Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 28 - BAEBOLO ANZƐƐ BULUKU NWUANZANWUANZA

Sɛlɛvolɛ ne adɛladeɛ

¹ “Akee maa ɛ diema Aalɔn nee ɔ mra mrenya ne mɔ, Needabe, Abaehu, Ɛlieza, yɛɛ Yetamaa ɛbikye wɔ na ye bɛ fi Yizilayɛma avinli sie ahane, amaa bɛanyia adenle bɛazonle me kɛ me sɛlɛvolɛma.

² Bu sɛlɛvolɛma adɛladeɛ nwuanzanwuanza maa ɛ diema Aalɔn maa ɔnyia gyinlabelɛ nee anyunlunyia.

³ Ka kile bɛ kɔsɔɔti mɔɔ memaa bɛ adwenle mɔɔ anu pi na bɛbɔ mɔdenle la kɛ bɛbu Aalɔn adɛladeɛ ne mɔ, amaa bɛadu ye bɛazie ahane bɛamaa me kɛ ɔle me sɛlɛvolɛ.

⁴ Adɛladeɛ mɔɔ bɛbabu la ɛne: akɛnrazo aguzo, ɛzonlenlɛ tɛladeɛ ne mɔɔ bɛfɛlɛ ye yifɔdo la, tɛladeɛ woladapi, anwuma tɛladeɛ mɔɔ bɛnwo ɔ nloa, abɔtile, yɛɛ tabule mɔɔ bɛfa bɛkye bɛ avinli la. Ɛhye mɔ a le adɛladeɛ nwuanzanwuanza mɔɔ ɔwɔ kɛ bɛbu bɛmaa ɛ diema Aalɔn nee ɔ mra mrenya ne mɔ bɛmaa bɛfa bɛsonle me kɛ me sɛlɛvolɛma a.

⁵ Ɔwɔ kɛ menli mɔɔ kpomgba la fa lenen ɛdanlɛ, mboane enrinli buluwu, buluwu nee kɔkɔlɛ afonla, nee kɔkɔlɛ ɛdanlɛ, nee nyɛma anye akɔlɛnlome a kpomgba adɛladeɛ ne mɔ a.

⁶ “Ɔwɔ kɛ bɛfa ɛdanlɛ mɔɔ bɛva mboane enrinli buluwu, buluwu nee kɔkɔlɛ afonla, nee kɔkɔlɛ bɛnwo, na bɛfa agbuyia bɛnwo nuhua.

⁷ Ɔwɔ kɛ bɛkpomgba ndanlɛ ndenrɛndenra nwiɔ bɛsosɔ ɔ bati nee ɔ bati, amaa bɛahola bɛava bɛabɔ bɛ kpɔkɛ.

⁸ Eza bɛva ɛdanlɛ nee nyɛma ko ne ala mɔɔ bɛvale bɛbule la bie bɛnwo akyeso kɛnlɛma bɛzɔ ɛzonlenlɛ tɛladeɛ ne na bɛava bɛahye zo.

⁹ Bɛva kanɛlea awolɛ mɔɔ sonle bolɛ la nwiɔ na bɛhɛlɛ Gyekɔbo amra mrenya ne mɔ aluma bɛgua zolɛ.

¹⁰ Bɛhɛlɛ nsia wɔ ko azo na bɛhɛlɛ nsia wɔ ko noko azo; bɛbɔ ye kpanyinli ne anwo zo bɛradwu ekyi kpalɛ ne anwo zo.

¹¹ Kɛ dwinvolɛ si kɛlɛ aluma gua adwinli mɔɔ yeli la azo la, zɔhane ala yɛɛ bɛhɛlɛ Gyekɔbo amra mrenya ne mɔ aluma wɔ awolɛ ne mɔ azo a, na yɛ ezukoa nvutuke boa wula awolɛ ne mɔ nu.

¹² Akee bɛva awolɛ nwiɔ ne bɛsosɔ ɛzonlenlɛ tɛladeɛ yifɔdo ne abati nwiɔ ne bɛmaa bɛyɛ Yizilayɛ mbusua ekpunli bulu nee nwiɔ ne ngakyedeɛ. Wɔ adenle ɛhye anu, dahuu Aalɔn bazoa bɛ aluma ɔ bati nwiɔ ne, amaa medame Ɛdɛnkɛma meava meahakye me menli ne.

¹³ Yɛ ezukoa nvutuke boa nwiɔ,

¹⁴ yɛɛ ezukoa nvutuke tagyee ndweabane ne mɔ kɛ nyɛma la fa sosɔ boa ne mɔ.

Akɛnrazo aguzo ne

¹⁵ “Bɛkpomgba ndɛnebualɛ akɛnrazo aguzo bɛmaa Sɛlɛvolɛ Kpanyinli ne na yeava yɛabiza Nyamenle ɛhulolɛdeɛ. Bɛva ninyɛne ko ne ala mɔɔ bɛvale bɛkpomgbale ɛzonlenlɛ tɛladeɛ yifɔdo ne la bie na bɛnwo nuhua. Bɛva lenen nyɛma kɛnlɛma, mboane enrinli anye akɔlɛnlome, buluwu, kɔkɔlɛ, yɛɛ buluwu nee kɔkɔlɛ afonla a bɛnwo ɛdanlɛ ne mɔɔ bɛfa bɛakpomgba la a.

¹⁶ Ɔwɔ kɛ ye tɛbanu ne mɔ sɛ na bɛta ɛdanlɛ ne zo. Ɔwɔ kɛ ye tendenle yɛ mita ko ngyɛnu nnu na ye tɛtɛlɛ noko yɛ mita ko ngyɛnu nnu.

¹⁷ Bɛsolo awolɛ mɔɔ sonle bolɛ la ɛhonlone nna wɔ zolɛ. Ɛhonlone ne mɔɔ lumua la, bɛva awolɛ wulubi, topaze, yɛɛ ganɛte;

¹⁸ ɛhonlone ne mɔɔ tɔ zolɛ nwiɔ la, bɛva ɛmelade, safaya, yɛɛ daemɔn;

¹⁹ ɛhonlone ne mɔɔ tɔ zolɛ nsa la, bɛva tɛkɔese, agate, yɛɛ ameteze;

²⁰ yɛɛ ɛhonlone ne mɔɔ tɔ zolɛ nna la, bɛva bɛlele, kanɛlea, yɛɛ gyasepa. Bɛwula ɛhye mɔ kɔsɔɔti wɔ ezukoa nvutuke boa nu.

²¹ Awolɛ bulu nee nwiɔ ɛhye mɔ, ko biala bɛhɛlɛ Gyekɔbo amra mrenya ne mɔ ko duma zolɛ bɛmaa bɛgyinla ɛkɛ bɛmaa Yizilayɛ mbusua ekpunli bulu nee nwiɔ ne.

²² Bɛva ezukoa nvutuke tagyee bɛyɛ ndweabane na bɛbɛka ye kɛ nyɛma la.

²³ Bɛyɛ ezukoa nvutuke ngɛba nwiɔ bɛsosɔ akɛnrazo aguzo ne anwuma abati nwiɔ ne

²⁴ na bɛva ezukoa nvutuke nyɛma nwiɔ ne bɛsosɔ ngɛba ne mɔ.

²⁵ Bɛva nyɛma ne mɔ ati nwiɔ ne bɛsosɔ ezukoa nvutuke boa nwiɔ ne na bɛva bɛsosɔ ɛzonlenlɛ tɛladeɛ yifɔdo ne ndanlɛ ndenrɛndenra nwiɔ ne mɔɔ wɔ ɔ bati nee ɔ bati la.

²⁶ Akee bɛva ezukoa nvutuke bɛyɛ ngɛba nwiɔ bɛsosɔ akɛnrazo aguzo ne anloa nwiɔ ne mɔɔ wɔ aze la akunlu ne mɔɔ gua ɛzonlenlɛ tɛladeɛ ne azo la.

²⁷ Bɛyɛ ezukoa nvutuke ngɛba nwiɔ bieko bɛsosɔ ɛzonlenlɛ tɛladeɛ yifɔdo ne abati nyɛma ne mɔ anyunlu aze wɔ akyeso kɛnlɛma ne anwuma.

²⁸ Bɛva nyɛma buluwu bɛbɔ akɛnrazo aguzo ngɛba ne mɔ nee ɛzonlenlɛ tɛladeɛ yifɔdo ngɛba ne mɔ kpɔkɛ, amaa akɛnrazo aguzo ne amkpɔne na yeazinze akyeso ne azo fɔɔnwo.

²⁹ “Saa Aalɔn kɔ Ɛleka Nwuanzanwuanza ne a, ɔbawula ndɛnebualɛ akɛnrazo aguzo ne mɔɔ bɛhɛlɛ Yizilayɛ mbusua ekpunli bulu nee nwiɔ ne aluma zolɛ la, amaa medame Ɛdɛnkɛma, meahakye me menli ne dahuu.

³⁰ Bɛva Yulem nee Tɛmem ne bɛgua ndɛnebualɛ akɛnrazo aguzo ne anu mɔɔ saa Aalɔn wula a ɛnee ɔgua ye ɛbolɛ zo la, amaa saa ɔlɛba me nyunlu ɛke a ɔ nee bɛ ara. Mekɛ ɛhye mɔ anu ɔwɔ kɛ ɔwula ndɛnebualɛ akɛnrazo aguzo ne, amaa yeahola yeamaa Yizilayɛma anwu me ɛhulolɛdeɛ.

Sɛlɛvolɛ adɛladeɛ bie mɔ

³¹ “Tɛladeɛ kpole ne mɔɔ bɛbu ye woladapi mɔɔ bɛwula bɛgua ɛzonlenlɛ tɛladeɛ yifɔdo ne azo la, ɔwɔ kɛ bɛfa mboane enrinli buluwu kɔsɔɔ a bɛnwo a.

³² Ɔwɔ kɛ bɛpɛ ɔ kɔme mɔɔ bɛfa bɛ ti bɛwula nu la. Ɔ kɔme ne, ɔwɔ kɛ bɛnwo debie bɛsɛ nu, amaa bɛwula a yeande.

^33-34 Ɔ bo aze ne mɔɔ bɛbu la, bɛva mboane enrinli nyɛma buluwu, buluwu nee kɔkɔlɛ afonla, nee kɔkɔlɛ bɛnwo debie mɔɔ zɔho akutue la bɛhendɛhenda ɔ nloa toonwo bɛbɛnra bɛyia, na bɛva ezukoa nvutuke dɔne bɛdidi bɛ avinli.

³⁵ Saa Aalɔn ɛlɛdi ye sɛlɛvolɛ gyima ne a ɔwɔ kɛ ɔwula tɛladeɛ ɛhye, amaa saa ɔlɛba me nyunlu wɔ Ɛleka Nwuanzanwuanza ne, anzɛɛ ɔvi ɛkɛ ne ɔlɛfinde a, dɔne ne mɔ awozo na yeanwu.

³⁶ “Fa ezukoa nvutuke tagyee bolo yɛ ye ɛdɛbaa na kɛlɛ zolɛ, ‘Bɛdu bɛzie ɛkɛ bɛmaa Ɛdɛnkɛma.’

³⁷ Fa ɛdanlɛ buluwu ɛdenraa kyekye ye wɔ abɔtile ne anyunlu.

³⁸ Aalɔn bɔ abɔtile ne a ɛnee ɔwɔ ɔ nwoma azo, amaa saa Yizilayɛma fa azubɔdeɛ nwuanzanwuanza ahyɛlɛ ninyɛne arɛlɛ me na bɛfo a yeali nwolɛ ɛzonle. Ɔwɔ kɛ ɔbɔ abɔtile ne dahuu, amaa azubɔdeɛ ne mɔ azɔ me nye na mealie.

³⁹ “Bɛva lenen ɛdanlɛ kɛnlɛma bɛnwo Aalɔn anwuma tɛladeɛ ne, bɛva lenen ɛdanlɛ kɛnlɛma bɛyɛ ye abɔtile ne nee ye akyeso ne, na bɛnwo debie bɛgua akyeso ne anu.

⁴⁰ “Bɛkpomgba anwuma adɛladeɛ, akyeso, yɛɛ ahyɛlɛ bɛmaa Aalɔn amra mrenya ne mɔ, amaa bɛ nwo ayɛ fɛ na bɛ nyunlu ara anyia.

⁴¹ Fa adɛladeɛ ɛhye mɔ kɔsɔɔti wulowula ɛ diema Aalɔn nee ɔ mra mrenya ne mɔ. Akee kpokpa bɛ nwole, wula bɛ sɛlɛvolɛ, tu bɛ maa medame Ɛdɛnkɛma maa bɛzonle me kɛ me sɛlɛvolɛma.

⁴² Fa lenen ɛdanlɛ bu aze adɛladeɛ maa bɛ, maa ɔvi bɛ bo ɔdwu bɛ ɛzɔlɛ nwo, amaa bɛ nwo anye angua zo.

⁴³ Kenle biala mɔɔ Aalɔn nee ɔ mra mrenya ne mɔ ɛlɛba me nyunlu wɔ Ndanlɛ Sua ne anu anzɛɛ bɛlɛkɔ azukponle ne anwo wɔ Ɛleka Nwuanzanwuanza ne bɛahɔyɛ bɛ sɛlɛvolɛ gyima ne la, ɔwɔ kɛ bɛwula zɔhane adɛladeɛ ne mɔ, anrɛɛ bɛkɛli ɛzonle na bɛkɛwu. Ɛhye le mɛla mɔɔ wɔ ɛkɛ ne dahuu maa Aalɔn nee ɔ bo zo amra a.