma anyunlunyia ne ɛyi sua ne tɛkɛɛ.

³⁶ Wɔ bɛ adendulɛ ne anu, mekɛ biala mɔɔ amungu ne kɛmaa ɔ nwo zo kɛvi Ndanlɛ Sua ne azo la Yizilayɛma tu bɛ bo kɔyɛ azokoɛleɛ wɔ ɛleka fofolɛ.

³⁷ Saa amungu ne ɛtɛyele ɔ nwo wɔ ɛkɛ ne a, bɛtɛnla azokoɛleɛ ɛkɛ ne, bɛndu bɛ bo.

³⁸ Ɔluakɛ wɔ bɛ adendulɛ ne anu bɛnwunle kɛ Ɛdɛnkɛma amungu ne keda Ndanlɛ Sua ne azo wɔ alehyenlɛ nu, na aledwolɛ nu noko a, ɛnee ɔle senle.