Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 38 - BAEBOLO ANZƐƐ BULUKU NWUANZANWUANZA

Azukponle ne mɔɔ bɛyela azubɔdeɛ wɔ zo la ɛbobɔlɛ

¹ Ɔvale akasea ndaboa ɔbobɔle azukponle mɔɔ bɛyela azubɔdeɛ wɔ zolɛ la. Ye tɛbanu ne mɔ amuala sɛ. Ye tendenle le mita nwiɔ nee ekyi, ye tɛtɛlɛ le mita nwiɔ nee ekyi, yɛɛ ye anwumahɔlɛ le mita ko nee ekyi.

² Ɔyɛle debie kpokpɔkoo kɛ mɛne la wɔ ɔ bati nna ne mɔ azo ɔmanle bɛ nee azukponle ne yɛle debie ko, na ɔvale kɔbele ɔfɔlele nwolɛ kɔsɔɔti.

³ Eza ɔyɛle azukponle ne anwo ninyɛne kɔsɔɔti: mbuakɛ, azofi, ahyɛnze, faka, nee senlevalɛ ahyɛnze. Ɔvale kɔbele a ɔyɛle ninyɛne ɛhye mɔ kɔsɔɔti a.

⁴ Ɔvale kɔbele ɔnwonle kɛlakɛlɛ na ɔvale ɔdole azukponle ne anloa kɛba ne abo wɔ asɛɛ ye avinli.

⁵ Ɔyɛle mbaka mɔɔ bɛfa bɛsoa la anwo ngɛba nna ɔsosɔle ye mgbɛnezo nna ne.

⁶ Ɔvale akasea ndaboa ɔzele mbaka mɔɔ bɛfa bɛsoa la, ɔvale kɔbele ɔfɔlele nwolɛ,

⁷ na ɔvale ɔwulowulale azukponle ne anwo ngɛba ne mɔ mɔɔ wɔ ye tɛbanu nee ye tɛbanu la anu kɛ bɛbava bɛazoa. Bɛvale ndaboa a bɛbobɔle azukponle ne a, yɛɛ ɔ kunlu le tokule.

Kɔbele kyɛnze ne ɛyɛlɛ

⁸ Ɔvale mraalɛ mɔɔ sonle Ɛdɛnkɛma Nyianu Ndanlɛ Sua ne anlenkɛ ne anloa la neanleɛ ne mɔ ɔyɛle kɔbele kyɛnze nee ɔ bo ne.

Ɛdɛnkɛma Ndanlɛ Sua ne anwo bane ɛlielɛ

⁹ Akee kɛ bɛzile bɛliele Ɛdɛnkɛma Ndanlɛ Sua ne anwo bane la ɛne. Ye nyiakɛ afoa nu, bɛvale ndanlɛ azinli mɔɔ bɛva lenen nyɛma kɛnlɛma bɛnwo la bɛwowale nwolɛ. Ndanlɛ ne mɔ ko tendenle le mita abulanla nee nna.

¹⁰ Bɛ mbaka ne mɔ le abulanwiɔ, yɛɛ bɛ adiabo ne mɔ noko le abulanwiɔ. Bɛvale kɔbele a bɛyɛle adiabo ne mɔ a. Bɛ nzosɔnu ne nee mɛkaleɛ ne mɔ, bɛvale dwɛtɛ fufule a bɛyɛle a.

¹¹ Ye sɔlɔ afoa nu ɛdeɛ ne le kɛ ye nyiakɛ afoa nu ɛdeɛ ne ala la.

¹² Ye adɔleɛ afoa nu ndanlɛ ne, ko biala tendenle le mita abulanwiɔ nee nwiɔ. Bɛ mbaka ne mɔ le bulu, yɛɛ bɛ adiabo ne mɔ noko le bulu. Mbaka ne nzosɔnu ne mɔ nee mɛkaleɛ ne mɔ, bɛvale dwɛtɛ fufule a bɛyɛle a.

¹³ Ye aduduleɛ afoa nu, ɛleka mɔɔ anlenkɛ ne la la, ye tɛtɛlɛ le mita abulanwiɔ nee nwiɔ.

^14-15 Anlenkɛ ne foa ko mgbɛnu ɛdanlɛ ne le mita nsia nee ekyi. Bɛ mbaka nsa, yɛɛ bɛ adiabo nsa. Ye foa ko ne noko kɛ de ala la ɛne.

¹⁶ Bɛvale ndanlɛ mɔɔ bɛva lenen nyɛma kɛnlɛma bɛnwo la a bɛwowale alie ne kɔsɔɔti anwo a.

¹⁷ Bɛvale kɔbele a bɛyɛle mbaka ne adiabo ne mɔ a, na mbaka ne mɔ nzosɔnu ne mɔ, nee mɛkaleɛ ne mɔ, bɛvale dwɛtɛ fufule a bɛyɛle a. Bɛvale dwɛtɛ fufule bɛfɔlele mbaka ne mɔ ati zo. Akee bɛvale dwɛtɛ fufule bɛbolole bɛ ndenrɛndenra bɛsosɔle mbaka ne mɔ mɔɔ bɛnra yia alie ne anwo la amuala.

¹⁸ Alie ne mɔɔ bɛlie nwo la anlenkɛ ne anu ɛdanlɛ ne, bɛvale mboane enrinli buluwu, buluwu nee kɔkɔlɛ afonla, nee kɔkɔlɛ yɛɛ lenen nyɛma kɛnlɛma a bɛnwonle a, yɛɛ bɛvale agbuyia bɛnwonle ɔ nloa. Ye tendenle le mita ngɔnla, yɛɛ ye anwumahɔlɛ le mita nwiɔ kɛ mɔɔ bɛvale bɛliele nwolɛ la.

¹⁹ Bɛ mbaka ne mɔ le nna; bɛvale kɔbele a bɛyɛle bɛ adiabo nna ne a. Bɛvale dwɛtɛ fufule bɛyɛle bɛ nzosɔnu ne mɔ, yɛɛ eza bɛvale dwɛtɛ fufule bɛfɔlele mbaka ne mɔ ati zo; ye mɛkaleɛ ne mɔ noko le dwɛtɛ fufule.

²⁰ Ndanlɛ Sua ne adakola ne mɔ nee mɔɔ solo alie ne anwo yia la, bɛvale kɔbele a bɛyɛle a.

Ninyɛne mɔɔ bɛvale bɛyɛle Ɛdɛnkɛma Ndanlɛ Sua ne anu la

²¹ Ninyɛne mɔɔ bɛvale bɛyɛle Ɛdɛnkɛma Ndanlɛ Sua ne anu, ɛleka mɔɔ awolɛ ndɛbandɛba nwiɔ ne mɔɔ bɛhɛlɛ Nyamenle Mɛla Bulu ne wɔ zo la wɔ la, bɛmɛ ɛne. Mosisi a hanle kɛ bɛhɛlɛ bɛ dodo a, yɛɛ Livaema mɔɔ sɛlɛvolɛ Aalɔn ara Yetamaa a nea bɛ nwo zo la a hɛlɛle a.

²² Yule ara nrenya Bɛzalii, Huuli anlɔnra ne mɔɔ vi Dwuda abusua ekpunli ne anu la yɛle debie biala mɔɔ Ɛdɛnkɛma hanle kɛ bɛyɛ la.

²³ Ye boavolɛ Ahesamake ara nrenya Oholeabe mɔɔ vi Dan abusua ekpunli ne anu la le dwinvolɛ mɔɔ kola kɛlɛhɛlɛ anwoneɛ zo, ɔdolɔdolɔ ninyɛne ɔmaa bɛnea zolɛ bɛyɛ anzɛɛ bɛnwo, ɔfa mboane enrinli buluwu, buluwu nee kɔkɔlɛ afonla, nee kɔkɔlɛ ɔnwo ndanlɛ ngɛnlɛma.

²⁴ Ezukoa nvutuke mɔɔ bɛvale bɛhyɛle Ɛdɛnkɛma kɛ bɛva bɛzi Ndanlɛ Sua ne la anloa to tone nu kilo apenle, kɛmɔ bɛ ezukoa awolɛ ne mɔ si de la.

²⁵ Bɛdianle menli ne na bɛ dodo kɛ zile yɛle la, dwɛtɛ fufule mɔɔ bɛnyianle ye wɔ bɛ lɔ la to tone nu kilo apenle nsa, ɛya nna abulasa, kɛmɔ ɛleka nwuanzanwuanza ne nzuzuleɛ bolɛ ne kile la.

²⁶ Ezukoa ne bolɛ kile menli ne mɔɔ bɛdianle la dodo, ko biala duale “hyikɛle” foa ko, bie andua bie andɛla bie. Menli mɔɔ ɛli ɛvolɛ abulanwiɔ mɔɔ kɔ la kɔsɔɔti le apenle ngoko ɛya nsia nee nsa, ɛya nnu abulanlu.

²⁷ Dwɛtɛ fufule ne, bɛvale nuhua tone nu kilo apenle nsa, ɛya nna bɛyɛle Ndanlɛ Sua nwuanzanwuanza ne mgbɛnu ndanlɛ mbaka ne mɔ adiabo ne mɔ; baka ko biala adiabo ne to tone nu kilo abulasa nee nna.

²⁸ Dwɛtɛ fufule ne, tone nnu kilo abulasa ne mɔɔ hale la, Bɛzalii vale yɛle mɛkaleɛ nee mbaka ne mɔ nzosɔnu na ɔvale bie ɔfɔlele mbaka ne mɔ ati.

²⁹ Kɔbele mɔɔ bɛvale bɛhyɛle Ɛdɛnkɛma la to tone nu kilo apenle nwiɔ, ɛya nna abulanwiɔ nee nnu.

³⁰ Bɛzalii vale ɛhye yɛle Ɛdɛnkɛma Ndanlɛ Sua ne anlenkɛ ne mbaka ne mɔ adiabo ne mɔ, kɔbele azukponle ne nee zolɛ kɛlakɛlɛ ne, yɛɛ azukponle ne anwo debie biala.

³¹ Ɔvale bie ɔyɛle mbaka mɔɔ bɛvale bɛliele sua ne alie ne anwo la adiabo nee nlenkɛ ne adiabo ne mɔ, Ndanlɛ Sua ne adakola ne mɔ, yɛɛ alie ne anwo adakola ne mɔ.