Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 15 - BAEBOLO ANZƐƐ BULUKU NWUANZANWUANZA

Mosisi edwɛne ne

¹ Akee Mosisi nee Yizilayɛma dole edwɛne ɛhye yeyɛle Ɛdɛnkɛma: “Mebado edwɛne meayeyɛ Ɛdɛnkɛma, ɔluakɛ yeli konim anyunlunyia nu; ɛkpɔnwɔ nee ye kavolɛ ne, yevuandi bɛ yegua nyevile nu.

² Ɛdɛnkɛma le me anwosesebɛ nee me edwɛne, yɛɛ yeyɛ me ngoanedievolɛ. Me Nyamenle ne ɛne, mebaye ye ayɛlɛ, me ze Nyamenle ne, mebayeyɛ ye.

³ Ɛdɛnkɛma le ɛlɔnenli; ye duma a le Ɛdɛnkɛma.

⁴ “Yigyibiti belemgbunli ne konle ehwili nee ye ɛlɔnema, yevuandi bɛ yegua nyevile nu; ye safohyenlema kpalɛ ne, Ndɔ Nyevile ne ɛva bɛ.

⁵ Azuyilɛ ne ɛheda bɛ nwo zo; bɛnlomanle azule bo kɛ bolɛ.

⁶ “O Ɛdɛnkɛma, ɛ sa fema le tumi kpole; O Ɛdɛnkɛma, ɛ sa fema bubu kpɔvolɛ.

⁷ Wɔ wɔ konimlilɛ kpole nu, ɛfuandi wɔ kpɔvolɛma ɛgua; ɛmaa wɔ ɛya dwu aze, yela bɛ kɛ ndile.

⁸ Wɔ ɛnwomenle ko pɛ manle nyevile ne dwazole bolonwonwo, azuyilɛ ne hɔle anwuma yɛle kɛ bane; azule buma ne bɔle kunguma.

⁹ Kpɔvolɛ ne hanle kɛ, ‘Meti bɛ, mekye bɛ; mekyɛ bɛ nwo ninyɛne, meadu me ahunlundwolɛ ɛdeɛ; metwe me dadeɛ ne, meabɔ bɛ bo zo.’

¹⁰ Ɛmanle anwoma dule, nyevile ne monlanle bɛ; bɛnlomanle kɛ sumi wɔ azubuma ne anu.

¹¹ “O Ɛdɛnkɛma, nwane a le kɛ ɛdawɔ wɔ awozonle avinli a? Nwane a le kɛ wɔmɔ, mɔɔ le kpole wɔ nwuanzanwuanzayɛlɛ nu, ye ayɛlɛyelɛ le kpole na ɔyɛ nwanwane ninyɛne a?

¹² Ɛmanle ɛ sa fema zo, na azɛlɛ menle bɛ.

¹³ Wɔ anwunvɔnezelɛ ne ati, wɔli menli mɔɔ wɔlie bɛ ngoane la ati; wɔva wɔ tumi ne wɔzinza bɛ ɛ nee bɛ ɛra wɔ ɛleka nwuanzanwuanza ne.

¹⁴ Maanle maanle ɛde, bɛsulo; ɛzulolɛ ɛha Filisitiama.

¹⁵ Akee Yidɔm arelemgbunli ahonle ɛdu; Mowabe katakyiema anwo ɛlɛwozo bɛ; Keena maanlema amuala ɛnwenwe.

¹⁶ Ɛzulolɛ nee ahunlundetelɛ tɔ bɛ nwo; wɔ tumi ne kpole ti, bɛnga bɛ nwo fee, bɛyɛle kɛ awolɛ kɔkpula kɛ, O Ɛdɛnkɛma, wɔ menli ne mɔɔ wɔkpɔne bɛ la ɛpɛ nu.

¹⁷ O Ɛdɛnkɛma, ɛbava bɛ wɔara, na wɔalua bɛ wɔ wɔ boka ne azo, ɛleka mɔɔ wɔziezie kɛ ɛbadɛnla, wɔ wɔ Ɛzonlenlɛ Sua ne mɔɔ ɛdawɔ wɔzi la anu.

¹⁸ Ɛdɛnkɛma bali belemgbunli wɔ melɛ mɔɔ ɛnlɛ awieleɛ.”

Meleam edwɛne ne

¹⁹ Yigyibiti belemgbunli ne mgbɔnwɔ, ye konle ehwili ne mɔ, nee ye menli mɔɔ ka mgbɔnwɔ la hɔle nyevile ne anu la, Ɛdɛnkɛma manle nyevile ne hedale bɛ nwo zo; na Yizilayɛma ne mɔ luale nyevile ne anu azɛlɛ resee zo hɔle.

²⁰ Na Nyamenle kpɔmanvolɛ raalɛ Meleam, Aalɔn adiema raalɛ ne vale akɛya, na mraalɛ ne mɔ kɔsɔɔti doale ye, wozole akɛya, zile agole.

²¹ Meleam dole edwɛne manle bɛ kɛ: “Bɛdo edwɛne bɛyeyɛ Ɛdɛnkɛma, ɔluakɛ yeli konim anyunlunyia nu; ɛkpɔnwɔ nee ye kavolɛ ne, yevuandi bɛ yegua nyevile nu.”

Nzule ɛnwonle ne

²² Akee Mosisi lile Yizilayɛma ati ɔ nee bɛ vi Ndɔ Nyevile ne anloa hɔle Hyɔɔ fienemgbole ne anu. Bɛdiale toonwo kenle nsa, na bɛannwu nzule nwo.

²³ Mɔɔ bɛradwule Mɛɛla la, bɛangola ɛkɛ ne nzule no, ɔboalekɛ nzule ne yɛ ɛnwonle; yemɔti bɛvɛlɛle ye Mɛɛla.

²⁴ Na menli ne dendɛle bɛ nzo abo tiale Mosisi zele kɛ, “Duzu a yɛno a?”

²⁵ Mosisi zɛlɛle Ɛdɛnkɛma, na Ɛdɛnkɛma hilele ye baka bie, ɔvuandinle baka ne ɔdole nzule ne anu, na nzule ne yɛle nzukpa. Ɛdɛnkɛma manle bɛ mɛla nee ngyehyɛlɛ na ɔzɔle bɛ ɔnleanle.

²⁶ Ɔzele bɛ kɛ, “Saa bɛtie medame Ɛdɛnkɛma, bɛ Nyamenle ne me ne, bɛyɛ debie mɔɔ sɔ me nye, bɛdi me mɛla nee me ngyehyɛlɛ ne mɔ azo a, ewule ngakyile mɔɔ memanle ɔrale Yigyibitima anwo zo la, menrɛmaa bie ɛnrɛra bɛ nwo zo; ɔluakɛ medame a mele Ɛdɛnkɛma mɔɔ metondo bɛ ewule a.”

²⁷ Akee bɛrale Yilem, nzufeanvea bula bulu nee nwiɔ nee mrɛlɛ abulasuu wɔ ɛkɛ, na bɛyɛle azokoɛleɛ wɔ nzule ne mɔ anloa.