Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 17 - BAEBOLO ANZƐƐ BULUKU NWUANZANWUANZA

Nzule mɔɔ vi bodane nu

¹ Yizilayɛma kɔsɔɔti vile fienemgbole ne anu zɔle bɛ adendulɛ ne azo ngyikyi ngyikyi, kɛmɔ Ɛdɛnkɛma ngyehyɛlɛ ne se la, na bɛyɛle azokoɛleɛ wɔ Relɛfedem, na ɛnee nzule mɔɔ bɛno la ɛnle ɛkɛ.

² Yemɔti menli ne hɔle Mosisi anwo zo na bɛzele ye kɛ, “Maa yɛ nzule yɛnlo.” Na Mosisi hanle hilele bɛ kɛ, “Duzu ati a bɛra me nwo zo bɛbabɔ me somolɛ a? Duzu ati a bɛlɛsɔ Ɛdɛnkɛma bɛanlea a?”

³ Nzuhɔne hunle menli ne na bɛdendɛle bɛtiale Mosisi, bɛhanle kɛ, “Duzu ati a ɛvale yɛ ɛvile Yigyibiti, kɛ ɛ nee yɛ ba wɔamaa nzuhɔne ahu yɛ, ahu yɛ mra nee yɛ nlankɛ ɛ?”

⁴ Na Mosisi zunle zɛlɛle Ɛdɛnkɛma kɛ, “Menli ɛhye mɔ, kɛ menyɛ bɛ ɛ? Asɛɛ bɛzi me awolɛ bɛwie.”

⁵ Ɛdɛnkɛma zele Mosisi kɛ, “Fa Yizilayɛ mgbanyima ne mɔ bie na ɛ nee bɛ ɛze ɛli menli ne anyunlu. Fa kpɔma ne mɔɔ ɛvale ɛbɔle Azule Naele ne anu la kɔ.

⁶ Nea, mebagyinla bodane bie azo wɔ ɛ nyunlu wɔ Saenae Boka; ɛbava wɔ kpɔma ne wɔabɔ bolɛ ne, na nzule vi nu bara, amaa menli ne anyia bie anlo.” Na Mosisi yɛle ye zɔhane wɔ Yizilayɛ mgbanyima ne mɔ anyunlu.

⁷ Na ɔvɛlɛle ɛleka zɔhane Masa nee Mɛleba ɔboalekɛ Yizilayɛma ne mɔ bɔle tokule zɔle Ɛdɛnkɛma nleanle, na bɛhanle kɛ, “Asoo Ɛdɛnkɛma wɔ yɛ avinli anzɛɛ ɔnle yɛ avinli?”

Bɛ nee Amalɛkema konle ne

⁸ Amalɛkema nee Yizilayɛma hɔhonle wɔ Relɛfedem.

⁹ Na Mosisi hanle hilele Dwɔhyua kɛ, “Ye menli, ɛ nee bɛ nee Amalɛkema ɛhɔho. Ɛhyema mebalɛ Nyamenle kpɔma ne me sa nu meahɔgyinla boka ne azo.”

¹⁰ Yemɔti Dwɔhyua yɛle mɔɔ Mosisi hanle hilele ye la na ɔ nee Amalɛkema hɔhonle. Na Mosisi, Aalɔn, yɛɛ Hɛɛle hɔle boka ne azo.

¹¹ Na mekɛ biala mɔɔ Mosisi kɛmaa ɔ sa zo la, ɛnee Yizilayɛma asa ɛla Amalɛkema anwo zo; saa ɔgua ɔ sa aze a, ɛnee Amalɛkema asa ɛla Yizilayɛma anwo zo.

¹² Na Mosisi asa akee bule, yemɔti bɛvale bolɛ bɛdole ɛkɛ bɛmanle ɔdɛnlanle zolɛ. Akee Aalɔn nee Hɛɛle sosɔle ɔ sa, ko lɛ fema ne yɛɛ ko lɛ bɛne ne. Yemɔti yeanga ɔ sa aze toonwo sɛnzɛne ne dɔle.

¹³ Na Dwɔhyua vale ye konle dadeɛ ne biale Amalɛkema takaa.

¹⁴ Akee Ɛdɛnkɛma zele Mosisi kɛ, “Kɛlɛ ɛhye wɔ buluku nu maa ɔyɛ ngakyelɛ na kenga kile Dwɔhyua kɛ: Mebanunu Amalɛkema abo zo bɔkɔɔ wɔ aleɛabo.”

¹⁵ Na Mosisi zile azukponle, na ɔdonle ye “Ɛdɛnkɛma le me Fɛlɛnra.”

¹⁶ Ɔse, “Bɛmaa Ɛdɛnkɛma fɛlɛnra ne zo! Ɔvi awolɛndoazo mɔɔ kɔ awolɛndoazo la, Ɛdɛnkɛma baho atia Amalɛkema.”