Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 30 - BAEBOLO ANZƐƐ BULUKU NWUANZANWUANZA

Azukponle ne mɔɔ bɛyela ɛyɛlɛ zo la

¹ “Fa akasea ndaboa bobɔ azukponle na woayela ɛyɛlɛ zo.

² Maa ye tɛbanu ne mɔ amuala ɛzɛ, ye tendenle ɛyɛ asɛɛ mita foa ko, ye tɛtɛlɛ ɛyɛ asɛɛ mita foa ko, na ye anwumahɔlɛ ɛyɛ asɛɛ mita ko. Yɛ debie kpokpɔkoo kɛ mɛne la wɔ ɔ bati nna ne azo maa bɛ nee ye ɛyɛ debie munli ko.

³ Kolo ezukoa nvutuke tagyee gua zolɛ, ye tɛbanu nee ye mɛne ne mɔ anwo na fa ezukoa nvutuke ne bie to ɔ nloa kɛba bɛnra yia.

⁴ Yɛ ezukoa nvutuke ngɛba nwiɔ sosɔ ezukoa nvutuke kɛba ne mɔɔ la ɔ nloa la abo wɔ ye tɛbanu nwiɔ ne. Nuhua yɛɛ saa bɛsoa azukponle ne a bɛbava mbaka ne mɔ bɛawulowula a.

⁵ Ɛbava akasea ndaboa a wɔaze mbaka ne mɔ a na wɔaholo ezukoa nvutuke wɔagua nwolɛ.

⁶ Sie azukponle ɛhye wɔ mgbɛnu ɛdanlɛ ne mɔɔ wa anwunvɔnezelɛ ebia ne mɔɔ dua Ngyekyeleɛ Ɛlɛka ne azo la akunlu. Ɛkɛ ne yɛɛ mebayia wɔ a.

⁷ Saa nwonlomɔ biala Aalɔn ba kɛ ɔbayɛ ahɛnlaneɛ ne mɔ boɛ a, ɔwɔ kɛ ɔkpu ɛyɛlɛ evuanlɛ wɔ zolɛ.

⁸ Zɔhane ala yɛɛ saa nɔsolɛ ɔsosɔ ahɛnlaneɛ ne mɔ a, ɔwɔ kɛ ɔyɛ a. Ɔwɔ kɛ awolɛndoazo kɔsɔɔti kpu ɛyɛlɛ maa Ɛdɛnkɛma.

⁹ Mmayela ɛyɛlɛ biala mɔɔ ɛnle nwuanzanwuanza la wɔ azukponle ɛhye azo, mmafa nane azubɔdeɛ anzɛɛ ma azubɔdeɛ ɛbɔ azu na ɛye ɛdɛne wɔ azukponle ɛhye azo.

¹⁰ Ɛvolɛ biala ɔwɔ kɛ Aalɔn fa nane ne mɔɔ bɛkɛva bɛkɛbɔ ɛtane nwo azu ne la mogya ne bie gua azukponle ne mɛne ne azo ɔyɛ mgbɔdalɛ nzɛlɛlɛ. Ɔwɔ kɛ awolɛndoazo kɔsɔɔti yɛ ɛhye, ɔluakɛ ɔle nwuanzanwuanza kpalɛ ɔmaa medame, Ɛdɛnkɛma.”

Ɛdɛnkɛma Ndanlɛ Sua ne anwo adwule

¹¹ Ɛdɛnkɛma zele Mosisi kɛ,

¹² “Saa ɛtia Yizilayɛma a, ɔwɔ kɛ awie biala tua ɔ nwo ɛkpɔnenlɛ adwule maa me, amaa munzule biala ando ye.

¹³ Awie biala mɔɔ bɛkɛdia ye la, ɔwɔ kɛ ɔtua ezukoa bolɛ mɔɔ bɛkɛpɛ la, kɛmɔ bɛ ezukoa awolɛ ne mɔ si to kɔ la. Ezukoa ɛhye le azubɔdeɛ maa medame Ɛdɛnkɛma.

¹⁴ Awie biala mɔɔ ɛli ɛvolɛ abulanwiɔ mɔɔ kɔ, mɔɔ bɛkɛdia ye la badua ɛhye yeava yeayɛ azubɔdeɛ yeamaa medame Ɛdɛnkɛma.

¹⁵ Saa bɛtua ezukoa ɛhye bɛamaa bɛayɛ bɛ ti mgbɔdalɛ nzɛlɛlɛ a, sukoavolɛ ɛndua ɛmmaa ɔmbo zolɛ yɛɛ ehyianli ɛndua ekyi.

¹⁶ Die mgbɔdalɛ ezukoa ɛhye wɔ Yizilayɛma lɔ na fa bu Ɛdɛnkɛma Ndanlɛ Sua ne anwo amaamuo, amaa Ɛdɛnkɛma ahakye bɛ dahuu wɔ bɛ mgbɔdalɛ nzɛlɛlɛ ne ati.”

Kɔbele kyɛnze ne

¹⁷ Ɛdɛnkɛma zele Mosisi kɛ,

¹⁸ “Fa kɔbele yɛ kyɛnze na fa kɔbele yɛ ɔ bo ne mɔɔ bɛsie ye zolɛ la. Ɛbazie ye wɔ Ɛdɛnkɛma Ndanlɛ Sua ne nee azukponle ne avinli, na wɔagua nzule nu.

¹⁹ Aalɔn nee ɔ mra mrenya ne mɔ bava awowo bɛ sa nee bɛ gyakɛ anwo

²⁰ kolaa na bɛahɔ Ndanlɛ Sua ne anu anzɛɛ bɛahɔ azukponle ne anwo kɛ bɛkayela aleɛ azubɔdeɛ bɛamaa Ɛdɛnkɛma, anrɛɛ bɛkɛwu.

²¹ Ɔwɔ kɛ bɛwowo bɛ sa nee bɛ gyakɛ anwo, anrɛɛ bɛkɛwu. Ɛhye bayɛ mɛla ala ɛkɛ amaa bɛ dahuu, ɔdaye nee ɔ bo zo amra nee bɛ awolɛndoazo kɔsɔɔti.”

Ɛkpokpalɛ Nwole ne

²² Ɛdɛnkɛma zele Mosisi kɛ,

²³ “Fa ninyɛne evuanlɛ, alufuanlɛ nzule kilo nsia, senamɔn mɔɔ bɔ evuanlɛ la kilo nsa, anatele baka evuanlɛ kilo nsa,

²⁴ nee kasea kilo nsia (suzu bɛ, kɛmɔ bɛ nzuzulɛ ne si de la). Fa ɔlivi nwole litili nna boka nwo,

²⁵ kpoto maa ɔbɔ evuanlɛ fa yɛ ɛkpokpalɛ nwole nwuanzanwuanza.

²⁶ Fa kpokpa Nyianu Ndanlɛ Sua ne, Ngyekyeleɛ Ɛlɛka ne,

²⁷ ɛkponle ne nee nwolɛ ahyɛnze ne mɔ, kɛnlaneɛ baka ne nee nwolɛ ninyɛne ne mɔ, ɛyɛlɛ ɛyelalɛ azukponle ne nee nwolɛ ninyɛne ne amuala,

²⁸ azukponle ne mɔɔ bɛfa bɛyela azubɔdeɛ ne mɔ nee nwolɛ ninyɛne ne amuala, yɛɛ kyɛnze ne mɔɔ bɛfa nuhua nzule bɛwowo bɛ sa nee bɛ gyakɛ anwo la nee ɔ bo ne.

²⁹ Ɔwɔ kɛ ɛtu bɛ ɛsie ahane ɛmaa me, amaa bɛayɛ nwuanzanwuanza. Debie biala mɔɔ anwo kɛha bɛ la bayɛ nwuanzanwuanza.

³⁰ Kpokpa Aalɔn nee ɔ mra mrenya ne mɔ nwole na tu bɛ sie ɛkɛ maa me maa bɛzonle me kɛ bɛle me sɛlɛvolɛma.

³¹ Akee ɛbaha wɔahile Yizilayɛma kɛ, ‘Ɛhye bayɛ me ɛkpokpalɛ nwole nwuanzanwuanza wɔ awolɛndoazo kɔsɔɔti mɔɔ bara la.

³² Bɛmmafa bɛkpokpa awie gyɛne biala, yɛɛ ninyɛne mɔɔ bɛvale bɛyɛle nwole ɛhye la, bɛmmafa bɛyɛ nwole gyɛne biala. Ɔle nwuanzanwuanza, yɛɛ ɔwɔ kɛ bɛmaa ɔsonle bolɛ kɛ ɔle nwuanzanwuanza.

³³ Awie biala mɔɔ kɛyɛ ye ko ne ala bie, anzɛɛ awie biala mɔɔ kɛva bie kɛkpokpa awie gyɛne biala la, bɛye ye bɛvi ye menli ne avinli.’ ”

Ɛyɛlɛ ne

³⁴ Ɛdɛnkɛma zele Mosisi kɛ, “Fa ninyɛne evuanlɛ ɛhye mɔ: setakiti, ɔneka, galebanɛm, yɛɛ ɛyɛlɛ evuanlɛ mɔɔ alufuanlɛ wɔ nu la. Suzu bɛ pɛpɛ,

³⁵ na fa bɛ bɔ nu, kɛmɔ bɛyɛ nwole evuanlɛ la yɛ ɛyɛlɛ. Fa ngyenle gua nu maa ɔ nye ɛde na ɔyɛ nwuanzanwuanza.

³⁶ Ti bie motomoto na fa bie sie Ngyekyeleɛ Ɛlɛka ne mɔɔ gyi Ndanlɛ Sua ne anu la anyunlu, ɛleka mɔɔ mebayia wɔ la. Nwu ye kɛ ɛyɛlɛ ɛhye le nwuanzanwuanza.

³⁷ Ninyɛne mɔɔ ɛbava wɔayɛ ɛyɛlɛ ɛhye la, bɛmmafa bie bɛyɛ ɛyɛlɛ ne bie bɛdabɛ bɛfa. Ɔwɔ kɛ bɛnwu kɛ ɔle debie nwuanzanwuanza mɔɔ bɛdu bɛzie ahane bɛmaa medame Ɛdɛnkɛma a.

³⁸ Awie biala mɔɔ kɛyɛ ye ko ne ala bie kɛyɛ ɔ nwo la, bɛye ye bɛvi ye menli ne avinli.”