Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 19 - BAEBOLO ANZƐƐ BULUKU NWUANZANWUANZA

Yizilayɛma wɔ Saenae Boka

^1-2 Mɔɔ Yizilayɛma vile Yigyibiti la, ye siane nsa ne na ye kenle ne mɔɔ lumua la bɛdwule Saenae fienemgbole ne anu. Akee mɔɔ bɛvi Relɛfedem bɛrale Saenae fienemgbole ne anu la, bɛrazokoɛle Boka Saenae abo ɛkɛ.

³ Na Mosisi vole boka ne kɛ ɔkayia Nyamenle. Ɛdɛnkɛma vɛlɛle ye boka ne azo zele ye kɛ, “Ɛhye yɛɛ ɛbaha wɔahile Gyekɔbo abo zo amra ne a: Ka kile Yizilayɛma ne kɛ,

⁴ ‘Bɛnwunle mɔɔ medame Ɛdɛnkɛma menvale menyɛle Yigyibitima, na menvale bɛ wɔ kɔleɛ ndɛbalɛ zo membale me nwo ɛke la.

⁵ Yemɔti saa bɛtie me ne na bɛdi me ngyekyeleɛ ne azo a, bɛbayɛ me ɛdeɛ wɔ maanle maanle kɔsɔɔti avinli, ɔluakɛ azɛlɛ ne kɔsɔɔti le me ɛdeɛ.

⁶ Bɛbayɛ me maanle nwuanzanwuanza na bɛazonle me kɛ bɛle me sɛlɛvolɛma. Ɛhye a le edwɛkɛ mɔɔ ɛbaha wɔahile Yizilayɛma a.’ ”

⁷ Yemɔti Mosisi ziale rale; ɔvɛlɛle Yizilayɛ mgbanyima ne mɔ na ɔvale mɔɔ Ɛdɛnkɛma ɛha ɛhile ye la ɔdole bɛ nyunlu.

⁸ Na menli ne kɔsɔɔti anloa hɔle ko hanle kɛ, “Debie biala mɔɔ Ɛdɛnkɛma ɛha la, yɛbayɛ.” Na Mosisi hanle mɔɔ menli ne hanle la hilele Ɛdɛnkɛma.

⁹ Na Ɛdɛnkɛma zele Mosisi kɛ, “Nea, mebalua amungu kumɔɔnwo bie anu meara, amaa saa me nee wɔ ɛlɛtendɛ a, menli ne ade me ne na bɛalie wɔ bɛali dahuu.” Akee Mosisi hanle mɔɔ menli ne hanle la hilele Ɛdɛnkɛma.

¹⁰ Na Ɛdɛnkɛma zele Mosisi kɛ, “Kɔ na kɔnlua menli ne ɛnɛ nee ɛhyema, bɛkpo bɛ nwo ninyɛne,

¹¹ na maa bɛboɔboa bɛ nwo ɛhyema anzi, ɔluakɛ ye kenle nsa ne azo medame Ɛdɛnkɛma, mebadwu aze wɔ Boka Saenae azo, wɔ menli ne kɔsɔɔti anye zo.

¹² Gya anyiane, amaa menli ne ambɔ andɛla, na ka kile bɛ kɛ, ‘Bɛnlea boɛ na bɛ biala anvo boka ne azo anzɛɛ ambikye nwolɛ bɔbɔ. Awie biala mɔɔ kɛzie ɔ ti boka ne anwo la, bɛkɛhu ye.

¹³ Bɛbazi ye awolɛ anzɛɛ bɛbado ye ɛda na awie biala ɛnrɛzɔ ye, saa sonla anzɛɛ nane o, ɔwɔ kɛ ɔwu.’ Na saa bɛbɔ aweɛne tendenle ne anu tendenle ko a, bɛvo boka ne azo.”

¹⁴ Yemɔti Mosisi vi boka ne azo dwule rale menli ne anwo ɛkɛ na ɔranluanle bɛ, na bɛkpole bɛ nwo ninyɛne.

¹⁵ Ɔzele menli ne kɛ, “Bɛboɔboa bɛ nwo toonwo ɛhyema anzi; awie biala mmakɔ raalɛ nwo.”

¹⁶ Kenle nsa ne azo nwonlomɔ ne, ezule hulule na maanle nu vedevedele. Amungu kumɔɔnwo hedale boka ne azo, bɛwule aweɛne tendenle ne anu tendenle bie, na menli ne mɔɔ wɔ azokoɛleɛ ɛkɛ ne la amuala anwo wozole bɛ.

¹⁷ Akee Mosisi vale menli ne kɔsɔɔti vile azokoɛleɛ ɛkɛ ne hɔle kɛ bɛkayia Nyamenle. Awie biala kpondɛle ɛleka gyinlanle wɔ boka ne abo.

¹⁸ Na esike hedale Boka Saenae azo, ɔboalekɛ Ɛdɛnkɛma dwule zo kɛ senle la, na esike ne hɔle anwuma kɛ fonlomo esike la, na boka mumua ne kpusule kpole bie.

¹⁹ Mekɛ mɔɔ ɛnee aweɛne tendenle ne ane ɛlɛkɔ anwuma kpalɛ la, Mosisi dendɛle, na Nyamenle vale ɛhululɛ liele ye zo.

²⁰ Na Ɛdɛnkɛma dwule Boka Saenae azo. Ɔvɛlɛle Mosisi na Mosisi hɔle boka ne azo.

²¹ Ɛdɛnkɛma zele Mosisi kɛ, “Sia kɔ aze na bɔ menli ne kɔkɔ, anrɛɛ bɛkɛtele zolɛ kɛ bɛbanlea Ɛdɛnkɛma na bɛ dɔɔnwo awu.

²² Eza maa sɛlɛvolɛma ne mɔ mɔɔ bikye Ɛdɛnkɛma la ɛnlua bɛ nwo na anrɛɛ Ɛdɛnkɛma kɛdua bɛ kakɛ.”

²³ Na Mosisi hanle hilele Ɛdɛnkɛma kɛ, “Menli ne mɔ ba Boka Saenae azo a ɔnyɛ boɛ, ɔluakɛ ɛdawɔ mumua ne ɛzele yɛ kɛ, ‘Bɛgya boka ne anyiane na bɛdu bɛmaa me.’ ”

²⁴ Na Ɛdɛnkɛma zele yɛ kɛ, “Dwu aze na ɛ nee Aalɔn bɛrɛla. Mmamaa sɛlɛvolɛma nee menli ne tɛla anyiane ne ba medame Ɛdɛnkɛma me nwo ɛke, anrɛɛ menwɔdua bɛ kakɛ.”

²⁵ Yemɔti Mosisi dwule aze hɔhanle edwɛkɛ mɔɔ Ɛdɛnkɛma hanle la hilele menli ne.