Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 29 - BAEBOLO ANZƐƐ BULUKU NWUANZANWUANZA

Ngyehyɛlɛ mɔɔ bɛdua zo bɛawula Aalɔn nee ɔ mra mrenya sɛlɛvolɛ la

¹ “Akee mɔɔ ɛbayɛ wɔamaa Aalɔn nee ɔ mra mrenya ne mɔ na wɔadu bɛ wɔazie ahane wɔamaa me, wɔamaa bɛayɛ me sɛlɛvolɛma la ɛne: fa ɛnlankɛ nyinli edonraa ko nee mboane nyinli nwiɔ mɔɔ bɛ nwo ɛnlɛ dɛne la,

² kpanwo mɔɔ mgbɔvonle ɛnle nu, keeki mɔɔ mgbɔvonle ɛnle nu mɔɔ bɛva nwole bɛfete la, yɛɛ belɛde mɔɔ mgbɔvonle ɛnle nu na bɛva nwole bɛvɔ ɔ nyunlu la. Ɛbava esamo kpalɛ a wɔayɛ ɛhye mɔ amuala a.

³ Ɛbagua bɛ kɛndɛne nu na wɔava bɛ wɔ kɛndɛne ne anu wɔaboka ɛnlankɛ ne nee mboane ne mɔ anwo wɔara.

⁴ “Ɛbava Aalɔn nee ɔ mra mrenya ne mɔ wɔara Ɛdɛnkɛma Ndanlɛ Sua ne anuhɔlɛ ne na wɔava nzule wɔabia bɛ.

⁵ Akee ɛbava adɛladeɛ ne mɔ na wɔava anwuma tɛladeɛ ne, ɛzonlenlɛ tɛladeɛ ne mɔɔ bɛnwo ye woladapi, ɛzonlenlɛ tɛladeɛ yifɔdo ne, akɛnrazo aguzo ne wɔawula Aalɔn na wɔava yifɔdo akyeso tabule ne wɔahye zolɛ.

⁶ Ɛbava abɔtile ne wɔabɔ ye na wɔava pɛlɛte nwuanzanwuanza ne mɔɔ bɛhɛlɛ zolɛ la wɔabɔ abɔtile ne azo.

⁷ Akee ɛbava ɛkpokpalɛ nwole ne wɔawola wɔagua ɔ ti zo wɔakpokpa ye.

⁸ “Ɛbava ɔ mra mrenya ne mɔ noko wɔara na wɔava anwuma adɛladeɛ wɔawula bɛ;

⁹ wɔava akyeso ne mɔ wɔahye bɛ nze zo na wɔazoa bɛ ahyɛlɛ. Ɛnee kɛ ɛbazi wɔawula Aalɔn nee ɔ mra mrenya ne mɔ sɛlɛvolɛ la ɛne. Ɔwɔ kɛ bɛdabɛ nee bɛ bo zo amra sonle me kɛ sɛlɛvolɛma wɔ mekɛ mɔɔ ɛnlɛ awieleɛ.

¹⁰ “Akee ɛbava ɛnlankɛ nyinli ne wɔara me nyunlu wɔ Ndanlɛ Sua ne anyunlu na wɔamaa Aalɔn nee ɔ mra mrenya ne mɔ ava bɛ sa agua ɔ ti zo.

¹¹ Akee ku ɛnlankɛ nyinli ne wɔ me nyunlu ɛke wɔ Ndanlɛ Sua ne anlenkɛ ne anloa.

¹² Fa ɛ sa ɛrɛlɛsɛka bɔ mogya ne anu na fa ka azukponle ne abati kpokpɔkoo ne mɔ azo na wola mogya ne mɔɔ kɛha la gua azukponle ne abo.

¹³ Akee fa ɛnlome ne mɔɔ wɔ ɔ kunlu ninyɛne ne mɔ anwo la, ninyɛne mɔɔ wɔ ye ɛbolɛ ne anwo, ye ezizira nwiɔ ne nee nwolɛ ɛnlome ne amuala na yela bɛ wɔ azukponle ne azo bɔ azu maa me.

¹⁴ Na yela ɛnlankɛ nyinli ne nane ne, ye nwoma ne, nee ye anyalɛ ne mɔ wɔ azokoɛleɛ ne anzi lɔ. Ɔle ɛtane azubɔdeɛ.

¹⁵ “Akee ɛbava mboane nyinli ne mɔ ko na Aalɔn nee ɔ mra mrenya ne mɔ ava bɛ sa agua ɔ ti zo.

¹⁶ Ku ye na to ye mogya ne gua azukponle ne anwo yia.

¹⁷ Ɛbapepɛ boane ne nane ne anu azinli, wɔawowo ɔ kunlu ninyɛne ne mɔ nee ye ndwɛlɛ ne mɔ anwo na wɔava wɔagua ɔ ti ne nee nane azinli ne mɔ azo.

¹⁸ Yela boane ne mumua wɔ azukponle ne azo bɔ azu maa medame Ɛdɛnkɛma. Azubɔlɛ ɛhye mɔɔ bɛfa senle bɛbɔ bɛmaa Ɛdɛnkɛma la sɔ me nye.

¹⁹ “Akee ɛbava boane nyinli ɛhendeɛ ne na wɔamaa Aalɔn nee ɔ mra mrenya ne mɔ ava bɛ sa agua ɔ ti zo.

²⁰ Ɛhye anzi ku ye na fa ɛ sa ɛrɛlɛsɛka fa ye mogya ne bie keha Aalɔn nee ɔ mra mrenya ne mɔ anzo fema ne mɔ ati, fa bie keha bɛ sa fema ahohotile ne mɔ azo nee bɛ gyakɛ fema ahohotile ne mɔ azo, na to mogya ne mɔɔ ɛha la gua azukponle ne anwo yia.

²¹ Akee ɛbava mogya ne mɔɔ wɔ azukponle ne azo la nee ɛkpokpalɛ nwole ne bie wɔakponde Aalɔn nee ɔ mra mrenya ne mɔ anwo nee bɛ adɛladeɛ ne mɔ anu. Ɔdaye, ɔ mra mrenya ne mɔ, nee bɛ adɛladeɛ ne mɔ kɔsɔɔti anwo kɛde.

²² “Eza ɛbayeye boane nyinli ne akunlu ɛnlome ne, dualɛ dɔlera ne, ɛnlome ne mɔɔ wɔ ɔ kunlu ninyɛne ne mɔ anwo, ye ezizira nwiɔ ne nee nwolɛ ɛnlome ne, nee ye ɛbolɛ ne anwo ninyɛne ne amuala, yɛɛ ye ɛzɔlɛ fema ne (ɔluakɛ ɔle sɛlɛvolɛ ɛwulalɛ boane).

²³ Akee ye kpanwo kunguma ko, keeki ko mɔɔ bɛva nwole bɛyɛ, yɛɛ kpanwo ndɛbandɛba ne mɔ ko wɔ kɛndɛne ne mɔɔ gyi Ɛdɛnkɛma anyunlu la anu,

²⁴ na fa ninyɛne ɛhye mɔ amuala wula Aalɔn nee ɔ mra mrenya ne mɔ asa anu maa bɛdo bɛ ehono, kɛ bɛle ehono azubɔdeɛ wɔ Ɛdɛnkɛma anyunlu.

²⁵ Akee dielie ninyɛne ne mɔ bɛ sa nu na yela bɛ wɔ azukponle ne azo boka ɛyelalɛ azubɔdeɛ ne kɛ bɛle azubɔlɛ mɔɔ bɛfa senle bɛbɔ bɛmaa medame Ɛdɛnkɛma a.

²⁶ “Ɛbaye boane nyinli ne mɔɔ bɛvale bɛdule Aalɔn bɛmanle me la akɛnrazo ne na wɔado ye ehono kɛ ɔle ehono azubɔdeɛ. Nane kpɔkɛ ɛhye bayɛ wɔ ɛdeɛ.

²⁷ “Saa bɛwula awie sɛlɛvolɛ a, ɔwɔ kɛ bɛye boane nyinli ne mɔɔ bɛlɛfa bɛali sɛlɛvolɛ ɛwulalɛ gyima ne la akɛnrazo ne mɔɔ bɛva bɛbɔ ehono azu ne nee ye ɛzɔlɛ ne mɔɔ le sɛlɛvolɛ ne ɛdeɛ na bɛva bɛbɔ ehono azu la bɛsie ahane bɛmaa me kɛ ɔle ahyɛlɛdeɛ mɔɔ anwo hyia me a. Ɔle Aalɔn nee ɔ mra mrenya ne mɔ ɛdeɛ.

²⁸ Ɛhye le kpɔkɛ mɔɔ mebɔ mɔɔ menrɛhakyi ye ɛlɛ a. Saa me menli ne fa anzonudwolɛ azubɔdeɛ ne mɔ ba a, bɛ kɛnrazo ne nee bɛ ɛzɔlɛ ne mɔ le sɛlɛvolɛma ne mɔ ɛdeɛ. Ɔle menli ne ahyɛlɛdeɛ ɔmaa medame, Ɛdɛnkɛma.

²⁹ “Saa Aalɔn wu a bɛva ye sɛlɛvolɛ adɛladeɛ ne mɔ bɛmaa ɔ mra mrenya ne mɔ, amaa bɛakpokpa bɛ nwole na bɛwula bɛ sɛlɛvolɛ a bɛawula.

³⁰ Aalɔn ara nrenya ne mɔɔ kɛli ye agya, kɛ ɔdi sɛlɛvolɛ gyima ne la, saa ɔlɛba me nyunlu wɔ Ndanlɛ Sua ne anu Ɛleka Nwuanzanwuanza ne kɛ ɔbazonle a, ɔwɔ kɛ ɔwula adɛladeɛ ɛhye mɔ toonwo kenle nsuu.

³¹ “Ɛbava boane nyinli ne mɔɔ bɛhunle ye bɛyɛle Aalɔn nee ɔ mra mrenya ne mɔ sɛlɛvolɛ ɛwulalɛ gyima ne la nane ne na wɔado ye wɔ ɛleka mɔɔ te la.

³² Bɛbava bɛaboka kpanwo ne mɔ mɔɔ hale kɛndɛne ne anu la na bɛali wɔ Ndanlɛ Sua ne anuhɔlɛ ne.

³³ Bɛbali ninyɛne mɔɔ bɛvale bɛyɛle mgbɔdalɛ nzɛlɛlɛ ne wɔ bɛ sɛlɛvolɛ ɛwulalɛ ne anu la. Awie mɔɔ ɛnle sɛlɛvolɛ la ɛnle kɛ di aleɛ ne bie, ɔboalekɛ ɔle nwuanzanwuanza.

³⁴ Saa bɛangola nane ne anzɛɛ kpanwo ne mɔɔ bɛvale bɛwulale bɛ sɛlɛvolɛ ne la amuala di na aleɛ kye zolɛ a, ɔwɔ kɛ bɛyela ye, ɔnle kɛ bɛdi, ɔluakɛ ɔle nwuanzanwuanza.

³⁵ “Ɔwɔ kɛ ɛbu Aalɔn nee ɔ mra mrenya ne mɔ sɛlɛvolɛwulalɛ amaamuo ne kenle nsuu pɛpɛ, kɛmɔ mehile wɔ la.

³⁶ Kenle ko biala ku ɛnlankɛ nyinli ko bɔ ɛtane azu, amaa bɛava bɛayɛ mgbɔdalɛ nzɛlɛlɛ. Eza bɔ ɛtane azu maa azukponle ne, kpokpa ye nwole fa nua ye mekɛ biala mɔɔ ɛkɛyɛ mgbɔdalɛ nzɛlɛlɛ ɛkɛmaa azukponle ne la.

³⁷ Ɛbayɛ mgbɔdalɛ nzɛlɛlɛ ne na wɔanlua azukponle ne kenle ko biala toonwo kenle nsuu. Akee azukponle ne anwo bade, ayɛ nwuanzanwuanza bɔkɔɔ, na ye nwuanzanwuanzayɛlɛ ne bamaa awie anzɛɛ debie biala mɔɔ kɛzɔ nu la anwo ade ayɛ nwuanzanwuanza.

Dahuu azubɔlɛ ninyɛne

³⁸ “Mekɛ kɔsɔɔti mɔɔ bara la, kenle ko biala fa mboane mralɛ nwiɔ mɔɔ ɛli ɛvolɛ ngoko la bɔ azu wɔ azukponle ne azo.

³⁹ Fa ko bɔ azu nwonlomɔ na fa ko noko bɔ azu nɔsolɛ.

⁴⁰ Fa esamo kpalɛ kilo ko na fa nwole anye kɛnlɛma litili ko fete; akee gua nza nwanye litili ko fa ye ɛdɛne.

⁴¹ Ku boane ne mɔɔ tɔ zolɛ nwiɔ la nɔsolɛ nu, na fa ma azubɔdeɛ nee nwolɛ ɛdɛneyelɛ nwanye, kɛmɔ nwonlomɔ ɛdeɛ ne de ala la boka nwolɛ na fa bɔ azu. Ɛhye le azubɔdeɛ mɔɔ bɛfa senle a bɛbɔ bɛmaa medame, Ɛdɛnkɛma a, na ɔsɔ me nye.

⁴² Ɛyelalɛ azubɔdeɛ azu ɛhye, ɔwɔ kɛ bɛbɔ ye me nyunlu wɔ Ndanlɛ Sua ne anuhɔlɛ ɛke dahuu wɔ awolɛndoazo kɔsɔɔti anu.

⁴³ Ɛkɛ ne yɛɛ mebayia Yizilayɛma, na me anyunlunyia ne bada ade bɛ nwo.

⁴⁴ Mebade Ndanlɛ Sua ne nee azukponle ne anwo na meadu Aalɔn nee ɔ mra mrenya meazie ahane kɛ bɛle me sɛlɛvolɛma.

⁴⁵ Mebadɛnla Yizilayɛma avinli na meayɛ bɛ Nyamenle.

⁴⁶ Bɛbanwu kɛ medame a mele Ɛdɛnkɛma bɛ Nyamenle ne mɔɔ yele bɛ vile Yigyibiti azɛlɛ zo rale kɛ mebadɛnla bɛ avinli la. Medame a mele Ɛdɛnkɛma bɛ Nyamenle ne a.