Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 20 - BAEBOLO ANZƐƐ BULUKU NWUANZANWUANZA

Nyamenle Mɛla Bulu ne

¹ Na Nyamenle dendɛle zele kɛ,

² “Mame a mele Ɛdɛnkɛma bɛ Nyamenle ne, mɔɔ yele bɛ vile Yigyibiti azɛlɛ zo, vile akɛlɛzonlenlɛ nu la.

³ “Bɛmmasonle nyamenle gyɛne biala kɛ me ngome ala.

⁴ “Bɛmmayɛ ananze, anzɛɛ debie biala mɔɔ wɔ anwuma anzɛɛ aze anzɛɛ nzule nu wɔ azɛlɛ bo la sɔhovolɛ.

⁵ Bɛmmabɔ bɛ ti aze bɛmaa bɛ anzɛɛ bɛmmasonle bɛ. Ɔluakɛ medame Ɛdɛnkɛma bɛ Nyamenle ne, mele nungule Nyamenle. Mefa bɛ ze mɔ ɛtane ne mɔ anwo ndeanlɛ metea bɛdabɛ mɔɔ bɛkpɔ me la toonwo ɔkɔdwu awolɛndoazo nsa ne nee nna ne azo,

⁶ na mekile me ɛhulolɛ kpundii ne memaa awolɛndoazo apenle apenle mɔɔ kulo me na bɛdi me mɛla zo la.

⁷ “Bɛmmabɔ medame Ɛdɛnkɛma bɛ Nyamenle ne duma mgbane mgbane, ɔluakɛ medame Ɛdɛnkɛma, menrɛmaa mɔɔ bɔ me duma mgbane mgbane la ɛnrɛva ɔ nwo dwɔɔ.

⁸ “Bɛhakye kɛ bɛkɛzie Ɛnwomenlelielɛ Kenle ne nwuanzanwuanza.

⁹ Bɛva kenle nsia bɛyɛ gyima, bɛyɛ bɛ gyima muala,

¹⁰ na kenle nsuu ne le Ɛdɛnkɛma bɛ Nyamenle ne Ɛnwomenlelielɛ Kenle; bɛmmayɛ gyima biala, bɛdabɛ anzɛɛ bɛ mra mrenya, anzɛɛ bɛ mra mraalɛ, bɛ sonvolɛ mrenya, anzɛɛ bɛ sonvolɛ mraalɛ, anzɛɛ bɛ nlankɛ, anzɛɛ nyɛvolɛ mɔɔ wɔ bɛ azua ne mɔ azo la.

¹¹ Ɔluakɛ medame Ɛdɛnkɛma, menvale kenle nsia a membɔle anwuma nee aze a, nyevile nee nuhua ninyɛne muala, na menliele me ɛnwomenle wɔ kenle nsuu ne azo. Yemɔti medame Ɛdɛnkɛma, menyilale Ɛnwomenlelielɛ Kenle ne na menyɛle ye nwuanzanwuanza.

¹² “Bɛli bɛ ze mɔ nee bɛ nli mɔ eni, amaa bɛ mekɛ awa wɔ azɛlɛ ne mɔɔ medame Ɛdɛnkɛma bɛ Nyamenle ne melɛfa meamaa bɛ la azo.

¹³ “Bɛmmaku sonla.

¹⁴ “Bɛmmafa awuvolɛ.

¹⁵ “Bɛmmawua.

¹⁶ “Bɛmmadi daselɛ adalɛ bɛtia bɛ gɔnwo.

¹⁷ “Bɛmmamaa bɛ nye bolo bɛ gɔnwo sua nu; bɛmmamaa bɛ nye bolo bɛ gɔnwo aye, anzɛɛ ye sonvolɛ nrenya, anzɛɛ ye sonvolɛ raalɛ, anzɛɛ ye ɛnlankɛ nyinli, anzɛɛ ye asoaso, anzɛɛ bɛ gɔnwo debie biala.”

Menli ne ɛzulolɛ

¹⁸ Mɔɔ menli ne kɔsɔɔti dele ɛhululɛ nee ye ɛvedevedelɛ ne nee aweɛne tendenle ne ane, na bɛnwunle boka ne azo esike ne la, ɛzulolɛ hanle bɛ na bɛ nwo wozole bɛ.

¹⁹ Bɛgyinlanle moa moa na bɛhanle bɛhilele Mosisi kɛ, “Wɔmɔ tendɛ kile yɛ na yɛbade. Mmamaa Nyamenle tendɛ kile yɛ, anrɛɛ yɛkɛwu.”

²⁰ Na Mosisi hanle hilele menli ne kɛ, “Bɛmmasulo, ɔluakɛ Nyamenle ɛra kɛ ɔbazɔ bɛ yeanlea, amaa bɛazulo ye dahuu na bɛanyɛ ɛtane.”

²¹ Menli ne gyinlanle moa moa na Mosisi bikyele awozinli kabikabi ne, ɛleka mɔɔ Nyamenle wɔ la.

Azukponle nwo mɛla

²² Na Ɛdɛnkɛma zele Mosisi kɛ, “Ɛhye yɛɛ ɛbaha wɔahile Yizilayɛma a: Bɛdabɛ bɛnwu ye bɛ nye zo kɛ mevi anwuma me nee wɔ ɛdendɛ.

²³ Bɛmmafa dwɛtɛ fufule bɛyɛ awozonle bɛboka me nwo, anzɛɛ bɛmmafa ezukoa nvutuke bɛyɛ awozonle bɛmaa bɛ nwo.

²⁴ Bɛzi ndɛtɛlɛ azukponle bɛmaa me na bɛva bɛ mboane nee nlankɛ azubɔdeɛ ne mɔ bɛbɔ ɛyelalɛ azu nee anzonudwolɛ azu wɔ zolɛ bɛmaa me. Ɛleka biala mɔɔ menwɔze bɛ kɛ bɛzonle me la, mebara mearayila bɛ.

²⁵ Saa bɛfa awolɛ a bɛazi azukponle bɛamaa me a, anrɛɛ bɛmmafa bulalɛ bɛkyekyɛ nwolɛ, ɔluakɛ saa bɛfa bulalɛ bɛkyekyɛ nwolɛ a, ɛnee bɛgua nwolɛ evinli.

²⁶ Bɛmmasi azukponle mɔɔ kpolike wɔ ɔ nyunlu mɔɔ bɛtietia zo na bɛahɔ zolɛ la bɛmaa me; saa bɛyɛ ye zɔhane na awie se kɛ ɔfo a, awie kɛnwu kɛ ɔ nwo la zolɛ.