Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 4 - BAEBOLO ANZƐƐ BULUKU NWUANZANWUANZA

Nyamenle maa Mosisi nwanwane tumi

¹ Akee Mosisi buale kɛ, “Bɛnrɛlie me bɛnrɛli anzɛɛ bɛnrɛdie me, bɛbaha kɛ, ‘Ɛdɛnkɛma anye ɔ nwo angile wɔ.’ ”

² Ɛdɛnkɛma bizale ye kɛ, “Duzu a ɛlɛ ye ɛ sa nu la?” Mosisi buale ye kɛ, “Kpɔma ɔ.”

³ Ɛdɛnkɛma zele ye kɛ, “Fuandi to azɛlɛ ne anwo.” Mosisi vuandinle dole azɛlɛ ne anwo, na ɔhakyile ɛwɔlɛ. Mosisi bɔle nguku hɔle ɔ nzi.

⁴ Na Ɛdɛnkɛma zele Mosisi kɛ, “Tenrɛ ɛ sa sɔ ɔ dua ne anu” Ɔzɔle nuhua, na ɔhakyile kpɔma wɔ ɔ sa nu.

⁵ Na Ɛdɛnkɛma zele ye kɛ, “Ɛhye bamaa bɛalie bɛali kɛ Ɛdɛnkɛma, bɛ ze mɔ Nyamenle ne, Ebileham Nyamenle ne, Ayezeke Nyamenle ne, nee Gyekɔbo Nyamenle ne ɛye ɔ nwo ɛhile wɔ.”

⁶ Ɛdɛnkɛma zele ye bieko kɛ, “Fa ɛ sa wula wɔ tɛladeɛ ne anu.” Mosisi vale ɔ sa wulale ye tɛladeɛ ne anu; na mɔɔ ɔyele ɔ sa la, ɛnee kokobɛ ɛdila ɔ sa ɛmaa yeyɛ fufule nwohyee kɛ ezukɔtweaba.

⁷ Eza Nyamenle zele ye kɛ, “Fa ɛ sa wula wɔ tɛladeɛ ne anu.” Yemɔti ɔvale ɔ sa ɔwulale ye tɛladeɛ ne anu; na mɔɔ ɔyele ɔ sa la, ɛnee kokobɛ ne ɛhɔ na nwonane ne ɛyɛ kɛ ye dɛba ne ala la.

⁸ Nyamenle zele ye kɛ, “Saa bɛanlie alumua sɛkɛlɛneɛ ne bɛanli a, amozi ɛdeɛ ne bamaa bɛalie bɛali.

⁹ Saa bɛnrɛlie sɛkɛlɛneɛ nwiɔ ye bɛnrɛli, anzɛɛ bɛnrɛdie ɛ ne a, sa Azule Naele ne nzule ne bie wola gua azɛlɛ resee ne azo, na nzule ne mɔɔ ɛbaza wɔ azule ne anu la bahakyi mogya wɔ azɛlɛ ne anwo.”

¹⁰ Na Mosisi hanle hilele Ɛdɛnkɛma kɛ, “O me Awulae, sumunli kɛ bɛwole me toonwo mɔɔ yeradwu ɛnɛ, yɛɛ kɛkala bɔbɔ mɔɔ wɔdendɛ wɔhile wɔ sonvolɛ la, me nloa ɛnde, yɛɛ me ɛdendɛlɛ le bɛtɛɛ.”

¹¹ Ɛdɛnkɛma zele ye kɛ, “Nwane a bɔle sonla nloa a? Nwane a maa ɔyɛ mumule anzɛɛ anzondiliravolɛ, anzɛɛ nwane a maa ɔnwu debie anzɛɛ ɔyɛ anyenzinliravolɛ a? Asoo tɛ medame, Ɛdɛnkɛma ɔ?

¹² Yemɔti kɔ na mebade ɛ nloa na meahilehile wɔ mɔɔ ɛbaha la.”

¹³ Na Mosisi hanle kɛ, “O me Awulae, soa sonla fofolɛ.”

¹⁴ Ɛhye manle Ɛdɛnkɛma vale Mosisi anwo ɛya na ɔzele kɛ, “Ɛ diema Aalɔn, Livaenli ne ɛnle ɛkɛ ɔ? Meze kɛ ɔ nloa ɛde kpalɛ; nea, ɔlɛba yearayia wɔ, na saa ɔnwu wɔ a ɔbali fɛlɛko wɔ ye ahonle nu.

¹⁵ Ka edwɛkɛ ne kile ye na fa wula ɔ nloa; mebamaa wɔ nee ɔdaye ɛnloanlɛ na meahilehile bɛ mɔɔ ɔwɔ kɛ bɛka la.

¹⁶ Ɔbagyinla wɔ gyinlabelɛ yeadendɛ yeahile menli ne; ɔbadendɛ ɛ nloa azo, na wɔayɛ ye Nyamenle.

¹⁷ Fa kpɔma ɛhye kɔ na wɔava wɔayɛ nwanwane sɛkɛlɛneɛ ne mɔ.”

Mosisi sia ahɔ Yigyibiti

¹⁸ Mosisi ziale hɔle ɔ ye ɔ ze Gyɛtulo ɛkɛ hɔhanle hilele ye kɛ, “Mesɛlɛ wɔ, maa me adenle maa menzia mengɔ Yigyibiti mengɔnea saa me nwo amra tɛte ngoane nu a.” Na Gyɛtulo kponlenle zolɛ kɛ Mosisi ɛhɔ anzonudwolɛ nu.

¹⁹ Na Ɛdɛnkɛma zele Mosisi wɔ Medean kɛ, “Sia kɔ Yigyibiti, ɔluakɛ menli mɔɔ ɛnee ɛlɛkpondɛ wɔ ahu wɔ la amuala ɛwie wu.”

²⁰ Yemɔti Mosisi vale ɔ ye nee ɔ mra mrenya ne mɔ vole asoaso zo zile nu hɔle Yigyibiti azɛlɛ zo; Mosisi eza vale kpɔma ne mɔɔ Nyamenle zele ye kɛ ɔva la.

²¹ Na Ɛdɛnkɛma zele Mosisi kɛ, “Saa ɛsia ɛkɔ Yigyibiti a, yɛ nwanwane ninyɛne ne mɔ mɔɔ meva nwolɛ tumi memaa wɔ la kile belemgbunli ne. Noko akee mebamaa yeayɛ dapele, yemɔti ɔnrɛmaa menli ne ɛnrɛhɔ.

²² Na ɛbaze ye kɛ, ‘Kɛ Ɛdɛnkɛma se la ɛne: Yizilayɛ a le me belamunli ralɛ nrenya a, yemɔti medame Ɛdɛnkɛma, mese,

²³ maa me ra nrenya ne ɛhɔ amaa yeazonle me. Saa ɛkpo kɛ ɛnrɛmaa ɔnrɛhɔ a, mebahu wɔ belamunli ralɛ nrenya ne.’ ”

²⁴ Mɔɔ Mosisi kɔ Yigyibiti na ɔhɔdwule adenle nu azokoɛleɛ bie la, Ɛdɛnkɛma yiale ye na ɔyɛle kɛ ɔku ye.

^25-26 Na Mosisi aye Zepɔla vale ɛtwɛlɛboɔ yɛle ɔ ra nrenya ne mrenyanu nzonlɛ na ɔvale ɔhanle Mosisi agyakɛ, ɔzele kɛ, “Nɔhalɛ, ɛle mogya kunli ɛmaa me!” Yemɔti Ɛdɛnkɛma gyakyile Mosisi, kɛmɔ ɔ ye hanle kɛ, “Ɛle mogya kunli ɛmaa me” la, ɔboalekɛ bɛbu mrenyanu nzonlɛyɛlɛ amaamuo ne.

²⁷ Ɛdɛnkɛma zele Aalɔn kɛ, “Kɔ fienemgbole ne anu kɔyia Mosisi.” Yemɔti Aalɔn hɔle hɔyiale Mosisi wɔ Nyamenle Boka, ɔyɛle ye atuu na ɔvole ɔ nloa anwo.

²⁸ Na Mosisi hanle edwɛkɛ mɔɔ Ɛdɛnkɛma ɛva ɛzoa ye la amuala hilele Aalɔn na ɔhanle sɛkɛlɛneɛ mɔɔ Ɛdɛnkɛma ɛze ye kɛ ɔyɛ la amuala ɔbokale nwolɛ.

²⁹ Akee Mosisi nee Aalɔn hɔle hɔboɔboale Yizilayɛ mgbanyima kɔsɔɔti anloa.

³⁰ Na Aalɔn hanle mɔɔ Ɛdɛnkɛma hanle hilele Mosisi la amuala hilele bɛ na ɔyɛle nwanwane sɛkɛlɛneɛ ne mɔ wɔ menli ne anyunlu ɛkɛ ne.

³¹ Na menli ne liele lile. Mɔɔ bɛdele kɛ Ɛdɛnkɛma ɛrakpɔla ye menli Yizilayɛma na yenwu bɛ amaneɛnwunlɛ ne la, bɛbɔle bɛ ti aze bɛyeyɛle ye.