Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 39 - BAEBOLO ANZƐƐ BULUKU NWUANZANWUANZA

Sɛlɛvolɛma adɛladeɛ ne ɛnwonlɛ

¹ Bɛvale mboane enrinli buluwu, buluwu nee kɔkɔlɛ afonla, nee kɔkɔlɛ nyɛma bɛnwonle adɛladeɛ ngɛnlɛma kpalɛ mɔɔ sɛlɛvolɛ wula fa sonle wɔ Ɛleka Nwuanzanwuanza ne, kɛmɔ Ɛdɛnkɛma hilele Mosisi la bɛmanle Aalɔn.

² Bɛvale lenen nyɛma kɛnlɛma, mboane enrinli buluwu, buluwu nee kɔkɔlɛ afonla, kɔkɔlɛ, yɛɛ akɔlɛnlome bɛnwonle ɛzonlenlɛ tɛladeɛ ne mɔɔ bɛfɛlɛ ye yifɔdo la.

³ Bɛvale hamenle bɛbolole ezukoa nvutuke na bɛpepɛle bɛ ndenrɛndenra bɛvale bɛbokale lenen nyɛma kɛnlɛma ne, mboane enrinli buluwu ne, buluwu nee kɔkɔlɛ afonla ne, yɛɛ kɔkɔlɛ ne bɛnwonle ɛdanlɛ ne.

⁴ Bɛnwonle ndanlɛ ndenrɛndenra nwiɔ bɛsosɔle ɛzonlenlɛ tɛladeɛ yifɔdo ne abati nee ɔ bati.

⁵ Bɛvale ninyɛne ko ne ala bie bɛnwonle akyeso bɛzɔle yifɔdo ne bɛmanle ɔ nee ye yɛle debie ko, kɛmɔ Ɛdɛnkɛma hanle hilele Mosisi ala la.

⁶ Bɛzele kanɛlea awolɛ ne mɔ na bɛvale ezukoa nvutuke bɛtotole bɛ nloa. Bɛdɔle alagye bɛhɛlɛle Gyekɔbo amra bulu nee nwiɔ ne aluma wɔ zo.

⁷ Bɛvale bɛbobɔle ɛzonlenlɛ tɛladeɛ ne abati nee ɔ bati ndanlɛ ndenrɛndenra nwiɔ ne azo. Ɛhye mɔ gyigyi ɛkɛ maa Yizilayɛ mbusua ekpunli bulu nee nwiɔ ne, kɛmɔ Ɛdɛnkɛma ɛha ɛhile Mosisi la.

Akɛnrazo aguzo ne ɛnwonlɛ

⁸ Bɛvale ninyɛne mɔɔ bɛvale bɛnwonle ɛzonlenlɛ tɛladeɛ yifɔdo ne la ko ne ala bie bɛnwonle akɛnrazo aguzo ne na bɛnwonle nuhua kɛnlɛma kɛ yifɔdo ne anu ɛdeɛ ne la.

⁹ Ɔ nloa nna ne amuala sɛ, bɛbɔle ɛdanlɛ ne nwo nwiɔ bɛnwonle. Ye tendenle le waa ko yɛɛ ye tɛtɛlɛ le waa ko.

¹⁰ Bɛsolole ezukoa awolɛ mɔɔ sonle bolɛ la ɛhonlone nna zolɛ: ɛhonlone ne mɔɔ lumua la, bɛvale wulubi, topaze, yɛɛ ganɛte;

¹¹ ɛhonlone ne mɔɔ tɔ zolɛ nwiɔ la, bɛvale ɛmelade, safaya, yɛɛ daemɔn;

¹² ɛhonlone ne mɔɔ tɔ zolɛ nsa la, bɛvale tɛkɔese, agate, yɛɛ ameteze;

¹³ yɛɛ ɛhonlone ne mɔɔ tɔ zolɛ nna la, bɛvale bɛlele, kanɛlea, yɛɛ gyasepa. Bɛvale ezukoa nvutuke bɛtotole ɛhye mɔ kɔsɔɔti anloa.

¹⁴ Awolɛ bulu nee nwiɔ ne, ko biala bɛhɛlɛle Gyekɔbo amra mrenya ne mɔ ko duma zo, yɛɛ bɛgyi ɛkɛ bɛmaa Yizilayɛ mbusua ekpunli bulu nee nwiɔ ne.

¹⁵ Bɛvale ezukoa nvutuke tagyee bɛyɛle ndweabane na bɛbɛkale ye kɛ nyɛma la bɛguale akɛnrazo aguzo ne azo.

¹⁶ Bɛyɛle ezukoa nvutuke ndolebɛnloa nwiɔ nee ezukoa nvutuke ngɛba nwiɔ. Bɛvale ngɛba nwiɔ ne bɛsosɔle akɛnrazo aguzo ne anwuma mgbɛnezo nwiɔ ne,

¹⁷ bɛvale ezukoa nvutuke ndweabane nwiɔ ne bɛwulowulale ngɛba nwiɔ ne anu,

¹⁸ bɛvale ɔ ti nwiɔ ne bɛsosɔle ndolebɛnloa nwiɔ ne na bɛvale bɛsosɔle ɛzonlenlɛ tɛladeɛ yifɔdo ne ndanlɛ ndenrɛndenra nwiɔ ne mɔɔ wɔ ɔ bati nee ɔ bati la.

¹⁹ Bɛyɛle ezukoa nvutuke ngɛba nwiɔ bɛsosɔle akɛnrazo aguzo ne anloa nwiɔ ne mɔɔ wɔ aze la akunlu ne mɔɔ gua ɛzonlenlɛ tɛladeɛ yifɔdo ne azo la;

²⁰ eza bɛyɛle ezukoa nvutuke ngɛba nwiɔ bɛsosɔle ɛzonlenlɛ tɛladeɛ yifɔdo ne abati nwiɔ ne anyunlu aze wɔ tɛladeɛ ne ayia zo nee akyeso kɛnlɛma ne anwuma.

²¹ Bɛvale nyɛma buluwu bɛsosɔle akɛnrazo aguzo ne nee ɛzonlenlɛ tɛladeɛ ne ngɛba ne mɔ na bɛbɔle bɛ kpɔkɛ, amaa akɛnrazo aguzo ne amkpɔne aze na yeazinze akyeso ne azo fɔɔnwo.

Sɛlɛvolɛma adɛladeɛ bie mɔ ɛnwonlɛ

²² Tɛladeɛ kpole ne mɔɔ bɛwula bɛgua ɛzonlenlɛ tɛladeɛ ne azo la, bɛvale mboane enrinli buluwu kɔsɔɔ a bɛnwonle a.

²³ Bɛvale ɛdanlɛ mɔɔ bɛnwo la bɛzɛle ɔ kɔme ne anu, amaa bɛwula a yeande.

^24-26 Ɔ bo ne mɔɔ bɛbu la, bɛvale lenen nyɛma kɛnlɛma, mboane enrinli buluwu, buluwu nee kɔkɔlɛ afonla, yɛɛ kɔkɔlɛ bɛnwonle bɛ ahunguma kɛ akutue la bɛhendɛhendanle ɔ nloa toonwo ɔyiale na bɛvale ezukoa nvutuke tagyee dɔne bɛdidile bɛ avinli, kɛmɔ Ɛdɛnkɛma hanle hilele Mosisi la.

²⁷ Bɛvale lenen nyɛma kɛnlɛma bɛnwonle anwuma adɛladeɛ bɛmanle Aalɔn nee ɔ mra mrenya ne mɔ,

²⁸ bɛvale lenen nyɛma bɛnwonle abɔtile, ahyɛlɛ, aze adɛladeɛ;

²⁹ eza bɛvale lenen nyɛma kɛnlɛma, mboane enrinli buluwu, buluwu nee kɔkɔlɛ afonla, yɛɛ kɔkɔlɛ bɛnwonle tabule mɔɔ bɛnwo nuhua, mɔɔ bɛfa bɛkye bɛ avinli la, kɛmɔ Ɛdɛnkɛma hanle hilele Mosisi la.

³⁰ Bɛvale ezukoa nvutuke tagyee bɛbolole ye ɛdɛbaa na bɛhɛlɛle zolɛ, “Bɛdu bɛzie ɛkɛ bɛmaa Ɛdɛnkɛma”, na bɛvale bɛbɔle belemgbunli abɔtile nwuanzanwuanza ne azo.

³¹ Bɛvale ɛdanlɛ nyɛma buluwu bɛzɔle ye bɛvale bɛhendanle abɔtile ne anyunlu, kɛmɔ Ɛdɛnkɛma ɛha ɛhile Mosisi la.

Gyima ne awieleɛ

³² Akee bɛwiele Ɛdɛnkɛma Ndanlɛ Sua ne si bɔkɔɔ. Yizilayɛma ne yɛle debie biala, kɛmɔ Ɛdɛnkɛma hanle hilele Mosisi ala la.

³³ Bɛvale Ndanlɛ Sua ne nee nwolɛ debie biala bɛrɛlɛle Mosisi, ye nzosɔnu ne mɔ, ye felɛmo ne mɔ, meɛbeanu ne mɔ, ye mbaka azika ne mɔ, nee bɛ adiabo ne mɔ;

³⁴ zolɛ ɛhedalɛ mboane nyinli nee mbɔnkye nwoma ne mɔɔ bɛwula bɛ ayile, nee mgbɛnu ɛdanlɛ ne;

³⁵ Ngyekyeleɛ Ɛlɛka ne mɔɔ awolɛ ndɛbandɛba ne mɔ gua nu la, ye mbaka ne mɔ nee ɔ ti ne;

³⁶ ɛkponle ne nee nwolɛ ninyɛne kɔsɔɔti, nee kpanwo ne mɔɔ bɛfa bɛbɔ azu bɛmaa Nyamenle la;

³⁷ ezukoa nvutuke tagyee kɛnlaneɛ baka ne, ye ahɛnlaneɛ ne mɔ, nwolɛ ninyɛne kɔsɔɔti, nee ahɛnlaneɛ ne mɔ nwole ne,

³⁸ ezukoa nvutuke azukponle ne, ɛkpokpalɛ nwole ne, ɛyɛlɛ evuanlɛ ne, Ndanlɛ Sua ne anlenkɛ ne anu ɛdanlɛ ne;

³⁹ kɔbele azukponle ne nee kɔbele kɛlakɛlɛ ne, ye mbaka ne mɔ, nee nwolɛ debie biala, kyɛnze ne mɔɔ bɛwowo bɛ sa nee bɛ gyakɛ anwo nuhua la nee ɔ bo ne;

⁴⁰ alie ne anwo banelielɛ ndanlɛ, bɛ mbaka azika nee bɛ adiabo ne mɔ, bane ne mɔɔ bɛliele la anlenkɛ ne anu ɛdanlɛ ne nee nwolɛ nyɛma, Ndanlɛ Sua ne adakola ne mɔ;

⁴¹ yɛɛ adɛladeɛ nwuanzanwuanza ngɛnlɛma ne mɔ mɔɔ sɛlɛvolɛma, Aalɔn nee ɔ mra mrenya ne mɔ bawula wɔ Ɛleka Nwuanzanwuanza ne la.

⁴² Yizilayɛma yɛle gyima ne amuala, kɛmɔ Ɛdɛnkɛma hanle hilele Mosisi ala la.

⁴³ Mosisi nleɛnleanle bɛ kɔsɔɔti na ɔnwunle kɛ bɛyɛ bɛ, kɛmɔ Ɛdɛnkɛma ɛha ɛhile ye la. Yemɔti Mosisi yilale bɛ.